1. Kristian tleirâwl tam takte chuan eng angin nge rawng an bâwl?

HUN pawimawh takah kan awm a. Tûn hma zawng aiin, hnam tina mi maktaduai têlte chuan biakna dik lam an rawn pan a ni. (Thup. 7:9, 10) Tleirâwl tam tak chuan nun chhanhim thei Bible thutak hre thiam tûra mi dangte an ṭanpuina aṭangin thiltawn phûrawm tak takte an nei a ni. (Thup. 22:17) Tleirâwl ṭhenkhat chuan mite chu nun ṭha zâwk nei tûra ṭanpuiin Bible an zirpui a. Tleirâwl dangte chuan ṭawng dang hmanna thu hrilhna bialahte chanchin ṭha chu phûr takin an hril thung a ni. (Sâm 110:3; Is. 52:7) Jehova mite hna thawh mêkah hian engtin nge i tel tam lehzual theih ang?

2. Engtin nge Timothea entîrna chuan Jehova’n tleirâwlte mawhphurhna pêk a duhzia a târ lan? (A thupui chunga milem en rawh.)

² Tleirâwl i nih angin, a hnua Pathian rawng i bâwl theih nâna hun ṭha hlimawm tak hawnsak thei tûr che duh thlannate i siam thei a ni. Entîr nân, Lustra khuaa Timothea chuan kum 20 a tlin hma emaw, a pelh hnu deuh emawa missionary anga rawngbâwltîr thei tûr duhthlanna fingte a siam niin a lang. (Tirh. 16:1-3) Dodâlna nasa tak avânga Paula’n Thessalonika khuaa kohhran din thar a chhuahsan hnu thla tam pawh a liam hmain, tleirâwl Timothea chu Thessalonikaa kîr leh a, unaute tichak tûrin a tîr a ni. (Tirh. 17:5-15; 1 Thes. 3:1, 2, 6) Chu chanvo dawn avânga Timothea awm dân tûr chu i ngaihruat thei em?

3. Nuna duh thlanna i siam theih tawh azawnga pawimawh ber chu eng nge ni a, engtikah nge i siam theih?

³ Tleirâwl lai hi duh thlanna pawimawh takte siam hun a ni a. Mahse, duh thlanna pakhat chu a dang zawng aiin a pawimawh zual a ni—Jehova rawngbâwl tûra i thu tlûkna siam chu. Eng hun hi nge chu duh thlanna siam nâna ṭha ber? Jehova chuan: “I vânglai hian i siamtu hre reng rawh,” tiin a sawi. (Thur. 12:1) Pawm tlâka Jehova ‘hriat reng’ theih dân kawng awmchhun chu tih tak zeta a rawngbâwl hi a ni. (Deut. 10:12) I thinlung zawng zawnga Pathian rawngbâwl tûra thu tlûkna i siam chu i duh thlan theih tawh azawnga pawimawh ber a ni ang. Chu chuan i hma lam hun zawng zawng a nghawng dâwn a ni.—Sâm 71:5.

4. Jehova rawngbâwlna i thlan bâkah, duh thlanna pawimawh dang engte’n nge Pathian rawng i bâwl dân chu nghawng ang?

⁴ Jehova rawngbâwl tûra duh thlanna i siam chu i hma lam hun nghawng thei duh thlanna awmchhun erawh a ni lo. Entîr nân, nupui pasal i neih dâwn leh dâwn loh te, i neih tûr te, leh ei i zawn dân tûrte chu i ngaihtuah pawh a ni thei. Hêngte hi thu tlûkna pawimawh takte an ni a, mahse, tih tak zeta Jehova rawngbâwl i duh leh duh loh i thlan hmasak chu a finthlâk a ni. (Deut. 30:19, 20) Engvângin nge? Chûng duh thlannate chu a inkûngkaih vâng a ni. Inneihna leh hna thawh tûr chungchânga i duh thlanna chuan Pathian rawng i bâwl dân chu a nghawng ang a. (Luka 14:16-20 nên khaikhin rawh.) Chutiang bawkin, Pathian rawngbâwl i duhna chuan inneihna leh hnathawh chungchânga i duh thlanna chu a nghawng bawk dâwn a ni. Chuvângin, i nuna thil pawimawh berte chungchângah duh thlang hmasa ang che.—Phil. 1: 10, 11.

