1, 2. Engvângin nge Sâm 45-na hi kan ngaihven?

LAL ropui chu thutak leh felna atân a hmêlmate hneh tûrin a sakawr chunga chuangin a kal zêl a. Hnehna hnuhnûngber a chan hnu chuan, mo duhawm tak chu a nei ta a ni. Chu lal chu chhuan lo la awm tûr zawng zawngte hriat reng leh chawimawi a ni ang. Chu chu Sâm 45-na thupui ber a ni.

² Mahse, Sâm 45-na hi tâwpna hlimawm tak nei thawnthu phûrawm tak mai a ni lo. Chuta târ lan thilthlengte chuan kan tân awmzia a nei a. Tûna kan nun bâkah, nakina kan nun tûr pawh a nghawng a ni. Chuvângin, he fakna hla hi ngun takin ilo bih chiang ang u.

3, 4. (a) “Thil ṭha” kan ngaihven chu eng nge ni a, chu chuan engtin nge kan thinlung a khawih theih? (b) Eng kawngin nge kan hla chu ‘lalber chungchâng thu’ a nih a, engtin nge kan lei chu kawlawm ang a lo nih?

³ Sâm 45:1 chhiar rawh. Fakna hla phuahtu thinlung chu lal chungchânga “thil ṭhain” a khat a. Chuvângin a thinlung chu  phûrnaa ‘liam zawih zawihin,’ a lei chu “lehkha ziak thiam tak kawlawm” ang a lo ni.

⁴ Eng nge kan an ve le? Messia Lalram chanchin ṭha hi kan thinlung khawihtu thil ṭha a ni a. Chu Lalram thuchah chu kum 1914 aṭangin a ‘ṭha’ lehzual a ni. Chuta ṭang chuan, chu thuchah chu Lalram lo la awm tûr chungchângah ni lovin, tûna vâna rorêl mêk sawrkâr tak tak chungchângah a lo ni ta. Chu chu ‘hnam zawng zawng hriattîrna tûra khawvêl zawng zawnga’ kan hrilh “ram chanchin ṭha” chu a ni. (Mt. 24:14) Kan thinlung chu Lalram thuchahin “a liam zawih zawih” em? Lalram chanchin ṭha chu ṭhahnemngai takin kan hril em? Fakna hla phuahtu angin, kan hla chu kan Lal Isua Krista—‘lalber chungchâng thuah’ a ni. Ani chu vân lam Messia Lalrama Lalber a nih thu kan puang chhuak a. Chu bâkah, mi zawng zawng—rorêltute leh a rorêlsakte—chu a lalna hnuaia intulût tûrin kan sâwm a ni. (Sâm 2:1, 2, 4-12) Tin, kan thu hrilhnaah Pathian Thuziak nasa taka kan hman hian, kan lei chu “lehkha ziak thiam tak kawlawm” ang a lo ni.

5. (a) Eng kawngin nge Isua chu ‘a hmêl a ṭhat’? (b) Engtin nge ‘Lalber hmui aṭanga khawngaihna’ a chhuah a, engtin nge a entawn tûr siam zui chu kan tum tlat theih?

⁵ Sâm 45:2 chhiar rawh. Bible hian Isua hmêl lan dân chu a sawi tlêm hle a. Mi ṭha famkim a nih angin, a “hmêl a ṭha” ngei ang. Mahse, a hmêl ṭhatna êm êm chu Jehova chunga a rinawm tlatna aṭanga lo awm a ni. Chu bâkah, Isua chuan Lalram thuchah a hrilhin ‘khawngaihna thu’ a chhâk chhuak bawk. (Lk. 4:22; Joh. 7:46) Kan thu hrilnaah a entawn tûr siam zui chu kan tum tlatin, mite rilru khawihtu ṭawngkamte hman kan tum em?—Kol. 4:6.

6. Engtin nge Pathianin “kumkhua atân” Isua mal a sâwm?

⁶ Thinlung zawng zawnga Isua inpêkna avângin, Jehova chuan leia a rawngbâwl chhûng zawng leh inthawina atâna a thih hnuah mal a sâwm a ni. Tirhkoh Paula chuan: “[Isua chu] mihring anga lo awmin, a inngaitlâwm a, thi khawp hiala thu zâwmin a lo awm ta a. . . . Chu mi avâng chuan Isua hmingin mi tin—vâna mite, leia mite, lei hnuaia mite nên—an ṭhingṭhit nân leh Pa Pathian tihropuina tûrin, ‘Isua Krista chu Lal a ni,’ tiin lei tinrêngin a puan nân, Pathianin ani chu nasa takin a chawimawi ve ta thung a, hming zawng zawnga hming chungnung ber chu a pe ta a,” tiin a ziak a ni. (Phil. 2:8-11) Pathian chuan thih theih lohna nun nêna kaithovin “kumkhua atân” Isua chu mal a sâwm a ni.—Rom 6:9.

