Pathianin mi rinawm Abrahama hnênah chuan ‘thlah’ lo piang tûra sawi lâwk chu ama thlahte aṭanga lo piang tûr a ni tih a tiam a. Chu ‘thlah’ avâng chuan ‘chi tina’ mite chuan malsâwmna an dawng ang. (Genesis 22:18) Abrahama tupa Jakoba chu a hnuah Aiguptaah a pêm a, chutah chuan nasa taka lo pungin, Israel hnam an lo ni ta a ni.

A hnuah, Aigupta ramah chuan lal nunrâwng tak Pharaoa chuan Israel mite chu salah a siam a. Anmahni chhan chhuaktu atâna Pathian ruat zâwlnei Mosia’n mak taka Tuipui Sen ata a hruai chhuah nî thlengin sal an la ni reng a ni. Chu mi hnuah chuan, Pathianin Israelte hnênah anmahni kaihhruai nân leh vênhim nân Thu Sâwm Pêk pawh tiamin dânte chu a pe a. Chûng dânte chuan sual ngaihdam nâna thil hlante a sawi a ni. Pathian thâwk khumin, Mosia chuan Israelte hnênah Pathianin zâwlnei dang a tîr dâwn tih a sawi a. Chu zâwlnei chu thu tiam ‘thlah’ lo la ni tûra chu a ni.

Kum 400 aia tam a liam hnuah, Pathianin Lal Davida hnênah Eden huana sawi lâwk ‘thlah’ lo awm tûra chuan chatuanin ro a rêl ang tih a tiam a. Chu mi chu Pathianin mihringte chhandam tûr leh leia Paradis din thar leh tûra a ruat Chhan Chhuaktu, Messia a ni ang.

Davida leh zâwlnei dangte hmangin Pathianin Messia chungchâng chu zawi zawiin a târ lang chho va. Anni chuan Messia chu inngaitlâwm tak leh ngilnei tak a ni ang a, a rorêlna hnuaiah chuan ṭâm te, rorêl dik lohna te, leh indona te chu a awm tawh lo vang tih an sawi lâwk a ni. Mihringte inkârah leh mihring leh ramsate inkârah pawh remna a awm ang. Atîra Pathian thiltuma tel lo natna te, hrehawm tawrhna te, leh thihnate chu a bo vang a, mitthi tawhte pawh leiah an lo tho leh ang.

Pathian chuan zâwlnei Mika kaltlangin Messia chu Bethlehema a pian tûr thu leh zâwlnei Daniela kaltlangin a hnua tihhlum a nih tûr thu a sawi lâwk a. Mahse, Pathianin Messia chu thihna ata a kaitho vang a, vânah Lalber ni tûrin a la ruat ang. Daniela chuan a tâwpah Messia Lalramin sawrkâr dang zawng zawngte a thlâk hlen dâwn tih a hmu lâwk bawk a ni. Hrilh lâwk ang ngeiin, Messia chu a lo thleng tak zet em?

—Genesis bung 22-50, leh Exodus, Deuteronomy, 2 Samuela, Sâm, Isaia, Daniela, Mika, Zakaria 9:9 a ṭanchhan a ni. (w13-E 10/01)