1, 2. Tirhkoh rinawmte nêna C.E.33-a Kalhlên Kût an hman hnua Isua thiltih chu sawi rawh.

A HUN chu C.E. 33, Nisan ni 14 zân a ni a. Isua leh a ṭhiante chuan Pathianin an pi leh pute Aigupta sâl tânna ata a chhan chhuah dân hriatnawntîrtu Kalhlên Kût chu an hmang zo va. Mahse, a zirtîr rinawmte chuan a aia ropui zâwk “chatuana tlanna” chu an la tawng dâwn a ni. A tûkah chuan an Hruaitu sualna nei lo chu a hmêlmate’n an tihlum dâwn a. Mahse, huatna avânga chu an thiltih chu malsâwmnaah a la chang dâwn. Isua thisen chu sualna leh thihna ata mihringte chhan chhuahna a ni ang.—Heb. 9:12-14.

² He thilpêk duhawm tak hi kan theihnghilh loh nân, Isua chuan Kalhlên Kût aiawhtu kum tina hman tûr hun serh thar chu a hmêlhriattîr a ni. Chhang dawidîm telh loh chu a phel a, a tirhkoh rinawm 11-te hnêna semin: “Hei hi ka taksa, in aia pêk tûra chu a ni; mi hriat reng nân hei hi ti ṭhîn rawh u,” a ti a. Uain sen pawh chutiang bawkin a ti a: “He no hi ka thisena thuthlung thar chu a ni, in aia chhuak tûra chu,” tiin a hrilh a ni.—Lk. 22:19, 20.

3. (a) Isua thihna chu eng thil inthlâk thlengna lian takin nge zui? (b) Johana bung 17-a chhinchhiah Isua ṭawngṭaina chungchângah eng zawhnate nge kan ngaihtuah ang?

³ Pathian leh tisa lam Israelte inkâra Dân thuthlung hlui chu a tâwp ṭêp tawh a. Chu chu Jehova leh Isua hnungzui hriak thihte inkâra thuthlung thar nêna thlâk thleng a ni ang. Isua chuan chu thlarau lam hnam thar hmakhua chu a ngaihven hle a. Tisa lam Israelte chu sakhuana leh khawtlânga nihna lam thilah an inṭhen nasa hle a, Pathian hming thianghlim chu an tichhe hle a ni. (Joh. 7:45-49; Tirh. 23:6-9) Isua erawh chuan chu mi nêna inkalh takin a hnungzuitute chu Pathian hming an  chawimawi theih nâna inlungrual taka inzawm khâwm tlat tûrin a duh a. Chuvângin, Isua’n eng nge a tih? Mihringte chhiar theiha awm ṭawngṭaina duhawm ber chu a chham chhuak a ni. (Joh. 17:1-26; a thupui bula milem chu en rawh.) Isua ṭawngṭaina kan bih chian hian, hêng zawhnate hi i ngaihtuah ang u: “Isua ṭawngṭaina chu Pathianin a chhâng em? Chu mi nêna inmilin ka nung em?” tiin.

4, 5. (a) Ṭawngṭainaa Isua thu chham hmasakte aṭangin eng nge kan zir theih? (b) A nakin hun chungchânga Isua dîlna chu Jehova’n engtin nge a chhân?

⁴ Isua chuan zân rei tak thlengin a zirtîrte hnênah Pathian hnên aṭanga a dawn hriatna hlut takte chu a hrilh a. Tichuan, vân lam hawi chhovin: “Ka Pa, a hun a thleng ta; i Fapa chawimawi rawh, Fapain a chawimawi nân che; khatia mi zawng zawng chunga thuneia i siam khân, a hnêna i pêk apiangte chu chatuana nunna a pêk theih nân. . . . Nangin thil tih tûr mi pêk kha ka ti zo va, khawvêlah ka chawimawi tawh a che. Aw ka Pa, khawvêl awm hmaa i hnêna mawina ka neih khân, tûnah nangma hnên ngeiah mi chawimawi rawh,” tiin a ṭawngṭai a ni.—Joh. 17:1-5.

⁵ Isua’n ṭawngṭainaa a chham hmasakte kha lo chhinchhiah teh. A ngaih pawimawh ber chu a Pa vâna mi chawimawi a ni a, chu chu lal ṭawngṭainaa dîlna hmasa ber: “Kan Pa, i hming zahawm rawh se,” tih nên a inrem a ni. (Lk. 11:2) A dawta a thil ngaih pawimawh chu a zirtîrte mamawh a ni a, chu chu ‘chatuana nunna pêk’ hi a ni. Chu mi hnuah Isua chuan: “Aw ka Pa, khawvêl awm hmaa i hnêna mawina ka neih khân, tûnah nangma hnên ngeiah mi chawimawi rawh,” tia ṭawngṭaiin ama duhzâwngte chu a dîl a. Jehova chuan a Fapa rinawm tak chu vântirhkohte aia “hming ṭha zâwk” pein a dîl aia tam a pe a ni.—Heb. 1:4.

