“Pathian tel lovin i awm thei em? Mi maktaduai tam takte chu an awm thei.” Chu chu tûn hnai lawka Pathian awm ring lo pâwlte’n sign board lian taka an târ chhuahtîr kan hmuh chu a ni a. Pathian mamawhna nei lo niin an inngai tih a chiang hle.

Kawng lehlamah chuan, Pathian ringa inchhâl mi tam tak chuan amah awm lo ang maia ngaih theih tûr thu tlûknate an siam ṭhîn. Catholic archbishop, Salvatore Fisichella chuan, a kohhran mite chungchângah: “Ring lo mite anga kan nun avângin, en mai chuan Kristian kan ni tih mite’n an hre thei lo vang,” tiin a sawi a ni.

Mi ṭhenkhat chu Pathian chungchâng ngaihtuah hman lo khawpin an buai a. An nuna hmun pawimawh luah thei lo khawpa hla leh biak pawh theih loh niin an ngai a ni. Chûng mite chuan Pathian chu an ngaihtuah ve a nih pawhin an koh huna lo kal tûr chhiahhlawh ang maia ngaiin harsatna an tawh hunah emaw, mamawh an neih hunah emaw chauh an hre chhuak a ni.

Mi dangte chuan sakhaw zirtîrna chu ṭangkaina nei mang lo angin an thlîr a, an kohhran zirtîrna chu an zâwm lo. Entîrna pakhat chauh târ lang ta ila, German rama Catholic zaa 76 chuan an kohhran leh Bible zirtîr dân nêna inkalhin, inneih hmaa mipa leh hmeichhe chên dûn chu pawm theih niin an ngai a ni. (1 Korinth 6:18; Hebrai 13:4) Mahse, Catholic-te chauh chu an thurin leh an nun dân inpersan an ni lo. Sakhaw tam taka rawngbâwltute chuan an kohhran mite chu “Pathian awm ring lo” mite anga an nun thu lungchhe takin an sawi a ni.

Hêng entîrnate hian: Pathian kan mamawh tak tak em? tih zawhna awmze nei tak a tichhuak a. He buaina hi thil thar a ni lo. Bible bu ṭan tîr lamah sawi ṭan nghâl a ni a. He zawhna chhân nân hian, Bible-a Genesis bua tihchhuah thu buai engemaw zât chu i lo ngaihtuah ang u. (w13-E 12/01)