1. Engvângin nge dawhtheihna kan tlâk chham mai theih?

KUM 1914-a Messia Lalram din a nih khân, Setana kal hmang tân ni hnuhnûng a inṭan a. Vâna indona a thlen avângin, Isua chuan Diabola leh a ramhuaite chu lei lamah a paih thla a ni. (Thu Puan 12:7-9 chhiar rawh.) Setana chuan “hun tlêm tê” chauh a nei tih a hria a. (Thup. 12:12) Mahse, chu “hun tlêm tê” chu kum 100 a tling ṭêp tawh a, mi ṭhenkhat chuan ni hnuhnûng chu a rei tawh hle niin an ngai mai thei. Jehova chêt hun kan nghah lai hian dawhtheihna kan tlachham em le?

2. He thuziakah eng nge kan ngaihtuah ang?

² Dawhtheih lohna chuan ngaihtuah chiang mang lova thil min tihtîr theih avângin a hlauhawm a. Engtin nge nghah peihna kan neih zêl theih ang? He thuziak hian a hnuaia zawhnate hi chhângin, nghah peihna nei tûrin min ṭanpui ang. (1) Zâwlnei Mika entawn tûr siam aṭangin dawhtheihna chungchângah eng nge kan zir theih? (2) Kan nghah hun chhûng a tâwp tawh tih eng thilthlengin nge hril ang? (3) Engtin nge Jehova dawhtheihna kan hlutzia kan lantîr theih?

3. Mika hun lai khân Israel ram dinhmun chu eng ang nge a nih?

³ Mika 7:2-6 chhiar rawh. Jehova zâwlnei Mika chuan thlarau lama Israel ram tlâk chhiatzia chu a hmu a, Lal suaksual tak Ahaza rorêlna hnuaiah phei chuan hmuh hrehawm khawpin a chhia a ni. Mika chuan Israel rinawm lote chu “buar” leh “hnim hlîng nei” nên a tehkhin a ni. Buar leh hnim hlîng nei chuan a chunga kalte a tihnat angin, chûng Israel mi ṭha lote chuan an mi dâwrte chu an tina ṭhîn a. Chûng an ṭhat lohna chu a nasat êm avângin chhûngkaw inlaichînna pawh a chhe hial a. Mika chuan dinhmun thlâk thleng tûrin engmah tih theih  a nei lo tih a hriat avângin Jehova hnênah a thinlung a leihbua a ni. Tichuan, dawhtheih takin Jehova chêt hun chu a nghâk a. Jehova chu ama hun ruatah a inrawlh dâwn tih Mika chuan a ring tlat a ni.

4. Eng harsatnate nge kan tawh?

⁴ Mika angin, mahni hmasialte zîngah kan nung a. Mi tam tak chu “lâwm nachâng hre lo te, thianghlim lo te, hmangaihna pianpui nei lo te” an ni. (2 Tim. 3:2, 3) Kan hna thawhpuite, kan school kalpuite, leh kan ṭhenawmte’n mahni hmasialna rilru put hmang an lantîr kan hmuh hian kan lunghnual a. Mahse, Pathian chhiahhlawh ṭhenkhat chuan harsatna lian zâwk an nei a ni. Isua chuan a hnungzuitute’n chhûngkua aṭangin dodâlna an tâwk dâwn tih a a sawi a, a thuchah kenin mite chunga nghawng a neih dân tûr târ lan nân Mika 7:6-a chhinchhiah thute nêna inang thute chu a sawi a ni. “Mi a pa dotîr tûrin fanu a nu dotîr tûrin, mo a pi dotîr tûrin lo kal ka ni asin. Mi a hmêlmate chu ama chhûngte zînga mi ngei an ni ang,” tiin a sawi a. (Mt. 10:35, 36) Kan rinna min ṭâwmpui lotu chhûngkaw zînga mite nuihsawhna leh dodâlnate chhel taka tawrh chu a va har tak êm! Chutiang harsatna kan hmachawn a nih chuan, chhûngkaw nêksâwrna laka i tlâwm lo vang u. Chu aimah chuan, rinawmna vawng rengin, Jehova thil chinfel hun chu dawhthei takin i nghâk zâwk ang u. A ṭanpuina kan dîl ziah chuan, chhel taka tuar thei tûra kan mamawh chakna leh finna chu min pe ang.

5, 6. Engtin nge Jehova chuan Mika chu mal a sâwm a, mahse Mika chuan eng nge a hmuh loh?

