Dinhmun manganthlâk tak takte chuan kan chungah nghawng ṭha lo tak a nei thei a. Chûngte chuan kan ngaihtuahna zawng zawng a lain, min tichau thei a, nun kan thlîr dân pawh a nghawng thei a ni. Hmân lai Israel Lal Davida chuan harsatna tam tak a tâwk a. Engtin nge a hmachhawn? Fakna hla rilru khawih takah, Davida chuan heti hian a chhâng a ni: “Ka awin LALPA chu ka au va; ka awin LALPA hnênah khawngaihna ka dîl ṭhîn. A hmâah ka mangan thu ka sawi a; a hmâah ka buaina ka hriattîr ṭhîn. Ka thlarau ka chhûngah a chauh lai khân, nangmah ngeiin ka kawng chu i hria,” tiin. Ni e, Davida chuan inngaitlâwm takin Pathian hnênah ṭanpuina a dîl a ni.—Sâm 142:1-3.

Fakna hla dangah Davida chu heti hian a zai a ni: “LALPA hnênah thil pakhat ka dîl a, chu mawlh chu ka zawng ang; LALPA mawizia hmu tûr leh, a biak in chu ngaihsânna nêna en tûrin ka dam chhûng zawnga LALPA ina ka awm reng theihna tûr chu,” tiin. (Sâm 27:4) Davida chu Levia thlaha mi a ni lo va, mahse chutih laia biakna dik hmunpui ber, biak bûk hungchhûng thianghlim pâwn lama a ding chu han mitthla teh. A thinlung chu lâwmnaa a khah avângin ‘Jehova mawizia thlîr tûra’ chuta a dam chhûng zawng awm mai chu a duh a ni.

“Mawizia” tih thu mal hi “ngaihtuahna, rilru vei zâwng, a nih loh leh hriat theihna nêna inrem leh chûng tâna ṭha” thilte nêna thlunzawm a ni a. Davida chuan biakna atâna Pathian ruahmanna siam chu engtik lai pawhin ngaihsânna nên a thlîr ṭhîn a. Chuvângin, ‘Davida neih ang rilru put hmang chu ka nei ve em?’ tiin kan inzâwt tûr a ni.

Kan hun lai hian, Jehova’n amah kan pan nâna ruahmanna a siam chu hmuh theih thil ruangâm neiah a innghat lo va. Pathian thlarau lam biak in ropui—biakna dik atâna ruahmanna thianghlim--nên a inkûngkaih zâwk a ni. * Chu ruahmanna ngaisâng taka kan thlîr tlat chuan, keini pawhin ‘Jehova mawizia chu kan thlîr’ thei ang.

Biak bûk luhna hmaa hûn dâra siam hâlral thilhlan hlanna maichâm kha han ngaihtuah teh. (Ex. 38:1, 2; 40:6) Chu maichâm chuan Pathianin inthawina atâna hlan Isua mihring nun a pawm duhna a entîr a ni. (Heb. 10:5-10) Chu miin kan tâna awmzia a neih chu ngaihtuah teh! Tirhkoh Paula chuan “hmêlma kan nih lai maha a Fapa thihna avânga Pathian nêna lo inrem tawh kan nih” thu a ziak a ni. (Rom 5:10) Isua thisen chhuaka rinna târ langin, Pathian ṭhian nihna aṭanga lo awm duhsakna leh rin hlawhna kan nei thei a. Chuta ṭang chuan, “Jehova nêna inṭhian ṭhatna” chu kan nei a ni.—Sâm 25:14, NW.

Kan “sualte thai bo” a nih avângin, Jehova hnên ata “harh hunte,” a nih loh leh hahdam hun kan tawng a. (Tirh. 3:19) Kan dinhmun chu khaihlum a nih hun tûr nghâk rengtu lung in tâng, tûn hmaa a thilsual tih avânga inchhîr a, nasa taka inthlâktlengtu nên a inang a ni. Chu a inthlâkthlengna chu hmuin rorêltu ngilnei tak chuan thi tûra a chung thu rêlna chu a hlihsak ta a. Chu lung in tâng pa tân chuan a hahdamthlâkin, a va hlimawm dâwn êm! Chu rorêltu angin, Jehova chuan inlâm lêtte chungah duhsakna târ langin, thi tûra thiam loh chantîr an nihna chu a hlihsak a ni.

