‘Hei Hi In Tâna Hriat Rengna Tûr A Ni’
“He mi nî hi in tân hriat rengna nî a ni ang a, LALPA tân kût nîah in ruat tûr a ni.”—EX. 12:14.
1, 2. Kristian zawng zawngte ngaihsak tûr champhaphâk chu eng nge ni a, engvângin nge?
“CHAMPHAPHAK” tih thu mal i ngaihtuah hian, eng nge i rilruah lo lang nghâl? Nupui pasal nei tuemaw chuan: “Kan inneih champha,” a ti mai thei a. Mi dangte tân chuan an ramin zalênna a hmuh ang chi, urhsûn taka an lâwm nî pawimawh tak pawh a ni mai thei a. Mahse, hnam pakhatin kum 3,500 aia tam an lo hman tawh champhaphâk chu i hria em?
2 Chu chu Kalhlên Kût a ni a. Hmân lai Israelte Aigupta sal tânna ata an chhuah zalên lawmna a ni. Chu thilthleng chu i tân a pawimawh tûr a ni. Engvângin nge? I nuna pêng pawimawh tak nêna inkûngkaihna a neih vâng a ni. ‘Mahse, Judate chuan Kalhlên Kût an hmang a, kei Juda mi ka ni ve si lo. Engvângin nge chu champhaphâk chu ka ngaihven ang?’ tiin i ngaihtuah mai thei. A chhânna chu he thu ril tak: “Kan Kalhlên Kûtna tûr pawh an talh tawh si a, Krista ngei chu,” tihah hian kan hmu thei a ni. (1 Kor. 5:7) He thutak pawimawhna hre thiam tûrin Judate Kalhlên Kût chungchâng kan hriat a, Kristian zawng zawng hnêna thupêk nêna a inkûngkaih dân chu kan ngaihtuah a ngai a ni.
KALHLEN KUT—ENGVANGIN NGE HMAN A NIH?
3, 4. Kalhlên Kût hmasa ber thlen hma khân eng thil nge thleng?
3 Juda mi ni lo khawvêl puma mi maktaduai tam tak chuan Kalhlên Kût hmasa ber hmaa thilthleng chu tlêm azâwng an hria a. Bible-a Exodus bu an chhiar emaw, mite sawi an hria emaw, a nih loh leh chu thilthleng ṭanchhana siam film an en emaw pawh a ni thei.
4 Israelte Aiguptaa kum tam tak sala an tân lai khân, Jehova chuan Mosia leh a unaupa, Arona chu Pharaoa hnêna A mite chhuah zalên phalna dîl tûrin a tîr a. Chu Aigupta lal chapo tak chuan Israelte chu a chhuahtîr duh loh avângin, Jehova chuan a ram chu hri râpthlâk tak takte nên a hrem a ni. A tâwpah, Pathian chuan a hri sâwmna, Aigupta fatîr thihna chu a thlentîr a, chu chuan Pharaoa chu Israelte chhuah tûrin a chêttîr ta a ni.—Ex. 1:11; 3:9, 10; 5:1, 2; 11:1, 5.
5. Israel mite khân chhuah zalên an nih nân eng nge an tih ngai? (A thupui kianga milem chu en rawh.)
5 Mahse, Israelte chhuah zalên an nih hma khân eng nge an tih ngai? A hun chu B.C.E. 1513 nipui lai, chhûn leh zân inchen lai vêl a ni a, Hebrai calendar-a Abib thla, a hnua Nisan tia koh tâk thla a ni. * Pathian chuan chu mi thla ni sâwmah, Israelte chu Nisan 14-a an thiltih tûr ṭhenkhat atâna inpeih ṭan tûrin a hrilh a. Hebrai mite nî chu ni tlâk aṭanga ni tlâk thleng a nih avângin chu nî chu nî a tlâk hian a inṭan a ni. Nisan 14-ah chuan, chhûngkaw tin chuan berâm (a nih loh leh kêl) chu an talhin, thisen ṭhenkhat chu in kawngka biangah leh kawngka lu chungah an tât tûr a ni. (Ex. 12:3-7, 22, 23) Chhûngkuate chuan berâm sa rawh chu chhang dawidîm telh loh leh hnim ṭhenkhat nên an ei tûr a ni. Pathian vântirhkoh chuan ram chu fangin Aigupta fatîrte chu a tihlum ang a, thuâwih Israelte erawh chu vênhim an ni ang a, tichuan chhuah zalên an ni ang.—Ex. 12:8-13, 29-32.
