1, 2. (a) Tu inneihnain nge a bîk takin vânah hlimna thlen ang? (b) Eng zawhnate nge chhuak?

INNEI tûra inbuatsaih nân hun a duh rei ṭhîn a. Mahse, tûna kan sawiho tûr erawh chu inneihna dang lam bîk tak—lal inneihna chungchâng a ni. Han ngaihtuah teh! Inbuatsaih nân kum 2,000 vêl hman a ni tawh a. Tûnah chuan mo neih hun chu a thleng ṭêp tawh a ni. Nakin lawkah Lal in chu rimawi hlimawm takin a khat ang a, vân mipui chu: “Halleluia, Lalpa kan Pathian Engkimtitheia chuan ro a rêl tâk hi. Hlim takin lâwm ila, amah i chawimawi ang u, Berâm No nupui neih chu a hun ta si a, a nupui pawh a inpeih tawh,” tiin an au chhuak dâwn a ni.—Thup. 19:6, 7.

² A nupui neih avânga vâna hlimna thlentu tûr “Berâm No” chu tudang ni lovin, Isua Krista a ni a. (Joh. 1:29) Inneihna atân engtin nge a inthuam? A nupui tûr chu tu nge ni? Mo tûr chu inneihna atân engtin nge a lo inbuatsaih? Engtikah nge inneihna chu a thlen ang? He inneihna hian vânah hlimna a thlen ang a; mahse, leia chatuana nun beiseitute chuan chu hlimna chu an ṭâwmpui ve ang em? Sâm 45-na kan bih chian  chhunzawm hian chûng zawhnate chhânna hriat châkawm takte chu kan hre dâwn a ni.

3, 4. (a) Mo Neitu inneihna silhfên chungchângah eng nge sawi a nih a, a hlimna chu engin nge belhchhah? (b) Mo Neitu hlimna ṭâwmpuitu “lalho fanute” leh “lalnu” chu tute nge an nih?

³ Sâm 45:8, 9 chhiar rawh. Mo Neitu, Isua Krista chu lal inneihna silhfên ropui tak a inbel a. Inâwm takin, a silhfên aṭangin “rimtui tui ber chi,” murra leh thakthîng rimtui tak a chhuak a, chûng chu Israel rama hriak thianghlim siam nâna hman chi a ni.—Ex. 30:22-25.

⁴ A lal ina vân rimawi chuan a nupui neih hun a hnai tawh tih a hriattîr avângin Mo Neitu chu a tihlim lehzual a. A hlimna chu “lalnu,” a nih loh leh lal ṭhian, Pathian inawpna pâwl vân lam pêng chuan a ṭâwmpui a, chutah chuan “lalho fanute” tia koh vântirhkoh thianghlimte an tel a ni. Vântirhkohte chuan: “Hlim takin lâwm ila, . . . Berâm No nupui neih chu a hun ta si a,” tia an puang chhuak hriat chu a va phûrawm êm!

5. Tu nge “Berâm No nupui” chu ni ta?

⁵ Sâm 45:10, 11 chhiar rawh. Mo Neitu tûr chu kan hre tawh a, a neih tûr mo chu tu nge ni ta ang? Ani chu mi pakhat ni lovin, Isua Krista lû a nihna kohhranho hmanga din mo pâwl chu a ni. (Ephesi 5:23, 24 chhiar rawh.) Anni chuan Messia Lalramah Krista nên ro an rêl ang. (Lk. 12:32) Thlarauva hriak thih hêng Kristian 1,44,00 te hi “Berâm No a kalna apianga zuitute chu an ni.” (Thup. 14:1-4) Anni chu “Berâm No nupui” lo niin, a hnênah vânah an chêng ve a ni.—Thup. 21:9; Joh. 14:2, 3.

6. Engvângin nge hriak thihte chu “lal fanu” tia koh an nih a, engvângin nge ‘an mite theihnghilh’ tûra tih an nih?

⁶ Mo la ni tûr chu ‘Aw, fanu’ tih chauh ni lovin “lal fanu” ti pawha koh a ni bawk. (Sâm 45:13) A nih leh “lal” chu tu nge ni? Hriak thih Kristiante chu Jehova “fate” anga lâk an ni a. (Rom 8:15-17) Hriak thihte chu vân lam mo an nih dâwn avângin: “I mite leh i pa ina mite chu theihnghilh rawh,” tia hrilh an ni a. Anni chuan ‘chung lama thil awmahte chuan an rilru an nghat tûr a ni a, leia thil awmahte chuan an nghat tûr a ni lo.’—Kol. 3:1-4.

