1. Mi tam takte’n bâwih nihna an thlîr dân leh Rom 6:22-a târ lan bâwih nihna inan lohna chu sawi rawh.

MI TAM takte bâwih nihna thlîr dân chu Kristiante bâwih nihna nên a inang lo hle. Bâwih kan tih hian an rilruah râwng taka in awpbehna te, in hnuaichhiahna te, leh dik lo taka in cheibâwlna te a lo lang ṭhîn a ni. Mahse, Pathian thâwk khum Thu chuan bâwih nihnaah chuan hmangaihna ngah tak Pu ber rawng inhuam taka bâwlna a tel tih a sawi a ni. A nihna takah chuan, tirhkoh Paula chuan kum zabi khatnaa Kristiante chu “Pathian bâwihte” anga a sawi khân, Pathian an hmangaihna avângin rawngbâwlna thianghlimah an tel a tihna a ni. (Rom 6:22) Hetiang bâwih nihnaah hian eng nge tel? Setana leh a khawvêl bâwih nihna chu engtin nge kan pumpelh theih ang? Jehova bâwih anga rinawm taka rawngbâwl a hlâwknate chu eng nge ni?

2. (a) Engin nge Israel mi bâwih chu a zalên theihna hun remchâng chân tûra thu tlûkna siamtîr mai thei? (b) Bâwih nih inhuam tak beng vih chungchânga thil chhinchhiah tlâk tak chu eng nge ni?

² Israelte hnêna Pathian pêk Dân aṭangin, Jehova min phût bâwih nihna chungchâng chu kan hre thiam a ni. Hebrai mi bâwih chu a kum sarihnaah a bawih nihna ata chhuah tûr a ni a. (Ex. 21:2) Mahse, a pu hmangaih tak zet a, a rawng bâwl zawm zêl duhtu bâwih tân Jehova chuan ruahmanna chhinchhiah tlâk tak a siam a. A pu chuan kawngkaah emaw, kawngka biangah emaw hruaiin a bengah thîr zumin a vit tûr a ni. (Ex. 21:5, 6) Chu thiltihah chuan beng a tel chu a chhinchhiah tlâk hle. Hebrai ṭawngah chuan thu âwihna tih ngaih dân chu benga hriat theihna leh ngaihthlâkna sawina thu mal nên a inkûngkaih a ni. Bâwih nih inhuam tak chuan thu âwih taka a pu rawngbâwl chhun zawm zêl chu a duh a. Hei hian Jehova hnêna kan inpumpêknaa thil telte chu min hriat thiamtîr  a ni—Pathian hmangaihnain a chêttîr inhuam taka thu âwihna chu.

3. Pathian hnêna kan inpumpêk chhan ber chu eng nge ni?

³ Kristian baptisma chang tûra kan inpumpêk hian, Jehova rawngbâwl a, a bâwih ni tûrin thu tlûkna kan lo siam tawh a ni. Jehova thu âwih a, a duhzâwng tih kan duh avânga inpumpêk kan ni a. Chutianga ti tûrin tuman min tilui lo. Naupang deuh laia baptisma changte pawhin an nu leh pate tihlâwm duh vâng ni lovin, Jehova hnêna mi mala an inpumpêk hnuah chauh an chang a ni. Kristian inpumpêkna chu a bul berah chuan vâna kan Pu ber, Pathian Jehova kan hmangaih vâng a ni a. “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin tirhkoh Johana chuan a ziak a ni.—1 Joh. 5:3.

4. ‘Felna bâwih’ ni tûrin eng nge ngai?

⁴ Jehova chuan a bâwih ni thei tûra ruahmanna a siam avângin a chungah kan va lâwm tak êm! Krista tlanna inthâwina kan rinna chuan sual bâwih ata min chhuahtîr a. Mi ṭha famkim lo ni mah ila, Jehova leh Isua thu neihna hnuaiah inhuam takin kan intulût a ni. Chu chu Paula’n thlarauva thâwk khum a lehkha thawn zînga pakhatah: “Sual lam kawngah thi tawhah inruat ula, Pathian lam kawngah erawh chuan Krista Isuaah nungah inruat rawh u,” tia sawiin chiang takin a hrilhfiah a. Chutah, heti hian a vaukhân bawk a ni: “Tu hnênah pawh an thu âwih tûra bâwiha in luh chuan (thihna khawpa sual bâwih emaw, felna khawpa thu âwih bâwih emaw,) a thu in âwiha bâwih chu in ni tih in hre lo em ni? Amaherawhchu sual bâwihte ni mah ula, zirtîr dân a hnêna in inpêkna chu rilru tak zetin in lo âwih a; tin, sual lak ata chhuahin in awm a, felna bâwihte in lo ni ta a; chuvângin Pathian hnênah lâwmthu awm rawh se,” tiin. (Rom 6:11, 16-18) Tirhkoh chuan ‘rilru tak zeta thu âwih’ chungchâng a sawi tih lo chhinchhiah ang che. Dik takin, Jehova hnêna kan inpumpêkna chuan ‘felna bâwih’ min nihtîr a ni.

