1. Mi tam tak chuan eng ang inpêkna nge an neih a, engvângin nge?

MITE chuan an thil ngaih pawimawhte atân inhuam takin an inpe ṭhîn a. Nu leh pate chuan an fate hlâwkpui tûrin an hun te, sum leh pai te, leh tha leh zungte an pe ṭhîn a. Olympic-a an ram aiawha tel tûra inbeisei infiam mite chuan an ṭhiante an intihlim vêl laiin, insawizawi nân nî tin dârkâr tam tak an hmang ṭhîn a ni. Isua pawh a thil ngaih pawimawhte tân a inpe ṭhîn a. Nuamsa taka awm a tum lo va, fate pawh a nei hek lo. Chu aimah chuan, rawngbâwlna ngaihsak chu a thlang zâwk a ni. (Mt. 4:17; Lk. 9:58) Chutiang bawkin a hungzuitute chuan Pathian Ram thlâwp tûrin thil tam tak an chân a. Chu Lalram tihhmasâwn chu an tân a pawimawh ber a, an theih ang tâwka Lalram ṭanpui tûrin inpêkna an siam a ni. (Mt. 4:18-22; 19:27) Chuvângin heti hian kan inzâwt thei a ni, ‘Ka nunah eng nge ka dah pawimawh?’ tiin.

2. (a) Kristian dik zawng zawng tân eng inpêkna nge neih ṭûl? (b) Ṭhenkhat chu eng hnate atân nge an inpêk theih?

² Inpêkna ṭhenkhat chu Kristian dik zawng zawng tâna neih ṭûl a ni a, Jehova nêna inlaichînna ṭha neih nân leh vawn reng nân a pawimawh a ni. Chûng inpêknaah chuan ṭawngṭai nân te, Bible chhiar nân te, chhûngkuaa Pathian biakna neih nân te, inkhâwm nân te, leh rawngbâwlnaa tel nân tea kan hun, leh tha leh zung pêk a tel a ni. * (Jos. 1:8; Mt. 28:19, 20; Heb. 10:24, 25) Kan thawhrimna leh Jehova malsâwmna avângin thu hrilhna chuan hma a sâwn chho hle a, mi tam tak chu chaklak lovin ‘LALPA in awmna tlângah’ an kal khâwm reng a ni. (Is. 2:2) Mi tam tak chu Lalram thiltihte ṭanpui nân Bethel-a rawngbâwl tûr te, Kingdom Hall leh Assembly Hall saknaa ṭanpui tûr te,  inkhâwmpui huaihawt tûr te, a nih loh leh leilung chhiatna tâwkte chhawmdâwlna hna thawk tûr tein an inpe a. Hêng hnate hi nunna hmuh nâna thil tih ngai ni kher lo mah se, Lalram thlâwp nâna thil pawimawh tak a ni.

3. (a) Laram tâna inpêkna kan neih hian, chu chu engtin nge kan hlâwkpui? (b) Eng zawhnate nge kan ngaihtuah ang?

³ Tûn hma zawng aiin thatho taka Lalram kan thlâwp a ngai a. Mi tam takin Jehova hnêna mahni duh thua an inpe hmuh chu a hlimawm hle. (Sâm 54:6 chhiar rawh.) Chutiang thilphalna chuan Pathian Ram lo thleng tûr kan nghah rual hian nasa takin min tihlim a ni. (Deut. 16:15; Tirh. 20:35) Mahse, mahni kan inbih chiang ṭheuh tûr a ni a. Lalram tâna inpêk belh theih dân kawngte a awm em? Kan hun te, sum leh pai te, tha leh zung te, leh thiamnate chu engtin nge kan hman? Fîmkhur a ngaihna lai eng nge kan ngaihtuah ang? Kan hlimna tipung tûrin chutianga mahni inpêkna kan neih huna kan entawn tûr chu i lo en ang u.

4. Inthawina hlan chu engtin nge Israelte’n an hlâwkpui?

⁴ Hmân lai Israel ramah khân inpêkna neih ngai inthawina an hlan tam ber chu sual ngaihdam nâna inthawina a ni a. Jehova duhsak hlawh tûrin inthawinate an hlan a ngai a ni. Chûng inthawinate zînga ṭhenkhat chu phût a ni a, a dangte chu mahni duh thua hlan a ni thung. (Lev. 23:37, 38) Hâlral thilhlan chu Jehova hnêna mahni duh thua hlan, a nih lo leh pêk a ni a. Inthawina chungchânga entawn tûr ṭha tak pakhat chu Solomona hun laia biak in hlanna nêna inkûngkaihah khân a lang a ni.—2 Chro. 7:4-6.