5, 6. Duh thlanna dik siamnain thiltawn ṭha tak a thlen dân sawi rawh.

⁵ Pathian rawngbâwl i thlan fel tawh chuan, Pathianin ti tûra a duh che chu i ngaihtuahin, a rawng i bâwl dân tûr chu i thlang thei a ni. Japan unaupa pakhat chuan heti hian a ziak a ni: “Kum 14 mi ka nih lai chuan, kohhran upa pakhat nên thu hrilhnaah kan inkawp a, ani chuan ka tui lo tih min hmu a. Zaidam takin: ‘Yuichiro, va haw la. I dawhkân kiangah ṭhuin, Jehova’n i tâna thil a tihsak che chu ngun takin va ngaihtuah rawh,’ tiin min hrilh a. A sawi ang chuan ka ti ta a. A nihna takah chuan, ni engemaw zât chu ka ngaihtuahin, ka ṭawngṭai a ni. Zawi zawiin, ka rilru put hmang chu a inthlâk ta a. Jehova rawngbâwl chu nuam ka ti ta hle a ni. Missionary-te chanchin chhiar chu nuam ka ti a, tih tak zeta Pathian rawngbâwl chu ka tum ṭan ta a ni,” tiin.

⁶ Yuichiro-a chuan heti hian a ziak zawm a ni: “Engtik hun emawa ram danga Jehova rawng min bawltîr thei tûr duh thlannate siam ka tum ta a. Entîr nân, Sâpṭawng zir ka thlang ta a. High school ka zawh hnu chuan, pioneer ka thawh theih nân Sâpṭawng zirtîrtua ṭan chu ka thlang ta a. Kum 20 mi ka nih chuan, Mongolia ṭawng ka zirin, Mongolia ṭawng hmang thuchhuahtute awmna group ka tlawh a. A hnu kum hnih, 2007-ah Mongolia ram chu ka tlawh a ni. Pioneer ṭhenkhatte nêna thu hrila kan han chhuah chuan, mi tam takte’n thutak an zawng tih ka hmu a, chu lai hmuna insawn a, ṭanpui chu ka duh ta a ni. Ruahmanna siam tûrin Japan-ah ka kîr leh a. Mongolia ramah chuan kum 2008 April thla aṭangin pioneer ka thawk ṭan a ni. He laiah hian nun a awlsam lo. Mahse, mite chuan chanchin ṭha chu an chhânglêt a, anni chu Jehova hnaih tûrin ka ṭanpui thei a. Ka duh thlanna siam chu nun kawng ṭha ber niin ka ngai a ni,” tiin.

7. Mahni tân eng duh thlanna nge kan siam ngai a, Mosia’n kan tân eng entawn tûr nge a siam?

⁷ Mi tinin Jehova Thuhretu anga an nun an hman dân tûrah duh thlanna an siam ṭheuh tûr a ni. (Jos. 24:15) Nupui pasal in neih dâwn leh dâwn loh te, in neih tûr te, a nih loh leh in hna  thawh tûr te chu kan hrilh thei lo che u. Zir nasat ngai vak lo hna chu i thlang ang em? Kristian tleirâwl ṭhenkhatte chu thingtlâng khaw rethei takah in awm a; mi dangte erawh chu khawpui hausa takah an awm thung. Khawvêl pumah hian miziaahte, theihnaahte, thiltawnahte, tuizâwngahte, leh thlarau lam dinhmunahte hian in inang lo nasa hle. Hmân lai Aigupta rama Hebrai tleirâwlte leh tleirâwl Mosia inang loh angin, nang pawh i danglam a ni thei. Ani chuan lal inah dinhmun ṭha zawng zawng a chang a, Hebrai mi dangte erawh chu sal an ni. (Ex. 1:13, 14; Tirh. 7:21, 22) Nangmahni ang bawkin, anni pawh hun pawimawh takah an awm a ni. (Ex. 19:4-6) Mi tinin an nun an hman dân tûr chu an thlan a ngai a. Mosia chuan duh thlanna dik a siam a ni.—Hebrai 11:24-27 chhiar rawh.

