1, 2. (a) Berâmte ṭha taka enkawl an nih chuan eng nge a rah chhuah? (b) Isua hun laia mi tam tak chu engvângin nge vêngtu nei lo berâm ang an nih?

BERAM vêngtuin a berâmte ṭhatna tûr a ngaihtuah tak zet chuan berâmte chu an ṭhang ṭha a. Berâm enkawl dân chungchâng ziakna lehkhabu pakhat sawi dân chuan, “miin ran tlatna hmuna berâmte thlah ringawt a, a ngaihsak zui tawh loh chuan kum tlêm tê chhûngin natna tam tak an nei a, hlâwkpui loh tûr berâm tam tak a nei ngei ang,” tiin a sawi a. Mahse, berâmte chu ṭha taka enkawl an nih hian an ṭhang ṭha dâwn a ni.

² Pathian berâm vêngtute’n berâm tinte an enkawl dân leh an ngaihsak dân chuan kohhran pum thlarau lam hrisêlna chu a nghawng ang. Isua’n mipuite chu “vêngtu nei lo berâmte anga hrehawm leh darha an awm avângin” a khawngaih tih i hre chhuak ngei ang. (Mt. 9:36) Engvângin nge chutiang dinhmun lungchhiatthlâk taka an awm? A chhan chu an hnêna Pathian Dân zirtîr tûra mawhphurhna neite chu mi hrâwk hmang, phût sâng tak, leh vervêk tak an nih vâng a ni. Thlarau lama Israel hruaitute chuan an berâmte ṭanpui leh châwm ai chuan “phur rit hrehawm takte” an chungah an nghat zâwk a ni.—Mt. 23;4.

3. Kohhran upate chuan thlarau lam berâm vêngtu an nih anga chanvo an hlen chhuahnaah eng nge an hriat reng ang?

³ Chuvângin, tûn laia Kristian berâm vêngtute—upaa ruatte—chuan mawhphurhna lian tak an nei a. An enkawl berâmte chu Pathian Jehova leh “berâm vêngtu ṭha” a nih thu sawitu, Isua ta an ni. (Joh. 10:11) Berâmte chu Isua’n a “thisen hlu” tak a pêk avângin, “mana lei” an ni tawh a. (1 Pet. 1:18, 19; 1 Kor. 6:20) Berâmte chu a hmangaih êm avângin an tâna a nun pawh inhuam takin a pe hial a ni. Upate chuan Krista hnuaia berâm vêngtu an nih a, Pathian Fapa duh tak, Isua Krista, “berâm  Vêngtu ropui tak” enkawlna hnuaia intulût tûr an nihzia chu an hre reng tûr a ni.—Heb. 13:20.

4. He thuziakah hian eng nge sawiho a nih ang?

⁴ A nih chuan, Kristian berâm vêngtute chu berâmte engtianga cheibâwl tûra beisei nge an nih? Kohhrana mite chu an zînga “hotute thu âwih” tûra fuih an ni a. Kawng leh lamah chuan, Kristian upate chu Pathian pêk an ‘chante chunga intilal’ lo tûra fuih an ni bawk. (Heb. 13:17;1 Petera 5:2, 3 chhiar rawh.) A nih chuan upate chuan berâmte chunga intilal si lovin engtin nge hma an hruai theih ang? Kawng danga sawi chuan, engtin nge upate chuan Pathian pêk an thu neihna pêl si lovin berâmte mamawh chu an a ngaihsak theih ang?

5. Isaia 40;11-a mitthlaa hmuh theih tûr thuziak chuan Jehova chungchâng eng nge a târ lan?

⁵ Pathian Jehova chungchângh, zâwlnei Isaia chuan: “Ani chuan berâm vêngtu angin a pâwl chu a châwm ang a, berâm note chu a bânin a pawm khâwm ang a, a ângchhûnga dahin a kalpui ang a, no hruai laite chu zawi têin a hruai dial dial ang,” tiin a sawi a. (Is. 40:11) Mitthlaa hmuh theih tûr he thuziak hian Jehova’n kohhrana chak lote leh derthâwngte mamawh a ngaihsakzia a târ lang a ni. Berâm vêngtu chuan a berâm huanga berâm tinte mamawh bîk chu a hriat a, ṭanpui a inpeih reng angin, Jehova chuan kohhrana mite mamawh chu a hria a, an mamawh chu lâwm takin a pe a ni. Berâm vêngtu chuan berâm no chu a ṭûl hunah chuan kawr bah fualah daha a kalpui angin, Jehova—“khawngaihnate Pa”—chuan hun harsa takte pawh tuar chhuak tûrin min ṭanpui ang. Fiahna nasa tak kan tawh hunah emaw, mamawh bîk tak kan neih hunah emaw ani chuan min thlamuan ang.—2 Kor. 1:3, 4.