6. Tirhkohte tân chatuan nunna an neih theih nân eng nge an tih ngai a, chu chu an ti zawm zêl thei tih engtin nge kan hriat theih?

⁶ Isua chuan a ṭawngṭainaah mi sualte kan nih anga chatuanna nunna thilpêk hlu tak dawng tûra kan tih tûr chungchâng pawh a chham tel a. (Johana 17:3 chhiar rawh.) Chu chu, Pathian leh Krista ‘hriatna neih’ hi a ni. Chutiang hriatna kan neih theih dân kawng khat chu Jehova leh a Fapa chanchin zir nâna kan mit leh kan bengte hman hi a ni a. Pathian hriatna neih theih dân kawng pawimawh tak dang chu a chungchâng kan zirte nunpuina aṭanga lo awm hlimna neih hi a ni. Isua chuan: “Nangin thu mi pêkte kha an hnênah ka pe tawh si a; chûng chu an vawng a,” tia a ṭawngṭai zawm avângin, tirhkohte chuan nunna petu kawng chu an zawh ṭan tawh tih kan hre thei a ni. (Joh. 17:8) Mahse, chatuanna nunna chang tûr chuan Pathian thusawite an chhût ngun a, an nî tin nunah an nunpui a ngai a ni. Tirhkoh rinawmte chuan an lei lam nun tâwp thlengin chutiang chuan an ti zawm zêl thei em? An ti zawm zêl thei a ni. Vân lam Jerusalem thar lungphûm 12-ah an hming thai bo theih lohva a chuan avângin an ti zawm zêl thei tih kan hre thei a ni.—Thup. 21:14.

7. Pathian ‘hria’ tih awmzia chu eng nge ni a, engvângin nge chu chu thil pawimawh tak a nih?

⁷ Grik ṭawng lama mi thiamte sawi dânin, ‘hria’ tih Grik thu mal hi “hriat zawm zêl tûr” tih pawhin a lehlin theih a. A awmzia pahnih hi an inṭanpui tawn a, an pawimawh ve ve a ni. Chuvâng chuan, Bible-a ‘hria’ tih ṭawngkam hi Pathian “hriat” theihna chanvo nei tûra thiltih zawm zêlna a kâwk a ni. Mahse, lei leh vâna Mi ropui  ber hriatnaah chuan, Pathian miziate leh a thiltum rilrua hriat thiam mai aia tam a tel a. Jehova hriatnaah chuan amah leh kan Kristian unaute nêna hmangaih taka inpumkhatna nghet neih a tel a ni. “Hmangaihna nei lo chuan Pathian a hre lo,” tiin Bible chuan a hrilhfiah a. (1 Joh. 4:8) Chuvângin Pathian hriatnaah chuan a thu âwihna a tel a ni. (1 Johana 2:3-5 chhiar rawh.) Jehova hretute zînga tel chu chanvo ropui a va ni êm! Mahse, Juda Iskariota chunga a thlen angin chu inlaichînna hlu tak chu chân theih a ni. Chuvângin, vawng reng tûrin taihmâk i chhuah ang u. Tichuan, a tâwpah kan phu loh chatuana nunna thilpêk chu kan chang thei ang.—Mt. 24:13.

8, 9. Isua’n leia a rawngbâwl chhûng khân eng nge a ngaih pawimawh ber a, sakhaw thiltih eng nge a hnâwl?

⁸ Johana bung 17-a chhinchhiah Isua ṭawngṭaina chhiar hnuah, Isua chuan chutih laia awm a tirhkohte chauh ni lovin, nakina a zirtîr lo la ni tûrte pawh a hmangaih hle tih tuin nge ringhlel tehrêng ang? (Joh. 17:20) Chutih rual chuan, kan chhandamna chu a ngaih pawimawh ber a ni lo tih kan hriatthiam a ngai a. A lei lam rawngbâwl chhûng zawnga a tum ber chu a Pa hming tihthianghlim leh chawimawi a ni. Entîr nân, Nazaret khua inkhâwmna ina a hnathawh tûr a sawi chhuah khân, Isua chuan Isaia lehkha zial aṭangin a chhiar a ni: “Riangvaite hnênah chanchin ṭha hril tûra mi ruat avângin Lalpa thlarau chu ka chungah a awm,” tiin.—Lk. 4:16-21.

