1, 2. Eng chhûngkaw dinhmun hrangte nge kan nih hlawm a, thlarau lama kan ṭobul chi hrang hrangte chu engte nge ni?

JEHOVA chu chhûngkaw dintu a ni a. (Eph. 3:14-19) Chhûngkaw pakhata mi pawh ni mah ila, mizia leh dinhmun hrang hrang kan nei a ni. I pian aṭanga i puitlin thlengin i nu leh pate bulah i awm pawh a ni thei a. Mi dangte chuan an nu leh pate chu natna avâng te, accident avâng te, a nih loh leh chhiatna dang avângtein an chân pawh a ni thei. Mi dang lehte chuan an nu leh pate takngial pawh an hre lo a ni.

² Jehova betu chhûngkaw zînga mite thlarau lam ṭobul pawh a inang lo va. Mi ṭhenkhat sawi angin ‘thutaka sei lian’ i ni mai thei a, i nu leh pate chuan Pathian thu bulte an zirtîr che a. (Deut. 6:6, 7) A nih loh leh Jehova chhiahhlawh dangte thu hrilhna aṭanga thutak zir mi sâng tam tak zînga mi pawh i ni thei a ni.—Rom 10:13-15; 1 Tim. 2:3, 4.

3. Inanna eng nge kan neih ṭheuh?

³ Kan sawi tâk ang dinhmun hrang hrangte nei mah ila, kan vai hian inanna ṭhenkhat kan nei a. Adama thuâwih lohna sawhkhâwk  chu kan tuarin, ṭhat famkim lohna te, sual te, leh thihnate chu kan rochung bawk a ni. (Rom 5:12) Chuti chung pawhin, betu dikte kan nih angin Jehova chu “kan Pa” tiin inâwm takin kan ko thei a. Hmân laia Pathian mi thlante chungchâng sawiin Isaia 64:8-na chuan: “Aw LALPA, nang chu kan pa i ni,” tiin a sawi a ni. Chu bâkah, Isua chuan lal ṭawngṭaina chu: “Kan Pa vâna mi, i hming zahawm rawh se,” tih thuin a ṭan bawk a ni.—Mt. 6:9.

4, 5. Kan Pa, Jehova chunga kan lâwmna tizual tûrin, eng nge kan ngaihtuah ang?

⁴ Kan Pa vâna mi chuan rinnaa a hming lamtute hnênah kan mamawh ngaihsakna leh vênghimna min pe a. Fakna hla phuahtu sawi dânin Pathianin: “[Betu dik chuan] ka chungah a hmangaihna a nghah tlat avângin ka chhanhim ang a: ka hming a hriat avângin hmun sângah ka hlâng ang,” tiin a sawi a ni. (Sâm 91:14) Ni e, Pathian Jehova chuan kan hmêlmate laka min chhanhimin, nuai bo kan nih loh nân a mite angin min vênghim a ni.

⁵ Kan Pa vâna mi chunga kan lâwmna tizual tûrin, thil pawimawh pathum i lo ngaihtuah ang u: (1) Kan Pa chu min Ngaihtuahsaktu a ni. (2) Jehova chu min Vênghimtu a ni. (3) Pathian chu kan Ṭhian ṭha ber a ni. Hêng thil pathumte kan ngaihtuah hian, Pathian nêna kan inlaichînna chhût ngun a, kan Pa anga amah kan chawimawi theih dân hriat chhuah chu a ṭangkai dâwn a ni. Jehova’n amah hnaihtute hnêna a tiam malsâwmnate ngaihtuah pawh a ṭangkai bawk ang.—Jak. 4:8.

6. Jehova chu ‘thilpêk ṭha zawng zawng’ Petu a nihna kawng khat chu eng nge ni?

⁶ “Thilpêk ṭha leh thilpêk famkim zawng zawng chu chung lam aṭangin êngte Pa hnên ata, a lo chhuk ṭhîn a ni,” tiin zirtîr Jakoba chuan a ziak a. (Jak. 1:17) Nunna ngei pawh hi Pathian hnên aṭanga thilpêk ropui tak a ni. (Sâm 36:9) Pathian duhzâwng tih nâna kan nun kan hman hian, tûnah malsâwmna tam tak kan dawng a, khawvêl tharah chatuana nun beiseina kan nei bawk a ni. (Thuf. 10:22; 2 Pet. 3:13) Mahse, Adama thu âwih lohna sawhkhâwk lungchhiatthlâk tak ngaihtuahin, engtin nge chu chu thil theih a nih?