7. Eng kawngin nge Pathianin Isua chu a ‘ṭhiante’ aia nasaa hriak a thih?

⁷ Sâm 45:6, 7 chhiar rawh. Isua’n felna a ngainat êm avâng leh a Pa chawimawi lo thei thil engpawh a huat avângin, Jehova chuan Messia Lalrama Lal atân hriak a thih a. Isua chu a “ṭhiante”—Davida thlah kal zêla Juda lal dangte—aia nasain “hlimna hriak” thih a ni. Chu chu engtin nge a nih? Kawng khatah chuan Isua chu Jehova ngeiin hriak a thih a. Chu bâkah, Jehova chuan Lal leh  Puithiam Lalber atân hriak a thih kawp a ni. (Sâm 2:2; Heb. 5:5, 6) Tin, Isua chu hriak tak tak ni lovin, thlarau thianghlima hriak thih a ni bawk a, a lalna chu leiah ni lovin, vânah a ni bawk.

8. Engvângin nge Isua thu neihna chu dân ang thlapa thu neihna kan tih theih a, engvângin nge a lalram chu a fel dâwn tih kan rin tlat theih?

⁸ Jehova chuan a Fapa chu kum 1914 khân vânah Messia Lal angin a ṭhuttîr a. ‘Thlei bîk neih lohna laltiang chu a ram laltiang’ a ni a, chuvângin a rorêlna chu a felin, a dik dâwn tih kan ring tlat thei a ni. Jehova chu a lalram lungphûm a nih avângin, a thu neihna chu dân ang thlapa thu neihna a ni. Chu bâkah, Isua lalṭhutphah chuan ‘chatuan’ a daih ang. Pathian ruat Lal chak tak hnuaia Jehova rawngbâwl chu kan inchhuang hle a ni lâwm ni?

9, 10. (a) Engtik khân nge Krista chuan a khandaih chu a vawn a, engtin nge chu chu a hman nghâl? (b) Engtin nge Krista chuan a khandaih a la hman dâwn?

⁹ Sâm 45:3 chhiar rawh. Jehova chuan a Lal chu ‘a khandaih a kâwnga vawng’ tûrin a hrilh a, a awmzia chu Pathian lalchungnunna dodâltu zawng zawngte do tûr leh an chunga A rorêlna thlen tûrin thu neihna a pe tihna a ni. (Sâm 110:2) Krista chu hneh theih rual loh Râldo Thiam Lal a nih avângin, ani chu “Aw, mi chak,” tia koh a ni a. Kum 1914-ah a khandaih a vuan a, Setana leh a ramhuaite chu hnehin vân aṭangin lei lamah a paih thla a ni.—Thup. 12:7-9.

¹⁰ Chu chu Râldo Thiam Lalin hnehna a chan bul inṭanna mai a ni a. Ani chuan a la “hneh zêl” tûr a ni. (Thup. 6:2) Jehova rorêlna chu leia Setana khawvêl kalhmang zawng zawngte chungah la thlentîr tûr a ni a, Setana leh a ramhuaihote chu engmah ti thei lova siam tûr a ni bawk. Tihboral hmasak ber tûr chu Babulon Khaw Ropui, khawvêl sakhaw dik lo lalram a ni ang a. He “nawhchizuar” suaksual tak tiboral tûra politics rorêltute hman chu Jehova thiltum a ni. (Thup. 17:16, 17) A dawtah chuan, Râldo Thiam Lal chuan Setana politics kalhmang chu dovin, engmah lovah a siam ang. Krista, “leilâwt tirhkoh” tia koh bawk chuan Setana leh a ramhuaiho chu leilâwta paih lûtin, a hnehna chu a tifamkim ang. (Thup. 9:1, 11; 20:1-3) Hêng thilthleng tûr phûrawm takte chungchâng Sâm 45-nain a sawi lâwk dân chu ilo en ang u.

11. Engtin nge Krista chuan ‘thutak avânga’ râl a do?

¹¹ Sâm 45:4 chhiar rawh. Râldo Thiam Lal chuan ram lâk nân leh mite a thu hnuaia dah nân râl a do lo. Chhan ṭha tak neiin felna râl a do va. Ani chuan “thutak leh thuhnuairawlhna leh felna avângin” ral a do a ni. Humhim ngei tûr thutak ropui ber chu lei leh vâna Jehova lalchungnunna hi a ni a. Setana chuan Jehova chunga a hel khân rorêl tûra A dikna neih chu a cho va. Chuta ṭang chuan, ramhuaite leh mihringte chuan chu thutak bulpui ber chu an kalh a ni. Tûnah chuan Jehova hriak thih Lal chuan Jehova chauh hi lalchungnung ber a nihzia chatuan atâna a lantîr hun chu a lo thleng ta a ni.