5. Mi retheite tân Jehova’n eng ruahmanna nge a siam?

⁵ Jehova chuan mi zawng zawng pêk theih zât chu a inang lo tih a hria a, mi theih ang tâwk chauh a beisei a ni. Jehova dân chuan ran thisena inthawi a phût a, chu chu a Fapa, Isua hmanga ‘thil ṭha, lo awm tûrte anpui,’ a nih loh leh hlimthla a ni. (Heb. 10:1-4) Mahse, Jehova chu inthawi nâna ran hman tûr chungchângah a khirh bur lo. Entîr nân, Pathian chuan mi chu a neihin ran rual zînga mi a tlin loh chuan ṭhuro a hlan a phalsak a. Chutiang chuan mi retheite pawhin Jehova hnênah hlim takin inthawina an hlân thei a ni. (Lev. 1:3, 10, 14; 5:7) An inthawihna ran chu inang lo mah se, mahni  duh thua inthawina hlântute hnênah thil pahnih phût a ni.

6. Inthawina hlântu mi tin hnên aṭangin eng nge phût a nih a, engvângin nge chûng thil phûtte zawm chu a pawimawh?

⁶ Pakhatnaah, mi chuan a neih zînga ṭha ber a pêk a ngai a. Jehova chuan Israel hman hnênah an inthawina “pawmsak tlâk” a nih theihna tûrin sawisêlbo a nih a ngai tih a hrilh a ni. (Lev. 22:18-20) Ran chu sawisêl kai a nih chuan, chu inthawina chu Jehova tân pawm tlâka ngaih a ni lo vang. A pahnihnaah, inthawina hlântu chu a thianghlim tûr a ni. Mi chu a thianghlim loh chuan, mahni duh thua inthawina a hlan hmain Jehova pawm a hlawh theihna tûrin sual thawina emaw, bawhchhiat thawina emaw a hlan phawt a ngai a ni. (Lev. 5:5, 6, 15) Chu chu thil pawimawh tak a ni a. Jehova chuan mi tuemawin a thianghlim loh laia mahni duh thua inthawina a telna remna thilhlan a ei chuan Pathian mite zîng ata tuithlâr tûrin thu a pe a. (Lev. 7:20, 21) Kawng leh lamah chuan, mi chu Jehova pawm a nih a, inthawina sawisêl bo a hlan chuan, a petu chu lungawi takin a hlim dâwn a ni.—1 Chronicles 29:9 chhiar rawh.

7, 8. (a) Lalram tâna an inpêkna aṭangin mi tam tak chuan eng hlimna nge an dawn? (b) Jehova hnêna pêk theih eng thilte nge kan neih?

⁷ Tûn laiah pawh, mi tam tak chuan Jehova rawngbâwlnaah phal takin an inhmang a, chu chu Jehova’n a lâwm a ni. Kan unaute tâna hnathawh chu a hmanhla a. Kingdom Hall sakna leh leilung chhiatna tuarte chhawmdâwl hna thawktu unaupa pakhat chuan chutianga rawng a bâwl avânga a dawn lungawina chu sawifiah pawh harsa a tih thu a sawi a. Ani chuan, “Kingdom Hall thar an neih vâng emaw, leilung chhiatna thlen huna ṭanpuina an dawn vâng emawa tualchhûng unaute hlimna leh lâwmna hmuhna chuan chûng thawhrimna zawng zawng chu a timanhla hle a ni,” tiin a sawi.

⁸ Kan hun laia Jehova mite chuan Jehova hna ṭanpui theih dân kawng an dap reng a. Kum 1904 khân, Unau C. T. Russell chuan: “Mi tin hi a hun neih te, a thu neihna te, a sumte, leh a dang dangte chunga Lalpa’n hotuah a siam niin an inngai tûr a ni a, tin, mi tinin an talent neihte chu Pu ber ropuina  tûra hman dân kawng theih tâwp chhuahin an dap tûr a ni,” tiin a ziak a. Malsâwmna tam tak dawnna mah ni se, Jehova hnêna inpêkna, a nih loh leh inthawina chuan thil engemaw min chântîr a ni. (2 Sam. 24:21-24) Kan thil neihte chu kan hmang ṭha zâwk thei ang em?