6. Engtin nge a hnu lama Pathian mite chuan Kalhlên Kût chu an thlîr ang?
6 Israelte chu chhuah zalên an ni ta a, anni chuan kum lo awm zêl tûrahte pawh chu an zalênna chu an hre reng tûr a ni. Pathian chuan an hnênah: “He mi nî hi in tân hriat rengna nî a ni ang a, LALPA tân kût nîah in ruat tûr a ni: in thlahte thlengin kumkhaw thuruat atâna awm reng tûrin kût nîah in hmang tûr a ni,” tiin a hrilh a. Ni 14-a an kût hman chu ni sarih chhûng awh tûr kûtin a zui a ni. Ni 14-na chu Kalhlên Kût nî tak chu a ni a; mahse, Kalhlên Kût tih hming hian kût neih chhûng ni riat chu a huam vek thei bawk. (Ex. 12:14-17; Lk. 22:1; Joh. 18:28; 19:14) Kalhlên Kût chu Hebrai mite’n kum tina an hman kût bi neite (“champhaphâkte,” The Bible in Living English) zînga pakhat a ni.—2 Chro. 8:13.
7. A tirhkohte nêna Kalhlên Kût an hman hnuhnûng berah Isua’n eng nge a hmêlhriattîr?
7 Isua leh a tirhkohte chuan Mosia Dân hnuaia awm Juda mi an nih angin, kum tiin Kalhlên Kût chu an hmang a. (Mt. 26:17-19) Chutianga a hman tlân hnuhnûng berah, Isua chuan a hnua a hnungzuitute’n kum tina an hman tûr thil thar—Lalpa Zanriah chu a hmêlhriattîr a ni. Mahse, eng nîah nge chu chu an hman ang?
LALPA ZANRIAH —ENG NIA HMAN TUR NGE?
8. Kalhlên Kût leh Lalpa Zanriah chungchângah eng zawhnate nge lo chhuak mai thei?
8 Isua’n Kalhlên Kût an hman hnu chiaha Lalpa Zanriah a hmêlhriattîr avângin, chu chu Kalhlên Kût nîa hman zêl tûr a ni. Mahse, tûn lai calendar ṭhenkhata târ lan Juda Kalhlên Kût nî leh Krista thih hriat rengna kan hman nî chu ni khat emaw, a aia tam emawin a inmil lo tih i hmun mai thei. Engah nge a inan loh? A chhânna chu Israel mite hnêna Pathian thupêk nên a inkûngkaih a ni. Mosia chuan berâm no chu “Israel-ho pung khâwm zawng zawng chuan tlai lamah an talh tûr a ni,” tia sawiin Nisan ni 14-a an talh hun tûr chu a sawi fak a ni.—Exodus 12:5, 6 chhiar rawh.
9. Exodus 12:6 sawi angin, Kalhlên Kût berâm no chu eng huna talh tûr nge a nih? ( “Ni Khat Chhûnga Eng Hunah Nge?” tih bâwm en rawh)
9 Exodus 12:6-na sawi angin berâm no chu ‘tlai lama’ talh tûr a ni a. Jewish Tanakh pawh tiamin Bible lehlin ṭhenkhat chuan “thim thet thetah” tiin a lehling a. Lehlin dangte chuan “thimhlimah” “tlai thim thet thet chhûngin,” a nih loh leh “ni tlâk lai vêlah” ti pawhin a let chhuak ve bawk. Chuvângin, berâm no chu Nisan 14 inṭanna ni tlâk hnu, a la ên laia talh tûr a ni.
10. Ṭhenkhat sawi dân angin, engtikah nge berâm no chu talh a nih a; mahse, chu chuan eng zawhna nge a tihchhuah?
