1, 2. Engvângin nge inbumna chu tûn laiah a hluar êm êm a, eng aṭangin nge kan hmuh theih? (A thupui kianga milem chu en rawh.)

INTIHDERNATE, bumhmang thiltihte, leh inbumnate chu tûn lai khawvêlah hian a hluar hle a. Chu chu mak kan ti tûr a ni lo. Bible chuan Diabol-Setana chu mi bum thiam tak leh he khawvêl rorêltu a nihzia chiang takin a sawi a ni. (1 Tim. 2:14; 1 Joh. 5:19) He khawvêl suaksual tâwpna kan hnaih rual hian, “hun tlêm tê” chauh a neih tawh avângin Setana chu a thinur lehzual a. (Thup. 12:12) Chuvângin, Diabola thununna hnuaia awmte chuan bum an hman lehzual leh a bîk takin biakna dik chawisângtute an bum lehzual chu kan beisei thei a ni.

² Jehova chhiahhlawhte leh an thu rinte chungchânga ngaihsual theih tûrzâwnga thusawite leh dâwt hulhualte chu chanchin tharah tihlan châng a awm ṭhîn a. Chanchinbu thupuite, TV-a thilthleng chungchâng târ lante, leh Internet Web page-te chu thu dik lo theh darh nâna hman a ni. Chu chuan mi ṭhenkhatte chu a tibuai a, awlsam taka bumin an awm mai ṭhîn a ni.

3. Engin nge bumna do tûrin min ṭanpui thei?

³ Min tibeidawng thei tak he kan hmêlma thil tihdân do tûrin ‘zilh kawnga sâwt’ tak Pathian Thu kan neih avângin kan hlâwm hle. (2 Tim. 3:16) Kum zabi khatnaa Thessalonika khuaa Kristian ṭhenkhat chu thu dik lo pawm tûra hruai sual an nih thu tirhkoh Paula thuziak aṭangin kan hmu chu a chhinchhiah tlâk hle a. Anni chu ‘rilru nghîng thuai lo’ tûrin a fuih a ni. (2 Thes. 2:1, 2) Paula zilhna duhawm tak aṭangin nge nge kan zir theih a, chûngte chu engtin nge kan dinhmun atân kan hman theih ang?

4. Engtin nge Thessalonika khuaa Kristiante kha lo thleng tûr “Lalpa Nî” chungchânga vaukhân an nih a, engtin nge vaukhân kan nih ve?

⁴ Thessalonika kohhrana a lehkha thawn pakhatnaah,  Paula chuan lo awm tûr “Lalpa Nî” chungchâng a sawi lang a. A unaute chu thima awm tûr leh inpuahchah lova awm tûrin a duh lo. Anni chu “êng fate” anga ‘menga ngaihven’ tlat tûrin a fuih zâwk a ni. (1 Thessalonika 5:1-6 chhiar rawh.) Tûnah hian khawvêla sakhaw dik lo zawng zawng infin khâwm, Babulon Khaw Ropui tihchhiatna chu kan nghâk mêk a. Chu tihchhiatna chu Jehova ni ropui tak inṭanna a ni ang. Jehova thiltum hlen chhuahna chungchâng kan hriat belh zêl avângin kan lâwm hle a. Kohhranah pawh inring renga awm tûra min ṭanpuitu a hun taka hriattîrnate chu kan dawng reng bawk. Chûng vaukhânna pêk nawn fote ngaihsakna chuan ‘rilru nghîng’ lova, Pathian rawng bâwl zêl kan tumna chu a tinghet sauh thei a ni.—2 Thes. 2:2.

5, 6. (a) Thessalonika mite hnêna a lehkha thawn pahnihnaah Paula’n eng chungchâng nge a sawi? (b) Isua hmangin Pathianin eng nge a tih thuai ang a, eng nge mahni kan inzawh ang?

⁵ Thessalonika khuaa Kristiante hnêna a lehkha thawn pakhatna a thawn hnu lâwkah, Paula chuan a pahnihna chu a thawn leh a. Chutah chuan Lalpa Isua’n “Pathian hre lo mi leh . . . chanchin ṭha âwih lo mite” chunga ro a rêl hun tûr, hrehawmna nasa tak lo thleng tûr chu a sawi lang a ni. (2 Thes. 1:6-8) Chu lehkha thawn bung 2-na chuan kohhrana mi ṭhenkhatin Jehova nî chu thleng ṭêp tawh anga ngaiin an “buai” hle tih a târ lang. (2 Thessalonika 2:1, 2 chhiar rawh.) Chûng Kristian hmasate chuan Jehova thiltum hlen chhuahna chungchâng an hre tlêm hle a, a hnuah Paula ngei pawhin hrilh lâwkna chungchângah heti hian an hriat tlêmzia a pawm a ni: “A kim lovin kan hria a, a kim lovin thu kan hril bawk ṭhîn a ni. A famkim a lo thlen hunah erawh chuan a kim lo hi tihbân a ni tawh ang,” tiin. (1 Kor. 13:9, 10) Mahse, Paula te, tirhkoh Petera te, leh chutih laia hriak thih mi rinawm dangte ziak thlarauva thâwk khum vaukhânna thute chuan an rinna vawng ṭha tûrin a thuam nghet a ni.

