Pathianin mihringte a siam khân natna emaw, thihna emaw tuar lo va, leia chatuana nung tûrin a siam a. Mahse, mihring hmasa ber Adama chuan Siamtu thu a awih loh avângin chatuana nun beiseina chu a hloh ta a ni. Adama thlahte kan nih angin, thihna chu kan rochun ta a. (Rom 5:8, 12; 6:23) Pathian dik Jehova chuan a Fapa, Isua chu Adama hloh tawh hnu tlan nâna a nun pe tûrin leiah a rawn tîr ta a ni.—Johana 3:16 chhiar rawh.

Isua thihna chuan kan sualte ngaihdamna leh chatuan nun neih theihna kawng min hawnsak a. Bible chuan tarna, natna, leh thihna kan tawrh tawh loh huna leia nun awm dân tûr min hriat thiamtîr a ni.—Isaia 25:8; 33:24; Thu Puan 21:4, 5 chhiar rawh.

Isua chuan a thih hma zân khân a zirtîrte hnênah hun serh pângngai tak hmanga a thihna chu hre reng tûrin a hrilh a. Chutianga Isua thih hriat rengna kum tina hmanna chuan Isua leh Jehova’n mihringte an hmangaihzia min ngaihtuahtîr a ni.—Luka 22:19, 20; 1 Johana 4:9, 10 chhiar rawh.

Tûn kum hian Isua thih Hriatrengna chu Thawhṭanni, April 14, ni tlâk hnuah neih a ni ang. Tualchhûnga Jehova Thuhretute ruala hmang tûrin kan sâwm a che.—Rom 1:11, 12 chhiar rawh. (w14-E 03/01)