⁹ Isua leia a lo kal hma daih khân Juda sakhaw hruaitute chuan mite chu Pathian hming hmang lo tûrin an zirtîr tawh tih Judate chanchin chuan a târ lang a. Pathian Thu nêna inmil lo chutiang chîn dân chu Isua’n a hnâwl tlat ang tih kan chiang thei a ni. Amah dodâltute hnênah: “Ka Pa hmingin ka lo kal a nih hi, nangnin mi lâwm si lo: mi dang mahni hmingin lo kal se la, ani chu in lâwm ang,” tiin a sawi a. (Joh. 5:43) Tichuan, a thih hma ni rei lo têah khân: “Ka Pa, i hming chawimawi rawh,” tia ṭawngṭaiin  a nuna a ngaih pawimawh ber chu a sawi chhuak a ni. (Joh. 12:28) Chuvângin, tûna kan bih chian mêk ṭawngṭaina tluan chhuakah Isua chuan a Pa hming a zep tel zêl hi mak kan ti tûr a ni lo.

10, 11. (a) Isua’n a Pa hming a hriattîrnaah chuan eng nge tel? (b) Isua zirtîrte chuan eng thiltum nge hlen an tum ang?

¹⁰ Isua chuan: “Nangin khawvêl zînga chhuak mite kei mi pêk hnênah khân i hming ka tilang ta; anni chu i ta an nih kha, nangin anni chu kei mi pe a ni; anni chuan i thu an zâwm ta a. Tin, kei zawng khawvêlah ka awm tawh lo vang, hêngho erawh hi chu khawvêlah an awm ang, kei i hnênah ka lo haw dâwn ta. Ka Pa thianghlim, nangin kei mi pêkteho hi i hmingin hum rawh, pumkhat an nih theih nân, keimahni ang bawk hian,” tiin a ṭawngṭai a ni.—Joh. 17:6, 11.

¹¹ A zirtîrte hnêna a Pa hming hriattîrnaah chuan a hming lam mai aia tam a tel a. Pathian hmingin a ken tel, Pathian mize ropui takte leh keimahni min dâwr dân chanchinte hre tûra anmahni ṭanpui pawh a tel bawk. (Ex. 34:5-7) Chu bâkah, Isua chuan vâna a dinhmun sâng tak aṭangin lei pumpuia Jehova hming hriattîrnaah a zirtîrte chu a ṭanpui chhun zawm zêl a ni. A tum ber chu eng nge ni? He khawvêl suaksual tâwpna a thlen hmaa zirtîrte a tam thei ang bera lâk khâwm hi a ni. A thuhretu rinawmte chhan chhuah nâna thil a tih hun chuan Jehova hming chu a va ropui dâwn êm!—Ezek. 36:23.

12. Nun chhan himna hna kan thawhnaah hlawhtling tûr chuan eng thil pathum nge ngai?

¹² Isua’n leia a awm lai khân a zirtîrte chu an chak lohnate hneh tûrin a ṭanpui nasa hle a. Chu chu a hna bul ṭan thawh zawh nân a pawimawh a ni. Isua chu: “Nangin khawvêla kei mi tîr ang khân, kei pawhin anni chu khawvêlah ka tirh hi,” tiin a ṭawngṭai a ni. He nun chhan himna hnaa an hlawhtlin theih nân, Isua chuan thil pawimawh pathum a târ lang a. Pakhatna chu, a zirtîrte chu Setana khawvêl thianghlim lo taka mi ni lo tûrin a ṭawngṭai a. A Pahnihnaah, Pathian Thu nunpuina hmanga an lo thianghlim theihna tûrin a ṭawngṭai a ni. A pathumnaah, Isua’n a Pa nêna an inkâra awm hmangaih taka inpumkhatna ang chu a zirtîrte’n an inkâra an neih ve theih nân a ngên nawn fo a ni. Chu mi atân chuan mahni inbih chian a ngai a. ‘Isua dîlna pathum milin ka nung em?’ tiin kan inzâwt ṭheuh tûr a ni. Chûng thilte kan tih chuan, ‘khawvêlin Pathian tirh a nihzia an rin’ a beiseiawm hle dâwn tih Isua’n a sawi.—Johana 17:15-21 chhiar rawh.