5. Kan vai hian chhûng lama beihna eng nge kan hmachhawn a, engvângin nge?

⁵ Mahse, kan inpumpêkna mila nunnaah chuan kan pal tlang tûr harsatnate a awm a. Thil pahnih kan do a ngai a ni. A hmasa zâwk chu Paula hmachhawn ang inbeihna a ni a. “Ka rilru tak takin Pathian dân chungah ka lâwm si ṭhîn a; nimahsela ka taksa pêngahte hian dân danglam a awm tih ka hria, chu chuan ka rilru dân a do va, ka taksa pêngtea sualna dân awm hnênah chuan salah mi hruai ṭhîn,” tiin a ziak a ni. (Rom 7:22, 23) Keini pawhin ṭhat famkim lohna chu kan nei reng a. Chuvângin, kan tisa lam ngaihtuahna chu kan do reng a ni. Tirhkoh Petera chuan: “Zalên in ni a, nimahsela in zalênna chu sual khuh nân hmang lovin, Pathian bâwiha awm nân hmang zâwk rawh u,” tiin min fuih a ni.—1 Pet. 2:16.

6, 7. Setana chuan engtin nge he khawvêl hi duhawm tak anga a lantîr?

⁶ Kan do pahnihna chu, ramhuaite thununna hnuaia awm he khawvêl hi a ni. He khawvêl lal, Setana thiltum ber chu Jehova leh Isua chunga kan rinawmna tihchhiat hi a ni a. A thununna ṭha lo tak laka tlu lût tûra min thlêmin bâwih min nihtîr a tum a ni. (Ephesi 6:11, 12 chhiar rawh.) Setana’n a thiltum tihhlawhtlin a tum dân kawng khat chu a khawvêl hi duhawm tak leh mi hîp thei tak anga lantîrna hmangin a ni a. Tirhkoh Johana chuan: “Mi tupawhin khawvêl hi a hmangaih chuan Pa a hmangaihna amahah a awm lo. Khawvêla thil awm zawng zawng, tisa châkna te, mit châkna te, dam chhûng ropuina lem te hi Paa chhuak a ni lo va, khawvêla chhuak a ni zâwk si a,” tiin min vaukhân a ni.—1 Joh. 2:15, 16.

 ⁷ Hausak châkna hian khawvêl a chiahpiah hneh hle a. Setana chuan hlimna chu sum leh pai-ah a innghat tih ngaih dân nei tûrin mite chu a fuih a ni. Hmun tinah dâwr lian tam tak a awm a. Company thil siam faknate chuan thil neih tam duhna leh hlimhlawp bâwlna nun kawng chu a chawi lâr a ni. Khualzin buaipuitute chuan hmun nuam taka mipui ruala zin theihna tûr an ruahman ṭhîn a; chu chu khawvêl mite ruala zin chhuahna a ni ṭhîn a ni. Ni e, kan chhehvêla mi zawng zawngte chuan kan nun phung “ṭha zâwka” thlâk tûrin min duh a; mahse, chu chu khawvêl tehna aṭangin a ni fo ṭhîn.

8, 9. Eng thil hlauhawm tak nge awm a, engvângin nge?

⁸ Khawvêl thlîr dân latu kum zabi khatnaa Kristian kohhrana mite chungchângah, Petera chuan: “Chhûna ruaiṭheh buai nuam ti mi an ni a. In hnêna ruai an ṭhehin, anmahni inbumna ruaiṭheh an nih avângin bawlhhlawh kaite leh tihkhawlohnate an ni a. . . . Thu lawilo pâwr tak taka sawiin suala awmte zîng ata tlân chhuak mêkte chu tisa châknaah hurnain an thlêm thlu si ṭhîn. Anmahni chu chhiatna bâwih ni chung rengin mite chu bâwih chhuah thu an tiam ṭhîn a; mi ngamtu apiangin chu mi ngei chuan bâwihah a siam ṭhîn a ni,” tiin a vaukhân a ni.—2 Pet. 2:13, 18, 19.

⁹ “Mit châkna” phuhrûkna chuan mi chu a tizalên lo. Hmuh theih loh he khawvêl lal, Diabol-Setana bâwihah an lo awm zâwk mah a ni. (1 Joh. 5:19) Hauhsak âtchilhna bâwiha tân chu a hlauhawm tak zet a ni—chuta ṭanga tâl chhuah chu a harsa hle si a.