8. An nuna duh thlanna siam tum tleirâwlte tân eng ṭanpuina nge hmuh theih a nih?

⁸ Jehova chuan i tleirâwl laia duh thlanna finthlâk siam tûrin a ṭanpui che a. I dinhmun bîka i nunpui theih tûr thu bulte hmangin thu râwn a pe che a ni. (Sâm 32:8) Chu bâkah, ringtu i nu leh pate leh kohhran upate chuan chûng thu bulte i nunpui dân tûr ngaihtuah thiam tûrin an ṭanpui thei che a ni. (Thuf. 1:8, 9) I nakin hun tûr chunga nghawng ṭha nei tûr duh thlanna finthlâk siam tûra ṭanpui thei tûr che Bible thu bul pathum i lo ngaihtuah ang u.

9. (a) Engtin nge Jehova chuan zalên taka duh thlan theihna pea min chawimawi? (b) ‘Lalram zawn hmasakna’ chuan eng hun remchângte nge a siam?

⁹ Pathian Ram leh a felna chu zawng hmasa zâwk rawh. (Matthaia 6:19-21, 24-26, 31-34 chhiar rawh.) Jehova chuan zalên taka duh thlan theihna min pein min chawimawi a. Lalram chanchin hrilh nâna i tleirâwl lai hun i hman zât tûr a bithliah lo. Mahse, Isua chuan Lalram zawng hmasa tûrin thu bul ṭangkai tak min pe a ni. A thusawi i nunpui dân chuan Pathian i hmangaihzia te, ṭhenawmte i ngaihsakzia te, leh chatuan nun beiseina i ngaihhlutzia te a târ lang ang. Nupui pasal neih leh hna thawh chungchâng i ngaihtuah rualin, i duh thlanna siamte chuan i tisa lam thil a lungkhamtîr dâwn che nge ni a, Pathian Ram leh a felna atâna i ṭhahnemngaihna a târ lang zâwk dâwn tih ngaihtuah rawh.

10. Engin nge Isua chu tihlim a, eng duh thlannain nge tihlim ang che?

¹⁰ Mi dangte rawngbâwlsaknaah hlimna hmu rawh. (Tirhkohte 20:20, 21, 24, 35 chhiar rawh.) Isua chuan nunna atâna he thu bul pawimawh tak hi ngilnei takin min zirtîr a ni. Ani pawh a duhzâwng aia a Pa duhzâwng a tih avângin a hlim hle a. Thuhnuairawlhte’n chanchin ṭha an chhâng lêt hmuh chu nuam a ti a ni. (Lk. 10:21; Joh. 4:34) Mi dangte ṭanpuina aṭanga lo awm hlimna chu i tawng tawh pawh a ni thei a. Isua zirtîr thu bulte mila i nuna duh thlanna lian tham takte i siam chuan, i hlim ngei ang a, Pathian Jehova pawh i tihlim ngei bawk ang.—Thuf. 27:11.

11. Engvângin nge Baruka chuan a hlimna a hloh va, Jehova chuan eng zilhna nge a pêk?

¹¹ Kan hlimna nasa ber chu Jehova rawngbâwlna aṭanga lo awm a ni. (Thuf. 16:20) Jeremia lehkha ziaktu, Baruka chuan chu chu a theihnghilh a ni ngei ang. Engtik emaw aṭangin, Jehova rawngbâwlnaah hlimna a hmu tawh lo va. Jehova chuan: “Mahni tân thil ropui i zawng em ni? Zawng lo mai rawh: tîsa zawng zawng chungah thil ṭha lo ka rawn thlen dâwn si a, . . . mahse i nun zawng i kalna apiangah ka zuahsak hram ang che,” tiin a hrilh a ni. (Jer. 45:3, 5) Engtin nge i ngaih? Engin nge Baruka chu tihlim zâwk ang—thil ropui zawnnain nge, Pathian chhiahhlawh rinawm anga Jerusalem tihchiatnaa dam khawchhuahnain?—Jak. 1:12.

