Hei hi Bible bu puma thu châng hriat lâr tak leh lâk chhuah tam berte zînga mi a ni a. He Bible châng aia “Pathian leh mihringte inlaichînna leh chhandamna kawng tawi fel zâwka sawina” châng dang a awm lo tia sawi a ni ṭhîn. Chuvângin ram ṭhenkhatah chuan he Bible châng, a nih loh leh “Johana 3:16” chu mipui punkhâwmnaah te, car bangah te, vântlâng hmunah te, leh hmun dang dangah te târ chhuah a ni fo ṭhîn.

Chu Bible châng târ chhuaktute chuan Pathian hmangaihnain chatuana chhandamna a tiam niin an ring tlat a ni ngei ang. Nang, eng nge i ngaih ve dân? Pathian hmangaihna chuan i tân eng awmzia nge a neih? Pathianin a hmangaihna che târ lan nân eng thil nge a tih?

Mi tam tak chuan lei leh vânte, thilsiam dangte, leh mihringte siamtu chu Pathian a ni tih an pawm a. Nunna neite chu chipchiar tak leh ṭha taka siam an nih dân aṭangin, tuemaw fing takin a siam a ni tih a chiang a ni. Mi ṭhahnem tâwk takte chuan nunna thil thlâwnpêk avângin nî tin hian Pathian hnênah lâwmthu an sawi a. An nun zêl theih a, hlim taka hna an thawh zêl theihna tûrin nunna atâna pawimawh zawng zawng—boruak te, tui te, ei tûr te, leh leilung pianken thil inher kual reng ang chite—pe tûrin Pathian an rinchhan a ngai tih an hre bawk a ni.

Chûng zawng zawngte avâng chuan Pathian hnênah kan lâwm tûr a ni, min Siamtu leh min Châwmtu a ni ngei si a. (Sâm 104:10-28; 145:15, 16; Tirhkohte 4:24) Kan nun theihna tûra Pathian thiltih zawng zawngte kan ngaihtuah hian  Pathian min hmangaihzia kan hre thiam thei a ni. Tirhkoh Paula chuan heti hian a sawi a: “[Pathian] ngei chu engkim hnêna nunnate, thâwknate leh thil zawng zawngte petu a ni. . . . Amah avângin kan nung, kan che, kan awm a ni si a,” tiin.—Tirhkohte 17:25, 28.

Mahse, Pathian hmangaihna chu tisa lama min ngaihsakna mai aia tamin a lang chhuak a ni. Ani chuan thlarau lam thil duhna min pein, a phuhrûk dân pawh min zirtîr bawk. (Matthaia 5:3) Hetiang hian, thuâwih mihringte chuan Pathian chhûngkaw zînga mi ni a, a “fate” nih theih beiseina an nei a ni.—Rom 8:19-21.

Johana 3:16-a sawi zawm angin, Pathian chuan a Fapa Isua chu kan tâna a nun pe tûr leh a Pathian leh a Pa chungchâng min zirtîr tûra leia rawn tîrin min hmangaihzia a lantîr a. Mahse, mi tam tak chuan mihringte tâna Isua thih a ngaih chhan leh Isua thihna hi Pathianin min hmangaihna târ lanna a nih dân an hre tak tak lo tih an pawm ngei ang. Isua thih chhan leh a hlutna Bible sawi dân chu i lo en ang u.

Thi thei lo kan awm lo va, natna te, tarna te, leh thihnate hian min tlâk buak reng a ni. Mahse, chu chu atîra Pathian Jehova thiltum a ni lo. Ani chuan mihring hmasa berte hnênah lei paradise-a chatuan nun beiseina a pe a ni. Mahse, thil pakhat tih tûr an nei a, chu chu a thu âwih hi a ni. Thu an âwih loh chuan an thi ang tih Pathian chuan a sawi. (Genesis 2:17) Mipa hmasa ber chu Pathian thuneihna laka a hel tâkah chuan amah leh a thlahte chungah thihna a thlentîr a. Tirhkoh Paula chuan: “Mi pakhat avângin sual khawvêlah a lût a, sual avângin thihna a lût bawk, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin a sawi a ni.—Rom 5:12.

