1, 2. Jehova’n berâm vêngtu anga a inkhaikhin chu engvângin nge awmze nei tak a nih?

JEHOVA chu berâm vêngtu angin a intehkhin a. (Ezek. 34:11-14) Chu chuan Jehova nihphung hre thiam tûra min ṭanpui avângin a pawimawh a ni. Hmangaihna nei tak berâm vêngtu chuan a enkawlna hnuaia awm berâm rualte dam khawchhuahna leh ṭhatna tûrin mawhphurhna pumhlûm a la a. Hlobet leh tui awmna hmunah a hruai a (Sâm 23;1, 2); a chhûn a zânin a vêng a (Lk. 2:8); sakawlh lakah a vênghim a (1 Sam. 17:34, 35); berâm no pianghlimte chu a pawm a (Is. 40;11); berâm vâk bote chu a zawngin, a hliamte chu a enkawl a ni.—Ezek. 34:16.

² Hmân laia Jehova mi a tam zâwkte chu ran vulh mi leh lo nei mite an nih avângin, Pathian Jehova’n hmangaihna nei tak berâm vêngtu anga a inkhaikhin hian a awmzia chu an man nghâl a ni. Ṭha taka an ṭhan chhoh theihna tûrin berâmte chuan ngaihsak leh châwm ṭhat an ngai tih an hria a. Thlarau lam thilah pawh, mite chuan chutiang chu an mamawh a ni. (Mk. 6:34) Thlarau lama ṭha taka ngaihsakna leh kaihhruaina a awm loh chuan, mite chuan hrehawm an tuar a. “Vêngtu nei lo berâm” a darh ṭhin angin, an lo derthâwngin, nungchang lamah an kal bo ta ṭhîn a ni. (1 Lal. 22:17) Mahse, Jehova chuan hmangaihna nei takin a mite mamawh chu a pe a ni.

3. He thuziakah hian eng nge kan sawiho vang?

³ Berâm vêngtu anga Jehova intâr lanna chuan tûn laiah pawh awmzia a la nei zêl a. Ani chuan berâm ang a mite a la châwm zêl a ni. Tûn laia a berâmte a kaihhruai a, an mamawhte a phuhrûksak dân i lo en ang u. Hmangaihna nei taka Jehova ngaihsakna berâmte’n an chhân lêt dân tûr pawh kan ngaihtuah bawk ang.

4. Jehova berâmte châwmna kawnga Isua chanvo chu eng nge ni?

⁴ Jehova chuan Isua chu Kristian kohhran Lûah a ruat a. (Eph. 1:22, 23) “Berâm verâm vêngtu ṭha” a nih angin, Isua chuan a Pa ngaihsakna, a thiltumte, leh a miziate chu a lan chhuahtîr a ni. Isua chuan “berâmte tân a nun a pe” hial a nih kha. (Joh. 10:11, 14, 15) Krista tlanna inthawina chu mihringte tân malsâwmna a va ni tak êm! (Mt. 20:28) Jehova thiltum chu “tupawh [Isua] ring a piang an boral loh va, chatuana nunna an neih” a nih avângin!—Joh. 3:16.

5, 6. (a) Isua chuan a berâmte enkawl tûrin tute nge a ruat a, chu ruahmanna hlâwkpui tûrin berâmte’n eng nge an tih ngai? (b) Kohhran upate thu âwih kan tum chhan tûr bul ber chu eng nge ni?

⁵ Engtin nge berâmte chuan Berâm Vêngtu Ṭha, Isua Krista chu an chhân lêt? Isua chuan: “Ka berâmten ka aw an hre ṭhîn, kei pawhin anni chu ka hria, anni chuan mi zui ṭhîn,” tiin a sawi. (Joh. 10:27) Berâm Vêngtu Ṭha aw hria tih awmzia chu thil engkima a kaihhruaina zui tihna a ni a. Chutah chuan a hnuaia thlarau lam berâm vêngtua a ruatte kaihhruaina zui pawh a tel a ni. Isua chuan a tirhkohte leh a zirtîrte’n bul a lo ṭan tawh rawngbâwlna chu an chhun zawm dâwn tih a târ lang a. Anni chuan ‘Isua berâm note’ chu an ‘zirtîrin,’ an “châwm” tûr a ni. (Mt. 28:20; Johana 21:15-17 chhiar rawh.) Chanchin ṭha a darh a, zirtîrte an lo pun chuan, Isua chuan Kristian puitling takte chu kohhran enkawl tûrin a ruat a ni.—Eph. 4:11-13.