7. (a) Engtin nge Krista chuan a nupui tûr chu a buatsaih? (b) Engtin nge mo chuan a pasal tûr, Mo Neitu chu a thlîr?

⁷ Kum zabi tam tak chhûngin, Krista chuan a nupui tûr chu a buatsaih a. Tirhkoh Paula chuan Krista’n “kohhranho a hmangaih a, an aia mahni a inpe ang khân, anni chu tuia sila thu chuan tifaiin a tihthianghlim theih nân; chutichuan kohhranho chu bawlhhlawh kai lo leh zûr lo leh, chutiang thil rêng pu lovin, thianghlim leh hmêlhem lova awm zâwkin, amah leh amah kohhranho ropui takah a inpe thei ang,” tiin a hrilhfiah a ni. (Eph. 5:25-27) Paula chuan hmân lai Korinth khuaa hriak thih Kristiante chu: “Pathian thîknain asin ka thîk che u ni; Krista hnênah chuan nula thianghlim angin ka pêk theihna tûr che uin, pasal pakhat ka hualsak si che u a,” tiin a hrilh a ni. (1 Kor. 11:2) Mo Neitu Lal Isua Krista chuan a nupui tûr thlarau lama ‘hmêl ṭhatna’ chu a ngaihlu a. Tin, mo chuan ani chu a “Lalpa” anga pawmin, a pasal la ni tûr angin ‘chibai a bûk’ a ni.

8. Engvângin nge mo chu a “ropui vêl vek” tia sawi chu thil âwm tak a nih?

⁸ Sâm 45:13, 14a chhiar rawh. Monu chu  lal inneihna atân a “ropui vêl vek a.” Thu Puan 21:2-ah mo chu khawpui, Jerusalem Thar ‘a pasal ela inchei’ anga khaikhin a ni a. Chu vân lam khawpui chuan “Pathian ropuina” a neiin a êng a, ‘lung man tam ber ang, jaspi lung ang mi a ni a, krustal lung angin a tle sur’ a ni. (Thup. 21:10, 11) Jerusalem Thar mawina chu Thu Puan buah mawi taka târ lan a ni. (Thup. 21:18-21) Fakna hla phuahtuin mo chu “ropui vêl vek” anga a sawi pawh hi a mak lo ve! Tihah chuan, lal inneihna chu vâna thleng tûr a ni si a.

9. Mo an rawn hruaina “lal” chu tu nge ni a, mo chu engtin nge a inthuam?

⁹ Mo an hruaina Mo Neitu chu Messia Lal a ni a. Ani chuan mo chu a buatsaih a, ‘tuia sila thu chuan tifaiin a tithianghlim a ni.’ Mo chu ‘thianghlim leh hmêlhem lo’ a ni bawk. (Eph. 5:26, 27) Chu mi hun atân chuan mo chu inâwm takin a inthuam ngei ang. Chutiang chuan a inthuam ngei a ni! “A silhfên chu rangkachaka zeh mawi a ni. Puan ṭhui mawi sinin lalber hnênah an hruai ang.” Berâm No nupui neihna atân chuan, “puan zai sîn fai tak vâr tak sin an phal a, puan zai sîn chu mi thianghlimte thiltih fel a ni si a.”—Thup. 19:8.

10. Berâm No chuan engtikah nge nupui a neih ang?

¹⁰ Thu Puan 19:7 chhiar rawh. Eng hunah nge Berâm No chuan nupui a neih ang? Innei tûrin ‘a nupui chu a inpeih tawh’ mah se, a dawta Bible chângte chuan inneihna chungchâng a sawi lo. Chu ai chuan, hrehawm nasa tak tâwp lam chungchâng chu chiang takin a sawi zâwk a ni. (Thup. 19:11-21) Chu mi awmzia chu Mo Neitu tûr lal chuan a hneh famkim hmain inneihna chu a thleng tihna a ni em? Ni lo ve. Thu Puan bua inlârnate chu a thlen dân indawta târ lan a ni lo va. Sâm 45-naah khân, lal inneihna chu Lal Isua Krista’n a khandaih a vawn a, a hmêlmate a ‘hneh zêl’ hnuah a thleng a ni.—Sâm 45:3, 4.

