Rilru sûkthlêk dân zir chîktute chuan hlimna dik tak nei tûr chuan mite’n an tisa lam mamawh bâk a phuhrûk a ngai tih an sawi a. Chu chu mite’n thiltum nei engemaw tih an duhna emaw, anmahni aia ropui zâwk tuemaw, a nih loh leh engemaw rawng an bâwl duhna emawah kan hmu a ni. Chu an mamawh phuhru tûr chuan, ṭhenkhat chuan an hun âwl neihte chu thil siam te, lemziah te, rimawi te, leh thil dang dangte zir nân an hmang a. Mahse, mi tam zâwk chuan chutiang lam ûmna aṭangin lungawina tak tak, a nih loh leh tluantling chu an hmu chuang lo.

Mihringte hian thlarau lam thil duhna an pianpui tih chu Bible chhiartute tân chuan thil mak a ni lo. Pathianin mihring nupa hmasa ber a siam hnu khân, anmahni nêna thlarau lama inlaichînna an neih nân a be ṭhîn tih Genesis bung hmasa lam chuan a târ lang a. (Genesis 3:8-10) Pathian chuan mihringte chu a laka in la hrang tûrin a siam lo va; anmahni Siamtu nêna inbiak pawhna an neih chu a ngai a. Chu an thil mamawh chu Bible chuan a târ lang nawn fo a ni.

Entîr nân, Isua chuan: “Pathian thu hriaa zâwmte hi mi hamṭha an ni,” tiin a sawi a. (Luka 11:28) Hêng thute aṭang hian, mi hamṭha, a nih loh leh nun hlim leh lungawithlâk tak neih nâna thil pawimawh chu Pathian hriat kan duhna phuhrûk hi a ni tih thutâwp kan siam thei a ni. Engtin nge kan phuhrûk theih? Isua chuan: “Mihring hi chhang chauhvin an nung lo vang a, Pathian kaa thu tin chhuakin an nung zâwk ang,” tia sawiin a chhânna a târ lang a ni. (Matthaia 4:4) Eng kawngin nge Pathian kaa thuchhuakte, a nih loh leh Bible-a kan hmuh Pathian ngaihtuahna leh kaihhruainate chuan nun hlim leh awmze nei tak min neihtîr theih? Kawng pawimawh tak pathumte chu i lo ngaihtuah ang u.

Tûn laiah hian inlaichînna te, hmangaihna te, chhûngkaw nun te, inrem lohna tihreh dân te, hlimna te, leh nun awmze neite chungchânga thurâwn pe tûra inpeih mi thiam bîk chhiar sên loh khawpa tam an awm a. Mahse, hêng thil zawng zawnga kaihhruaina ṭha leh inbûk tâwk pe tûra tling ber chu mihringte Siamtu, Pathian Jehova a nih nghâl loh chuan, tu dang nge ni thei tehrêng ang?

Entîr nân: Camera emaw, computer emaw ang chi khawl thar i lei chuan, a ṭha thei ang ber leh duhthusâma hman dân hrilhfiahtu kaihhruaina lehkhabu a ken tel ngei chu i beisei a ni. Bible hi chutiang kaihhruaina lehkhabu anga ngaih theih  a ni a. Mihring nun kaihhruaina atâna min siamtu Pathianin a hmangtute hnêna min pêk lehkhabu a ni. He “kaihhruaina lehkhabu” hian thil siam chu eng atân nge tih leh a ṭha thei ang bera hman dân tûr a hrilhfiah a ni.

Ṭha taka ziak kaihhruaina lehkhabu dang ang bawkin, Bible chuan chhiartute chu, chu “thil siam”—kan nun—tichhe thei thiltihte laka invêng tûrin min vaukhân a ni. Mite pêk theih thurâwn emaw, a awlsam zâwnga thil tih dân emaw chu zawm awlsam zâwk ang leh sâwt zâwk dâwn niin a lang hial thei; mahse, Siamtu kaihhruaina kan zui chuan rah ṭha ber kan sengin, buaina kan pumpelh thei dâwn anga ngaih chu thil âwm tak a ni lâwm ni?