13. Engtin nge C.E. kum zabi khatnaah Isua ṭawngṭaina chu chhân a nih?

¹³ Chu Isua ṭawngṭaina chu chhân a nihzia chu Chanchin Ṭha ziak palite dawta Tirhkohte Thiltih zirna aṭangin kan hmu thei a ni. Juda leh Jentail te, mi hausa leh mi rethei te, bâwihte leh bâwih neitute awm khâwmna Kristian hmasate zînga inṭhen darhna awm thei chu han ngaihtuah teh. Chuti chung pawhin, an vaia an inlungrual êm avângin mihring taksa pêng hrang hrang nêna tehkhin theih an ni hial a, Isua chu an lû a ni. (Eph. 4:15, 16) Setana inṭhen darhna khawvêla hlawhtlinna mak tak a va ni êm! A thlarau thianghlim avânga chutiang hlawhtlinna awmtîrtu Pathian Jehova chauh chu kan chawimawi tûr a ni.—1 Kor. 3:5-7.

14. Tûn laiah engtin nge Isua ṭawngṭaina chu chhân a nih?

¹⁴ Mahse, tirhkohte thih hnuah chu inlungrualna mak tak a awm tawh lo chu a lungchhiatthlâk hle. Inlungrual a hnêkin, sawi lâwk tawh anga kalpênna nasa tak a lo awm ta zâwk a, Kristianna rama pâwl chi  hrang hrangah a inṭhen darh a ni. (Tirh. 20:29, 30) Mahse, kum 1919-ah chuan Isua’n a hnungzuitu hriak thihte chu sakhaw dik lo hnuaia an sal tânna ata a chhuah zalên a, ‘phuar famkimnaah’ chuan a hruai khâwm a ni. (Kol. 3:14) An thu hrilhna chuan khawvêlah eng nghawng nge a neih? ‘Hnam tin, chi tin, mi tin, ṭawng tin zînga mi’ “berâm dang” maktaduai sarih chuangte chu Pathian hriak thihte nên berâm huang pakhata lâk khâwm an ni a. (Joh. 10:16; Thup. 7:9) Chu chu: “Nangin [Jehova’n] kei mi tîr tih leh mi hmangaih angin anni hi i hmangaih tih, khawvêlin an hriat theihna tûrin,” tih Isua ṭawngṭaina chhânna chhinchhiah tlâk tak a ni.—Joh. 17:23.

15. Isua chuan a zirtîr hriak thihte tân a bîk takin eng nge a dîl?

¹⁵ Nisan ni 14 zân tîr lamah Isua chuan a tirhkohte chu a Lalrama rorêlpui tûra thu thlunpuiin a chawimawi a. (Lk. 22:28-30; Joh. 17:22) A hnungzuitu hriak thih lo la ni tûr zawng zawngte chungchângah, Isua chu: “Ka Pa, nangin kei mi pêkte hi ka awmnaa ka hnêna awmah ka duh; nangin mi pêk ka ropuina kha an hmuhna tûrin; leilung pian hma pawhin nangin mi hmangaih tawh si a,” tiin a ṭawngṭai a ni. (Joh. 17:24) Chu chuan Isua berâm dangte tân îtsîkna ni lovin, hlimna a siam a, chu chu tûn laia Kristian dik zawng zawng zînga awm inlungrualna finfiah belhchhahna a ni.

16, 17. (a) Isua chuan a ṭawngṭaina tlipnaah a thiltih tum eng nge a sawi lan? (b) Eng nge tih kan tum ang?

¹⁶ An sakhaw hruaitute thununna hnuaia awm khawvêla mi tam zâwkte chuan Jehova’n amah hre tak zettu mipui inlungrual tak a nei tih finfiahna chiang tak chu an ngaihthah lui a. Isua hun laiah pawh chutiang bawk chu a ni. Chuvângin, a ṭawngṭaina chu: “Aw ka Pa, fel tak, khawvêl zawngin an hre lo chia, kei erawh chuan ka hriat che kha; hêngho pawh hian nangin kei mi tîr tih an hriat kha. Tin, an hnênah i hming ka hriattîr a, ka hriattîr leh fo vang; nangin kei min hmangaihna kha anmahniah a awm a, kei pawh anmahnia ka awm theihna tûrin,” tih thu duhawm takin a tlip a ni.—Joh. 17:25, 26.

¹⁷ Isua chuan a ṭawngṭaina milin thil a ti tih tuin nge hnial thei ang? Ani chuan kohhran Lû a nih angin, a Pa hming leh a thiltumte hriattîr tûrin min ṭanpui chhun zawm zêl a. Thu hril tûr leh zirtîr siam tûra a thupêkte ṭhahnemngai taka zâwmin a lû nihna hnuaiah i intulût zêl ang u. (Mt. 28:19, 20; Tirh. 10:42) Kan inlungrualna hlu tak hi vawng reng tûrin i thawkrim bawk ang u. Chûng thilte kan tih chuan, Jehova hming chawimawi tûr leh chatuana kan hlimna tûrin Isua ṭawngṭaina milin kan nung tihna a ni ang. (w13-E 10/15)