MAHSE, rinpawlhna thlâwptute thlîr dân erawh chu a dang hle a. “Khawngaihna nei lo . . . , chhehvêl boruak enkawl ngaihsak lo . . . , thil phalna ngaihsak lo sakhua a awm ngai a nih chuan mi han hmuh ta che?” tiin Eboo Patel-a, the Interfaith Youth Core dintu chuan a zâwt a ni.

Retheihna do tûr te, mihringte dikna atâna campaign tûr te, rah puah bomb phûm rûkna titâwp tûr te, a nih loh leh chhehvêl boruak chungchâng ngaihven tûrtein Buddhist te, Catholic te, Protestant te, Hindu te, Mosolman te, leh sakhaw dang tam takte chuan inzawmkhâwm châng an nei ṭhîn a ni. Rinna hrang hrang nei awm khâwmte chu inhriatthiam tawnna leh inchawhphûr tawnna zawngin an inhmukhâwm a. Anni chuan chi hrang hrang kalkhâwm an nihna chu bati chhi te, kût hmang te, rimawi te, ṭawngṭaina te, leh thil dangte’n an lâwm bawk ṭhîn.

Sakhuate an inchawhpawlhna chu rinna inang lote zînga buaina tih rehna a ni em? Rinpawlhna hi Pathianin khawvêl ṭha zâwk a thlentîr dân tûr a ni em?

Rinpawlhna pâwlte zînga lian ber pakhat chuan an member zîngah rinna hrang hrang nei 200 aia tam an awm thu leh ram 75 aia tama an awm thu chu chhuang takin a sawi a. Chu pâwl thiltum chu “tawrh chhelna chawisân a, ni tina rinpawlhna thiltiha inṭawiâwm” a nih thu a puang chhuak bawk. Mahse, chu chu sawi mai aia tih a harsat zâwkzia finfiah a ni tawh a. Entîr nân, chûng pâwlte sawi dân chuan, an inremna lehkhaa hming ziaktu rinna hrang tam takte rilru chu tihnat a nih loh nân fîmkhur taka an thuziak pawh dah chhuah a ngai a ni. Engvângin nge? Thil pakhatah chuan, an inremna ziahah chuan Pathian telh tûr nge telh loh tûr tih chungchângah an thu a inmil lo va. A hnuah chuan, Pathian chungchâng sawi emaw, sawi lan emaw rêng rêng pawh an pumpelh ta hial a ni.

Pathianin hmun a chan tawh si loh chuan rinna chuan eng hmun nge a chan tâk ang? Chu bâkah, engtin nge chutiang rinpawlhna thiltih chu sakhaw lam nêna inkûngkaih lo mite ṭanpuitu pâwl dangte laka a danglam? Chuvângin, kan lo sawi tawh rinpawlhna pâwl chuan sakhaw pâwl hrang ni lovin, “pâwlte zawmkhâwmtu” angin a insawi a ni.

“Sakhaw pâwl lianhote chuan thuchah inang an nei ṭheuh va: chu chu hmangaihna, khawngaihna, ngaihdamna,” a ni tih rinpawlhna ṭantu mi challang tak Dalai Lama chuan a sawi a. “Chûng miziate chu kan nî tin nunah a lang tûr a ni,” tiin a sawi belh bawk.

 Chûng mize duhawm tak hmangaihna, khawngaihna, leh ngaihdamna a hlutna chu sawiuar lutuk a awm thei lo ngei mai. Dân Rangkachak, tia sawiah Isua chuan: “Thil engkim miin in chunga an tiha in duh tûr ang apiang chu, mi chungah pawh ti ve rawh u,” tiin a sawi a. (Matthaia 7:12) Mahse, rinna dik tak chu thil ṭha chawi lârna mai chauh a ni em?

Paula chuan a hun laia Pathian betu nia inchhâl tam takte chungchângah heti hian a sawi a ni: “Pathian lamah ṭhahnem an ngai tih ka hriatpui a ni, hre famkim ang erawh chuan an ngai lo,” tiin. Eng nge thil dik lo awm? Paula chuan: “Pathian felna hre lovin, anmahni felna tihngheh tumin,” an awm vâng a ni tih a sawi. (Rom 10:2, 3) Pathianin ti tûra a duh hriatna famkim, a nih loh leh hriatna dik an nei lo va, an taimâkna leh an rinna chu awmze nei lo a ni tak zet a ni.—Matthaia 7:21-23.