Mahse, Pathian chuan “rorêlna fel a ngaina” a. (Sâm 37:28) Mipa hmasa berin thil sual an tihluih chu ngaihthah thei lo mah se, Pathian chuan mi pakhat thu âwih loh avânga mihring zawng zawng thihnain a lem hlen tûr chu a duh lo va. Chu mi nêna inkalh takin, ‘nun aiah nun,’ tih dân thu bul chu zâwmin, rorêlna dik chu a siam a, thu âwih mihringte tân chatuana nunna neih theihin a siam a ni. (Exodus 21:23) Zawhna lo awm ta chu, engtin nge Adama hloh tâk mihring nun ṭha famkim chu kan neih lêt theih ang? tih a ni a. A chhânna chu: Tuemaw chuan Adama nun tlukpui—mihring nun ṭha famkim—chu a pêk emaw, a hlan emaw a ngai, tih hi a ni.

Adama thlahte zîngah chuan chutiang man pe thei tûr ṭha famkim an awm lo tih a chiang a, mahse, Isua chuan a pe thei a ni. (Sâm 49:6-9) Sual rochunga piang a nih loh avângin, Isua chu Adama ang khân ṭha famkim a ni a. Chuvângin, Isua’n a nun a hlanna aṭangin mihringte chu sual bâwih ata a tlan thei a ni. Chutiang chuan, Adama thlahte hnênah nun ṭha famkim Adama leh Evi lo neih tawh ang chu neih leh theihna hun remchâng a pe  a ni. (Rom 3:23, 24; 6:23) Chutiang hmangaihna thiltih ropui tak hlâwkpui tûr chuan kan tih ngai thil engemaw a awm em?

Johana 3:16 chu en leh ta i la, “amah [Isua] chu tupawh a ring apiang an boral loh va, chatuana nunna an neih zâwk nân,” tih thu hi kan hmu a ni. Chu mi awmzia chu, chatuana nunna thilthlâwnpêk nei tûr chuan thiltih ngai a awm tihna a ni. “Chantuana nunna” nei tûr chuan Isua rin leh a thu âwih a ngai a ni.

Heti hian i ngaihtuah mai thei a: ‘Engtin nge thuâwihna a tel a ngaih? Isua chuan “amah chu tupawh a ring apiang” chatuana nunna nei tûrin a sawi mai a ni lâwm ni?’ tiin. Sawi e, rinna chu a pawimawh a ni. Mahse, Bible-in rinna a tih hian Isua a awm tih rin ringawt aia tam a tel a ni. Vine’s Expository Dictionary of Old and New Testament Words sawi dânin, Johana thu mal hman hi atîra ṭawngah chuan “ring mai ni lovin, rinchhan tlat,” tihna a ni. Pathian duhsak hlawh tûr chuan Isua chu Chhandamtu a ni tih rilrua pawmna mai aia tam a tel a. Ringtu chuan Isua zirtîrnate nunpui a tum tlat tûr a ni bawk. Thiltih a tel loh chuan, rinna nei anga inchhâlna chu awmze nei lo a ni. Bible chuan ‘thiltih tel lovin rinna chu thi a ni,’ tiin a sawi a. (Jakoba 2:26) Kawng danga sawi chuan, ringtu chuan Isua rinna a lantîr tûr a ni—chu chu, a rinna nêna inmilin a nung ngei tûr tihna a ni.

Chu thu chu heti hian Paula’n a hrilhfiah a ni: “Krista hmangaihna chuan min tîr lui a ni; heti hian kan ngaihtuah: Mi zawng zawng thih aiin mi pakhat [Isua] a thi a, . . . tin, a nungte chu anmahni tân an nun tawh loh va, an thih aia thia tholeha tân chuan an nun tawh zâwkna tûrin a ni, mi zawng zawng thih aiin a thih ni,” tiin. (2 Korinth 5:14, 15) Isua inthawina avânga lâwmna dik tak chuan kan nun thlâk dang lam a, hma sial taka mahni tâna nung lo va, kan tâna thi Isua tâna nung tawh tûrin min chêttîr tûr a ni. Chu chu, Isua thil zirtîrte nunpui chu kan ngai pawimawh ber tûr tihna a ni. Chutiang inthlâk dang lamna chuan kan thil ngaihhlut te, kan duh thlanna te, leh kan thiltih a piangah nghawng a nei tûr a ni. Isua ring a, chu an rinna lan chhuahtîrtute chuan eng lâwmman nge an dawn ang?

