“Mi sualte chu an thih veleh an thlarau chu hremhmunah a kal nghâl a, chutah chuan hremhmun, ‘chatuan meia’ nghaisakna an tuar a ni.” (Catechism of the Catholic Church) Sakhaw hruaitu ṭhenkhat chuan hremhmun kan tih chu Pathian hnên aṭanga awm hran pumhlûmna leh inlâk hran pumhlûmna dinhmun niin an sawi.

Mitthite chuan “eng mah an hre lo.” (Thuhriltu 9:5) Mitthite’n eng mah an hriat si loh chuan engtin nge chatuan meia hrehawm an tawrh theih ang a, Pathian hnên ata chatuana inlâk hranna pawh an tawrh theih tehrêng ang?

Bible-a “hremhmun” tia leh fo Hebrai leh Grik thu mal chuan mihringte thlân pângngai a kâwk a ni. Entir nân, Joba chuan na a tawrh lai khân: “Seolah chuan mi thukru teh la,” tiin a ṭawngṭai a ni. (Joba 14: 13) Joba chuan hremhmunah emaw, Pathian laka awm hranna hmunah emaw ni lovin, thlâna chawlh veng veng mai chu a duh a ni.

Nunrâwnna chuan Pathian min ngainattîr lo va, min huattîr zâwk mah ani. Mexico rama awm Rocío-i chuan: “Ka naupan lai ata hremhmun meidîl thurin zirtîrna ka dawng a. Ka hlauh êm avângin Pathianin mize ṭha rêng a neih ka ring thei miah lo. Mi thinram tak leh dawhtheihna nei lo niin ka hria a ni,” tiin a sawi.

Bible-in Pathian rorêlna leh mitthite dinhmun chiang taka a sawite chuan Pathian chungchânga Rocío-i thlîr dân chu a thlâkthleng a. Heti hian a sawi a ni: “Ka phûrrit hlân thlâk ang maiin zalên ta huai niin ka inhria. Pathianin kan tân thil ṭha ber min duhsak a, min hmangaihin, kan hmangaih ve thei tih ka ring ṭan a. Ani chu a fate bân chelh a, an tâna thil ṭha berte duhsaktu pa ber ang a ni,” tiin.

Mi tam tak chuan hremhmun meidîl an hlauh avângin Pathian ngaihsak an tum tlat a, mahse Pathian chuan amah kan hlauh avânga a rawng kan bâwl chu a duh lo. Isua chuan: “Lalpa i Pathian chu . . . i hmangaih tûr a ni,” tiin a sawi zâwk mah a ni. (Marka 12:29, 30) Chu bâkah, tûn laiah Pathianin dik lo takin thil a ti lo tih kan hriat hian nakina a rorêlna tûrahte pawh kan ring thei a. Joba ṭhian Elihua ang bawkin: “Pathian chuan thil suaksual tiin Engkimtitheia chuan thil dik lo chu a ti teuh lo vang,” tiin rinna nasa tak nên kan sawi ve thei a ni.—Joba 34:10. (w13-E 11/01)