11. Krista’n a hneh famkim dân tûr indawt chu eng nge ni?

¹¹ Chuvângin thilthleng indawt dân tûr chu a hnuaia mi ang a ni ang tih kan sawi thei a ni: A hmasain, khawvêla sakhaw dik lo zawng zawng, Babulon Khaw Ropui “nawhchizuar” chunga rorêlna a thleng ang. (Thup. 17:1, 5, 16, 17; 19:1, 2) Tichuan, Krista chuan leia Setana kalhmang suaksual la bâng zawngte chu ‘Pathian Engkimtitheia ni ropuia indona,’ Armageddon-ah tiboralin Pathian rorêlna keng kawh tûrin a kal chhuak ang. (Thup. 16:14-16; 19:19-21) A tâwpah, Râldo Thiam Lal chuan Setana leh a ramhuaite leilâwta paih lûtin, engmah ti thei lovin a siam dâwn a ni.—Thup. 20:1-3.

12, 13. (a) Engtikah nge Berâm No chuan nupui a neih ang? (b) Vâna Berâm No nupui neihna avângin tute nge hlim ang?

¹² Kristian hriak thihte’n Krista lo awm leh chhûnga an lei lam nun an hman zawh chuan vân nunna nei tûra kaihthawh nghâl an ni a. Babulon Khaw Ropui tihchhiat a nih hnu hun engemawah chuan Isua’n a hnênah mo pâwla mi a la bângte a la khâwm vek dâwn a ni. (1 Thes. 4:16, 17) Chuvângin, Armageddon indona a inṭan hmain “mo” pâwla mi zawng zawngte chu vânah an awm vek tawh ang. Chu indona zawh hnuah chuan Berâm No nupui neihna chu a thleng ang. Chu inneihna chu hun hlimawm tak a va ni dâwn êm! Thu Puan 19:9 chuan: “Berâm No nupui neihna ruaiṭheha sâwmte chu an eng a thâwl e,” tiin a sawi a ni. Mo pâwla mi, 1,44,000-te chu an hlim hle ngei ang. Mo Neitu Lal pawh chu ‘a rama a dawhkana eia bâr tûr’ a lal  ṭhiante kim taka a bula an awm tawh dâwn avângin a hlim hle ang. (Lk. 22:18, 28-30) Mahse, Berâm No nupui neih avânga hlim chu Mo Neitu leh mo chauh an ni lo vang.

¹³ Kan hriat tawh angin, vâna mite chu: “Hlim takin lâwm ila, amah [Jehova] i chawimawi ang u, Berâm No nupui neih chu a hun ta si a, a nupui pawh a inpeih tawh,” tiin inlungrual takin an zai a ni. (Thup. 19:6, 7) Mahse, leia Jehova chhiahhlawhte chungchâng hi eng nge ni ve le? Chu hlimnaah chuan an tel ve ang em?

14. Sâm 45-naa târ lan angin, tute nge “mo ṭhian nulahote” chu?

¹⁴ Sâm 45:12, 14b, 15 chhiar rawh. Zâwlnei Zakaria chuan tâwpna hunah chuan, hnamte chuan thlarau lam Israel a la bângte hlim taka an kawm tûr thu a sawi lâwk a. Heti hian a ziak a ni: “Chûng nîahte chuan heti hi a la ni ang a, mi sâwm, hnam ze tinrêng aṭanga lo chhuakte chuan Juda mi pakhat fênfualah an vuanin an chelh ang a, i hnênah Pathian a awm tih kan hriat avângin i hnênah kan kal ve dâwn e, an ti ang,” tiin. (Zak. 8:23) Sâm 45:12-ah chuan hêng entîr nei “mi sâwmte” hi “Tura fanute” leh “mi zînga hausate” anga sawi an ni. Anni chuan hriak thih a la bângte hnênah thilpêk an rawn keng a, ‘an khawngaihna leh thlarau lam ṭanpuina’ an dîl a ni. Kum 1935 aṭang khân mi maktaduai tam takte chu hriak thih a la bângte zârah ‘felnaah an hawi kîr’ a ni. (Dan. 12:3) Hêng hriak thih Kristiante ṭhian rinawm takte hian an nun an tithianghlim a, thlarau lama nula thianghlim an lo ni ta a. Hêng mo “ṭhian nulahote” hi Jehova hnênah an inpumpêk  a, Mo Neitu Lal khua leh tui rinawm tak an nihzia an lantîr bawk a ni.

