1. Pathian Jehova anpuia siam an nih avângin, mihringte’n eng thilte nge an tih theih?

“PA SIAR, pa siar,” tih ṭawngkam hi kan hre fo ṭhîn a. Naupang tam tak chuan an nu leh pate chu a chhun hle ṭhin vâng a ni. Tihah chuan, naupangte chuan an nu leh pate mizia chu an la ṭhîn si a. Kan Pa vâna mi Jehova chu nunna Petu a ni a. (Sâm 36:9) A fate kan nih angin, engemaw chen chuan amah kan chhûn a ni. Ama anpuia siam kan nih avângin, thil awm dân chhûta thu tlûkna siam theihna kan nei a, inṭhianna nei a, vawn reng theihna pawh kan nei bawk.—Gen. 1:26.

2. Engvângin nge Jehova chu kan Ṭhian a lo nih theih?

² Jehova chu kan Ṭhian ṭha ber a ni thei a. Chutianga inṭhianna chu Pathian min hmangaihna leh amah leh a Fapa kan rinna avânga lo awm thei a ni. Isua chuan heti hian a sawi a ni: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin. (Joh. 3:16) Jehova nêna inlaichînna ṭha tak neite siam entîrna tam tak a awm a. Chûng zînga pahnih chu i lo ngaihtuah ang u.

3, 4. Jehova nêna inṭhianna chungchângah Abrahama leh a thlahte inan lohna chu eng nge ni?

³ Jehova chuan Israelte thlahtu chu “ka ṭhian Abrahama” tiin a ko a ni. (Is. 41:8) Chronicles pahnihna 20:7-na pawhin Abrahama chu Pathian ṭhian tiin a sawi bawk. Engin nge chu mi rinawm chu amah Siamtu nêna inṭhianna ṭha tak neihtîr thei? Abahama rinna hian a ni.—Gen. 15:6; Jakoba 2:21-23 chhiar rawh.

⁴ Abrahama thlah hmân lai Israel hnam pawhin atîrah chuan Jehova chu an Pa leh Ṭhian angin an nei a. Mahse, lungchhiatthlâk takin Pathian nêna an inṭhianna chu an hloh a ni. Engvângin nge? Jehova thutiam an rin loh avângin.

5, 6. (a) Engtin nge Jehova chu i Ṭhian a lo nih? (b) Eng zawhnate’n nge kan ngaihsak phu?

⁵ Jehova chanchin i zir tam poh leh amah i rinna leh i hmangaihna chu a lo nghet zual sauh ṭhîn a. Pathian chu inlaichînna ṭha tak i neihpui theih, Mi tak tak anga i hriat ṭantirh lai kha han ngaihtuah lêt teh. Adama thu âwih lohna avângin kan vai hian suala piang kan ni tih i hria a. Mihring zawng zawngte hi Pathian laka ṭhenin an awm tih i hre thiam bawk a ni. (Kol. 1:21, 22) Tichuan, hmangaihna ngah tak kan Pa vâna mi chu min ngaihsak lova, hmun hla taka awm a ni lo tih i hre ta a. Isua tlanna inthâwina a ruahman tih i hriat a, chu ruahmanna chunga rinna i lantîr chuan, Pathian nêna inṭhianna chu i siam ṭan tihna a ni.

⁶ Kan han thlîr lêt leh hian, hetiang hian kan inzâwt thei a ni: ‘Pathian nêna kan inṭhianna kawngah hma ka sâwn em? Amah ka rinna chu a nghetin, ka Ṭhian duh tak, Jehova ka hmangaihna chu nî tin hian a ṭhang chho vem?’ tiin. Jehova nêna inlaichînna hnai tak nei hmân lai mi dang leh chu Gideona a ni. A entawn tûr siam ṭha tak chu ngaihtuahin, rilruah i vawng reng ang u.

7-9. (a) Gideona chuan eng thiltawn chhinchhiah tlâk tak nge a neih a, chu chuan eng nge a rah chhuah? (A thupui chunga milem chu en rawh.) (b) Engtin nge Jehova nêna inṭhianna kan neih theih ang?

⁷ A hnam puma Ram Tiam an luh hnu, Israelte chanchina hun buaithlâk tak chhûngin Rorêltu Gideona chuan Jehova rawng a bâwl a. Rorêltute bung 6-na chuan Jehova vântirhkohvin Gideona chu Ophra khuaah a tlawh tih a sawi a. Chutih lai chuan ṭhenawm ram Midian-hote chu Israelte tân an hlauhawm tak zet a ni. Chuvângin, Gideona chuan buh chu lovah chîl lovin, a thuhrûk vat theihna tûr grêp sâwrna khurah a chîl a ni. Gideona chuan vântirhkoh a rawn inlan a, “mi chak huaisen” tia a koh chuan mak a ti a, Aigupta aṭang Israelte chhan chhuaktu Jehova chuan anmahni a ṭanpui dâwn tih chu a ringhlel a ni. Vântirhkoh chuan Siamtu aiawha thu sawiin, Jehova’n a ṭanpui tak zet dâwn tih a tiam a ni.