10 A hnu lamah chuan, Juda ṭhenkhat chuan biak ina ken berâm no zawng zawng talh tûr chuan dârkâr tam tak a ngai dâwn niin an hria a. Chuvâng chuan Exodus 12:6 thu hi Nisan 14 tâwp, ni tlâk tîr lam (chawhnu lam) leh ni tlâk tak tak inkâr anga hriat thiam a lo ni a. Mahse, chutiang ni ta se, engtikah nge chaw chu an ei ang? Hmân lai Juda sakhaw lama mi thiam professor Jonathan Klawans-a chuan: “Ni thar chu ni tlâk aṭangin a inṭan a, chuvângin inthawina chu ni 14-ah neih ni mah se, he nî indawt dân hi Exodus-ah sawi fak a ni lo nâ a, Kalhlên Kût leh chaw ei chu ni 15-ah neih ṭan a ni,” tiin a sawi. Ani chuan: “Rabbi thu leh hla chhuah chuan . . . [C.E. 70-a] Biak In tihchhiat a nih hmaa Seder [Kalhlên Kût chaw] buatsaih a nih dân chu min hrilh pawh a tum lo,” tiin a ziak bawk a ni.—Hawrawp âwn hi keimahni tihâwn a ni.
11. (a) C.E. 33 Kalhlên Kût nî chuan Isua’n eng thilte nge a phal tlang? (b) Engvângin nge C.E. 33 Nisan 15 chu Chawlhni, a nih loh leh Sabbath “ropui” tia koh a nih?
11 Chuvâng chuan, C.E. 33-ah khân eng nîah nge Kalhlên Kût chaw chu an ei? tia inzawh chhan tûr kan nei a ni. “Kalhlên Kûtna berâm no talhna tûr” nî a lo hnaih hun Nisan 13-ah Krista chuan Petera leh Johana hnênah chuan: “Kalhlên Kût chaw kan ei tûrin min va buatsaihsak rawh u,” tiin a hrilh a. (Lk. 22:7, 8) Nisan 14 ni tlâk hnuah, Kalhlên Kût chaw “ei a lo hun” ta a, chu chu Nilaithawhṭanni tlaiah a ni. Isua chuan a tirhkohte nên Kalhlên Kût chaw chu a ei a, tichuan Lalpa Zanriah chu a hmêlhriattîr a ni. (Lk. 22:14, 15) Chu mi zân chuan man leh rorêlsakin a awm a. Isua chu Nisan 14 chhûn lai dâwn vêlah khenbeh a ni a, chaw hnu lama a thi ta a ni. (Joh. 19:14) Chuvâng chuan, Kalhlên Kût berâm no talh nî vêk chuan ‘kan Kalhlên Kûtna tûr pawh an talh a, Krista ngei chu.’ (1 Kor. 5:7; 11:23; Mt. 26:2) Chu Judate nî a tâwp dâwn—Nisan 15 a inṭan hma chuan Isua chu phûm a ni ta a ni. *—Lev. 23:5-7; Lk. 23:54.
I TANA AWMZE NEI HRIATRENGNA
12, 13. Engtin nge Juda naupangte chu a bîk takin Kalhlên Kût hmannaa an tel?
12 Mahse, Aiguptaa thilthlengah khân kîr leh ta ila. Mosia chuan Pathian mite’n Kalhlên Kût chu “kumkhuaa” an hman reng tûr thu a sawi a. Kum tin an hman laiin, naupangte chuan an nu leh pate hnênah chu thiltih awmzia chu an zâwt ṭhîn ang a. (Exodus 12:24-27 chhiar rawh; Deut. 6:20-23) Chuvângin, Kalhlên Kût chuan naupangte tân pawh “hriat rengna” tih awmzia a nei ang.—Ex. 12:14.
13 Chhuan tharte an lo ṭhan chhoh zêl rual chuan zir tûr pawimawh takte chu pate’n an fate an hrilh chhâwng zêl a. Chûng zînga pakhat chu Jehova’n amah betute chu a vênghim thei tih hi a ni. Naupangte chuan ani chu mumal lo leh tak nei lo pathian mai mai a ni lo tih a hria a. Jehova chu Pathian tak leh nung, a mite ngaihsak a, an tâna thilti ṭhîntu a ni a. ‘Aigupta mite a tihhluma,’ Israel fatîrte zuaha a vênhim lai khân chutiang Pathian a nihzia chu a târ lang a ni.