12. Eng duh thlannain nge Ramiro-a chu nun hlim tak neihtîr?

¹² Mi dangte rawngbâwlsakna aṭanga hlimna hmutu unaupa pakhat chu Ramiro-a hi a ni a. Ani chuan: “Andes Tlâng thingtlâng khuaa  chhûngkaw rethei tak aṭanga lo kal ka ni a. Chuvângin, ka uin university kalna tûr min tumsak a inhuam thu min hrilh chuan, chu chu ka tâna hun remchâng ropui tak a ni. Mahse, Jehova Thuhretute zînga pakhat anga baptisma ka channa a la rei lo va, pioneer pakhat chuan khaw tê pakhata a ruala thu hril tûrin min sâwm ve bawk a ni. Chutah chuan ka kal a, lu meh zirin, inchâwm nân dâwr ka hawng ta a ni. Mite Bible zirpui tûra kan han sâwm chuan, tam takin ngaihlu takin an chhâng lêt a. A hnuah chuan tual chhuak ṭawng hmang kohhran din thar chu ka zâwm ta a ni. Tûnah chuan hunbi kima rawng ka bâwlna chu kum sâwm a ni tawh a. Mite an ṭawng hman ngeia chanchin ṭha ka zirtîrna aṭanga hlimna ka neih chu hna dang eng mahin min pe thei lo vang,” tiin a sawi a ni.

13. Engvângin nge tleirâwl lai hi tih tak zeta Jehova rawngbâwl nâna hun ṭha tak a nih?

¹³ I vânglai hian hlim takin Jehova rawng chu bâwl rawh. (Thuhriltu 12:1 chhiar rawh.) Jehova rawng i bâwl theih nâna hna ṭha tak i neih phawt a ṭûl angin ngai suh. Tleirâwl lai hun hi Jehova rawng tih tak zeta bâwl ṭan nâna hun ṭha tak a ni. Tleirâwl tam tak chuan chhûngkaw mawhphurhna an la nei tam lo va, chanvo harsa takte thawk tûrin hrisêlna leh chakna an nei a ni. I tleirâwl lai hian Jehova tân eng nge tih i duh? Pioneer thawh i tum pawh a ni thei a. Ṭawng dang hmanna thu hrilhna bialah thawh i duh pawh a ni thei. A nih loh leh, i awmna kohhranah rawngbâwlnaa inhman tam lehzual dân kawng i dap pawh a ni thei bawk. Pathian rawngbâwlnaa i thiltum chu engpawh ni se, mahni i inchâwm pawh a ngai dâwn a ni. Chu mi atân heti hian inzâwt rawh: Eng ang hna nge ka thlan ang a, chu hna atân chuan eng anga rei nge zir ngai ang? tiin.

14. Nakin hun atâna ruahmanna siam hunah, eng thilah nge kan fîmkhur ngai?

¹⁴ Bible thu bul kan ngaihtuah tâk pathumte chuan hna thawh tûr i thlan dâwn hunah a ṭanpui thei che a ni. In school zirtîrtute chuan tualchhûnga hna thawh tûr awmte chungchâng chu engemaw chen an hre ngei ang a. Chanchinbua hna ruak târ lante emaw, hmêlhriatte emaw chuan tualchhûng emaw, rawngbâwl i tumna hmun emawa hna thawh tûr awmte chu a hrilh thei mai thei che a ni. Chûng thute chu a ṭangkai thei a—mahse fîmkhur rawh. Pathian hmangaih lotute chuan i thinlungah khawvêl hmangaihna tuh an tum thei si a. (1 Joh. 2:15-17) Khawvêlin a pêk theih thilte i han thlîr hian, i thinlung chuan awlsam takin a bum thei che tih chu theihngilh ngai suh.—Thufingte 14:15 chhiar rawh; Jer. 17:9.

