Latvia khawpui, Riga-ah ka piang a. Ka nu chuan ka unaunu nên min enkawl seilian a. Ka nu chu Catholic ni mah se, sakhaw ni serhahte chauh biak inah kan kal ṭhîn. Thiltithei zâwk a awm rinna chu ka nei reng ṭhîn a, mahse tlangvâl ka nih laiin thil dang tam takin ka rilru a lapêng a ni.

Ka han ṭhan chhoh zêl chuan thil ṭhiah darh a, rem khâwm leh chu ka chemkalna a ni tih ka nu chuan a hria a. In chhûnga thil tam takte chu ṭhiah darh theih a nih avângin ka nu chuan keimah chauhvin inah min hnutchhiah ṭha ngam ṭhîn lo. Tichuan, thil lem siam nâna rem khâwma ṭhiah leh theih tûr thîra siam chi chu min pe ta a, chu mi remkhâwm a, ṭhiah darh leh chu nuam ka ti hle a ni. Chu tuina ka neih chu tuina dang ka neih—bike intlânsiakna--nên chuan a kal kawp ta tlat mai a. Ka nu chuan bike intlânsiakna pâwl, Zelta Mopēds (The Golden Moped) tia kohva tel tûrin ka hming a ziak lût ta a. Bike tê chi, moped hmanga intlânsiaknaah ka tel ṭan a, a hnuah chuan bike pângngaia intlânsiakna tak takah chuan ka tel chho ta a ni.

Ka zir thiam chak hle a, chu infiamna chak leh hlauhawm takah chuan ka hlawhtling ta thuai a. Latvia motorcycle intlânsiakna class tam takah vawi thum ka champion a, vawi hnih chu Baltic States Chanpionship-ah ka chak bawk a ni.

Ka hlawhtlin lai berin ka bialnu Evija-i (a hnua ka nupui ni ta) chu Jehova Thuhretute nên an inhmêlhriat ṭan a. An thu leh hla chhuah ṭhenkhat chu a chhiar a, chutah chuan Bible zir tûra ngenna coupon a awm a. Chu coupon chu ziak khatin, a thawn ta a ni. Thuhretu pahnih chuan an rawn tlawh vat a, anni nên chuan Bible a zir ṭan ta a. Chu chu pawi ka ti hran lo va, mahse chutih lai chuan thlarau lam thil ka tuipui vak lo a ni.

 A hnuah, Thuhretute chuan Evija-i Bible zirnaah chuan tel a, ngaithla ve tûrin min sâwm a. Min sâwmna chu ka pawm a, ka thil ngaihthlâk chu ka duh ta hle a. Thil pakhat a bîk taka ka rilru khawihtu chu Bible-in lei paradis min tiam hi a ni. Entîr nân, Sâm 37:10, 11-naa: “Rei lo tê achinah mi suaksual chu a awm tawh dâwn si lo: A ni, a awmna hmun chu en en mah la, a awm tawh lo vang. Thuhnuairawlhte erawh chuan ram hi an luah ang a: remna chênin an hmuingîl ang,” tih thu chu min hmutîr a. Chu thutiam chuan ka rilru a khawih tak zet a ni.

Thlarau lamah chuan ka tui chho zêl a. Sakhaw lama dâwt thu a tam zia ka hre ṭan ta a. Chu mi nêna inkalh takin, Bible zirtîrnate chuan a dik leh a fiah êm avângin ka rilru khawih a ni.

Bible ka han zir zêl chuan, Jehova’n nunna a ngaihhlut dân chu ka hre ta a. (Sâm 36:9) Chu chuan bike intlânsiaknaa ka tel ṭhinnaah chuan nghawng a nei a, ka nun thâp ka duh tawh lo a ni. Chu ai chuan, ka nun chu Jehova chawmawi nâna hman ka duh ta a. Chuvângin, hmingthanna te, ropuina te, bike intlânsiakna avânga rilru phûrnate chu ka tân a pawimawh tawh lo.

Kum 1996 khân, bike-a kan intlânsiakna ṭhin motor stadium aṭanga hla vak lo, Tallinn, Estonia hmunah chuan Jehova Thuhretute international inkhâwmpuiah ka tel ve a. Inkhâwmpuinaah chuan ram hrang tam tak aṭangin mite chu inlungrual leh inrem takin an inhmu khâwm tih ka hmu a ni. Entîr nân, Thuhretu zînga pakhatin a bag a han hloh chuan a hmuh leh tawh ka lo ring miah lo va. Mahse, rei lo te hnuah Thuhretu pakhat chuan a lo chhar a, engmah bo awm lovin a rawn pe lêt leh a. Mak ka tihzia mai chu! Tûnah chuan, Thuhretute chu Bible tehna sâng takte milin an nung tak zet tih ka hre ta. Evija-i nên chuan Bible zirnaah hma kan sâwn zêl a, kum 1997-ah Jehova Thuhretute zînga mi niin baptisma kan chang ta a ni.

Ka ṭhian ṭhenkhatte chu bike intlânsiakna hlauhawm leh chak taka an telnaah chuan an boral tawh a. Bible ka zirna aṭangin nunna min Petu, Jehova lakah mawhphurhna ka nei tih ka lo hre thiam ta a ni. Chu mi hriatthiamna chuan ka nun a chhanhim a tih theih ang.

Evija-i nên chuan kum li chhûng Riga hmuna Jehova Thuhretute branch office-ah hun bikima rawngbâwl theihna chanvo hlu tak kan nei a. Tûnah chuan kan fanu Alise-i enkawl chhovin, Jehova hmangaih tûrin kan ṭanpui mêk a ni. Chawlhkâr tinin, ni khat chu translation office-a car leh thil dang chhiate siam ṭhat hna thawh theihna chanvo hlu tak ka nei bawk a ni. Naupan laia ka thil zir thiamte ka hman ṭangkai theih avângin ka va lâwm tak êm! Ni e, tûn thlengin thil ka ṭhiat darhin, ka rem khâwm leh reng a ni.

Bible aṭanga ka thil zirte azârah, kan chhûngkuaa Pathian dik awmchhun chanchin mite hrilh theihna chanvo hlu ka neih chu ka ngaihlu hle. Lei paradis thutiam chuan ka nun a thlâk danglam chiang ngei mai! (w14-E 02/01)