Johana 3:16 tâwp lamah chuan tlanna inthawinaa rinna lantîrtute leh Pathian tehnate mila nungte hnêna Pathian thutiam târ lan a ni a. Pathian chuan chûng mi rinawmte chu ‘boral lo va, chatuana nunna an neih’ a duh a ni. Mahse, Pathian hmangaihna hlâwkpuitute chuan hma lam hun atân beiseina inang lo tak an nei a ni.

Isua chuan pâwl khat tân chuan vâna chatuana nunna a tiam a. A hnungzuitu rinawmte hnênah chuan amah nêna ropui taka ro an rêl theih nân hmun a buatsaih tûr thu chiang takin a hrilh a ni. (Johana 14:2, 3; Philippi 3:20, 21) Vân nunna changa tho lehte chu “Pathian leh Krista puithiamte an ni ang a, amah nên kum sângkhat rorêlin an awm zâwk ang.”—Thu Puan 20:6.

Chutiang chanvo chu Krista hnungzuitu tlêm tê chauhvin an dawng ang. Isua chuan: “Pâwl tlêmte u, hlau suh u; ram pêk che u hi in Pa lâwmzâwng tak a ni,” tiin a sawi a ni. (Luka 12:32) “Pâwl tlêmte” chu eng zât nge ni ang? Thu Puan 14:1, 4 chuan: “Ka han en a, tin ngai teh, Berâm No [tho leh Isua Krista] [vân lam] Zion Tlânga ding leh an chala a hming leh a Pa hming ziak, mi 1,44,000 a hnênah ka hmu a. . . . Chûng chu Pathian tân leh Berâm No tân rah hmasa ber ni tûrin mihring zîng ata tlan an ni,” tiin a sawi a ni. Leia lo nung tawh mi chhiarsên lohte nêna khaikhin chuan mi 1,44,000-te chu “pâwl tlêmte” chauh an ni a. Lalte anga sawi an ni a, chuti a nih chuan tute chungah nge ro an rêl ang?

Isua chuan pâwl hnihna, vân lam Lalram hlâwkpuitu mi rinawmte chungchâng chu a sawi a. Johana 10:16-a kan hmuh angin Isua chuan: “He berâm huanga mi lo hi, berâm dang ka nei; anni pawh ka la rawn hruai tûr a ni, ka aw pawh an hria ang; chutichuan pâwl khatin an awm ang a, a vêngtu pakhat nên,” tiin a sawi a ni. Chûng ‘berâmte’ chuan leia chatuana nun beiseina an nei a —chu chu atîra Adama leh Evi neih ang kha a ni. Engtin nge leia awm tûr an ni tih kan hriat?

Bible chuan leia lo awm tûr Paradise chungchâng vawi tam tak a sawi a. Nangmah ngeiin i hmuh theih nân, i Bible keuvin, a hnuaia thu ziakte hi chhiar i duh thei a ni: Sâm 37:9-11; 46:8, 9; 72:7, 8, 16; Isaia 35:5, 6; 65:21-23; Matthaia 5:5; Johana 5:28, 29; Thu Puan 21:4. Hêng Bible chângte hian indo te, ṭâm te, natna te, leh thihna te tâwpna chu a sawi lâwk a. Mi ṭhate’n mahni in ngei an sak a, mahni huan ngei an siam a, hmun râl muang taka fate an enkawl seilen theih hun tûr a sawi a ni. * Chutiang beiseina neih chu i duh em? Chûng thutiamte chu a lo thleng thuai dâwn tih rin nachhan tûr ṭha tak kan nei a ni.

Nangmah leh mi dangte tâna Pathian thiltih tawh zawng zawngte ngaihtuah tûra i han chawlh hlek chuan, thil tam tak a ti tawh tih a chiang hle a ni. Nunna te, finna te, hrisêlna ṭha te, leh nun chhawmdâwl nâna thil ṭûlte kan nei a. Chûng zawng ai pawhin, Johana 3:16-a kan hriat angin kan tâna thi Isua hmanga Pathian min pêk tlanna chu malsâwmna ropui a ni lehzual a ni.

Natna te, indona te, ṭâm te, a nih loh leh thihna te awm tawh lohna, dinhmun him leh nuam taka chatuana nunna neihna chuan hlimna leh malsâwmna tâwp nei lo a thlen ngei ang. Chûng malsâwmnate i dawn dâwn leh dâwn loh chu nangmahah a innghat tlat a. Zawhna lo awm ta chu, Pathian tân eng nge i tih? tih hi a ni. (w14-E 03/01)