⁶ An ngaihtuahna siam ṭhat nân, thlarauva thâwk khuma awmin Paula chuan Jehova nî a lo thlen hmain kalpênna nasa tak leh “dân bawhchhepa” an lo lan tûr thu a hrilhfiah a. * Chu mi hnuah chuan, Lalpa Isua chuan a hun  ruatah buma awm zawng zawngte chu a “tiboral ang.” Tirhkoh chuan an chunga chutianga rorêlna thlen a nih chhan chu “thutak hmangaihna chu an pawm loh avâng” niin a sawi fak a ni. (2 Thes. 2:3, 8-10) Chuvângin, heti hian kan inzâwt tûr a ni: ‘Eng ang takin nge thutak chu ka hmangaih? Khawvêl puma Pathian mite kohhran atâna buatsaih he magazine leh Bible ṭhanchhan thu leh hla chhuah danga târ lan tûn laia kan hriatthiamna thar ber berte chu ka hria em?’ tiin.

7, 8. (a) Kristian hmasate khân eng hlauhawm nge an hmachhawn? (b) Tûn laia Kristian dikte tân eng thil hlauhawm bîk tak nge awm?

⁷ Kristiante chuan kalpêngte leh an zirtîrnate bâkah hlauhawm dang pawh an hmachhawn dâwn a. Paula chuan Timothea hnênah: “Tangka sum ngainat hi sual tinrêng bul a ni,” tiin a ziak a. Tirhkoh chuan “chu chu ṭhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a,” tih a sawi bawk. (1 Tim. 6:10) Tin, “tisa thiltihte” chu eng lai pawhin thil hlauhawm a ni reng bawk a ni.—Gal. 5:19-21.

⁸ Mahse, Paula’n Thessalonika mite chu “tirhkoh derte” tia a kohte chungchângah nasa taka a vaukhân chhan chu i hre thiam thei a ni. An zînga ṭhenkhat chuan ‘zirtîrhote an hnêna pakaitîr tûrin thu hran sawi’ an awm si a. (2 Kor. 11:4, 13; Tirh. 20:30) A hnuah Isua chuan Ephesi khuaa kohhran chu “mi sualte” a ngaihtheih loh avângin a fak a. Chûng Ephesi khuaa mite chuan tirhkoh derte leh dawtheite chu an “fiah” a ni. (Thup. 2:2) Thessalonika mite hnêna a lehkha thawn pahnihnaah Paula chuan he fuinna a pe hi a ngaihven awm hle: “Unaute u, . . . dân lo anga awm unau tinrêngte lakah chuan inthiarfihlîm tûrin kan Lalpa Isua Krista hmingin thu kan pe a che u,” tih hi. Tichuan, ‘hna thawk duh lo’ Kristiante chungchâng pawh chiang takin a târ lang bawk a ni. (2 Thes. 3:6, 10) Chutiang mite mah dân lo anga awm anga ngaih an nih chuan, kalpêng ṭante chu an va ni lehzual dâwn êm! Ni e, chutih hun laia chûng mite nêna inkhawm chu a hlauhawm hle a, pumpelh tûr a ni—tûn laiah pawh chutiang tho chu a ni.—Thuf. 13:20.

9. Tuemawin Bible-a hrilhfiah loh thila mi mal ngaih dân a sawi emaw, mite a sawisêl emaw chuan engvângin nge kan invên ang?

⁹ Hrehawm nasa tak leh he khawvêl suaksual tâwpna a thlen hun kan hnaih tawh êm avângin, kum zabi khatnaa thlarauva thâwk khum chûng vaukhânnate chuan kan tân awmzia a nei lehzual a. Jehova khawngaihna “sâwtpui lova” awm chu kan duh lo va, leiah emaw, vânah emaw pawh ni se, chatuana nunna thutiam hloh chu kan duh hek lo. (2 Kor. 6:1) Kan kohhrana rawn inkhâwm tuemawin Bible-a hrilhfiah loh thila mi mal ngaih dân sawipui tûr emaw, upate leh Pathian betu dangte sawisêl tûr emawa min thlêm a tum a nih chuan kan fîmkhur hle tûr a ni.—2 Thes. 3:13-15.

