Kristian sakhaw “bul ber pathum—Roman Catholic, Eastern Orthodox, leh Protestant—te chuan Pathian pakhata Mi pathum: Pa Pathian, Fapa Pathian, leh Thlarau Thianghlim Pathian hi an pawm a. Kristian thurinah chuan, chu zirtîrna pawm chu pathian pathum awm anga pawmna ni lovin, hêng mi pathumte hi pakhat anga pawmna a ni.”—The New Encyclopædia Britannica.

Pathian Fapa Isua chu a Pa nêna intluk, a nih loh leh ang khat niin a insawi ngai lo. Chu aimahin: “Pa hnêna ka kal dâwn avângin in lâwm tûr a ni, Pa chu keimah aiin a ropui zâwk si a,” tiin a sawi zâwk a. (Johana 14:28) A zirtîrte zînga pakhat hnênah phei chuan: “Ka Pa, in Pa, ka Pathian, in Pathian hnênah ka lâwn chho dâwn,” tiin a sawi a ni.—Johana 20:17.

Thlarau thianghlim chu mi mal pakhat a ni lo va. Kristian hmasate chu “an zain thlarau thianghlimin an khat ta vek a,” chu bâkah, Pathian Jehova chuan: “Mi zawng zawng chungah ka thlarau ka leih ang,” tiin a sawi bawk a ni. (Tirhkohte 2: 1-4, 17) Thlarau thianghlim chu Trinity-a pêng pakhat a ni lo. Chu chu Pathian chakna chevêl reng a ni.

Catholic scholars Karl Rahner-a leh Herbert Vorgrimler-a te chuan Trinity chu “puan chhuahna tel lova hriat theih loh leh puan chhuah a nih hnu pawha hriat vek theih loh” niin an sawi a. I hriat chian theih loh leh i hriatthiam theih loh tuemaw chu i hmangaih tak tak thei ang em? Chuvângin, Trinity thurin chu Pathian kan hmangaihna leh hriatna tûr dâltu a ni.

Thuziak hmasaa a thusawi kan târ lan tâk Marco-a chuan Trinity chu Pathian pawh thei lo tûra dangtu niin a hria a. Ani chuan: “Pathianin ka lakah a nihna a thup niin ka hria a, chuvângin ani chu min hlat tak, hriatthiam theih loh leh hnaih theih rual loh niin ka hria,” tiin a sawi a ni. Mahse, “Pathian chu buaina Pathian a ni lo.” (1 Korinth 14:33) Ani chuan kan lakah a nihna a thup hek lo. Amah kan hriat chian chu a duh zâwk a ni. Isua chuan: “Kan hriata chu chibai kan bûk ṭhîn,” tiin a sawi a ni.—Johana 4:22.

Marco-a chuan: “Pathian chu Trinity-a pêng pakhat a ni lo tih ka hriat hnu chuan, amah nêna mi mal inlaichinna ka nei ṭan thei ta a ni,” tiin a sawi. Jehova chu hriat thiam theih loh anga thlîr aia hriat chian theih tûr mi pakhat anga kan thlîr chuan, chu chuan amah hmangaih chu a tiawlsam sawt ang. Bible chuan: “Hmangaihna nei lo chuan Pathian a hre lo; Pathian chu hmangaihna a ni si a,” tiin a sawi si a.—1 Johana 4:8. (w13-E 11/01)