⁵ Mika chu a dawhtheihna avângin Jehova chuan mal a sâwm a. Lal Ahaza leh a rorêlna suaksual tak tâwpna chu a hmu a ni. Ahaza fapa, Lal ṭha Hezekia’n lalṭhutthlêng a rochung a, biakna thianghlim a tung ding leh pawh a hmu bawk a. Tin, Assuria’n Israel hmâr lam lalram a rûn khân Mika hmanga Samari chunga Jehova rorêlna thuchah chu a thleng famkim a ni.—Mik. 1:6.

⁶ Mahse, Mika chuan a thu hrilh lâwk zawng zawngte thlen famkimna chu a hmu vek lo. Entîr nân, heti hian a ziak a: “Ni hnuhnûngahte chuan heti hi a ni ang a, LALPA in awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan chi tinrêngte chu an kal nguah nguah ang. Tin, hnam tam takte chu an kal ang a, Lo haw ula, LALPA tlângah . . . chuan i chho vang u,” tiin. (Mik. 4:1, 2) He hrilh lâwkna hi Mika thih hnu hun rei takah a thleng famkim chauh a ni. Chuti chung chuan, mi dangte’n eng pawh ti se, thih thlenga Jehova chunga rinawm chu a tum tlat a. Heti hian a ziak a ni: “Hnam tinin mahni Pathian ṭheuh an bia ang a, keini pawh LALPA kan Pathian chu kumkhuain kan bia ang,” tiin. (Mik. 4:5) Mika chuan Jehova’n A thutiam zawng zawng a thlen famkimtîr dâwn tih a rin tlat avângin, hun harsa tak kârah pawh dawhthei takin a nghâk thei a. He zâwlnei rinawm hian Jehova chu a ring tlat a ni.

7, 8. (a) Engvângin nge rin tlat nachhan tûr ṭha tak kan neih? (b) Engin nge hun liam chaktîr lehzual thei?

⁷ Chutiang bawkin Jehova chu kan ring ve em? Rin tlat nachhan tûr ṭha tak kan nei a ni. Mika hrilh lâwkna thlen famkimna chu hmai chhanah kan hmu a. ‘Ni hnuhnûng’ chhûng hian hnam tin, chi tin, leh ṭawng tina mi maktaduai têlte chu ‘LALPA in awmna tlângah’ chuan an kal khâwm tawh a ni. Ram indo reng aṭanga kal khâwm ni mah se, hêng Pathian betute hian “an khandaihte chu leilehna hmâwr zumahte” an chher tawh a, “indo dân pawh an zir tawh hek lo.” (Mik. 4:3) Jehova mi inrem takte zînga kan tel thei chu chanvo hlu a va ni êm!

⁸ Jehova’n he kalhmang suaksual tak hi titâwp thuai se kan duh a, chu chu hriat thiamawm tak pawh a ni. Mahse, dawhthei taka nghâk tûr chuan Jehova thlîr dân anga thil kan thîr a ngai a. Ani chuan “a mi ruata,”  Isua Krista’n mihringte chunga ro a rêl nî tûr chu a ruat tawh a ni. (Tirh. 17:31) Mahse, chu mi hmain Pathian chuan mi zawng zawngte chu ‘thutak hriatna’ neih theihna, chu thutak mila thiltih theihna, leh chu mi avânga chhandam nih theihna hun remchâng a pe a ni. Mi tam takte nunna chu dinhmun hlauhawmah a awm si a. (1 Timothea 2:3, 4 chhiar rawh.) Pathian hriatna dik nei tûra mi dangte ṭanpuia kan buai chuan Jehova rorêlna lo thlen hma hunte chu a liam chak lehzual ang a. Nakin lawkah, vawi lehkhatah a tâwp thut ang. Chutih hunah chuan Lalram thu hrilhnaa kan inhman avângin kan va lâwm dâwn êm!

9-11. 1 Thessalonika 5:3-na a thleng famkim tawh em? Hrilhfiah rawh.

⁹ 1 Thessalonika 5:1-3 chhiar rawh. Nakin lawkah hnamte chuan “Muanna leh himna,” tiin an sawi ang a. Chu thu puan chhuahna buma awm lo tûr chuan kan ‘meng a, kan ngaihven’ a ngai a ni. (1 Thes. 5:6) Thlarau lama harhvânga reng tûra min ṭanpui tûrin chu thu puan chhuahna chhinchhiah tlâk tak awmtîrtu tûr thilthleng tûrte chu tawi têin i lo ennawn ang u.