6. Kohhran upa chuan thlarau lam berâm vêngtu a nih angin engtin nge Jehova entawn tûr siam chu a zui theih?

⁶ Thlarau lam berêm vêngtu tân kan Pa vâna mi hnên aṭanga zir tûr pawimawh tak a va ni êm! Jehova angin, berâmte mamawh chu a hre tûr a ni a. An hmachhawn mêk harsatnate leh ngaihsak vat ngai an mamawh bîkte a hriatna chuan, upa chu an mamawh fuihna leh ṭanpuina pe thei dinhmunah a dintîr ang. (Thuf. 27:23) Upa chuan a Kristian unaute nên inbiak pawhna ṭha a neih a ngai a ni tih a chiang hle. Thil engkim sawi chhuak lo tûra dikna an neih chu a zahsak rualin, kohhrana a thil hmuh leh hriatte chu a ngaihsakin, ‘mi chak lote ṭanpui’ tûrin hmangaihna nei takin a inpe a ni.—Tirh. 20:35; 1 Thes. 4:11.

7. (a) Engtin nge Ezekiela leh Jeremia hun laia Pathian berâmte chu cheibâwl an nih? (b) Jehova’n thlarau lam berâm vêngtu rinawm lote a demna thu aṭangin eng nge kan zir theih?

⁷ Pathianin thiam loh a chantîr berâm vêngtute rilru put hmang hi han ngaihtuah teh. Ezekiela leh Jeremia hun lai khân, Jehova chuan a berâmte ṭha taka enkawl lo berâm vêngtute chu a dem a. Berâmte chu ngaihsaktu a awm loh hian, seh an tuarin, an darh a ni. Chûng berâm vêngtute chuan berâmte châwm aiin, hlâwkna atâna anmahni hmang ṭangkaiin, ‘mahni an inchâwm’ zâwk a ni. (Ezek. 34;7-10; Jer. 23:10) Jehova’n chûng berâm vêngtute a demna thu Kristiana rama hruaitute tâna hman chu a inâwm hle. Mahse, chu chuan Kristian upate tân Jehova berâmte ṭha tak leh hmangaihna nei taka an ngaihsak a pawimawhzia pawh a târ lang bawk a ni.

8. Engtin nge Isua chuan rilru put hmang dik lo siam ṭhatna kawngah entawn tûr ṭha tak a siam?

⁸ Mihring ṭhat famkim lohna avângin, Pathian berâm ṭhenkhat chuan Jehova’n an laka a beiseite chu an hre thiam har deuh pawh  a ni thei a. Pathian Lehkha Thu anga zilhna an dawnte milin thil an ti lo emaw, thlarau lama an la puitlin lohzia târ lang zâwngin thil an ti emaw pawh a ni thei bawk. Upate chuan eng nge an tih ang? Zirtîrte’n Lalrama mi ropui ber tûr chungchâng an inhnial laia Isua lantîr dawhtheihna chu an entawn tûr a ni. Isua chuan dawhtheihna hloh mai lovin, inngaihtlâwmna lantîr chungchângah zilhna pein, a zirtîr chhun zawm zêl a ni. (Lk. 9:46-48; 22:24-27) An kete silsakin, Isua chuan inngaihtlâwmna kawnga an awm dân tûr a tihhmuh a, chu mizia chu Kristian upate tân târ lan a ngai a ni.—Johana 13:12-15 chhiar rawh; 1 Pet. 2:21.

9. Isua’n a zirtîrte hnênah eng rilru put hmang nge nei tûra a tih?

⁹ Ṭum khat chu, thlarau lam berâm vêngtu chanvo Isua thlîr dân nêna inang lo tak chu Jakoba leh Johana chuan an lantîr a. Pathian lalrama dinhmun sâng leh langsâr tak chelh chu an tum a ni. Mahse, Isua chuan an ngaihtuahna chu siam ṭhain: “Jentailte chunga rorêltute chu an chungah an lal êm êm ṭhîn a, an mi liante chuan an chungah thu an nei êm êm bawk ṭhîn tih in hria. Nimahsela, nangni zîngah zawng chutiang a ni lo vang; tupawh in zînga mi lian nih duh aping chu in rawngbâwltuah a awm zâwk tûr a ni,” a ti a. (Mt. 20:25, 26) Tirhkohte chuan an ṭhiante chunga “lal êm êm” duhna, a nih loh leh thu neih duhna chu an do a ngai a ni.

10. Isua chuan upate’n berâmte eng anga an enkawl nge a duh a, chu mi chungchângah Paula chuan eng entawn tûr nge a siam?