Davida’n Jehova ina biakna dik hmêl hmang a hmuh theihte zîngah chuan Israel mipui pungkhâwm te, vântlâng hmaa Dân thu chhiar leh hrilhfiah te, englo rimtui hâl te, leh puithiam leh Levia thlahte’n rawngbâwlna thianghlim an hlante a tel a. (Ex. 30:34-38; Num. 3:5-8; Deut. 31:9-12)  Hmân lai Israela chûng biakna dik hmêl hmangte chuan tûn laiah anpui a nei a ni.

Hmân lai ang bawkin tûn laiah pawh, “unaute inngeih dial diala awm khâwm hi a va ṭhain, a va nuam êm!” (Sâm 133:1) Khawvêl puma “unauhote” zîngah nasa taka punna a thleng a. (1 Pet. 2:17) Kan inkâwmnaahte chuan Pathian Thu chu vântlâng hmaa chhiar leh hrilhfiah a ni. Jehova chuan a inawpna pâwl hmangin, kaihhruaina hnianghnâr takin min pe a. Mi mal leh chhûngkua anga zir tûr thu leh hla chhuah tam tak pawh a awm bawk a ni. Governing Body member pakhat chuan: “Jehova Thu chhût ngunna, a awmzia ngaihtuahna, leh hriatna leh hriatthiamna zawnna chuan ka men chhûng zawng chu thlarau lama hausakna leh lungawinain a tikhat a ni,” tiin a sawi. Ni e, ‘kan nunna atân hriatna chu tui tak a ni thei a ni.’—Thuf. 2:10.

Tûn laiah Pathian chhiahhlawhte pawm tlâk ṭawngṭaina chu nî tin Jehova hnênah a chho ṭhîn a. Jehova tân chuan chutiang ṭawngṭaina chu englo rimtui tak ang a ni. (Sâm 141:2) Inngaitlâwm taka a hnêna kan ṭawngṭaina hian Pathian Jehova a tilâwm tih kan hria a, chu chuan rilru a va tinuam tak êm!

Mosia chu : “LALPA kan Pathian mawina chu kan chungah awm rawh se; kan kut hnathawh hi kan chungah tinghet bawk ang che,” tiin a ṭawngṭai a. (Sâm 90:17) Kan rawngbâwlnaah ṭhahnemngai taka kan thawh hian, Jehova’n kan kut hnathawh chu mal a sâwm a ni. (Thuf. 10:22) Thutak hre tûrin mi ṭhenkhat chu kan ṭanpui tawh pawh a ni mai thei a. Mite ngaihsak lohna te, hrisêlna ṭhat lohna te, rilru lama hrehawm tawrhna te, a nih loh leh tihduhdahnate tuar reng chungin rawngbâwlnaah kum tam tak kan lo thawk tawh pawh a ni thei. (1 Thes. 2:2) Mahse, ‘Jehova mawina’ chu kan hmuin, kan Pa vâna mi chuan kan thawhrimna chu a lâwm hle tih kan hria a ni lâwm ni?

“LALPA chu ka ro chan tûr leh ka no chan tûr chu a ni: nangin ka chanpual chu mi tihngheh sak ṭhîn a. Tehna hruaite chu hmun nuam takahte ka pualah a tla ta hlauh a ni,” tiin Davida chu a zai a. (Sâm 16:5, 6) Davida chu a “ro chan”—Jehova nêna inlaichînna pawm tlâk leh a rawngbâwl theihna chanvo hlu tak a neih—avângin a lâwm a. Davida angin, harsatna tam tak kan tawng mai thei a; mahse, thlarau lam malsâwmna tam tak kan dawng thung a ni. Chuvângin, biakna dikah lâwm zêlin, Jehova thlarau lam biakin chu ‘ngaisâng takin i en’ reng ang u. (w14-E 02/15)