⁶ Kum zabi khatnaa Ephesi khua kohhran upate hnêna a lehkha thawnah, tirhkoh Paula chuan thlarau thianghlim chuan anni chu “Pathian kohhranho” enkawl tûrin hotuah a ruat thu a sawi a. (Tirh. 20;28) Tûn laia Kristian upate pawh thlarau thianghlim thâwk khum Pathian Lehkha Thua thil phûtte ṭanchhana ruat an nih avângin, chutiang tho chu an ni. Chuvângin, Kristian upate thu ngaihthlâk chu Berêm Vêngtu ropui pahnih Jehova leh Isua kan zahzia lantîrna a ni. (Lk. 10:16) Chu chu upate hnêna kan intukluh chhan tûr bul ber a ni a. Mahse, chutiang thu âwihna a finthlâk chhan dang pawh a awm a ni.

7. Pathian nêna inlaichînna ṭha nei reng tûrin upate chuan engtin nge an ṭanpui che?

⁷ Upate chuan an unaute hnêna kaihhruaina an pêk hian Bible emaw, Bible thu bulte emaw ṭanchhanin fuihna leh zilhnate chu an pe ṭhîn. Chu chu an unaute nun dân tûr chunga thu neih duh vâng a ni lo. (2 Kor. 1:24) Chu aimah chuan, an Kristian unaute’n thu tlûkna ṭha siam tûr leh kohhrana ruahmanna fel leh remna awmtîr tûra ṭanpui nân a ni zâwk. (1 Kor. 14:33, 40) Upate’n an ‘thlarau an vênsak’ tih chu kohhrana mi tinte chu Jehova nêna inlaichînna ṭha vawng tûra ṭanpui an duh tihna a ni. Chuvângin, unaupa emaw, unaunu emawin kawng “sual” a zawh dâwn emaw, a zawh der tawh emaw a nih chuan ṭanpuina an pe vat dâwn a ni. (Gal. 6:1, 2, Jud. 22) Chûngte chu ‘hotute thu âwih’ chhan tûr ṭha tak a ni lâwm ni?—Hebrai 13:17 chhiar rawh.

8. Engtin nge upate chuan Pathian berâmte chu an vênhim?

⁸ Thlarau lama berâm vêngtu Tirhkoh Paula chuan Kolossa khuaa awm a unaute hnênah: “Fîmkhur rawh u, chutilochuan tupawhin Krista thu ang ni lovin, mihring thu rochhiah leh khawvêl A Aw B ang zâwkin an thu fing leh bumna mai maiin râl lâkin an la dah ang che u,” tiin a ziak a. (Kol. 2:8) Chu vaukkhânna chuan upate pêk zilhna kan ngaihsak nachhan tûr ṭha tak dang min pe a ni. An unaute chu an rinna tihchhiatsak tum tupawh laka an vênghim a. Tirhkoh Petera chuan thil sual ti tûra ‘mi nghet lote thlêm thlûk’ tum “zâwlnei derte” leh “zirtîrtu derte” chungchângah vaukhânna thu a sawi. (2 Pet.  2:1, 14) Tûn laia upate pawhin a ṭûl hunah chutiang bawk vaukhânna chu an pe tûr a ni. Kristian puitling an nih angin, nunah thiltawn tam tak an nei tawh a. Chu bâkah, upaa ruat an nih hmain, Pathian Lehkha Thu hriatthiamna chiang tak an nei tih leh thu rinawm zirtîr tûrin an tling tih an târ lang tawh bawk a ni. (1 Tim. 3:2; Tit. 1:9) An puitlinna te, inbûk tawkna te, leh Bible ṭanchhan finnate chuan berâmte hnênah kaihhruaina thiam takin a pêktîr thei a ni.

9. Engtin nge tûn laia Kristian kohhran chu kaihhruai leh chhâwm a nih?

⁹ Pathian Jehova chuan a inawpna pâwl hmangin khawvêl puma unaute tân thlarau lam chaw hnianghnâr takin a pe a. Bible thurâwn tam tak chu kan thu leh hla chhuahte aṭanga pêk chhuah a ni. Chu bâkah, inawpna pâwl chuan upate chu lehkha thawn emaw, bial kantute emaw kal tlangin kaihhruaina pêk châng a nei a. Chutiang kawng chuan berâmte chuan kawhhmuhna chiang tak an dawng a ni.