Jehova chuan kaihhruaina leh kawhhmuhnate min pe mah se, pawm tûrin min tilui lo. Mite Ṭanpuitu hmangaihna ngah tak a nih angin, ani chuan: “Kei hi LALPA in Pathian, in ṭhatna tûra nangmahni zirtîrtu, in kalna tûr kawnga hruaitu che u chu ka ni. Aw nangni hian ka thupêkte chu lo ngaithla ta ula chu aw! in chunga remna chu lui ang maia awmin, in felna chu tuifinriat fâwnte ang maiin a awm tûr,” tiin min ngên zâwk mah a ni. (Isaia 48:17, 18) A tawizâwnga sawi chuan, Pathian kaihhruaina kan zawm chuan hlim takin kan nung ang. Kawng danga sawi chuan, ṭha tak leh hlim taka nung tûr chuan Pathian kan mamawh a ni.

Mi ṭhenkhat chuan hmangaihna Pathian rinna nêna inkalh harsatna hrilhhaithlâk tak takte an hmuh avângin Pathian mamawhna nei lo angin an inhria a. Entîr nân: ‘Engvângin nge mi ṭhate’n hrehawm an tawh a ngaih?’ ‘Engvângin nge pawisawi lo naupang ṭhenkhat chu rualban lova an pian?’ ‘Engvângin nge dik lohna a tam êm êm?’ tiin an zâwt mai thei a. Hêngte hi zawhna pawimawh tak a ni a, a chhânna lungawithlâk tak hmuh chhuahna chuan kan nunah nghawng a nei thui hle thei a ni. Mahse, chutiang harsatnate avânga Pathian mawhpuh nghâl mai ai chuan, he mi chungchâng Pathian Thu, Bible-in a hrilhfiah dân chu i lo en ang u.

Genesis bung thumah chuan Pathian Jehova’n nupa hmasa berte hnêna chhia leh ṭha hriatna thing rah ei lo tûra thu a pêk kalh tûra rûl hmanga thlêmtu, Setana chanchin chu kan hmu a. Setana chuan Evi hnênah chuan: “Thi teh suh e: in ei nî apang chuan in mit a lo vâr ang a, a chhia leh a ṭha hriain Pathian ang in lo ni dâwn tih Pathianin a hre reng a nih chu,” tiin a hrilh a ni.—Genesis 2:16, 17; 3:4, 5.

Hêng thute hmang hian, Setana chuan Pathian chu dawthei nia a puh mai ni lovin, Pathian rorêl dân hi a dik lo niin a puh tel bawk a ni. Diabola chuan mihringte’n a thu an ngaihthlâk chuan an tân a ṭha zâwk dâwn tih sawiin a bei bawk a ni. Chûng buainate chu eng anga chinfel tûr nge ni? Jehova chuan chutianga amah puhna chu a dik leh dik loh mi zawng zawngin an hmuh theihna tûrin hun pêk chu a thlang ta a. Pathian chuan Setana leh a lam ṭangte hnênah mihringte hi Pathian tel lovin hlawhtling taka an nun theih leh theih loh târ lan theihna hun remchâng an hnênah a pe, tih theih a ni.

Setana puhna chhânna chu eng nge nia i hriat? Pathian tel lovin mihringte hi hlawhtling taka nungin, ro an inrêlsak thei em? Hrehawm  tawrhna te, rorêl dik lohna te, natna te, leh thihnate bâkah, dân bawhchhiatna te, nunchang tlâk chhiatna te, indona te, hnam insuatna te, leh nunrâwnna thiltih dangte avânga kum zabi tluanchhuaka mihringte hrehawm tawrhna hi mihringte’n Pathian tel lovin mahnia ro inrêl an tumna a hlawhchhamzia târ langtu a ni. Pathian chu mihringte chungpikna awntîrtu anga târ lan aiin, Bible chuan: “Mi, mi dang chungah pawi khawpin a intilal ṭhîn,” tia sawiin a chhan bul ber chu a târ lang zâwk mah a ni.—Thuhriltu 8:9.

Heta ṭang hian, mihringte min zarbuaitu zawhnate chhânna atân chauh ni lovin, a chinfelna atâna Pathian lam kan hawi a ngai tih a chiang hle lâwm ni? Pathianin eng nge a tih ang?