7. Engtin nge Pathian chuan amah nêna inlaichînna ṭha kan neih theih dân kawng a hawn?

⁷ Jehova chu kawng tam takin min Ngaihtuahsaktu Ropui a ni tak zet a. Entîr nân, a khawngaihna chuan min chhan chhuak a ni. Ni e, kan vai hian sual nei kan ni a, kan lei lam pa hmasa ber hnên aṭangin ṭhat famkim lohna kan rochung a ni. (Rom 3:23) Mahse, Jehova chuan hmangaihna avângin, amah nêna inlaichînna ṭha kan neih theih dân kawng hawng tûrin hma a la a. Tirhkoh Johana chuan: “He miah hian Pathian hmangaihna kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian. He miah hian hmangaihna a awm, keimahnin Pathian kan hmangaih ka ti a ni lo va, amahin min hmangaih a, kan sualte thupha chawina ni tûrin a Fapa a rawn tîr ka ti a ni zâwk e,” tiin a ziak a ni.—1 Joh. 4:9, 10.

8, 9. Engtin nge Jehova chuan Abrahama leh Issaka hun laiin Ngaihtuahsaktu Ropui a nihzia a târ lan? (A thupui chunga milem chu en rawh.)

⁸ B.C.E. kum zabi 19-naah khân, thu âwih mihringte’n chatuana nunna an neih theih nâna Jehova chuan ruahmanna duhawm tak entîr neia târ langtu thil pakhat a thleng a. Hebrai 11:17-19-na chuan: “Rinnain Abrahama chu fiaha a awm khân Isaaka chu a hlân a; ‘Isaaka-ah hian i thlahte chhui an ni ang’ tih Pathian thutiam dawngtu chuan a fapa mal neih chhun chu a hlân a ni; mitthi pawh Pathian chuan a kai tho thei ang tih a ring a, thi hnu nung leh ang maiin a hmu kîr leh ta rêng a ni,” tiin a hrilhfiah a ni. Chu mi tlukpui  hmuh thiam chu thil harsa a ni lo. Jehova chuan a Fapa, Isua Krista chu khawvêla mihringte tân a hlân a ni.—Johana 3:16, 36 chhiar rawh.

⁹ Isaaka chu inthawi nâna a thihna laka chhan chhuah a nih avângin a va lâwm dâwn êm! A aiawha inthawina atân berâmpa thing hnawka tâng chu Pathianin a pêk avângin a lâwm hle ngei ang. (Gen. 22:10-13) Chu hmun chu “Jehova-jire,” tia koh a ni chu a mak lo a ni, Hebrai ṭawnga chu mi awmzia chu ‘Jehova’n A Ngaihtuah Ang’ tihna a ni.—Gen. 22:14.

10, 11. Tute’n nge ‘inremna rawngbâwlna hnaah’ hma hruai a, chu chu engtin nge an thawh?

¹⁰ Jehova chu Ngaihtuahsaktu Ropui a nih dân kan chhût ngun hian, Paula’n: “Heti hian kan ngaihtuah: Mi zawng zawng thih aiin mi pakhat a thi a, chuvângin mi zawng zawng chu an thi a ni; tin, a nungte chu anmahni tân an nun tawh loh va, an thih aia thia tholeha tân chuan an nun tawh zâwkna tûrin a ni, mi zawng zawng thih aiin a thih ni,” tia Isua Krista chanvo pawimawh tak a pawm angin lâwm takin kan pawm ve a ni.—2 Kor. 5:14, 15.

¹¹ Kristian hmasate khân Pathian an hmangaihna avâng leh a rawngbâwl theihna chanvo ropui tak chunga an lâwm avângin “inremna rawngbâwl hna” chu lâwm takin an thawk a. An thu hrilh leh zirtîr siam hna chuan mi rilru ṭha pute tân Pathian nêna lo inrem a, amah nêna inṭhianna nei a, a tâwpa thlarau lama a fate nih theihna kawng a hawng a ni. Tûn laiah, Jehova chhiahhlawh hriak thihte’n chutiang bawk rawngbâwlna chu an nei a. Pathian leh Krista aia palai hna an thawhna chuan mi rilru ṭha pute chu Jehova hîpa awmin, ringtu an ni thei a ni.—2 Korinth 5:18-20 chhiar rawh; Joh. 6:44; Tirh. 13:48.

12, 13. Engtin nge Jehova thilpêk tam tak chunga kan lâwmna kan târ lan theih?