9. Hun hman chungchângah, Luka 10:2-4-a Isua kaihhruaina aṭangin eng thu bul nge kan nunpui theih?

⁹ Kan hun. Kan thu leh hlate lehlin leh chhut chhuah nân te, Pathian biakna hmun sak nân te, inkhâwmpui huaihawt nân te, chhiatna tâwkte chhawndâwl nân te, leh thil ṭûl dang tam tak tih nânte hian hun leh tha leh zung tam tak sên a ngai a. Mahse, ni khatah dârkâr 24 chauh kan nei a ni. Isua chuan min ṭanpui thei thu bul min pe a. Ani chuan thu hril tûra a zirtîrte a tirh chhuah khân, an hnênah “kalkawngah tumah chibai bûk suh u,” tiin a hrilh a ni. (Lk. 10:2-4) Engvângin nge chutiang kaihhruaina chu a pêk? Bible lama mithiam pakhat chuan: “Khawchhak mite zînga inchibainaah chuan kûn deuh hlek emaw, kut inpêk emaw mai a ni lo va, vawi tam tak an inpawm a, an taksa lei si hialin chibai an inbûk ṭhîn a. Chûng zawng zawng atân hun tam tak a ngai a ni,” tiin a sawi. Isua chuan a hnungzuitute chu hawihhâwm lo tûrin a fuih tihna a ni lo. Anni chuan hun tlêm tê chauh an nei tih leh thil pawimawh zâwk ngaihsak tûrin chu hun chu a ṭha thei ang bera an hman a ngaihzia hmu thiam tûrin a ṭanpui zâwk a ni. (Eph. 5:16) Lalram hna thawh nân hun tam lehzual nei tûrin he thu bul hi kan nunpui thei ang em?

10, 11. (a) Kawvêl puma rawngbâwlna atâna kan thawhlâwmte hman a nih dân ṭhenkhat chu eng nge ni? (b) Korinth thawn khat 16:1, 2-a târ lan eng thu bulin nge min ṭanpui thei?

¹⁰ Kan sum leh pai. Khawvêl puma rawngbâwlna ṭanpui nân sum leh pai tam tak a ngai a. Kum tinin bial kantute, special pioneer-te, leh missionary-te enkawl nân dollar maktaduai sâwm têl hman a ni. Kum 1999 aṭang khân, ram retheiahte chuan Kingdom Hall 24,500 aia tam sak a ni tawh a. Mahse, Kingdom Hall 6,400 dâwn lai chu mamawh belh a la ni. Thla tinin, Vênnainsâng leh Awake! chu copy maktaduai 100 dâwn lai chhut chhuah a ni a. Hêng zawng zawng hi in thawhlâwm hmanga chhawmdâwl vek a ni.

¹¹ Tirhkoh Paula chuan thawhlâwm kan thawh huna hman theih tûr thu bul min pe a. (1 Korinth 16:1, 2 chhiar rawh.) Thlarau thâwk khuma awmin, Korinth khuaa a unaute chu chawlhkâr tâwpa a chuang bâng nghâk lovin, chawlhkâr tîrah an theih ang anga thawhlâwm tûr dah khâwl zâwk tûrin a fuih a ni. Kum zabi khatna ang bawkin, kan hun laia unaute chuan an dinhmun azira thawhlâwm thawh tûrin ruahmanna an siam a. (Lk. 21:1-4; Tirh. 4:32-35) Jehova’n chutianga pêk duhna rilru chu a hlut hle a ni.

12, 13. Eng lungkhamnain nge mi ṭhenkhat chu an tha leh zung, leh thiamnate hman hrehtîr mai thei a, mahse, engtin nge Jehova’n a ṭanpui ang?

¹² Kan tha leh zung, leh thiamnate. Jehova chuan kan tha leh zung, leh thiamnate chu Lalram atâna hmang tûra kan thawhrimnaah min ṭanpui a. Kan chauh huna min ṭanpui a intiam a ni. (Is. 40:29-31) Hna thawh ṭanpui tûrin kan thiamnate chu a tling tâwk lo niin kan ngai em? Mi dang tling zâwkte an awm tiin kan ngaihtuah em? Jehova chuan Bezalela leh Oholiaba chunga a tih angin, pianpui thiamna chu a belhchhahsak thei tih hre reng ang che.—Ex. 31:1-6; a thupui kianga milem en rawh.