15, 16. Hna thawh tûr chungchângah tuin nge kaihruai ṭha ber thei ang che?

¹⁵ I hnathawh tûr thlan theihte i hriatthiam hnu chuan, thurâwn ṭha tak i mamawh a ni. (Thuf. 1:5) Bible thu bulte êngah i hna thawh tûrte thlang tûrin tuin nge ṭanpui thei ang che? Jehova leh nangmah hmangaih a, nang leh i dinhmun hre chiangtute thusawi chu ngaithla ang che. Anni chuan i thiamna leh thiltumte chhût tûrin an ṭanpui ang che. An thusawi chuan i thiltumte ngaihtuah ṭha leh tûrin a ṭanpui mai thei che a. Jehova hmangaihtu nu leh pa i neih chuan, i tân malsâwmna an va ni êm! Tin, in kohhrana upate chu kaihruai thei tûr che thlarau lama mi puitling tak an ni bawk. Chu bâkah, pioneer-te leh bial kantute chu be rawh. Engvângin nge hunbi kima Pathian rawngbâwl tûra duh thlanna an siam? Engtin nge pioneer an thawh ṭan a, engtin nge an inchâwm? An rawngbâwlna aṭangin eng lungawina nge an neih? tiin zâwt ang che.—Thuf. 15:22.

¹⁶ Nangmah hre chiangtu che chuan thurâwn fing tak a pe thei che a ni. Entîr nân, school-a lehkha zir i peih loh avângin high school chawlhsan a, pioneer thawk duh lo ni ta ang la. Nangmah hmangaihtu che chuan i thiltum chu hre thiamin, school chuan awlsam taka tlâwm mai ṭhîn lo tûra a ṭanpui theih dân che hre thiam tûrin a ṭanpui thei che a ni; chu mizia chu tih tak zeta Jehova rawngbâwl duhte tâna neih ngai mize pawimawh tak a ni.—Sâm 141:5; Thuf. 6:6-10.

17. Eng thu tlûknate nge kan pumpelh ngai?

¹⁷ Jehova rawngbâwl zawng zawngte chuan thlarau lam atâna thil hlauhawm—Pathian lak aṭanga la hrang thei thununnate chu an tawng ang. (1 Kor. 15:33; Kol. 2:8) Mahse, hnathawh ṭhenkhat chu a dang aiin thlarau lam atân a hlauhawm zâwk thei a ni. In bial chhûngah hna engemaw tak an thawh hnua ‘an rinna kawnga lawng keh anga keh chhe ta’ mi ṭhenkhat an awm em? (1 Tim. 1:19) Pathian nêna in inlaichînna tichhe thei thu tlûknate siam loh chu a finthlâk hle ngei ang.—Thuf. 22:3.

18, 19. Miin Jehova rawngbâwl châkna a la neih loh chuan, eng nge a tih ang?

¹⁸ I thinlunga Jehova rawngbâwl châkna i neih tawh chuan, Pathian chhiahhlawh tleirâwlte neih hun remchâng ṭhate chu nei ang che. He hun phûrawm taka Jehova rawng bâwltîr thei tûr duh thlannate chu siam ang che.—Sâm 148:12, 13.

¹⁹ Kawng lehlamah chuan, Jehova rawngbâwl châkna i la neih loh chuan eng nge i tih ang? I rinna tihchak tum chho zêl rawh. Tirhkoh Paula chuan Pathian malsâwm theih tûr nun kawng ûm tuma a beihna a sawifiah hnuah: “Eng kawngah pawh rilru danglam pu in lo nih chuan, chu pawh chu Pathianin a la hriattîr ang che u. Engpawh ni sela, kan thlen chin aṭang khân hma i sâwn zêl ang u,” tiin a ziak a ni. (Phil. 3:15, 16) Pathian hmangaihna leh a thurâwn fing takte chu ngaihtuah chhunzawm zêl rawh. I tleirâwl laia thu tlûkna finthlâk siam tûrin mi dang zawng aia ṭhain Jehova chuan a ṭanpui thei che a ni. (w14-E 01/15)