Bible-a Thuthlung Hlui lam ziak zawh hnu kum zali vêlah, Messia chungchânga Mika hrilh lâwkna chu a thleng famkim a: Isua chu Bethlehemah a lo piang a ni. Kum 30 vêl a liam hnu, C.E. 29-ah Messia lo lanna tûr chungchânga Daniela hrilh lâwkna hmasa lam chu a thleng famkim a. Chu mi kum chuan, Isua’n baptisma changin Pathianin thlarau thianghlimin hriak a thih a ni. Hun rei tak chhûng an lo nghah, Thlah, Messia chu a hun takah a lo thleng ta!

Isua chuan “thu hrilh leh Pathian ram chanchin ṭha thlen chungin” a rawngbâwlna chu a ṭan nghâl a. (Luka 8:1) Hrilh lâwk tawh ang ngeiin, mi khawngaih thei tak, nunnêm tak, leh mi dangte ngaihsak tak a ni. A zirtîrna chu a sâwtin, a duhawm a, “chak lohna tinrêng” neite chu tidamin, Pathianin a awmpuizia a târ lang a. (Matthaia 4:23) Mipuite chuan a hnên lam panin: “Messia kan hmu ta,” an ti a ni.—Johana 1:41.

Isua chuan a Lalramin thu neihna a chan pumhlûm hma rei lo têah, leiah indona te, lîrnghîng te, leh buaina dang tam tak a thleng dâwn tih a sawi lâwk a. Mi zawng zawngte chu ‘inring renga awm’ tûrin a fuih a ni.—Marka 13:37.

Isua chu Pathian laka rinawm reng mi ṭha famkim a ni a; mahse, hmêlma a nei a, anni chuan a tâwpah an tihlum a. Chu a thihna chu Adama leh Evi-te hloh tâk Paradis-a chatuana nun beiseina min neihtîr leh thei inthawina ṭha famkim a lo ni ta a ni.

Isua thihna leh ni thum hnua thlarau thil siam thiltithei tak ni tûra kaihthawh a nihna chuan hrilh lâwkna a tifamkim a. Chutah, zirtîr 500 aia tamte hmaah a inlâr a ni. Vâna a lâwn chhoh hmain, Isua chuan a hnungzuitute chu a chungchâng leh a Lalram chungchânga chanchin ṭha chu ‘hnam tina mite’ hnêna thlen tûrin a tîr a. (Matthaia 28:19) Chu an chanvo neih chu eng ang takin nge an hlen chhuah?

—Matthaia, Marka, Luka, Johana, leh 1 Korinth a ṭanchhan a ni. (w13-E 10/01)