¹⁰ Khawvêl indopui pahnih a thlen hnuah ramte chu rem duhin an au chhuak a. Indopui pakhatna a tâwp khân, remna a thlen beiseiin League of Nations pâwl chu din a ni a. A hnuah, khawvêl indopui pahnihna a tâwp khân United Nation chu leia remna thlentîr tûra mite beisei ber a lo ni. Sawrkârte leh sakhaw hruaitute chuan chûng pâwlte’n mihringte tâna remna a thlen theih chu an beisei a. Entîr nân, kum 1986 khân United Nations chuan Khawvêl Pum Remna Kum-ah a puang a, chu chu nasa taka au chhuahpui a ni. Chu mi kum chuan ram tam tak leh sakhaw tam taka hruaitute chuan remna atâna ṭawngṭai rualna nei tûrin Italy ram, Assisi khawpuia Catholic Church lû ber chu an zâwm a ni.

¹¹ Mahse, chu remna leh muanna puan chhuahna emaw, chutiang thil dang eng pawh emaw chu 1 Thessalonika 5:3 hrilh lâwkna thlen famkimna a ni lo. Engvângin nge a nih  loh? A chhan chu sawi lâwk “chawp leh chilha boralna” a lo la thlen loh vâng a ni.

12. “Muanna leh himna,” tih puan chhuahna chungchângah eng nge kan hriat?

¹² Chu “Muanna leh himna,” la puan chhuah tûr chu tuin nge puang ang? Kristianna rama sakhaw hruaitute leh sakhaw dangte chuan eng chanvo nge an neih ang? Chu puan chhuahnaah engtin nge sawrkâr hruaitu hrang hrangte chu an tel ve ang? Bible chuan min hrilh lo. Kan thil hriat erawh chu eng ang pawhin puang chhuakin, rin tlâk tak angin lang mah se, a lang chauhva mawi a ni ang tih hi a ni. He khawvêl hlui hi Setana thununna hnuaiah a la awm reng ang a. A chhûngril chu a ṭawihin, chutiang chuan a awm reng ang. Setana ngaih dân theh darh âwih a, Kristian tualdawihna kan bawh chhiat chuan a va lungchhiatthlâk dâwn êm!

13. Engvângin nge vântirhkohte chuan boralna thli chu an chelh?

¹³ Thu Puan 7:1-4 chhiar rawh. 1 Thessalonika 5:3-na thlen famkimna kan nghah rual hian, vântirhkoh chak takte chuan hrehawm nasa tak thlentîrtu tûr tihboralna thlipui chu an chelh mêk a. Anni chuan eng nge an nghah? Tirhkoh Johana chuan thil thleng pawimawh tak pakhat—“Pathian bâwihte” chhinchhiahna hnuhnûng ber chu a târ lang a ni. * Chu chhinchhihna hnuhnûng ber a zawh chuan, vântirhkohte chuan boralna thli an chelh chu an thlah ang. Chu mi hnu chuan eng thil nge thleng ang?

14. Eng thilte’n nge Bobulon Khaw Ropui boralna hun a hnai tih târ lang?

¹⁴ Khawvêl sakhaw dik lo lalram, Babulon Khaw Ropui chuan a phu anga tihboralna chu a la tawng ngei ang a. “Mi te, mipui te, hnam te, ṭawng te” chuan ani chu ṭha takin an ṭanpui thei lo vang. A boralna hun a hnai tawh tih târ langtute chu kan hmu tawh a ni. (Thup. 16:12; 17:15-18; 18:7, 8, 21) A nihna takah chuan, ṭanpuina a hmuh tawh lohzia chu chanchin thara sakhua leh sakhaw hruaitute beihna chuan a târ lang a ni. Chuti chung chuan Babulon Khaw Ropuia hruaitute chuan dinhmun hlauhawma an dinzia an inhre lo. An va tisual tak êm! “Muanna leh himna,” tia puan chhuah a nih hnuah chuan Setana khawvêla politics lam thilte chuan sakhuana dik lo chu a bei thut ang a, a tiboral ang. Babulon Khaw Ropui chu hmuh a ni leh tawh ngai lo vang! Chutiang thilthleng pawimawh tak chuan dawhthei taka nghah phu hle.—Thup. 18:8-10.

15. Engvângin nge Jehova chuan hmanhmawh taka thil a tih loh?

¹⁵ Mite chuan Jehova hming an sawichhe chung pawhin, ani chuan chêt lâk hun tûr dik chu dawhthei takin a nghâk a ni. Jehova chuan mi rilru ṭha pu tumah tihborala an awm a duh si lo va. (2 Pet. 3:9, 10) Chutiang chu kan ni ve em? Jehova nî a lo thlen hmain, a dawhtheihna kan ngaihhlutzia chu a hnuaia mi ang hian kan târ lang thei a ni.