10. Thessalonika khuaa Kristiante kha eng thurochhiah nge vuan tlat tûra fuih an nih?

¹⁰ Paula chuan Thessalonika khuaa a unaute chu “ding nghet” tûr leh an thil zirte vuan tlat tûrin a ngên a. (2 Thessalonika 2:15 chhiar rawh.) Eng “thurochhiahte” nge zirtîr an nih? Chûng chu sakhaw dik lovin Bible-a chuang anga an chawi lâr thurochhiahte a ni lo. Paula chuan amah leh mi dangte’n Isua hnên aṭanga an dawn zirtîrnate leh Pathian thâwk khuma tirhkohte ziak, a tam zâwk Bible-a chuang tate a sawina a ni zâwk a. Ani  chuan “engkima mi hriat reng avâng leh, thurochhiah ka hrilh che u ang taka in vawn tlat avângin,” tia sawiin Korinth khuaa a unaute chu a fak a ni. (1 Kor. 11:2) Chutiang zirtîrna chu Jehova leh a Fapa aṭanga lo chhuak a nih avângin a rin tlâkin, kan ring thlap thei a ni.

11. Eng kawngtein nge ṭhenkhat chu buma an awm mai theih?

¹¹ Paula’n Hebrai mite hnêna lekha a thawnah khân Kristianin a rinna a hloh a, a din nghet loh theih dân kawng hnih a târ lang a. (Hebrai 2:1; 3:12 chhiar rawh.) “Tawlh bo” leh “bânsan” tih ṭawngkam a hmang a ni. Lawnglêng chu hriat tham lovin vaukam ata a tawlh hla thei a. Zawi zawiin vaukam chu a hlat tial tial a ni. Kawng leh lamah chuan, bânsan tih chu vaukam ata lawnglêng tuipui lama nawr anga sawi theih tûr duhrêng vânga thiltih nên khaikhin theih a ni ang. Hêng thil pahnihte hian buma awm a, thutak an rinna tichak lo mi ṭhenkhatte dinhmun chu a târ lang chiang hle a ni.

12. Kan thlarau lam tichhe thei tûn laia thil ûmte chu engte nge ni?

¹² Thessalonika khuaa mi ṭhenkhat chuan chutiang chu an tawng pawh a ni thei. Tûn laiah chutiang thil chu a thleng ve thei em? Hun khawh ralna thilte chu a tam hle a. Social network hmanga inbiak pawh nân te, SMS leh e-mail chhiar leh chhân lêt nân te, mahni tuizâwng thil ûm nân te, a nih loh leh infiamna lam chanchin thar ber berte ngaihchân reng nântea hun hman ral zât chu han ngaihtuah teh. Hêng thiltihte zînga a engpawh hian Kristian rilru chu lapêngin, a ṭhahnemngaihna a hlohtîr thei a ni. Chu chuan eng rah nge a chhuah? Thinlung tih tak zeta ṭawngṭaina te, Pathian Thu zirna te, inkhâwm te, leh chanchin ṭha hrilhnate chuan a tuar mai thei a ni. Chutiang thilte avânga rilru nghîn thuaina chu pumpelh tûrin eng nge kan tih theih?

13. Sawi lâwk tawh angin, mi tam takte rilru put hmang chu eng nge ni a, kan rinna chu engin nge vênghim ang?

¹³ Kan tih ngei ngai thil pakhat chu kan hun hmâwr tawhzia hriat reng leh tûn hi ‘ni hnuhnûng’ a ni tih pawm duh lotute kawm a hlauhawmzia hriat reng hi a ni. Kan hun chungchângah hian tirhkoh Petera chuan: “Nuihsantute chu anmahni châkna anga awmin, nuihsan chungin an lo kal ang a, ‘A lo kal lehna thutiam chu khawiah nge? Siam tirh aṭangin engkim a awm pângngai angin chi thlahtute muthilh nî ata tawh kha a la awm zêl alâwm,’ an la ti ang,” tiin a ziak a ni. (2 Pet. 3:3, 4) Nî tina Pathian Thu chhiarna leh zir ziahna chuan kan awmna hun hmâwr tawhzia—‘ni hnuhnûnga’ kan awm tawhzia hre reng tûrin min ṭanpui ang. Sawi lâwk kalpênna chu hmân aṭang tawhin a awm a, vawiin thleng hian a la awm reng a ni. “Dân bawhchhepa” chu a la awm reng a, Pathian chhiahhlawhte a do zawm zêl bawk. Chuvângin, Jehova nî hnaih tawhzia rilrua kan vawn reng a ngai a ni.—Zep. 1:7.

