Ṭum khat chu, Isua’n a Pa, Jehova chanchin chu Jerusalem-ah sawiin, a hun laia sakhaw hruaitu derte dik lohna chu a hai lang a. (Johana 8:12-30) Chu mi ṭuma a thusawi chuan tûn laia Pathian chungchânga rin dân lâr takte bih chian dân tûr min hriattîr a ni. Isua chuan: “Ka thua in awm reng chuan ka zirtîrte in ni tak tak ang. Tin, thutak in hria ang a, thutak chuan bâwih a bân ang che u,” tiin a sawi a ni.—Johana 8:31, 32.

‘Ka thuah awm reng rawh u.’ Hetah hian Isua’n sakhaw zirtîrnate hi “thutak” a nih leh nih loh fiah dân tûr tehna min pe a. Chuvângin, Pathian chungchânga mite thusawi i hriat hian, heti hian inzâwt rawh: ‘Hei hi Isua thu leh Pathian Lehkha Thu dangte nên a inrem em?’ tiin. Tirhkoh Paula thusawi hria a, an thu zirte ‘a dik leh dik loh hriat nâna ni tin Pathian Lehkhaa zawng ṭhînte’ chu entawn ang che.—Tirhkohte 17:11.

Thuziak hmasa bera an thusawi kan târ lan tâk, Marco-a te, Rosa-i te, leh Raymonde-i te chuan an thurin chu Jehova Thuhretute nêna Bible zirin an bih chiang a. Eng nge an hmuh chhuah?

Marco-a: “Bible min zirpuitu chuan ka nupui nêna kan neih zawhna engpawh chu Bible hmangin min chhânsak a. Pathian Jehova kan hmangaihna chu lo ṭhangchho ṭanin, kan nupain kan inhnaih sawt bawk!”

Rosa-i: “Atîrin, Bible chu mihring chhût dân hmanga Pathian hrilhfiah tumna finna lehkhabu pakhat mai niin ka lo ngai a. Mahse, Bible-in ka zawhna neihte a chhâng a ni tih zawi zawiin ka hmu ta a. Tûnah chuan Pathian Jehova chu ka tân a tak ta hle a. Ani chu ka rin theih tûr Tuemaw tak a lo ni.”

Raymonde-i: “Pathian hnênah a chanchin zir tûra min ṭanpui tûrin ka ṭawngṭai a. Chu mi hnu rei lo têah ka pasal ruallin Bible ka zir ṭan ta a. A tâwpah chuan, Jehova chungchâng thutak chu kan hre ta! Eng ang Pathian nge a nih kan han hriat chuan kan lâwm hle a ni.”

Bible chuan Pathian chungchânga dâwtthute a hai lang mai a ni lo; a mize duhawm takte pawh a târ lang bawk a ni. Bible chu a thlarauva thâwk khum a Thu a ni a, chu chuan “a thlâwna Pathianin thil min pêkte chu kan hriat theihna” tûrin min ṭanpui a ni. (1 Korinth 2:12) Bible-in Pathian chungchâng te, a thiltum leh kan nakin hun tûr chungchângtea zawhna tlânglâwn tak, pawimawh tak ni bawk site a chhân dân chu engah nge mahni ngeia i bih chian loh vang? A nih loh leh, www.pr418.com-ah emaw, Jehova Thuhretute zînga tuemaw ber hnênah emaw Bible zirna neih dîl ang che. I dîl chuan, Pathian hmangaih chu i rin aiin a lo awlsam viau tih i hmu ngei ang. (w13-E 11/01)