10, 11. Tûn laia Setana beih tum berte chu tute nge ni a, engtin nge lehkha zirna chuan an chungah harsatna a thlen theih?

¹⁰ Setana chuan Eden huana a lo tih tawh angin, tûn laiah pawh thiltawn nei lote chu a tum ber a. Naupangte chu a beih duh berte an ni. Naupang tuemaw, a nih loh leh mi tupawhin duh rêng vânga Jehova bâwih an lo nih hian Setana chu a lâwm lo. Ani chuan Jehova hnêna inpumpêk zawng zawngte chu an inpêkna leh an rinawmna vawng thei lo tûrin a duh a ni.

¹¹ Benga thîr zuma an vihsak bâwih chungchânga entîrnaah khân kîr leh ta ila. Chu bâwih chuan rei lo tê chhûng chu nâ a tuar ngei ang; mahse, a dam thuai a, bâwih nihna chhinchhiahna nghet tak a nei a ni. Chutiang bawkin ṭhalai pakhat tân a ṭhiante laka danglam chu a harsain, a hrehawm hial pawh a ni thei. Setana chuan khawvêl lam hna thawhnain mi chu lungâwina a pe dâwn tih ngaih dân  a chawi lâr a; mahse, Kristiante chuan an thlarau lam mamawh phuhrûka pawimawhzia an ngaihtuah tel tûr a ni. Isua chuan: “Felnaa rilṭâma tuihâlte chu an eng a thâwl e; an la tlai dâwn si a,” tiin a zirtîr a. (Mt. 5:6) Kristian inpumpêk tawhte chu Setana tân ni lovin, Pathian tân an nung a ni. An lâwmna chu Jehova dânah a ni a, a chhûn a zânin an ngaihtuah a ni. (Sâm 1:1-3 chhiar rawh.) Mahse, tûn laia zirna tam tak chuan Jehova chhiahhlawh chu a thlarau lam mamawh ngaihtuah a, phuhrûk nân hun a pe meuh lo a ni.

12. Tûn laia naupang tam tak chuan eng duhthlan tûr nge an hmachhawn?

¹² Pathian rawngbâwl lo hnathawhna pute chuan Kristian bâwih tân harsatna a siam thei a. Korinth khuaa mite hnêna a lehkha thawn pakhatnaah, Paula chuan: “Bâwiha i awm koh i ni em?” tiin a zâwt a. Tichuan, an hnênah: “Engto teh chiam suh, remchâng a awm erawh chuan chhuah tum mai rawh,” tiin thurâwn a pe a ni. (1 Kor. 7:21) Bâwih nih aiin zalênna neih chu a duhawm zâwk a. Tûn laia ram tam takah chuan naupang tân kum engemaw zât chu loh theih lohva school kal a ngai a. Chu mi hnu chuan, zirlaite chu duhthlanna pêk an ni a. Mi chuan pâwn lam hna a thawh theih nâna lehkha a zir chhoh zêl chuan, hunbi kima rawngbâwl tûrin zalênna a neih tlêm phah thei a ni.—1 Korinth 7:23 chhiar rawh.

13. Jehova chhiahhlawhte chuan eng ang zirna nge an hlâwkpui ber ang?

¹³ Paula chuan Kolossa khuaa Kristiante chu: “Fîmkhur rawh u, chutilochuan tupawhin Krista thu ang ni lovin, mihring thurochhiah leh khawvêl A Aw B ang zâwkin an thu fing leh bumna mai maiin râl lâkin an la dah ang che u,” tiin a vaukhân a ni. (Kol. 2:8) ‘Thu fing leh bumna mai mai’ chu tûn laia mi fing tam takte tihchhuah khawvêl ngaihtuahnaah a lang a. Lehkha zir ringawt ngaih pawimawhna zirna sâng chuan thiamna nei vak lo leh nei miah lo zirlai tam tak a chher chhuak a, a tak rama nun hmachhawn hlei thei lovin a siam hlawm a ni. Chu mi nêna inkalh takin, Jehova chhiahhlawhte chuan nun tluang taka Pathian rawng an bâwl theih nân themthiamna neihtîr thei tûr zirna chu an thlang zâwk a. Paula’n Timothea hnêna a pêk fuihna hi an ngai pawimawh a ni: “Pathian ngaihsakna hi lungawina tel zawngin hlâwkna nasa tak a ni rêng a ni. Nimahsela ei tûr leh silh tûr neiin chûngah chuan kan lungawi ang,” tih hi. (1 Tim. 6:6, 8) An hming hnunga ziah tûr nihna leh degree-te neih tum ai chuan, Kristian  dikte chuan rawngbâwlnaah an theih tâwka telin “sawimawina lehkha” hmuh chu an tum zâwk a ni.—2 Korinth 3:1-3 chhiar rawh.