10. Berâm huang aṭanga vâk bote chungchânga thlarau lama berâm vêngtute chuan eng mawhphurhna nge an neih?

¹⁰ Upate chuan thlarau lamah kohhrana mite, a bîk takin mahni intinate emaw, thlarau lama dam lote emaw chu an hrisêlna vêng ṭha tûr te, enkawl tûr te, leh ngaihsak tûr tein mawhphurhna an nei a ni. (Jakoba 5:14, 15 chhiar rawh.) Chûng mite zînga ṭhenkhat chu a huang chhûng aṭanga vâk bovin,  Kristian thiltihahte an tel tawh lo mai thei a. Chutiang dinhmunah chuan mite ngaihsak tak kohhran upa chuan berâm bo hmu leh tûra theih tâwp chhuahin, a huang chhûng—kohhrana lo kîr leh tûrin a fuih dâwn lâwm ni? Chutiang chuan a ti ngei ang! “Hêng mi tête zînga pakhat boral pawh hi in Pa vâna mi duhzâwng a ni lo ve,” tiin Isua chuan a hrilhfiah a ni.—Mt. 18:12-14.

11. Engvângin nge mi ṭhenkhat chuan upate kaihhruaina zui chu an harsat mai theih?

¹¹ Jehova leh Isua chu Berâm Vêngtu ṭha famkim an ni a. Kohhran enkawltu atâna an ruat berâm vêngtute upate erawh chu an ṭha famkim lo. Chu chuan ṭhenkhatte tân upate kaihhruaina zui chu a tiharsa thei a ni. Chûng mite chuan: ‘Keimahni ang thova ṭha famkim lo an ni a. Engvângin nge an zilhna chu kan ngaihthlâk bîk ang?’ tiin an ngaihtuah pawh a ni thei. Upate chu an ṭha famkim lo ngei mai a. Mahse, an tlin lohna leh chak lohnate chungchângah thlîr dân dik kan neih a ngai a ni.

12, 13. (a) Jehova’n mawhphurhna dinhmun chelh tûra a hman mi ṭhenkhat tlin lohna chungchângah eng nge kan sawi theih? (b) Bible-ah hian engvângin nge mawhphurhna neite tlin lohna chu chhinchhiah a nih?

¹² Bible chuan Jehova’n tûn hmaa a mite kaihruai tûra a mi hmante tlin lohna chu a pawm thlap a. Entîr nân, Davida chu Israelte lal leh kaihruaitu atâna hriak thih a ni a. Mahse, thlêmnaa tlu lûtin, uirêna leh tualthahna sualah a tlu a ni. (2 Sam. 12:7-9) Tirhkoh Petera pawh han ngaihtuah teh. Kum zabi khatna Kristian kohhranah mawhphurhna lian tak chelh mah se, thil sual lian tak a ti a ni. (Mt. 16:18, 19; Joh. 13:38; 18:27; Gal. 2:11-14) Isua tiam lovin, Evi leh Adama aṭanga mihring tumah hi an ṭha famkim lo.

¹³ Engvângin nge Jehova chuan Bible ziaktute chu thil ti tûra a mi tirhte tlin lohna chu ziaka a chhinchhiahtîr? A chhan tam tak zînga pakhat chu Pathian chuan a mite kaihruai tûrin mi ṭha famkim lote a hmang thei tih târ lan nân a ni a. Chutiang chuan mi ṭha famkim lo hlîr a hmang reng a ni. Chuvângin, tûn laia kan zînga hmahruaitute ṭhat famkim lohna chu an chunga phunnawi nân emaw, an thu neihna pawm loh nân emaw kan hmang tûr a ni lo. Jehova chuan chûng unaute zah tûr leh an thu âwih tûrin min beisei a ni.—Exodus 16:2, 8 chhiar rawh.

14, 15. Tûn hmaa Jehova’n a mite a biak pawh dân aṭangin eng nge kan zir theih?