12. Engtin nge Lal chuan thuhnuairawlhna kawngah entawn tûr ṭha tak a siam?

¹² Lal chu thuhnuairawlna kawngah entawn tûr ṭha tak a ni bawk a. Pathian Fapa neihchhun a nih angin, thuhnuairawlhna leh a Pa lalchungnunnaa rinawm taka intukluhna kawngah entawn tûr ṭha tak a siam a ni. (Is. 50:4, 5; Joh. 5:19) Chu Lal khua leh tui rinawm zawng zawngte chuan a entawn tûr siam chu zuiin, engkimah Jehova lalchungnunnaah inngaitlâwm takin an intulût  tûr a ni. Chutianga tite chauh chu Pathian tiam khawvêl thara an awm phalsak a ni ang.—Zak. 14:16, 17.

13. Engtin nge Krista chu ‘felna avânga’ a thawh chhuah?

¹³ Krista chu ‘felna avângin’ a thawk chhuak bawk a. Lalin a humhim felna chu “Pathian felna”—thil dik leh dik lo chungchânga Jehova tehnate a ni. (Rom 3:21; Deut. 32:4) Lal Isua Krista chungchângah, Isaia chuan: “Fel taka rorêl tûr lal,” tiin a sawi lâwk a ni. (Is. 32:1) Isua rorêlna chuan thutiam “vân tharte” leh “lei thar,” a chhûnga “felna awmte” chu a rawn thlen ang. (2 Pet. 3:13) Chu khawvêl thara awm zawng zawngte tân Jehova tehnate mila nun a ngai dâwn a ni.—Is. 11:1-5.

14. Engtin nge Krista kut ding lamin “thil râpthlâk takte” a hlen chhuah ang? (A thupui chunga milem chu en rawh.)

¹⁴ Sakawr vâr chunga a chuan ṭan chuan, Lal chuan a khandaih chu a kâwngah a vawng a. (Sâm 45:3) Mahse, khandaih a phawi a, a kut ding lama a vai hun chu a lo thleng ta. Fakna hla phuahtu chuan: ‘I kut ding lamin thil râpthlâk takte a hlen chhuak dâwn,’ tih a hrilh lâwk a. (Sâm 45:4) Isua Krista’n Armageddon-a Jehova rorêlna a rawn ken kawh hunah chuan, a hmêlmate chungah “thil râpthlâk takte” a hlen chhuak ang. Setana kalhmang tihchhiat nâna a thil hman tûr chiah chu kan hre lo va. Mahse, chu a thiltih chuan Lal rorêlna hnuaia intulût tûra Pathian vaukhânna zâwm lo, leia awm zawng zawngte chu a tihlau hle dâwn a ni. (Sâm 2:11, 12 chhiar rawh.) Isua chuan tâwpna hun chungchâng a hrilh lâwknaah “thlabâr avâng leh khawvêla thil lo thleng tûr chu ngaihtuah avângin mite an thidang ang; vân thiltihtheihnate chu a nghîng dâwn si a,” tiin a sawi a. “Chutih hunah chuan Mihring Fapa hi thiltihtheihna leh ropuina nasa tak nên chhûm zînga lo kal an hmu ang,” tiin a sawi zawm a ni.—Lk. 21:26, 27.

15, 16. Indonaa Krista zuitu “sipaihote” chu tute nge ni ang?

¹⁵ “Thiltihtheihna leh ropuina nasa tak” nêna rorêl tûra Lal a lo kal tûr thu puang chhuakin, Thu Puan bu chuan: “Vân inhawng ka hmu a; tin, ngai teh, sakawr vâr leh a chunga chuang, Rinawma leh Diktaka an tih chu ka hmu bawk a; ani chuan fel takin ro a rêl a, mi a do ṭhîn. Tin, vâna sipaihote chuan puan zai sîn vâr tak fai tak sinin sakawr vâr chungahte chuangin an zui a. Tin, a kâ aṭangin khandaih hriam tak a chhuak a, chu chu hnam tin a sahna tûr a ni; tin, thîr tiangin an ro a rêl ang a; Pathian Engkimtitheia thinur nasatna grêp sâwrna khurah chuan a rap sâwr ang,” tiin a sawi a ni.—Thup. 19:11, 14, 15.