14. Philippi 3:8 sawi angin, engtin nge Paula chuan Pathian leh Krista bâwih nih theihna chanvo chu a thlîr?

¹⁴ Tirhkoh Paula chungchâng hi han ngaihtuah teh. Juda Dân hretu Gamaliela ke bulah lehkha a zir a. Paula dawn zirna chu tûn laia university zirna sâng nêna tehkhin theih a ni. Mahse, Paula’n Pathian leh Krista bâwih nih theihna chanvo leh a lehkha zir thiamna a khaikhin chuan engtin nge a zirna chu a thlîr? “Ka Lalpa Krista Isua hriatna ropui bîkzia avângin thil engkim pawh chânnaah ka ruat a ni,” tiin a ziak a. Tichuan heti hian a sawi zawm a ni: ‘Amah avângin thil zawng zawng ka chân ta vek a, chûng chu hnâwmhneah lek ka ngai a, Krista ka hmuh theihna tûrin,’ tiin. (Phil. 3:8) Hetiang chhût dân hian Kristian naupangte leh Pathian ṭih mi an nu leh pate chu lehkha zirna chungchângah duh thlanna fing tak siam tûrin a ṭanpui a ni. (Milemte chu en rawh.)

15, 16. Jehova inawpna pâwl chuan eng zirtîrna nge a pêk a, chu chuan eng nge a tum ber?

¹⁵ He khawvêla zirna sâng dawnna hmun tam takah chuan eng ang boruak nge awm ṭhîn? Politics lam leh khawtlâng lama buaina lo chhuahna hmun a ni ṭhîn lâwm ni? (Eph. 2:2) Chu mi nêna inkalh takin, Jehova inawpna pâwl chuan Kristian kohhran boruak nuam takah zirna sâng ber a pe a ni. Chawlhkâr tina neih Theocratic Rawngbâwlna School chu kan hlâwkpui ṭheuh thei a. Tichuan, pioneer thawk unaupate tân leh pioneer thawk nupate tân a bîk taka buatsaih zirna a awm a, chûng chu Nupui Nei Lo Unaupate Tâna Bible School leh Kristian Nupate Tâna Bible School a ni. Chutiang theocratic zirtîrna chuan kan Pu ber, vâna mi Jehova thu âwih tûrin min ṭanpui a ni.

¹⁶ Chutiang thlarau lam rohlute chu Watch Tower Publications Index emaw, Watchtower Library CD emawah kan hai chhuak thei a. He zirtîrnain a tum ber chu Jehova chibai bûk hi a ni. Chu chuan Pathian nêna lo inrem tûra mi dangte ṭanpui theih dân min zirtîr a. (2 Kor. 5:20) Tin, anni pawh chu mi dangte zirtîr chhâwng tûrin a ṭanpui ang.—2 Tim. 2:2.

17. Zirna sâng ber thlanna chuan eng malsâwmna nge a thlen?

¹⁷ Isua talent tehkhin thu-ah bâwih rinawm pahnihte chuan fak an hlawh a, hna thawh tûr dawn belhin an pu lâwmnaah an lût a ni. (Matthaia 25:21, 23 chhiar rawh.) Tûn laia zirna sâng ber thlanna chuan hlimna leh malsâwmna a thlen a ni. Michael-a entawn tûr siam hi han ngaihtuah teh. School-a a tih ṭhat êm avângin a zirtîrtute chuan university a kalna tûr chungchâng sawipui tûrin an ko va. Regular pioneer thawh a tum avânga a inchâwm theihna tûr themthiamna lam rei lo te chhûng zir a han tum tâkah chuan mak an ti hle. Thil engemaw chân nei niin a inhria em? Ani chuan: “Pioneer ka nih ang leh tûna kohhran upa ka nih anga ka dawn theocratic zirna chu ka hlut hle a. Malsâwmna leh chanvo hlu ka dawnte chu ka thawh chhuah mai theih sum leh pai eng ang ai pawhin a hlu zâwk daih a. Zirna sâng ka ûm loh avângin ka lâwm tak zet a ni,” tiin a sawi.

18. Engin nge zirna sâng ber thlantîr che?

¹⁸ Zirna sâng ber chuan Pathian duhzâwng min zirtîrin, Jehova bâwih ni tûrin min ṭanpui bawk. Pathian bâwih nihna chuan kan hmaa ‘chhiatna bâwih ata tihchhuah’ beiseina leh a tâwpa ‘Pathian fate zalenna ropuia’ luh theih beiseina min pe a. (Rom 8:21) A pawimawh berah chuan, kan Pu ber, vâna mi Jehova kan hmangaihzia târ lan dân ṭha ber kan zir a ni.—Ex. 21:5. (w13-E 10/15)