Isua chuan: “Remna siamtu chu an eng a thâwl e,” tiin a sawi a. (Matthaia 5:9) Ani chuan tharum thawh loh leh sakhaw hrang hrang vuantute hnêna thlamuanna thu thlen chu a sawiuar a, a thil puan chhuah chu a nunpui bawk a ni. (Matthaia 26:52) A chhâng lêttute chu hmangaihna nghet taka phuarkhâwm an ni. (Kolossa 3:14) Mahse, Isua thiltum ber chu mi chi hrang hrangte inrem taka awm khâwmtîr mai a ni em? Mi dangte sakhaw thiltihah a tel ve em?

Pharisaite leh Sadukai sakhaw hruaitute chuan Isua chu nasa takin an dodâl a—tihhlum an tum hial a ni. Engtin nge a chhân lêt? Isua chuan a zirtîrte chu: “Anni chu pawisa suh u; hruaitu mitdel an ni,” tiin a hrilh a. (Matthaia 15:14) Isua chuan chûng mite nêna thlarau lama inunauna neih chu a duh lo a ni.

A hnuah, Korinth leh Grik ram—sakhaw chîn dân hrang hrang inpawlh nuaihna hmunahte chuan Kristian kohhran din a ni a. Chutiang hmunah chuan Kristiante chu engtin nge an awm ang? Tirhkoh Paula chuan heti hian a ziak a ni: “Ring lo mite nên rual lo taka nghâwngkawl bât dûnin awm suh u,” tiin. Engvângin nge chutianga an awm loh vang? Ani chuan: “Beliara leh Krista pawhin engnge inngeihna an neih? A nih loh leh ring lo leh ringtu chuan engnge chan dun an neih?” tiin a chhûtpui a. Tichuan: “An zîng ata lo chhuak ula, ahrangin awm rawh u,” tih zilhna hi a pe a ni.—2 Korinth 6:14, 15, 17.

Bible chuan rinpawlhna a do tih a chiang hle a. Mahse, ‘Chu ti a nih si chuan, engtin nge inpumkhatna dik tak chu neih theih a nih ang?’ tiin i ngaihtuah mai thei a ni.

The International Space Station—leilung hel kualtu thil ropui tak tak zir thiamna—chu ram 15 vêlte inlungrual taka an thawh rimna rah chhuah a ni a. Chuta tel ramte chuan an thil hman tûr atâna ruahmanna an siam chu pawm lo se chuan, an ruahmanna chu tihpuitlin theih a ni dâwn em ni?

Chu chu tûn laia rinpawlhna dinhmun chu a ni. Thawhhona leh inzah tawnna neih chu chawilâr ni mah se, rinna neih nân chuan remtih tlân ruahmanna a awm lo. Chu vâng chuan, nungchang leh sakhaw thurinte chu a hma zawng ai pawhin chi hrang hrang a tam tawh zâwk a ni.

Bible-ah chuan ruahmanna ang mai, Pathian tehnate kan hmu a. Bible thu nêna inmilin kan nung thei a. Chutianga titute chuan hnam leh sakhaw inthliar hrannate chu an nei tawh lo va, inrem leh inpumkhatin thawh ho an zir tawh a ni. Chu mi chungchângah Pathian chuan: “Mipuite chu hmui thianghlim ka puttîr leh ang, LALPA hming chu an zaa an lama thu khat vuaa a rawng an bâwl tlân theih nân,” tiin a lo sawi lâwk a. Inpumkhatna chu “hmui thianghlim,” Pathian duh dâna biakna aṭanga lo awm a ni.—Zephania 3:9; Isaia 2:2-4.

Jehova Thuhretute chuan Kingdom Hall-ah an bula rawn inkhâwm a, an zînga remna leh inpumkhatna mak tak mai chu nangmah ngeia rawn hmu tûrin an sâwm che a ni.—Sâm 133:1. ▪ (w14-E 03/01)