¹³ Jehova chuan a hnêna ui lo leh hreh lova, kan theih tâwk pe tûrin min fuih a. (Thuf. 3:27) Biak in sak ṭhat leh a nih  chhûng khân, Jehova chuan Jerusalema Judate hnênah chu in sak hna atâna an thiltihte chhût ngun tûrin a hrilh a ni. (Hag. 1:2-5) Anni chu lâk pênin an awm a, an nunah Jehova rawngbâwlna an dah hmasa lo. Keini pawhin kan thil ngaih pawimawhte leh Jehova ngaih pawimawhte chu a inrem leh rem loh kan ngaihtuah tûr a ni. Hêng ni hnuhnûngah hian Lalram hnaa kan thawh tam lehzual theih nân ‘kan kawngte chu kan chhût ngun’ thei ang em?

14, 15. (a) Unau retheite entawn tûr siam chuan engtin nge min fuih? (b) Eng tih nge kan duh ang?

¹⁴ Mi tam tak chu harsatna emaw, retheihna emaw a hluarna hmunah an awm a. Kan inawpna pâwl chuan chûng rama awm kan unaute tlâkchhamna ‘phuhru’ tûrin a thawkrim a ni. (2 Kor. 8:14) Mahse, kan unau rethei takte pawhin pêk theihna chanvo an neih chu an hlut a. Reithei tak takte’n hlim taka an pêk hian Jehova chu a lâwm a ni.—2 Kor. 9:7.

¹⁵ Africa-a ram rethei tak pakhata unau ṭhenkhat chuan an huan rama hmun chhe tê chu chhinchhiahin, chuta thar chhuah thlai zawrh man chu Lalram chhawmdâwlna atân an thawh ṭhîn a. Chu ram vêkah chuan, mamawh êm êm Kingdom Hall sa tûrin ruahmanna a awm a ni. Tualchhûng unaute chuan ṭanpui an duh a. Mahse, chu hna chu an thlai chîn hun lai taka thawk tûra ruahman a ni. Chuti chung pawhin, chhûn lamah Kingdom Hall saknaah chuan an thawk a, thlaite chîng tûrin tlai lamah an thawk chhuak ṭhîn a ni. Inpêkna a va ni êm! He hian kum zabi khatnaa Makedonia rama unaute min hriat chhuahtîr a. Anni chu ‘nasa takin an retheih a,’ mahse thawhlâwm thawh theihna chanvo chu an ngên chiam a ni. (2 Kor. 8:1-4) Keini pawh ‘LALPA kan Pathianin malsâwmna min dawntîr ang zêlin kan theih ang tâwk i pe’ ve ṭheuh ang u.—Deuteronomy 16:17 chhiar rawh.

16. Engtin nge kan inpêkna chu Pathian pawm tlâk a ni tih kan chian theih?

¹⁶ Mahse, fîmkhur a ngaihna lai a awm a. Hmân lai Israelte ang bawk khân, duh thua kan inpêkna chu Pathian pawm tlâk a ni tih kan chian tûr a ni. Engin nge Pathian pawm loh nihtîr thei? Chhûngkuate leh Jehova biakna nêna inkûngkaih kan mawhphurhna bul ber kan ngaihsak theih nân kan inbûk tâwk reng tûr a ni. Kan hun leh sum leh paite mi dang tâna kan pêkna chuan kan chhûngkua thlarau lam leh tisa lam ṭhatna tûr min ngaihthahtîr tûr a ni lo. Chutilochuan, kan neih loh pui pe ang kan ni thei ang. (2 Korinth 8:12 chhiar rawh.) Chu bâkah, kan thlarau lam chu kan vawng ṭha tûr a ni. (1 Kor. 9:26, 27) Mahse, Bible tehnate mila kan nun chuan, kan inpêkna chuan hlimna leh lungawina nasa tak min pein, Jehova tân “lawm tlâk” a ni ang.

17, 18. Lalram atâna inpe zawng zawng chu engtin nge kan ngaih a, eng nge kan ngaihtuah ṭheuh vang?

¹⁷ Kan unau tam tak chuan Lalram thiltihte ṭanpuina hmangin, in tûr thilhlan angin ‘an inleih bua’ a. (Phil. 2:17) Chutiang inpêkna rilru târ langtute chungah chuan kan lâwm tak zet a ni. Lalram thiltiha hmahruaitute nupuite leh fate târ lan thilphalna leh mahni inpêkna rilru chu kan fak tlâk a ni tak zet bawk.

¹⁸ Lalram hna thlâwp tûr chuan nasa taka thawhrim a ngai a. A theih anga thawh tam lehzual theih dân kawng chu ngun takin i ngaihtuah ṭheuh vang u. A lâwmman chu tûnah ngei pawh a ropui a, ‘hun lo la thleng tûrah’chuan a ropui lehzual dâwn tih i ring tlat thei a ni.—Mk. 10:28-30. (w13-E 12/15)