15. Engtin nge mo “ṭhian nulahote” chuan leia la awm mo pâwl zînga mite nên hna an thawh tlân?

¹⁵ Mo pâwl a la bângte chu hêng ‘a ṭhian nulahote’n’ lei pum puia “he Ram chanchin ṭha” hrilhnaa taima taka an ṭanpui avângin a bîk takin an lâwm hle a. (Mt. 24:14) “Thlarau leh mo chuan, ‘Lo kal rawh,’ an ti,” mai ni lovin, a hria apiangte pawhin “Lo kal rawh,” an ti bawk a ni. (Thup. 22:17) Ni e, “berâm dang” chuan mo pâwla hriak thihte’n “Lo kal rawh,” an tih chu an hria a, mo rual chuan leilung luahtute chu “Lo kal rawh,” tiin an sâwm ve a ni.—Joh. 10:16.

16. Jehova chuan berâm dangte chu eng chanvo nge a pêk?

¹⁶ Hriak thih a la bângte chuan an ṭhiante chu an hmangaih a, Mo Neitu Pa, Jehova chuan leia berâm dangte chu vâna Berâm No nupui neih hlimpui theihna chanvo a pe ve tih an hriat avângin an lâwm hle bawk. Hêng an “ṭhian nulahote” hi “lâwm tak leh hlim takin an hruai ang” tih sawi lâwk a ni. Ni e, leia chatuana nun beiseina neitu, berâm dangte chuan vâna Berâm No nupui neih huna hlimna awm chu an ṭâwmpui ve dâwn a ni. Thu Puan bu chuan “mipui tam tak” chu “lalṭhutphah hmaah leh Berâm No hmaa ding” anga a târ lang chu a âwm hle. Anni chuan Jehova thlarau lam biak in lei lam hungchhûng kawtlaiah a rawng an bâwl a ni.—Thup. 7:9, 15.

17, 18. Engtin nge Berâm No nupui neihna chuan rah a chhuah a, Kum Sâng Rorêl chhûngin Krista chu tute tân nge pa a nih ang?

¹⁷ Sâm 45:16 chhiar rawh. Krista mo “ṭhian nulahote” chu vân lam inneihnain khawvêl tharah rah a chhuah tih an hmuh hunah an lâwm lehzual ang. Mo Neitu Lal chuan lei lam a rawn ngaihsak ang a, lei lama a “pate” chu a khaitho vang a, anni chu a lei lam “fate” an lo ni ang. (Joh. 5:25-29; Heb. 11:35) Hêng mite zîng aṭang hian ‘lei chung zawng zawnga mi liante’ a ruat ang a. Krista chuan khawvêl thara hmahruaitu tûrin, tûn laia upa rinawmte zîng aṭangin mi dangte pawh a ruat ngei a rinawm bawk.—Is. 32:1.

¹⁸ Kum Sâng Rorêl chhûngin, Krista chu mi dangte tân pawh pa a ni bawk ang. Leilung zawng zawnga awm chatuan nunna changtute chuan Isua tlanna inthawina an rin avânga chang an ni ang a. (Joh. 3:16) Chutiang chuan Krista chu an “Chatuan Pa” a lo ni ang.—Is. 9:6, 7.

19, 20. Sâm 45-naa târ lan thilthleng phûrawm takte chuan tûn laia Kristian dik zawng zawngte chu engtin nge a nghawng?

¹⁹ Sâm 45:1, 17 chhiar rawh. Sâm 45-a chhinchhiah thilthlengte chuan Kristian zawng zawngte a khawih tel tak zet a ni. Leia la bâng hriak thihte chu an unaute leh Mo Neitu nêna vâna an awm tlân theih thuai dâwn avângin an phûr hle a. Berâm dangte chu an Lal ropui hnuaia intulût lehzual tûra chêttîrin an awm a, leia a la bâng mo pâwl zînga mite an kawm theih avângin an lâwm hle a ni. An inneih hnuah chuan, Krista leh a rorêlpuite chuan leia awmte chungah malsâwmna chhiarsên loh an vûr ang.—Thup. 7:17; 21:1-4.

²⁰ Messia Lal chungchânga ‘thil ṭha’ lo thleng famkim tûrte kan nghah rual hian, ‘a hming hriattîr’ tûra chêttîrin kan awm a ni lâwm ni? ‘Kumkhaw tlaitluana’ Lalber chawimawitu tûr zînga mi i ni ṭheuh vang u. (w14-E 02/15)