⁸ Gideona chuan ‘Israel-ho chu Midian-ho lak ata a chhandam’ theih dân tûr a ngaihtuah a. Chhânna a dawn chu a chiang hle, Jehova chuan: “I hnênah ka awm zêl dâwn alâwm, tichuan Midian-ho chu pakhat ang maiin i hneh vek mai ang,” tiin a hrilh a ni. (Ro. 6:11-16) Gideona chuan chutiang a thlen theih dân tûr chu a la ringhlel a ni ngei ang, Pathian hnênah chhinchhiahna a dîl a. He an inbiaknaah hian Gideona chuan Jehova chu Mi tak tak angin a thlîr tih a chiang.

⁹ A dawta thilthleng chuan Gideona rinna a tinghetin, Pathian a hnaihtîr lehzual a. Gideona chuan vântirhkoh tân chaw a buatsaih a, a hlui a ni. Vântirhkoh tiangin chaw a han deha mak tak maia a kan ral chuan Gideona chuan vântirhkoh chu Jehova aiawhtu a ni tih a hre ta a. “E khai aw, aw Lalpa PATHIAN! LALPA vântirhkoh chu a hmai chhan ngeiah ka hmuh tâk chu le,” tiin mangang takin a sawi chhuak a ni. (Ro. 6:17-22) Mahse, chutianga an inhmuhna chuan Gideona leh a Pathian inkârah indaidanna a siam em? Siam lo  ve! An inhnaih zâwk mah a ni. Gideona chuan Jehova a hriat chian tâk avângin amah nêna inremin an awm a. Chu chu Gideona maichâm din hming “Jehova-salom” tih aṭangin kan hre thei a. Chu hming awmzia chu Hebrai ṭawng chuan “Jehova Chu Remna A Ni,” tihna a ni. (Ro. 6:23, 24, NW) Jehova’n kan tâna nî tina a thiltihte kan chhût ngun hian, ani chu kan Ṭhian ṭha tak a ni tih kan hria a. Ṭawngṭaia Pathian hnên lam kan pan ṭhinna chuan kan inremna chu a tizualin, kan inṭhianna pawh a tinghet zual sauh a ni.

10. Sâm 15:3, 5-na sawi angin, Jehova’n a ṭhian ni tûrte hnênah eng thilte nge a phût?

¹⁰ Mahse, Jehova chu kan Ṭhian ni tûrin a thil phût engemawte kan tlin a ngai a. Sâm 15-a chhinchhiah angin, Davida chuan ‘LALPA puan ina mikhual,’ a nih loh leh Pathian ṭhian kan nih theihna tûr thil phûtte chungchâng chu hlaah a sa a ni. (Sâm 15:1) Chûng thil phûte zînga pahnih—sawichhiatna pumpelh leh engkima rinawm taka thiltih--chu i lo ngaihtuah ang u. Chûng thilte chungchângah, Davida chu: “A leia mi rêl [“sawichhe” NW] ngai lova, . . . a thiam zâwk thiam loh chantîrna tûra thamna pawh la ngai lo mi chu,” tiin a zai a ni.—Sâm 15:3, 5.

11. Engvângin nge tumah kan sawichhiat loh vang?

¹¹ Fakna hla dangah, Davida chuan: “I lei chu sual lakah vêng ṭha la,” tiin min vaukhân a. (Sâm 34:13) Thlarauva thâwk khum he zilhna thu zawm lohna hian keimahni leh kan Pa vâna mi, fel tak inkâr a tichhia ang. A nihna takah chuan, insawichhiatna chu Jehova hmêlma lian tak, Setana mizia a ni a. “Diabola” tih hi Grik thu mal “sawichhetu” tih aṭanga lâk a ni nghe nghe a ni. Mi dangte chanchin kan sawite thununna chuan Jehova nêna kan inhnaihna chu vawng ṭha tûrin min ṭanpui ang a. Chu chu, a bîk takin kohhrana upate chanchin kan sawi leh an chunga kan rilru put hmangah a ni lehzual a ni.—Hebrai 13:17; Juda 8 chhiar rawh.

12, 13. (a) Engvângin nge thil engkima kan rinawm ang? (b) Engtin nge kan rinawmna chuan mi dangte a nghawng theih?