¹⁰ Isua chuan Kristian upate chu berâmte a cheibâwl dân anga cheibâwl tûrin a beisei a. An ṭhiante chunga hotu ang ni lovin, chhiahhlawh anga thiltih chu an inhuam tûr a ni. Tirhkoh Paula chuan chutiang inngaihtlâwmna chu a nei a ni, Ephesi khuaa kohhran upate hnênah: “Asia ram ka tlawh tirh nî ata kha in hnêna ka awm chhûng zawng khân ka awmzia kha in hria e; thuhnuairawlh ber . . . chungin, Lalpa rawng ka bâwl ṭhin kha,” tiin a sawi si a. Paula chuan chûng upate chu tih tak zet leh inngaitlâwm taka mi dangte ṭanpui tûrin a duh a. Ani chuan: “Engkim ka tih apiangah ka tihhmuh ṭhin che u kha, chutianga thawk rim . . . chungin mi chak lote in ṭanpui tûr a ni,” tiin a sawi. (Tirh. 20:18, 19, 35) Ani chuan Korinth khuaa mite hnênah an rinna chungah lalna a nei lo tih a hrilh a. An lâwmna ṭanpuitu mai a ni zâwk a ni. (2 Kor. 1:24) Paula chuan tûn laia upate tân inngaihtlâwmna leh thawh rimnaah entawn tûr ṭha a siam hle.

11, 12. Engtin nge upa chuan a unau chu thu tlûkna siam tûra a ṭanpui theih?

¹¹ Kohhran upa chuan zirtîr thiamna, a nih loh leh ‘zirtîrna dik tak kawngah chuan thu rinawm chu a pawm tlat’ tûr a ni a. (Tit. 1:9) Mahse, chu chu “thuhnuairawlh takin” a ti tûr a ni. (Gal. 6:1) Thlarau lama berâm vêngtu ṭha tak chuan kohhrana a ṭhiante chu eng kawng emaw taka thil tihluihtîr ai chuan, an thinlung chêttîr tûr zâwng chu a ngaihtuah zâwk a. Upa pakhat chuan unaupa pakhat hnênah thu tlûkna pawimawh tak siam a tum huna a ngaihtuah tûr Bible thu bulte chu a sawipui thei a. Kan thu leh hla chhuaha thuziakte chu a ennawnpui thei a ni. Ani chuan kawng zawh tûr chi hrang hrangin Jehova nêna an inlaichînna a nghawng dân tûr chu ngaihtuah tûrin a nawr deuh mai thei bawk. Upa chuan thu tlûkna siam hmaa ṭawngṭaia Pathian kaihhruaina zawn a pawimawhzia a sawi uar thei bawk a ni. (Thuf. 3:5, 6) A unau nêna chûng thilte an sawiho hnu chuan, upa chuan chu unaupa chu thu tlûkna a siamtîr ang.—Rom 14:1-4.

¹² Kristian upate neih thu neihna awmchhun chu Bible aṭangin a lo kal a.  Chuvângin, Bible chu thiam taka an hman a, a thute an zawm tlat chu a pawimawh a ni. Chutianga tihna chuan upate chu thu neihna hman khaw loh theihna engpawh pumpelh tûrin a ṭanpui ang. Tihah chuan, Krista hnuaia berâm vêngtu mai an ni a, kohhrana mi tinte chuan an thu tlûkna siamah Jehova leh Isua chungah mahni chanchin an sawi ṭheuh dâwn a ni.—Gal. 6:5, 7, 8.

13, 14. Eng kawngahte nge upa chu berâmte tâna entawn tûr an nih ang?

¹³ Tirhkoh Petera chuan kohhrana upate chu ‘an chante chunga intilal lo’ tûra a fuih hnuah, “pâwlho entawnan insiam” tûrin a fuih a ni. (1 Pet. 5:3) Engtin nge upa chu pâwlho, a nih loh leh berâmte tâna entawn tûr a nih ang? ‘Kohhran hotua ṭan duhtuin’ a tlin ngai thil pahnih hi han ngaihtuah teh. Ani chu “rilru dik tak” pu leh “mahni inchhûng khawsak rêl fel thiam mi” a nih a ngai a. “Miin ama in chhûng khawsak mah a rêl fel thiam si loh chuan Pathian kohhranho engtin nge a enkawl theih ang?” tih a nih avângin, upa chu chhûngkaw nei a nih chuan entawn tlâkin a chhûngkua a enkawl tûr a ni. (1 Tim. 3;1, 2, 4, 5) Kohhran upa nih tling tûrin, mi chu Pathian thu bulte chiang taka hre thiam leh nunpui dân hria rilru dik tak pu mi a ni tûr a ni a. Thil ngaihtuah thiam mi a ni a, hmanhmawh takin ro a rêl lo. Upate’n hêng miziate an nei tih hriatna chuan kohhran mite zîngah upate rin ngamna a awmtîr a ni.

