Thihna hi hmêlma hlauhawm tak a ni a. Kan chakna zawng zawngin kan do lêt a ni. Kan hmangaih tak tuemaw a thih hian chu chu kan âwih thei lo hial mai thei a. A nih loh pawhin, ṭhalai chak ṭha tak kan nih lai chuan thihnain kan chungah thla a zâr ngai lo tûrah kan ngai thei a—chu chu kan theih chhûng zawnga kan vawn tlat ṭhin ngaih dân dik lo a ni.

Hmân lai Pharaoa-te aia thih theih lohna ngaihtuah tam zâwk an awm meuh lo va. Anni chuan thihna hneh an tumna lamah anmahni nun—leh hnathawktu a sâng têlte nun—chu an hmang a ni. An thil zawn leh an hlawhchhamzia chu an pyramid sakte hian a târ lang a ni.

Chinese lalte chuan thih theih lohna chu kawng dang—thawnthua nunna tui—hmangin neih an tum ve bawk a. Lal Qin Shi Huang-a chuan a mithiamte chu thih theih lohna dawi zawng tûrin a ti a. Mahse, an thil siam tam takah chuan tûr hlauhawm tangkaraw tui a tel a, an thil siamte zînga pakhat chuan lalber nunna a la niin a lang a ni.

Kum zabi 16-naa Spanish mi ram thar hmuh chhuah tuma zin Juan Ponce de León-a chu an sawi dân chuan tar theih lohna tui hnâr zawngin Caribbean thliarkârah a zin a. Ani chuan chutianga a zawnna lamah, U.S.A Florida chu a hmu chhuak a, mahse a hnu kum rei lo têa America Ram Leilung Fate nêna an indonaah a thi ta a. Tar theih lohna tui hnâr chu hmuh chhuah a ni ngai lo rêng rêng a ni.

Pharaoate, hmân lai chinese lalte, leh ram thar hmuh tuma zin kual mite chuan thihna hneh chu an tum vek a. An tum dân kawng chu duh kher lo mah ila, kan zîngah tuin nge an thiltum chu ngainêp thei tehrêng ang? Kan vai hian thi lova nun reng chu kan duh vek si a.

Engvângin nge thihna chu chuti taka kan duh loh? Bible-in a chhan min hrilh a ni. Min Siamtu Pathian Jehova * chungchângah Bible chuan heti hian a sawi a ni: “Engkim hi an hun ṭheuhvah chuan mawi takin a siam a; mihring rilruah chuan chatuan a dah bawk a,” tiin. (Thuhriltu 3:11) Lei mawina chu kum 80 emaw vêl lek ni lovin, chatuana hmuh chu kan duh a. (Sâm 90:10) Chu chu thinlunga kan duhzâwng tak a ni.

Engvângin nge Pathianin kan rilru, a nih loh leh thinlungah “chatuan” a dah? Min tibeidawng mai mai tûr atân em ni? Chu chu thil ni thei a ni lo. Pathian chuan thihna chu hneh theih a ni ang tih min tiam zâwk mah a. Bible chuan thihna nuai bona leh Pathian thutiam chatuan nunna chungchâng chu a sawi nawn fo a ni.— “Thihna Chunga Hnehna” tih bâwm chu en rawh.

Isua Krista ngei chuan heti hian a sawi a ni: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin. (Johana 17:3) Chuvângin, thihna do lêt chu thil theih loh a ni lo. Mahse, Isua chuan Pathian chauhvin kan tân min hnehsak thei tih a sawi chiang thung a ni. (w14-E 01/01)