“Mi sualin rorêlna an chanin mite an rûm ṭhîn.”—Thufingte 29:2.

Mihring chanchin hi lal râwng takte rorêlna chanchinin a khat a, chu chuan an khua leh tuite chungah hrehawmna nasa tak a thlen a ni. Rorêltute chu chutiang vek an ni lo ngei mai. Ṭhenkhat phei chuan an mihringpuite tân thil ṭha ber an duhsak a ni. Mahse, rorêlna an chan hian an thiltumte chu thu neihna chan tuma intihbuainate’n a tikhaw lo fo ṭhîn. A nih loh leh an thu neihna chu mi dangte chhiatna thlen khawpa mahni hlâwkpui nân an hmang ṭhîn bawk. Tûn hmaa U.S. Secretary of State lo ni tawh ṭhîn Henry Kissinger-a chuan: “Mihring chanchin hi ṭan lâkna hlawhchham, a tak chang zo lo châkna chanchin a ni e,” tiin a sawi.

Bible pawhin: “Tungchhova kal mihringah hian, a pheikhai hruai tûr a awm lo,” a ti a. (Jeremia 10:23) Mihring ṭha famkim lote chuan mahni pheikhai hruai tûra mamawh finna leh nakin hun hriat lâwk theihna an tlachham a ni. Mite’n mahni pheikhai mah an hruai theih loh chuan, engtin nge ram pakhat pheikhai chu an hruai theih ang? Mihring rorêlnain hrehawm tawrhna a ûm bo theih loh chhan i hmu thiam tawh em? A nihna takah chuan sawrkâr ṭha lo, a nih loh leh rorêlna ṭha lo chu hrehawm tawrhna awm chhan a ni fo!

Isua chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” a ti.—Johana 13:35.

Sakhaw hruaitu tute pawhin hmangaihna leh inpumkhatna thu an sawi reng a. Mahse, an hnungzuitute thinlungah chuan hleih neihna tibo thei tûr khawpa chak hmangaihna an tuh zo lo a ni. Hmangaihna nei tûra ṭanpui ahnêkin, sakhuana chuan mite leh hnamte kârah inṭhenna te, mahni pâwl âtchilhna te, leh innghîrnghona te a awmtîr zâwk mah a. Theologian Hans Küng-a chuan a lehkhabu ziah Christianity and the World Religions-ah chuan:  “Politics lama inbeihna âtthlâk ber leh nunrâwng berte chu sakhuanain a thunun a, a chawhthawh a, leh a phal bawk avânga lo awm a ni,” tiin a ziak a ni.

Chu bâkah, sakhaw tam taka hruaitute chuan inneih hmaa mipat hmeichhiatna hmanna leh kawppui ni lote nêna hmanna leh mawngkawhurna chu an pawmzam a. Hei hian natna inkaichhâwnna te, nau tihtlâkna te, duh lo chunga naupaina te, leh nupa inṭhenna leh chhûngkua keh chhiatna te a awmtîr a, chu chuan lungngaihna leh manganna tam takte a thlen a ni.

“Mi tin mahni châknaa hruai bo leh hîpa an awm chuan thlêmna an tâwk a ni zâwk e. Tin, châkna chuan no a pai a, sual a hring ṭhîn.” —Jakoba 1:14, 15.

Kan rochun ṭhat famkim lohna avângin thil ṭha lo leh sual lam âwn duhna kan nei a, chuvângin “tisa leh rilru duhzâwng” tih duhna kan do a ngai a ni. (Ephesi 2:3) Mahse, châkna dik lo leh tihpuitlinna tûr hun remchâng a intawn fuh hian, chutianga do chu a harsa lehzual a. Châkna ṭha lote lama kan tlûk chuan, a sawhkhâwk chu a pawi hle thei a ni.

Ziakmi P.D. Mehta-a chuan: “Hrehawm tawrhna a tam zâwk chu mahni tisa châkna, thunun loh nawmsip bâwl ûmna leh inphalraina, kan duhâmna leh tumsânna vânga lo awm a ni,” tiin a ziak a. Châkna leh ngawlveina tinrêng—zu, drugs, pawisa khelh, mipat hmeichhiatna, leh a dang dangte—chuan “mi zahkai” tam takte nun chu a tichhia a, an chhûngte, an ṭhiante, leh mi dangte chungah hrehawm tawrhna a thlen a ni. Mihring ṭha famkim lote nunphung han thlîr hian, Bible thusawi: “Thil siam zawng zawngte chu tûn thlengin rûm leh nauvei na tuarin an awm hlawm,” tih chu kan pawm lo thei lo a ni.—Rom 8:22.

Bible chuan Setana hi “he khawvêl pathian” tiin a ko va, ani chu ramhuai kan tih thlarau suaksual thiltithei takte chuan an thlâwp a ni. —2 Korinth 4:4; Thu Puan 12:9.

Setana ang bawkin ramhuaite chu mihringte thununnaah leh hruai sualnaah an phusa hle a. Tirhkoh Paula chuan: “Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e,” tia sawiin he thu hi a pawm a ni.—Ephesi 6:12.

Ramhuaite’n mihringte tihbuai chu nuam an ti hle a, mahse chu chu an thiltum ber a ni lo. An tum ber chu mihringte hi Pathian Chungnungber, Jehova hnên ata lâk pên a ni. (Sâm 83:18) Arsi enna te, mitdawivaih te, dawithiamna te, leh nakin hun tûr sawi lâwkna te hi ramhuaite’n mite an bumna leh thununna hmanrua a ni a. Chuvângin, Jehova chuan chûng hlauhawmte laka invêng tûrin min ti a, Setana leh a ramhuaite laka invênhimna min pe a ni.—Jakoba 4:7.

Kum sânghnih vêl kalta khân, Bible chuan: “Hei hi hre rawh, ni hnuhnûngahte chuan hun khirh takte a lo awm ang,” tiin a sawi lâwk a ni. —2 Timothea 3:1.

Tûn lai hun hi hun khirh tak nihtîrtute chu sawiin, heti hian a chhunzawm a ni: “Mi, mahni inhmangaihtu te, tangka ngainatu te, intivei te, chapo te, . . . hmangaihna pianpui nei lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te, Pathian hmangaih aia mahni lâwmna mai hmangaih zâwktu te an ni dâwn si,” tiin. Tûn laia kan hmuh hrehawm tawrhna zawng zawngte awm chhan chu ‘ni hnuhnûnga’ kan awm vâng a ni tih a chiang hle.—2 Timothea 3:1-4.

A chhan leh vâng kan sawi tâkte aṭang chuan, mihringte’n tum ṭha tak an nei chung pawhin hrehawm tawrhna an nuaibo theih loh chhan chu a lang chiang hle a ni lâwm ni? Ṭanpuina chu khawiah nge kan zawn tâk ang? ‘Diabola [leh a hnungzuitute] hnathawhte tihboral’ tiamtu, min Siamtu hnênah kan zawng tûr a ni. (1 Johana 3:8) A dawta thuziak chuan hrehawm tawrhna awmtîrtu zawng zawngte nuaibo tûra Pathian thiltih tûrte chu a târ lang ang. (w13-E 09/01)