¹² Mahni hmakhua chauh hriaa thiltihna ni lovin, rinawmna chu Jehova chhiahhlawhte chhinchhiahna a ni bawk a. Tirhkoh Paula chuan: “Min ṭawngṭaisak rawh u; engkimah fel taka awm tumin, chhia leh ṭha hriatna thiang tak kan nei tih dik takin kan inhre si a,” tiin a ziak a ni. (Heb. 13:18) “Engkimah fel taka awm,” a nih loh leh rinawm taka thiltih kan tum tlat avângin, kan Kristian unaute chu hlâwkna hmuh nân kan hmang lo. Entîr nân, kan hnuaiah hna an thawh chuan, dik takin kan cheibâwlin, kan inbiak rem dân nêna inmilin hlawh kan pe ngei tûr a ni. Kristian kan nih angin, kan hna thawktute leh mi dang zawng zawngte chu dik takin kan dâwr a. Tin, kan Kristian unau tuemaw hnênah hna kan thawk a nih chuan, chanvo ṭha bîkte phûta hlâwkna hmuh tum lo tûrin kan fîmkhur tûr a ni bawk.

¹³ Jehova Thuhretute nêna indâwrna nei khawvêla mite hnên aṭangin fakna ṭawngkam kan va hre zing tak êm! Entîr nân, company lian pakhata director chuan Jehova Thuhretute chuan an thutiam an hlen tih a hmu a. Ani chuan: “Ti tûra in intiam ang chuan in ti ziah ṭhîn,” a ti. (Sâm 15:4) Chutiang nungchang chuan Jehova nêna kan inlaichînna vawng reng tûrin min ṭanpui a. Chu bâkah, hmangaihna ngah tak kan Pa vâna mi chawimawina a thlen a ni.

14, 15. Kan thu hrilhnaah engtin nge mi dangte chu Jehova ṭhian ni tûra kan ṭanpui theih?

¹⁴ Kan thu hrilh rawngbâwlnaa kan tawn mi tam tak chuan Pathian a awm ring mah se, an Ṭhian ṭha ber angin an thlîr lo. Engtin nge anni chu kan ṭanpui ang? Isua’n thu hril tûra zirtîr  70-te pahnih zêla a tirh chhuah laia kaihhruaina a pêkte chu han ngaihtuah teh: “In luhna in apiangah a hmasa berin, ‘He inah hian thlamuanna thleng rawh se,’ ti ang che u. Tin, chutah chuan thlamuan fa a awm chuan in thlamuanna thu chu a chungah awm reng ang; a awm loh erawh chuan in chungah a lo kîr leh ang,” tih hi. (Lk. 10:5, 6) Nêlawm taka mite kan biakna chuan anni chu thutak lamah a hîp thei a. Min dodâltute tân pawh min huatna paih bo tûr leh ṭum danga Thuhretute lo dawngsawng ṭha zâwk tûrin a ṭanpui thei bawk a ni.

¹⁵ Sakhaw dik lovin a chiahpiah hnehte emaw, Bible nêna inmil lo chîn dân neitute emaw kan tawn hunah nêlawmna leh remna neih duhna rilru put hmang kan lantîr reng a. Tûn lai khawtlâng nuna an lungawi loh avânga kan biak Pathian chungchâng zir duhna neite chu kan inkhâwmnaah ṭha takin kan lo lâwm a. “Bible-in Nun A Thlâk Danglam” tih thuziakte chuan entawn tûr ṭha tam tak min pe a ni.

16. Eng kawngin nge Jehova ṭhian leh “hnathawhpuite” kan nih theih?

¹⁶ Hna thawk tlângte chu an inṭhian ṭha tlângpui ṭhîn a. Jehova hnêna inpumpêk tawh zawng zawngte chuan a ṭhian leh a “hnathawhpuite” nih theihna chanvo hlu tak an nei a ni. (1 Korinth 3:9 chhiar rawh.) Thu hrilh leh zirtîr siamnaa kan tel hian, kan Pa vâna mi mizia ropui tak takte hriatthiam lehzualna kan nei a. Chanchin ṭha hril tûra kan mawhphurhna hlen tûrin a thlarau thianghlimin min ṭanpui dân pawh kan hmu bawk a ni.