14. Kristian nu leh pate chuan Kalhlên Kût chanchin chu an fate’n eng an hriat thiam nân nge an hman theih?
14 Kristian nu leh pate chuan kum tinin chu Kalhlên Kût awmzia chu an fate hnênah an hrilh lo. Mahse, in fate hnênah Pathianin a mite a vânghim tih chu in zirtîr ve em? Jehova chu a mite Vênghimtu dik tak a la ni reng tih i rin tlatzia in hrilh hria em? (Sâm 27:11; Is. 12:2) Chutianga in hrilh hriatnaah thu hrilh ang ni lovin, titina hlimawm tak angin in ti em? Chu zir lai chu in chhûngkaw thlarau lam ṭhan chhoh nân telh tum tlat rawh u.
Kalhlên Kût chanchin sawipuinaah, i fate chu eng nge zir tûra i ṭanpui ang? (Paragraph 14-na en rawh)
15, 16. Kalhlên Kût chanchin leh Exodus thuziakte chu Jehova chanchin a eng ber sawi uar nân nge kan hman theih?
15 Kalhlên Kût aṭanga kan zir theih chu Jehova’n a mite a vênhim theih dân mai a ni lo. ‘Aigupta aṭanga hruai chhuakin,’ anni chu a chhan chhuak a ni. Chuta thil telte chu han ngaihtuah teh. Chhûm ding leh meialh dinga hruai an ni a. Ding lam leh vei lama Tuipui Sen tui a din luah laiin a chhuat lei chârah chuan an kal a. Him taka an kân hnu chuan, chûng tuite chuan Aigupta sipaite a chhîm pil vek pawh an hmu bawk a ni. Tichuan chhan chhuaha awm Israel mite chuan: “LALPA chawimawiin hla ka sa ang . . . Sakawr leh a chunga chuang chu tuipuiah a paih thla ta a. LALPA chu ka chakna leh ka hla a ni, Ani chu ka chhandamna a lo ni ta bawk a,” tiin aw an chhuah thei a ni.—Ex. 13:14, 21, 22; 15:1, 2; Sâm 136:11-15.
16 Fa i neih chuan, Jehova chu Chhan Chhuaktu anga ring ngam tûrin i ṭanpui em? Anni chuan chutianga i rinzia chu nangmahah te, i titinaah te, leh i thu tlûkna siamahte chuan an hmu em? Exodus bung 12-15-naa thu awmte chu Chhûngkuaa Pathian Biaknaah i sawipui theiin, Jehova’n a mite a chhan chhuah dân chu i sawi uar thei a ni. Ṭum dangah chuan, Tirhkohte 7:30-36 emaw, Daniela 3:16-18, 26-28 emawa thute hmangin Pathianin a mite a chhan chhuah dân chu i sawipui thei bawk. Ni e, apui apangte chuan Jehova chu hun kal tawha Chhan Chhuaktu mai a ni lo tih an ring vek tûr a ni a. Mosia hun lai khân a mite a chhan chhuak tawh a, nakinah pawh min la chhan chhuak ngei ang.—1 Thessalonika 1:9, 10 chhiar rawh.
KAN HRIAT RENG TUR CHU
17, 18. Kalhlên Kût hmasa bera thisen hmanna ngaihtuahna chuan eng nge min hriat chhuahtîr ang?
17 Kristian dikte chuan Judate Kalhlên Kût chu an hmang lo. Chu champhaphâk lawm chu Mosia Dâna awmte tân a ni a, chu Dân hnuaiah chuan kan awm lo a ni. (Rom 10:4; Kol. 2:13-16) Chu ai chuan thil dang, Pathian Fapa thih hriat rengna chu kan hmang zâwk a. Chuti chung chuan, Aigupta rama hmêlhriattîr Kalhlên Kût hmêlhmangte chuan kan tân awmzia a la nei tho a ni.
18 Kawngka biang leh kawngka lu chunga berâm thisen tah chu nun chhanhimna a ni a. Tûn laiah chuan, Kalhlên Kût nîah emaw, hun dangah emaw pawh ni se, Pathian hnênah ranin kan inthawi lo a ni. Mahse, kan nun chhanhim hlen thei tûr inthawina ṭha zâwk a awm a. Tirhkoh Paula chuan “Fa tîr vâna hming chhuang kohhranho” chungchâng chu a ziak a. Hêng hriak thih Kristiante nun chhanhimna chu Isua “thisen theh” hi a ni. (Heb. 12:23, 24) Leia chatuana nun beiseitu Kristiante nun chhanhimna chu, chu thisenah bawk an innghat a. Chuvângin, he tiam kamna hi an inhriat nawntîr ziah tûr a ni: “A thisen avângin amahah chuan kan tlanna kan nei a ni—a khawngaihna ngahzia ang zêla kan bawhchhiatnate ngaihdamna chu,” tih hi.—Eph. 1:7.
