“Mi dangte ngaidam thei lotu chuan a zawh ngei tûr leihlâwn dawh chu a titliak a ni.” Hei hi kum zabi 17-naa thilthleng chanchin ziaktu Sâppa Edward Herbert-a ziak a ni a, chu chuan mi dangte kan ngaihdam a ṭûl chhan pakhat a târ lang: Engtik nîah emaw chuan mi dangte hnêna ngaihdam kan dîl a ngai thei, tih hi. (Matthaia 7:12) Mahse, mi dangte kan ngaihdam chhan tûr pawimawh zâwk a awm a. Kolossa 3:13-a kan hmuh tirhkoh Paula thute hi chhinchhiah ang che.—Chhiar rawh.

Mi ṭha famkim lo kan nih vek avângin, mi dangte tihthinur emaw, tihthinrim emaw châng kan nei thei a, anni pawhin chutiang chuan min ti ve thei a ni. (Rom 3:23) Engtin nge mihring ṭha famkim lote nêna kan inrem theih ang? Pathian thlarau thâwk khuma awm Paula chuan dawhthei tak leh ngaihdam peih tak ni tûrin min hrilh a ni. Chu thu chu kum sâng hnih dâwn lai kal taa ziah a nih lai ang bawkin tûn laiah pawh a la pawimawh reng a. Paula thute hi i lo bih chiang lehzual ang u.

‘Indawh tawn rawh u.’ Grik thu mal “indawh” tia lehlin hian dawhtheihna leh zâwldawhna a kâwk a. Lehkhabu pakhat sawi dân chuan Kristiante’n he mizia hi “mi dangte dik lohna emaw, mize ninawm tak emaw avânga an thinur chung pawha inhuam taka dawhna” niin a sawi. “Tawn” tih thu mal hian dawhtheihna chu kan lantîrin kan dawng bawk tûr a ni tih min hrilh a. Chu mi awmzia chu, mi dangte duh loh mizia kan nei tih kan inhriatna avânga an mizia kan duh lo chung pawha inrem taka awm hi a ni. Mahse, mi dangte chuan kan chungah thil tisual ta se engtin nge ni ang?

‘Inngaidam tawn rawh u.’ Mithiam pakhat sawi dânin, Mizo Bible-a ‘ngaidam’ tia lehlin atîra ziak Grik thu mal hi “ngilnei taka a ngaihdamzia târ langtu a ni.” Mi dang pakhat chuan he thu mal hian “lungâwina, duhsakna, hlâwkna awmtîrtu thil engemaw tihna” a kâwk thei tih a sawi. Mi dangin kan chunga ‘thupawi an neih’ hunah pawh inhuam taka ngaidamin ngilneihna kan lantîr a. Mahse, engvângin nge chutiang duhsakna chu kan lantîr ang? A chhan pakhat chu, a hnu lawkah kan pawi sawitu ngaihdamna kan mamawh lêt leh theih vâng a ni.

“Lalpa chuan a ngaidam che u ang tak khân inngaidam ve rawh u.” Hei hi mi dangte kan ngaihdam chhan bul ber a ni tûr a ni: Pathian Jehova chuan nasa takin min ngaidam si a. (Mika 7:18) Thil sual ti inlamlêttu chunga Jehova duhsakna ropui tak chu han ngaihtuah lawk teh. Keimahni ang lo takin, Jehova chuan thil a ti sual lo. Chuti chung pawhin, chûng mi sualte ngaihdamna a mamawh lêt ngai dâwn lo tih hre mah se, anni chu inhuam takin a ngaihdam a ni. Jehova chu thil sual ti inlamlêtte ngaihdamna kawngah entawn tûr ṭha ber a ni tih a chiang hle!

Jehova ngilneihna chuan a lamah min hîpin, amah entawn duhna min neihtîr a ni. (Ephesi 4:32–5:1) Chuvângin, heti hian kan inzâwt tûr a ni, ‘Jehova’n ngilnei taka min ngaihdam avângin, ka chunga thil a tihsual avânga inchhîr tak zet mi ṭha famkim lo tuemaw chu engtin nge ka ngaihdam theih loh tehlul ang?’ tiin.—Lk. 17:3, 4. (w13-E 10/01)