17. Engtin nge kan inkhâwmpuitea thlarau lam chaw kan dawnte chuan Jehova chu kan Ṭhian a nihzia a târ lan?

¹⁷ Zirtîr siam rawngbâwlnaa kan tel tam poh leh Jehova chu hnaih lehzual nia inhriatna kan nei a ni. Entîr nân, Jehova chuan dodâltute a hlawhchhamtîr dân chu kan hmu a. Kum kal tate kha han thlîr lêt leh teh. Pathian min kaihhruai dân chu chiang takin kan hmu a ni lâwm ni? Thlarau lam chaw ṭha hnianghnâr taka kan dawn rengna pawh hian mak min tihtîr a ni. Kan inkhâwmpuite chuan kan Pain kan harsatnate leh kan mamawhte a hriatzia a târ lang a. Chhûngkaw pakhat chuan inkhâwmpui avânga an lâwm thu chu hetiang hian an ziak a ni: “Inkhâwmpui program chuan kan thinlung a khawih tak zet a. Jehova chuan mi tinte min hmangaihin, kan hlawhtling ṭheuh a duhzia kan hria a ni,” tiin. Ireland rama special inkhâwmpui chhimtu German rama nupa tuak khat chuan ṭha taka lo lawm leh ngaihsak an nih avânga an lâwmzia an sawi a, heti hian an sawi belh a ni: “Mahse, Jehova leh a Lal, Isua Krista hnênah kan lâwm lehzual a ni. Anni chuan he hnam inlungrual tak zînga tel ve tûrin min sâwm a. Kan inlungrualna chungchâng kan sawi mai ni lovin, nî tin inlungrualna kan hmuin kan chên a ni. Dublin khawpuia special inkhâwmpuia kan thiltawnte hian inzavai ruala kan Pathian ropui tak rawngbâwl theihna chanvo hlu kan neih chu min hriat chhuahtîr reng ang,” tiin.

18. Jehova nêna kan inbiak pawhna chungchângah eng nge kan inzawh ang?

¹⁸ Inbiak pawhna ṭha a awm hian inṭhianna chu a nghet zual ṭhîn. Internet leh inbiak pawhna hmanruate hman uarna hunah hian social network leh message inthawnte chu a lâr hle a. Mahse, chûng nêna khaikhinin, kan thian ṭha ber Jehova nêna kan inbiak pawhna chu a mi malin engtin nge kan ngaih? Ani chu “ṭawngṭaina ngaithlatu” a ni ngei mai. (Sâm 65:2) Mahse, engtia zingin nge amah kan biak ṭhin?

19. Kan Pa vâna mi hnêna kan ngaihtuahna phawrh chhuah harsa kan tih chuan eng ṭanpuina nge kan hmuh theih?

¹⁹ Pathian chhiahhlawh ṭhenkhat chuan an ngaihtuahna phawrh chhuak a, an rilru chhûngrilte sawi chhuah chu harsa an ti a. Mahse, Jehova chuan kan ṭawngṭai hunah kan rilru phawrh chhuak tûrin min duh a ni. (Sâm 119:145; ṬH. 3:41) Chutianga rilrua thil awmte sawi chhuah harsa kan tih pawhin, ṭanpuitu nei lo kan ni lo. Rom khuaa Kristiante hnênah Paula chuan: “Engtia ṭawngṭai tûr nge tih kan hre si lo va; nimahsela thlarau chuan rûm sawi hleih theih lovin min ṭawngṭaisak ṭhîn. Tin, Pathian duhzâwng ang zêlin mi thianghlimte chu a ṭawngṭaisak ṭhin avângin rilrute Entu chuan thlarau duhzâwng chu a hre ṭhîn a ni,” tiin a ziak a ni. (Rom 8:26, 27) Joba te, Sâm te, leh Thufingte ang chi Bible bua chhinchhiah thute chhût ngunna chuan Jehova hnêna kan rilru vei zâwngte sawi chhuak tûrin min ṭanpui ang.

20, 21. Philippi 4:6, 7-a Paula thute chuan eng thlamuanna nge min pêk?

²⁰ Dinhmun manganthlâk tak kan hmachhawn hunah chuan Paula’n Philippi mite hnêna Pathian thâwk khum thurâwn a pêk chu i nunpui ang u: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” tih hi. Chutianga kan Ṭhian ṭha ber nêna inbiak pawhna chuan min thlamuanin, min hnêm ngei ang, Paula chuan: “Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tia a sawi belh avângin. (Phil. 4:6, 7) Kan thinlung leh ngaihtuahna vênghim tak zettu “Pathian thlamuanna” tehkhin rual loh chu i ngaihlu reng ang u.

²¹ Ṭawngṭaina chuan Jehova nêna inṭhianna nei tûrin min ṭanpui a. Chuvângin, ‘bâng lovin i ṭawngṭai’ ang u. (1 Thes. 5:17) He zirna hian Pathian nêna kan inlaichînna hlu tak leh a thil phût felte mila nun kan tumna chu tinghet sauh rawh se. Jehova chu kan Pa, kan Pathian, leh kan Ṭhian a nih tak zet avânga malsâwmna kan dawnte chhût ngun nân hun i hmang zêl ang u. (w14-E 02/15)