16, 17. (a) Engvângin nge thu hrilhnaa tel tawh lote ṭanpui chu kan duh ang? (b) Engvângin nge thu hrilhnaa tel tawh lote tân Jehova hnêna kîr leh chu a hmanhmawhthlâk?

¹⁶ Thu hrilhnaa tel tawh lote chu ṭanpui rawh. Isua chuan berâm bo pakhat zawn hmuh a nihin vânah lâwmna a awm tih a sawi a. (Mt. 18:14; Lk. 15:3-7) Jehova chuan a hming chunga hmangaihna lo lantîr tawh a, tûna a rawng bâwl ṭha lote chu a ngaihsak tih a chiang hle. Chûng mite kohhrana lo kîr leh tûra kan ṭanpui hian Jehova leh vântirhkohte kan tilâwm a ni.

¹⁷ Tûna Pathian rawng bâwl ṭha tawh lote zînga mi i ni em? Kohhrana tuemawin i rilru a  tinat avângin Jehova inawpna pâwl i bêl tawh lo pawh a ni mai thei a. Hun engemaw chen a ral tawh mai theih avângin, heti hian inzâwt rawh: ‘Ka nun chuan awmzia a nei zâwkin, ka hlim zâwk em? Mi tilungni lotu chu Pathian Jehova ngei ni a, mihring ṭha famkim lo zâwk? Pathian Jehova chuan mi tina tûrin thil engemaw tal tih a nei em?’ tiin. Ani chuan engtik lai pawhin kan chungah thil ṭha a ti a. A hnêna kan inpumpêkna milin kan nung thei lo a nih pawhin, ani chuan a thil pêk ṭha zawng zawngte nuam taka kan chên chu a phal a ni. (Jak. 1:16, 17) Jehova nî chu a lo thleng thuai dâwn. Tûn hi hêng ni hnuhnûnga hmun him awmchhun vâna min hmangaihtu kan Pa vênhimna bânah leh kohhrana kîr leh hun a ni.—Deut. 33:27; Heb. 10:24, 25.

18. Engvângin nge hmahruaitute kan thlâwp ang?

¹⁸ Hmahruaitute chu rinawm takin thlâwp rawh. Hmangaihna ngah tak Berâmpu a nih angin, Jehova chuan min kaihruaiin, min vênghim a. A Fapa chu Berâm Vêngtu Lalber atân a ruat a ni. (1 Pet. 5:4) Kohhran 1,00,000 ai tama awm upate chuan Pathian berâmte chu a mi malin an enkawl a ni. (Tirh. 20:28) Hmahruai tûra ruatte rinawm taka kan thlâwp hian, kan tâna Jehova leh Isua thiltih zawng zawng chunga kan lâwmna kan târ lang tihna a ni.

19. Engtin nge kan inhnaih theih?

¹⁹ Inhnaih tawn rawh u. Chu mi awmzia chu eng nge ni? Ṭha taka zirtîr sipai rual chu hmêlmain an beih hunah an inhnaih tawnin, an awm ṭang rual a. Chutiang chuan tâwn tlang theih lohvin an insiam a ni. Setana chuan Pathian mite chu a bei nasa sauh va. Tûn hi mahni maia do hun a ni lo. Kan inhnaih tawn a, mi dangte ṭhat famkim lohna en lova, Jehova kaihhruaina kan rinzia târ lan hun a ni.

20. Tûnah hian eng nge kan tih ang?

²⁰ Thlarau lamah i harhvângin, nghah peihna i lantîr ṭheuh vang u. “Muanna leh himna,” tia puan chhuahna leh thlante chhinchhiahna hnuhnûng ber chu dawh thei takin i nghâk ang u. Chu mi hnuah chuan vântirhkoh palite chuan tihboralna thli chu an thlah ang a, Babulon Khaw Ropui chu tihboral a ni ang. Hêng thil pawimawh takte a thlen hun kan nghah rual hian Jehova inawpna pâwla hmahruai tûra ruatte kaihhruaina chu i pawm ang u. Diabola leh a ramhuaite donaah inhnaih takin i ṭang tlâng ang u! Tûn hi fakna hla phuahtu fuihna: “LALPA beisei zawng zawngte u, chak takin awm ula, in thinlung chu intihuai rawh se,” tih thu hi zawm hun a ni.—Sâm 31:24. (w13-E 11/15)