¹² Ngaihtuahsaktu Ropui a nih anga Jehova chunga lâwmna avângin, lei lam beiseina nei Kristian zawng zawngte chuan Lalram thu hrilhnaah hriak thihte chu an thawhpui a. He hnaah hian Pathian thilpêk ropui tak dang, Bible chu kan hmang ṭangkai a ni. (2 Tim. 3:16, 17) Kan rawngbâwlnaa Pathian thâwk khum Thu chu thiam taka hmangin, mi dangte hnênah chatuana nun theihna hun remchâng kan pe a. He hnaa min ṭanpui tûrin, Jehova thilpêk dang—a thlarau thianghlim chu kan rinchhan ṭheuh a ni. (Zak. 4:6; Lk. 11:13) A rah chhuah Jehova Thuhretute Yearbook-a târ lante chuan rilru a khaw hle. Kan Pa leh Ngaihtuahsaktu fak nâna he hnaa tel hi chawimawina a va ni êm!

¹³ Pathian min pêk zawng zawngte thlîrin, heti hian kan inzâwt tûr a ni: ‘Jehova thilpêkte avânga a chunga ka lâwmna thûkzia târ lan nân rawngbâwlnaah theih tâwp ka chhuah em? Chanchin ṭha hriltu thiam lehzual ni tûrin eng kawngtein nge hma ka sâwn theih ang?’ tiin. Kan nuna Lalram dah hmasain Pathian thilpêk hlu takte avânga kan lâwmna chu kan târ lang thei a ni. Chutianga kan tih chuan, Jehova chuan kan mamawhte chu min ngaihsak ang. (Mt. 6:25-33) Pathian min hmangaihna avângin, amah leh a thinlung tilâwm tûra theih tâwp chhuah chu kan duh hle a ni—Thuf. 27:11.

14. Engtin nge Jehova chu a mite tâna Chhan Chhuaktu a nih?

¹⁴ Fakna hla phuahtu Davida chu: “Kei zawng rethei leh pachhe tak ka ni a, nimahsela LALPAN mi ngaihtuah ṭhîn a: nang chu mi ṭanpuitu leh mi chhanhimtu i ni,” tiin a zai a. (Sâm 40:17) Jehova chu a mite tân a pâwl angin, a bîk takin an hmêlmate’n nasa taka an tihduhdah a, an zar buai hunah Chhan Chhuaktu a ni fo a ni. Chutiang huna Pathian ṭanpuina leh thlarau lam chaw hnianghnâr tak min pêk reng avângin kan va lâwm tak êm!

15. Hmangaihna ngah tak pa berin a fa vênhim a tum dân entîrna sawi rawh.

¹⁵ Hmangaihna ngah tak pa ber chuan a fate mamawh a pe mai ni lovin, anmahni vênhim pawh a tum bawk a. Dinhmun hlauhawma an awm chuan chhan chhuah a tum ṭhîn a ni. Unaupa pakhat chuan a naupan laia thilthleng chu a hre reng a. A pa nên thu hrilhna aṭanga an haw lam chuan lui pakhat an kân a ngai a ni. Zîng lama ruah sûr nasa chuan lui tui chu a tilian a. A kân dân tûr awmchhun chu lung lian pakhat aṭanga a danga zuan kai a ni. A pa aia kal hmasain, a zuang kai a, lung pakhat rap pelhin, tuiah vawi hnih lai a tla a ni. A pain a dârah nghet taka rawn vuan vatin, tuia pil lo tûra a rawn chhan avângin a va lâwm tak êm! Kan Pa vâna mi chuan tui lian anga sawi theih tûr he khawvêl suaksual leh rorêltu, Setana lak ata min chhan chhuak a. Jehova chu kan beisei theih Vênghimtu ṭha ber a ni tih a chiang hle.—Mt. 6:13; 1 Joh. 5:19.

16, 17. Israel mite’n Amalek mite an beih lai khân Jehova’n engtin nge a ṭanpui a, a vênhim?

¹⁶ Jehova vênhimna duhawm tak chu Aigupta sal tânna aṭanga Israelte a chhan chhuah hnu, B.C.E. 1513-a Tuipui Sen an kân laia mak tak maia a vênhim khân a lang chiang hle a. Sinai Tlâng lam pana thlalêra an kal hnu khân, Rephidim hmun an rawn thleng a ni.