14. Engtin nge Pathian rawngbâwlnaa inhman rengna chu invênhimna a nih?

¹⁴ Lalram chanchin ṭha hrilnaa tel ziahna chu harhvâng taka awm a, rilru nghînna pumpelh theih dân kawng ṭha ber a ni tih thiltawn chuan a târ lang a. Chuvângin, kohhran Lû, Krista Isua’n a hnung zuitute hnênah hnam tina mite zirtîra siam a, a thute pawm tûrin zirtîr tûra thu a pêk khân, anmahni vênghimtu tûr thurâwn a pe a ni. (Mt. 28:19, 20) A kaihhruaina anga thilti tûr chuan thu hrilhnaa ṭhahnem kan ngaih a ngai a ni. Thessalonika khuaa unaute khân thu hrilh leh zirtîr siamna chu tih tûr a nih vâng maia a rûn dâl chauhva thawk tûrah i ngai thei em? An hnêna Paula thu sawi hi hre chhuak leh rawh: “Thlarau chu timit suh ula: thu hrilte hmusit suh u,” tih hi.  (1 Thes. 5:19, 20) Kan zir leh mi dangte kan hrilh hêng hrilh lâwknate hi a va phûrawm tak êm!

15. Chhûngkuaa Pathian biakna neih hun chhûngin eng thil ṭangkai takte nge kan sawiho theih?

¹⁵ Thu hrilhnaa an thiamna tihhmasâwn tûra kan chhûngkuate ṭanpui kan duh chu hriatthiam awm tak a ni a. Chu mi hlen chhuah dân kawng khat chu chhûngkuaa Pathian an biaknaah rawngbâwlna chu pêng pakhata neih a ni tih unau tam takte chuan an hmu chhuak a ni. Chhûngkaw zînga mite’n ngaihventu an tawnte an bawhzui dân tûr sawiho pawh ṭangkai i ti mai thei a. An tlawhkîr leh dâwn hunah eng thu nge an sawi ang? Eng chungchângin nge chûng an va tlawhte ngaihsakna chu chawk tho zawm zêl thei ang? Eng huna va tlawh nge ṭha ber ang? Mi tam tak chuan chhûngkuaa Pathian biakna an neihna hun ṭhenkhat chu inkhâwmnaa sawiho tûrte inpuahchah nân an hmang a. Inkhâwmnaa chhânna pe tûrin i inpuahchah ṭha lehzual thei ang em? Chhânna i pêkna chuan i rinna a tichakin, rilru nghîn thuaina pumpelh tûrin a ṭanpui ang che. (Sâm 35:18) Ni e, chhûngkuaa Pathian biakna neihna chuan Bible-a hrilhfiah loh thila mi mal ngaih dân sawina leh rinhlelhna lakah a vênghim ang che u.

16. Hriak thih Kristiante chuan rilru nghîng lova awm chhan tûr eng nge an neih?

¹⁶ Kum tam tak chhûngin, Jehova chuan a mite chu Bible hrilh lâwkna hriat thiamna tam tak a pe a, chûng hrilh lâwknate kan ngaihtuah hian, lâwmman ropui tak kan dawn tûrte kan rinna chu a nghet lehzual a ni. Hriak thite chuan vânah Krista zâwm tûrin beiseina an nei a. Chu chu rilru nghîng lova awm chhan tûr a va ni tak êm! Thessalonika mite hnêna Paula lehkha thawna thute hi anmahniah kan hmehbel thei ngei ang: “Unau, Lalpa duhtakte u, thlarau tihthianghlim leh thutak âwiha . . . Pathianin a thlan che u avângin in chung thu-ah hian Pathian hnênah lâwmthu hril fo tûr rêng kan ni,” tih thu hi.—2 Thes. 2:13.

17. Eng fuihna thu nge 2 Thessalonika 3:1-5-ah kan hmuh?

¹⁷ Leia chatuan nunna beiseitute pawhin chutiang bawkin rilru nghîn thuaina pumpelh tûrin an bei tlat tûr a ni. Lei lam beiseina nei i nih chuan Thessalonika khuaa hriak thihte hnêna Paula ziak fuihna duhawm tak hi ngaihsak ang che. (2 Thessalonika 3:1-5 chhiar rawh.) Kan vai hian chûng thu duhawm takte chu kan hlut hle tûr a ni. Ni e, Thessalonika mite hnêna lehkha thawnte hian Bible-a hrilhfiah loh thila mi mal ngaih dân sawina emaw, rinhlelh awm ngaih dânte chungchângah emaw vaukhânna pawimawh tak a pe a ni. Tâwpna kan hnaih tawh hle lai hian, hêng vaukhânnate hi tûn laia Kristiante chuan an hlut hle a ni. (w13-E 12/15)