Isua thawhlehna chuan a zirtîrte chu rin tlatna leh ṭhahnemngaihna a neihtîr a. A bîk takin tirhkoh Paula phei chuan Asia Minor leh Mediterranean Tuipuiah zin kualin kohhrante a din a, Kristiante chu nungchang lama nêksâwrna leh tihduhdahna râwng takte an tâwk chung pawha ding nghet tûrin a tichak a ni. Chutiang harsatna a tâwk chung pawhin Kristianna chu a lo ṭhangin a darhzau chho hle a ni.

A hnuah Paula ngei pawh lung ina khung a ni a. Chuti chung pawhin, a tânna hmun aṭangin Kristian kohhrante hnênah fuihna leh thurâwn pêkna lehkha thawnte a ziak a ni. Thil hlauhawm zâwk—kal pênna—chungchângah vaukhânna a pe bawk. Pathian thlarau thianghlim kaihhruaiin, Paula chuan “thu hran” sawi ṭhîn “chinghne kawlhte” chu an zîngah lûtin, ‘anmahni lamah an pakaitîr’ dâwn tih a hmu lâwk a ni.—Tirhkohte 20:29, 30.

Kum zabi khatna tâwp lamah chuan, chu kal pênna chu a inṭan a. Chutih hun lai vêlah tholeh Isua chuan tirhkoh Johana hnênah inlârna hmangin nakina thil lo thleng tûrte chu entîr neiin a hmuhtîr a. Johana lo ziah tawh angin, dodâltute emaw, zirtîrtu derte emaw chuan Pathianin lei leh mihringte tâna atîra a thiltumte a tihfamkim vekna tûr chu an dang thei lo vang. “Hnam tinrêng te, chi tinrêng te, ṭawng tinrêng te, mi tinrêng te” chuan Pathian Ram chanchin ṭha chu an hria ang. (Thu Puan 14:6) Leiah hian Paradis chu din thar leh a ni ang a, Pathian duhzâwng ti duh apiangte chu chutah chuan an awm thei ang!

Hei hi i tân “chanchin ṭha” niin i hria em? I hria a nih chuan Bible-a mihringte tâna Pathian thuchah chungchâng leh, chu chu tûnah leh nakina i hlâwkpui theih dân tûr chu zir belh ang che.

Bible chu Internet-a www.pr418.com-ah ṭawng 50 vêlin i chhiar thei a. Chu Web site-ah chuan Bible—Eng Thuchah Nge A Ken? tih leh Pathian Aṭanga Chanchin Ṭha! tih brochure-te rualin, Bible Zirtîrna Dik Tak Chu Eng Nge Ni? tih lehkhabu bâkah, Bible kan rin theih chhan leh a thurâwn ṭangkai takte kan mi mal leh chhûngkaw nuna kan nunpui theih dân târ langtu thu leh hla chhuah dangte pawh i bih chiang thei ang. A nih loh pawhin, chanchin hriat belh nân Jehova Thuhretute zînga mi tuemaw ber chu zâwt ang che.

—Tirhkohte, Ephesi, Philippi, Kolossa, Philemona, 1 Johana, Thu Puan a ṭanchhan. (w13-E 10/01)