¹⁷ Genesis 3:15-a Pathian hrilh lâwkna ngaihtuahin, Setana chuan vêngtu nei lo anga lang Israelte beih theih dân kawng chu a dap nasa hle ngei ang. Chu chu Pathian mite hmêlma Amalek mite hmangin a ni. (Num. 24:20) Mi rinawm pali—Josua te, Mosia te, Arona te, leh Hura te—hmanga Jehova thil hlen chhuah hi han ngaihtuah teh. Josua’n Amalek mite a han beih lai chuan, Mosia, Arona, leh Hura chu a bul hnai tlâng chungah  chuan an awm a. Mosia’n a kut a phar chuan Israel mite chuan an hneh ṭhîn a. A bânte chu a lo kham chuan Arona leh Hura chuan a kut an dawmsak a ni. Chuvângin, Jehova ṭanpuina leh venhimnain ‘Josua chuan Amaleka leh a hote chu a tudawl’ ta a ni. (Ex. 17:8-13) Mosia chuan chu mi hmunah chuan maichâm a siam a, a hmingah chuan “Jehova-nissi” a vuah a, Hebrai ṭawngin a awmzia chu “Jehova Chu Ka Ban A Ni” tihna a ni.—Exodus 17:14, 15 chhiar rawh.

18, 19. Pathian chuan a chhiahhlawhte tân kan hun lai hian eng ang vênhimna nge a pêk?

¹⁸ Jehova chuan amah hmangaih a, a thu âwihte chu a vênghim a. Rephidim hmuna Israel mite ang khân, hmêlma kan hmachhawn hunah min vênghim tûrin Pathian kan rinchhan a ni. Jehova chuan a pâwl angin min vênghim fo va, Diabola beihna lak ata min vênghim ṭhîn a ni. Pathianin kan unau, Kristian tualdawihna vawngtute vawi tam tak a vênhim dân hi ngaihtuah teh. Entîr nân, Nazi hun lai khân German ramah leh 1930 chho bâwr vêl leh 1940 chho tîr lam khân ram dangah pawh chutiang thil chu a thleng a ni. Nuna thil tawnte leh Yearbook aṭanga kan hmuh, tihduhdahna hnuaia Pathian ṭanpuina an dawn dân chanchinte chhiarna leh ngaihtuahna chuan Jehova chu kan Inhumhimna anga kan rinna chu a tichak ang.—Sâm 91:2.

¹⁹ Kan invênhim nân, Jehova inawpna pâwl leh a thu leh hla chhuahte aṭangin hmangaih taka hriattîrna kan dawng ṭhîn a. Tûn hnaia chutiang hriattîrnate a ṭangkai dân chu han ngaihtuah teh. He khawvêl hi nawmsipbâwlna leh saruak lem leh thuziak chirhdupa a tân thuk tial tial laiin, Jehova chuan hriattîrna hmanhmawhthlâk takte leh nungchang hlauhawm laka invênna tûr ṭanpuina ṭangkai takte min pe a. Entir nân, social network hman dik lohna aṭanga ṭhian sual pumpelh tûrin pa ber zilhna ang chu kan dawng a ni. *—1 Kor. 15:33.

20. Kristian kohhran aṭangin eng vênhimna leh kaihhruaina nge hmuh theih a nih?

²⁰ Engtin nge “LALPA zirtîrin” kan awm tak zet tih kan târ lan theih? A thupêkte ṭha taka zâwmin kan târ lang thei a ni. (Is. 54:13) Kan awmna kohhran him takah hian, upa rinawm takte chuan Bible aṭanga ṭanpuina leh zilhna min pêk avângin kan mamawh kaihhruaina leh venhimna chu kan hmu a. (Gal. 6:1) Jehova enkawlna tam tak chu hêng ‘thilpêk,’ upate aṭangin kan dawng a ni. (Eph. 4:7, 8) Engtin nge kan chhân lêt ang? Inhuam taka intukluhna leh thu âwihna chuan Pathian malsâwmna a thlen a ni.—Heb. 13:17.

21. (a) Eng tih nge kan tum tlat ang? (b) A dawta thuziakah eng nge kan ngaihtuah ang?

²¹ Pathian thlarau thianghlim kaihhruaia awm tum tlatin, kan Pa vâna mi kaihhruaina chu i zâwm ang u. A Fapa, Isua Krista nun kawng chhût ngun leh a entawn tûr siam ṭha chungchuang zui chu kan tum tlat a ngai bawk a. Isua chuan thi khawp hiala thu a âwih avângin malsâwmna nasa tak a dawng a ni. (Phil. 2:5-11) Amah anga kan thinlung zawng zawnga Jehova kan rin chuan malsâwmna kan dawng ang. (Thuf. 3:5, 6) Chuvângin, Jehova chu tehkhin rual loh Ngaihtuahsaktu leh Vênghimtu a nih angin i rinchhan reng ang u. A rawngbâwl chu a hlimawmin, chanvo hlu a va ni êm! Kan Pain min ngaihsak dân a pathumna —a ṭhian nihna--kan ngaihtuahna chuan amah kan hmangaihna chu a tizual ang. A dawta thuziak chuan Jehova kan ṭhian ṭha ber a nih dân a thlûr bing ang. (w14-E 02/15)