Mite chuan natna te, tarna te, leh thihna te laka zalên an duhna chu a rei tawh hle a. Chu mi atân chuan an hun, tha leh zung, leh neih sum an sêng nasa hle a; hlâwkna erawh a nei tlêm hlein, a nei lo hulhual thei bawk. Mi ṭhenkhat chuan chutiang zalênna chu tualchhuak damdawi te, taksa sâwizawi te, leh dawithiamna te aṭanga neih theih an inbeisei a. Mahse, chûng an duhthusâm zawng zawngte chu beidawnnaah a chang zo ta.

Pathian chuan mihringte chu hlim taka awmah a duh a. Chu chu mihringte a siam ṭantîra a thiltum a ni a, a theihnghilh lo. (Genesis 1:27, 28; Isaia 45:18) A thiltum apiang chu a ti ngei ang tih Pathian Jehova intiamna kan nei a ni. (Isaia 55:10, 11) Nupa hmasa berte hloh tâk Paradis dinhmun chu siam ṭha leh tûra Pathian thutiam chungchâng chu Bible-in min hrilh a. Bible bu tâwpna berah chuan he thu hi kan hmu a ni: “[Pathian Jehova chuan] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tih hi. (Thu Puan 21:4) Engtin nge Pathianin hêng dinhmun ṭha tak hi a rawn thlentîr ang a, he thutiam hi engtin nge kan hlâwkpui theih ang?

Pathian Fapa, Isua Krista chuan a zirtîrte chu leia Pathian duhzâwng tih a nih theih nâna ṭawngṭai tûrin a zirtîr a. Lal Ṭawngṭaina tia an koh chu ṭawngṭaina chu mi tam takte chuan an hre bel hlein, an chham nawn fo ṭhîn. Hetiang hian a inziak a ni: “Kan Pa vâna mi, i hming zahawm rawh se. I ram lo thleng rawh se. I duhzâwng vâna an tih angin leia mi’n ti rawh se,” tiin. (Matthaia 6:9, 10) Ni e, Pathian Ram chu mihringte rorêlnain a rah chhuah lungngaihnate nuaibo va, a thutiam anga felna khawvêl thar thlentîr tûra Pathian Jehova hmanrua a ni. * (Daniela 2:44; 2 Petera 3:13) Pathian thutiam chu hlâwkpui tûrin eng nge kan tih ngai?

Isua Krista chuan kan tih theih tûr thil a târ  lang a ni: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin. (Johana 17:3) Ni e, Pathian ṭanpuinain thutiam khawvêl thara chatuana nunna chu kan neih phâk thil a ni. Chu mi beiseina chuan, Pathian kan mamawh em? tih zawhna chu kan mamawh tia chhâng tûrin a hmin thei ang che.

Kum sânghnih liam taah khân, Atheni khuaa Areopagi, a nih loh leh Mars Tlângah tirhkoh Paula chuan Pathian chungchângah mi inhawng tak Atheni mite hnênah chuan: “Amah ngei chu engkim hnêna nunnate, thâwknate leh thil zawng zawngte petu a ni zâwk e. Amah avângin kan nung, kan che, kan awm a ni si a; nangmahni hlaphuahthiam tute emaw pawhin, ‘Keini pawh a thlahte kan ni si,’ tia an sawi ang khân,” tiin a sawi a ni.—Tirhkohte 17:25, 28.

Atheni mite hnêna Paula thusawi chu a la dik reng a. Kan boruak hîpte, kan chaw eite, kan tui inte hi Siamtu min pêk vek a ni. Pathian Jehova’n kan mamawh châkkhai atâna thil ṭha min pêkte tel lo hian kan nung thei lo. Mahse, Pathian chuan amah an ngaihtuah emaw, ngaihtuah lo emaw pawh ni se, engvângin nge mi zawng zawng hnênah chutiang thilte chu a pêk reng? Paula chuan “Pathian an zawn a, an dap an dap a, an hmuh mial theih nân,” tia a sawi hnuah, “nimahsela ani chuan min hlat lo ṭheuh si a,” tiin a sawi belh a ni.—Tirhkohte 17:27.

Pathian thiltum chungchâng leh tûnah leh chatuana hlim taka nun nâna a thurâwnte zir belhna hmanga amah hriat chian lehzual chu i duh em? I duh chuan he magazine petu che emaw, a chhuahtute emaw be pawp tûrin kan ngên a che. Anni chuan ṭanpui che chu an châk hle ang. (w13-E 12/01)