¹⁶ Indonaa Krista zuitu vân “sipaihote,” a nih loh leh a râldopuite chu tute nge ni ang? Vân aṭanga Setana leh a ramhuaite hnawt chhuak tûra a khandaih a vawn hmasak ṭum khân, Isua chu “a vântihkohte” chuan an dopui a. (Thup. 12:7-9) Armageddon indonaah vântirhkoh thianghlimte chu Krista sipaihote zîngah an tel ang tia thu tâwp siam chu a âwm hle a ni. A sipaihote zîngah chuan mi dangte pawh an tel ang em? Isua chuan a unau hriak thihte hnênah he thu hi a tiam a ni: “A hnehtu apiang leh a tâwp thlenga ka thiltihte pawmtu apiang, keiin ka Pa laka ka hmuh ang bawk hian, chu mite chu hnam tin chungah thu ka neihtîr ang; tin, anni chuan bêlvawtu bêlte keh sawm depa a awm angin thîr tiangin an ro an rêlsak ang,” tih hi. (Thup. 2:26, 27) Chuvângin, Krista vân lam sipaihote zîngah chuan a  unau hriak thih, chutih huna vâna an lâwmman dawng tawhte pawh an tel bawk ang. “Thil râpthlâk takte” a hlen chhuah hun a, hnam tin chungah thîr tianga ro a rêlsak lai chuan hriak thih a rorêlpuite chu a bulah an awm ang.

17. (a) Isua chuanna sakawr vâr chuan eng nge a entîr? (b) Khandaih leh thalngul chuan eng nge a entîr?

¹⁷ Sâm 45:5 chhiar rawh. Lal chu sakawr vâr chungah a chuang a, chu chuan Jehova mit hmuha indona thianghlim leh dik a entîr a ni. (Thup. 6:2; 19:11) Khandaih bâkah thalngul a keng bawk. “Ka han en a, tin, ngai teh, sakawr vâr ka hmu a; a chunga chuang chuanin thalngul a keng a; tin, a hnênah chuan lallukhum an pe a; tin, hneh chung leh hneh zêl [a nih loh leh, hnehna tifamkim] tûrin a chhuak ta a,” tiin kan chhiar a ni. Khandaih leh thalngul chuan Krista’n a hmêlmate rorêlsak nâna a thil hman tûr chu a entîr a ni.

18. Engtin nge Krista “thal” chu a “zum” tih a lan ang?

¹⁸ Fakna hla phuahtu chuan hla thuin Lal ‘thal chu a zum a, a dotute thinlungah chuan a bûr,’ ‘mite chu a hnuaiah a titlu ṭhîn’ tiin a sawi lâwk a. Leilung pumah inthahna a awm ang. Jeremia hrilh lâwkna chuan: “Chumi nîa LALPA thahte chuan lei tâwp aṭangin lei tâwp thlengin an dâp ang,” tiin a sawi lâwk a ni. (Jer. 25:33) Thilthleng inang sawina hrilh lâwkna dang chuan: “Niah khian vântirhkoh ding ka hmu a; tin, ani chuan vanlaizâwla sava thlâwk zawng zawng hnênah chuan aw ring takin, ‘Lal sa te, sipai hotu sa te, mi chak sa te, sakawr leh a chunga chuang sa te, mi zawng zawng—bâwih leh bâwih lo, alian atê pawh—an sa in ei theihna tûrin Pathian ruai ropui tak ṭhehnaah chuan rawn inkhâwm rawh u,’ tiin a au va,” tih a sawi a ni.—Thup. 19:17, 18.

19. Engtin nge Krista chu ‘hmuingîl takin a kal zêl’ ang a, a hnehna a tihfamkim ang?

¹⁹ Leia Setana kalhmang suaksualte a tihboral hnuah, Krista chu ‘a mawina inbelin hmuingîl takin a kal zêl ang.’ (Sâm 45:4) Ani chuan Setana leh a ramhuaite chu Kum Sâng Rorêl chhûng atâna leilâwta paihin a hnehna chu a tifamkim ang. (Thup. 20:2, 3) Diabola leh a vântirhkohte chu thi ang maia engmah tithei lova an awm chhûngin, leilunga awmte chuan Setana thununna laka zalênin, hnehna changtu Lal ropui tak hnuaiah chuan intulût thlapin an awm thei dâwn a ni. Mahse, zawi zawia leilung hi paradise a nih vek hun an hmuh hmain, an Lal leh vâna a rorêl puite nêna hlim chhan tûr dang an nei dâwn a ni. Chu hun hlimawm tak chu a dawta thuziakah kan bih chiang ang. (w14-E 02/15)