¹⁴ Tûn laia kan zînga hmahruaitute thu âwih chu a pawimawh hle a. Tûn hmaa hun khirh tak chhûnga Jehova’n a mite a biak pawh dân kha han ngaihtuah teh. Israel mite’n hmân lai Aigupta an chhuahsan khân, Pathian chuan anni chu Mosia leh Arona hmangin thu a pe a. Hri sâwm laka dam khawchhuak tûrin, Israelte chuan a bîka buatsaih chaw hlui kîl tûr leh kawngka biangah leh kawngka lu chunga an berâm talh thisen ṭhenkhat tât tûrin thupêk an dawn chu an zâwm tûr a ni. Chu kaihhruaina chu vân aṭanga awin a rawn hriattîr lo. Mosia hnên aṭanga kaihhruaina chiang tak dawng chhâwng lehtu, Israel upate thu chu an ngaihthlâk a ngai a ni. (Ex. 12:1-7, 21-23, 29) Chûng dinhmunah chuan, Mosia leh upate chuan a mite hnêna Jehova kaihhruaina kengtu angin hna an thawk a. Tûn laiah Kristian upate chuan chutiang bawk hna pawimawh tak chu an thawk a ni.

¹⁵ Jehova’n mihring emaw, vântirhkoh emaw hmanga nun chhanhimtu kaihhruaina a pêkna Bible chuang thilthleng tam tak i ngaihtuah chhuak thei ngei ang. Chûng zawng zawngah chuan Jehova’n a thu neihna hlan chhâwn chu âwm leh rem a ti a ni. Thuchah kengtute chuan Pathian hmingin thu  an sawi a, mite hnênah chhiatna lo thleng tûra an dam khawchhuah theihna tûra an tih ngaite chu an hrilh a ni. Jehova’n Armageddon-ah chutiang bawka thil a tih chu kan beisei thei a ni lâwm ni? Tûn laia Pathian Jehova emaw, a inawpna pâwl emaw aiawha mawhphurhna pêk upa tupawhin an hnêna kawltîr thu neihna hmang khaw lo ngai lo tûrin an fîmkhur hle tûr a ni.

16. Eng “thu” nge kan ngaihthlâk ngai?

¹⁶ Jehova mite chu “vêngtu pakhat,” Isua Krista hnuaiah ‘pâwl khata’ din an ni a. (Joh. 10:16) Isua chuan a zirtîrte hnênah “kumkhuain, khawvêl tâwp thleng pawhin, in hnênah ka awm zêl ang” tih a sawi. (Mt. 28:20) Vâna Lal a nih angin, Setana khawvêl chunga rorêlna thlentu tûr thil inmung chhoh dân zawng zawng chu a thunun vek a ni. Pathian berâm huang chhûnga inlung rual tak leh him taka kan awm reng theihna tûrin, kalna tûr kawng min hrilhtu ‘kan hung lama thu’ chu kan ngaihthlâk a ngai a. Chu ‘thu-ah’ chuan Pathian thlarau thianghlimin Bible hmanga a sawi leh Jehova leh Isua’n an hnuaia berâm vengtu atâna an ruatte hmanga an sawite a tel a ni.—Isaia 30:21; Thu Puan 3:22 chhiar rawh.

17, 18. (a) Berâm rual tân eng thil hlauhawm nge awm a; mahse, eng nge kan rin tlat theih? (b) A dawta thuziakah eng nge kan sawiho vang?

¹⁷ Setana chu ‘sakeibaknei rûm ṭhîn anga a ei tûr zawnga phi ruai’ anga sawi a ni a. (1 Pet. 5:8) Sa seh hmang ramsa râwng tak leh koham tak angin, berâm fîmkhur lote emaw, vâk bote emaw bawh thut theihna hun remchâng zawng rengin anni chu a veh reng a ni. Chu chu berâm dang zawngte leh kan “thlarau vêngtu leh hotu” hnaih lehzuala kan awm chhan tûr a ni. (1 Pet. 2:25) Hrehawm nasa taka dam khawchhuakte chungchângah Thu Puan 7:17 chuan: “Berâm No [Isua] . . . chu an vêngtu a ni ang a, nunna tuikhurahte a hruai ang; Pathianin an mit ata mittui zawng zawng a hru fai tawh ang,” tiin a sawi. Chu aia thutiam ṭha zâwk a awm thei dâwn em ni?

¹⁸ Thlarau lam berâm vêngtu hnuaia awm Kristian upate chanvo pawimawh tak kan ngaihtuah hnu chuan, heti hian kan inzâwt tûr a ni, Engtin nge hêng upate hian Isua berâmte chu ṭha takin an cheibâwl a ni tih an fiah theih?’ tiin. A chhânna chu a dawta thuziakah sawiho a ni ang. (w13-E 11/15)