19. Kalhlên Kût berâm no cheibâwl a nih dân chuan engtin nge hrilh lâwkna kan rinna a tihngheh theh?
19 Israel mite’n Kalhlên Kût chaw tûr berâm no an talh khân, a ruh rêng rêng an titliak tûr a ni lo. (Ex. 12:46; Num. 9:11, 12) Tlanna petu “Pathian Berâm No” chungchâng hi eng nge a nih ve? (Joh. 1:29) A sîr ve veah mi sual khenbeh an ni a. Judate chuan Pilata hnênah chûng an khenbehte ruh chu tihtliahsak an dîl a. Chu chu Nisan 15, Chawlhni, a nih loh leh Sabbath ropui thlenga bana khaikan ni lo tûrin a thih hmatîr dâwn a ni. Sipaite chuan mi sual pahnihte ke chu an titliak a, “nimahsela Isua kiangah an lo kal a, a thi tawh reng tih an hria a, a kete an titliak ve lo va.” (Joh. 19:31-34) Chu chu Kalhlên Kût berâm no an tih dân nên a inmil chiah avângin, chu berâm no chu C.E. 33, Nisan 14-a thil lo thleng tûr “anpui,” a nih loh leh hlimthla a ni. (Heb. 10:1) Chu bâkah, thil awm dân chuan Sâm 34:20-a hrilh lâwkna a tithleng famkim a, chu chuan hrilh lâwknate kan rinna a tinghet tûr a ni.
20. Kalhlêt Kût leh Lalpa Zanriah inan lohna chhinchhiah tlâk tak engte nge awm?
20 Mahse, Kalhlên Kût leh Lalpa Zanriah inan lohna a awm nual a. Chûngte chuan Judate lawm ṭhin Kalhlên Kûtin Krista’n a hnungzuitute hnêna a thih hriat rengna an hman ṭhin chu a en lâwktîr lo tih a târ lang. Aigupta ramah khân Israelte chuan Berâm no sa chu an ei a, a thinsen erawh an in lo va. Chu chu Isua’n a zirtîrte hnêna ti tûra a hrilh nên chuan a inang lo a ni. Ani chuan “Pathian rama” rorêltu tûrte chuan a taksa leh a thisen aiawhtu chhang leh uain chu an eiin an in tûr a ni tih a sawi a. He mi chungchâng hi a dawta thuziakah chipchiar lehzuala sawi a ni ang.—Mk. 14:22-25.
21. Engvângin nge Kalhlên Kût chanchin hriat chu a ṭangkai?
21 Chuti chung chuan, Kalhlên Kût chu Pathianin Israelte a dâwrna kawnga thilthleng lian tham tak a ni chu rinhlelh rual a ni lo va, chuta ṭangin zir tûr pawimawh kan nei a ni. Chuvângin, Kalhlên Kût chu Kristiante tân ni lovin, Judate tâna “hriat rengna” a ni a, chutih rual chuan, Kristian kan nih angin a chanchin chu kan hre tûr a ni a, “Pathian Lehkha Thu zawng zawng” zînga telh a nih angin chuta ṭanga kan zir tûrte chu rilruah i vawng reng ang u.—2 Tim. 3:16. (w13-E 12/15)
^ par. 5 Hebrai calender-a thla hmasa ber chu Abib tia koh a ni a; mahse, a hnuah Israel mite Babulon sal tânna aṭanga an chhuah khân Nisan tia koh a ni. He thuziakah hian Nisan tiin kan hmang ang.
^ par. 11 Ni a tlâk a, Nisan 15 a inṭan chuan, chu mi kuma chawlhkâr tin Chawlhni (Sabbath/Inrinni) pângngai leh sabbath nîa inṭan ziah Chhang Dawidîm Telh Loh Kût ni hmasa ber a thleng rual chiah a. Chawlhni (Sabbath) pahnih a tlâk rual avângin Chawlhni, a nih loh leh Sabbath “ropui” a ni.—Joh. 19:31, 42.