¹⁴ Thu hrilh rawngbâwlnaa hma hruaina pawh hi kohhran upate’n an Kristian unaute tâna entawn thu ṭha an siam theihna kawng dang a ni a. He mi chungchângah hian, Isua chuan upate tân entawn tûr a siam a ni. Lalram chanchin ṭha hrilh chu Isua lei lam rawngbâwlna pawimawh tak a ni a. A zirtîrte hnênah chu hna thawh dân tûr a kawhhmun a ni. (Mk. 1:38; Lk. 8:1) Tûn laia thuchhuahtute tân thu hrilhnaa upate thawhpui te, he nun chhanhimna hnaa upate ṭhahnemngaihna hmuh te, leh an zirtîr dân zirte chu anmahni tichaktu a va ni tak êm! Upate’n an hun chêp tak kâra ṭhahnemngai taka chanchin ṭha hril tûra hun leh tha leh zung an pêk an tum tlatna chuan kohhran pum chu chutiang bawk ṭhahnemngaihna târ lang tûrin a fuih a. Upate chuan kohhran inkhâwm atâna inpuahchah a, chhânna pêkna, leh Kingdom Hall thenfai leh vawn ṭhat ang chi thiltih dangte hmangin an unaute tân entawn tûr ṭha an siam thei bawk a ni.—Eph. 5:15, 16; Hebrai 13:7 chhiar rawh.

15. Upate’n berâmte an tlawh chhan ṭhenkhat chu engte nge ni?

¹⁵ Berâm vêngtu ṭha chuan berâm chu a inhliam emaw, a dam loh emaw hunah ṭanpuina ṭangkai tak a pe vat ṭhîn. Chutiang bawkin, upate chuan kohhrana hrehawm tuar emaw, thlarau lama ṭanpui ngai emaw tupawh  chu an ngaihsak vat ṭhin a ngai a ni. Târte leh dam lote chuan tisa lamah ngaihsakna an mamawh mai thei a; mahse, thlarau lama ṭanpuina leh fuihna an mamawh zual bîk a ni. (1 Thes. 5:14) Kohhrana ṭhalaite chuan ‘tleirâwl châkna’ do ang chi, harsatna an hmachhawn mai thei a. (2 Tim. 2:22) Chuvângin, berâm enkawlnaah chuan kohhrana mite chu an dinhmunte hriat nâna a khât tâwka tlawh ṭhin leh Bible fuihna inâwm takte pêk ṭhin a tel a ni. Chu thilte chu a hun taka tih a nih chuan buaina tam tak chu a pawi thui hmaa chinfel theih a ni ṭhîn.

16. Kohhrana tuemawin thlarau lama ṭanpuina a mamawh hunah, upate chuan eng ṭanpuina nge an pêk theih?

¹⁶ Kohhrana mi tuemaw chuan a thlarau lam hrisêlna dinhmun hlauhawma awm khawpin buaina tâwk ta se, engtin nge ni ang? Bible ziaktu Jakoba chuan: “In zîngah damlo an awm em? Kohhran upa kohtîr sela, anin Lalpa hminga hriak hnawihin a chungah ṭawngṭai rawh se; tin, rinnaa ṭawngṭaina chuan damlo chu a chhandam ang a, Lalpa chuan ani chu a kai tho vang; tin, thil a lo tihsual tawh chuan ngaihdamsak a ni ang,” tiin a sawi a ni. (Jak. 5:14, 15) Thlarau lama dam lo chuan ‘kohhran upate a kohtîr’ lo a nih pawhin, upate chuan a dinhmun an hriat ve leh an ṭanpui nghâl ṭhîn tûr a ni. Upate chuan an unaute nêna an ṭawngṭai emaw, an tâna an ṭawngṭaisak emaw, a nih loh leh an mamawh huna ṭanpuina an pêk hian an enkawlna hnuaia awmte tân thlarau lama insiam ṭhatna leh chakna hnâr an ni.—Isaia 32:1, 2 chhiar rawh.

17. Upate’n “berâm Vêngtu ropui tak” an entawn hian eng nge a rah chhuah theih?

¹⁷ Kristian berâm vêngtute chuan Jehova inawpna pâwla an thiltih engkimah “berâm Vêngtu ropui tak,” Isua Krista entawn chu an tum tlat a. Chutiang mawhphurhna neite’n thlarau lama an ṭanpuina chu berâmte’n nasa takin an hlâwkpui a, an ṭhang chho zêl a ni. Hêng zawng zawngte avâng hian, kan lâwm hle a, tlukpui nei lo Berâm Vêngtu Jehova chawimawi tûra chêttîrin kan awm a ni. (w13-E 11/15)