1, 2. (a) Mosia chu dinhmun hlauhawma ding anga a lan chhan hrilhfiah rawh. (A thupui chunga milem chu en rawh.) (b) Engvângin nge Mosia chuan lal thinurna chu a hlauh loh?

PHARAOA chu rorêltu hlauhawm tak leh Aigupta mite’n pathian anga an biak a ni a. Ani chuan “finna leh thiltihtheihnaah lei lam thilsiam zawng zawng chu a khûm vek,” nia an ngaih thu When Egypt Ruled the East tih lehkhabu chuan a sawi. Pharaoa chuan a khua leh tuite’n an hlauh a duh avângin, chuk tûra inpeih reng chawngkawr lem lallukhum chu a khum a, chu chuan lal hmêlmate chu nuaibo an ni thuai dâwn tih a hriattîr a ni. Chutiang a nih chuan Jehova’n: “Ka mi Israela thlahte chu Aigupta ram ata hruai chhuak tûrin Pharaoa hnênah ka tîr ang che,” tih a hrilh laia Mosia rilru tûr chu han mitthla teh.—Ex. 3:10.

² Mosia chu Aiguptaah a kal a, Pathian thuchah chu puang chhuakin, Pharaoa thinurna chu a tuar a ni. A rama hri kua-na a lên hnu chuan, Pharaoa chuan Mosia chu: “Ka hnên ata hi chhuak daih la, fimkhur rawh khai, ka hmêl rêng rêng rawn hmu tawh hlek suh; ka hmêl i hmuh nî la la chuan i thi ngei tûr a ni,” tiin a vau a. (Ex. 10:28) Mosia chuan Pharaoa a kalsan hmain, lal fa tîr a thih tûr thu a sawi lâwk a ni. (Ex. 11:4-8) A tâwpah, Mosia chuan  Israel chhûngkhaw tinte hnênah berâm emaw, kêl emaw talh a, kawngka lu chunga tât tûrin a hrilh a, chûng rante chu Aigupta pathian Ra tâna ran thianghlim a ni. (Ex. 12:5-7) Engtin nge Pharaoa chuan a chhân lêt? A chhân lêtna chu Mosia chuan a hlau lo a ni. Engvângin nge? Rinnain Jehova thu a awih a, “lal thinurna chu hlau lovin . . . hmuh theih lohva chu a hmuh avângin a tuar ṭan ṭan a ni.”—Hebrai 11:27, 28 chhiar rawh.

3. Mosia’n “hmuh theih lohva” a rinna chungchângah eng nge kan bih chian ang?

³ ‘Pathian hmu’ thei khawpin i rinna a chak em? (Mt. 5:8) ‘Hmuh theih lohva chu kan hmuh’ theih nâna thlarau lam thlîrna tifiah tûra min ṭanpui tûrin Mosia chu i lo ngaihtuah ang u. Engtin nge Jehova a rinna chuan mihring hlauhna lakah a vênhim? Eng kawngin nge Pathian thutiamte a rinzia a târ lan? “Hmuh theih lohva” a hmuh theihna chuan Mosia chu engtin nge amah leh a mite hlauhawma an awm laia a tihchak?

4. Mihring mit aṭanga thlîrin Pharaoa hmaa Mosia dinhmun chu eng nge?

⁴ Mihring mit aṭanga thlîr chuan Mosia chuan Pharaoa chu a tluk lo hle a. Mosia nun, a hmakhua, leh a hma lam hun chu Pharaoa kuta awm niin a lang. Mosia chuan Jehova hnênah: “Israela thlahte Aigupta ram ata zuk hruai chhuaktu atân chuan tunge maw ka nih le?” tiin a zâwt a ni. (Ex. 3:11) A hma kum 40 vêlah khân, Mosia chu râltlân angin Aigupta ram aṭangin a tlân chhia a. Ani chuan, ‘Aigupta rama kîr leh a, lal thin tihrim chu a finthlâk tak zet ang em?’ tiin a ngaihtuah mai thei a ni.

5, 6. Engin nge Mosia chu Pharaoa hlau lo va, Jehova ṭih zâwk tûra ṭanpui?

⁵ Mosia Aigupta rama a kîr leh hma khân, Pathianin thu bul pawimawh tak a zirtîr a, a hnuah: “Lalpa ṭih hi, hei ngei hi finna a ni,” tiin Mosia’n chu thu bul vêk chu Joba buah a ziak a ni. (Job. 28:28) Chutiang ṭihna nei a, fing taka thil ti tûra Mosia ṭanpui nân, Jehova chuan mihringte leh amah Pathian Engkimtitheia inan lohna chu a târ lang a. “Mihring kâ hi tu siam nge ni a, ṭawng thei lo te, bengngawng te, mitvâr te, mitdel te pawh hi tu tih nge ni? Kei LALPA hian a ni lo vem ni?” tiin a zâwt a ni.—Ex. 4:11.

⁶ Zir tûr chu eng nge ni? Mosia’n a hlauh a ngai lo. Jehova tirh a ni a, Ani chuan Pharaoa hnêna a thuchah puang chhuak tûra Mosia mamawh apiang a pe dâwn a ni. Chu bâkah, Pharaoa chuan Jehova chu a tluk lo. Chu chu Aigupta rorêlna hnuaia Pathian chhiahhlawhte dinhmun hlauhawma an awm vawi khatna a ni lo. Mosia chuan Abrahama te, Josefa te, leh amah ngei pawh tûn hmaa Pharaoa dangte rorêl laia Jehova’n a vênhim dân chu a ngaihtuah mai thei a. (Gen. 12:17-19; 41:14, 39-41; Ex. 1:22–2:10) “Hmuh theih lohva,” Jehova chunga rinna neiin, Pharaoa hmaah huai takin a inlan a, Mosia chuan Jehova’n sawi tûra a tihte chu a puang chhuak ta vek a ni.

7. Engtin nge unaunu pakhat chu Jehova a rinna chuan a vênhim?

⁷ Chutiang bawkin, unaunu Ella-i chu Jehova a rinna chuan mihring hlauhna nei lo tûrin a vênghim a. Kum 1949 khân Estonia ramah KGB chuan an man a, saruakin an awmtîr a, police officer la naupang deuhte chuan ngeiawm takin an melh bawk a. Ani chuan: “Tihmualpho hle niin ka inhria a. Mahse, Jehova hnênah ka ṭawngṭai a, thlamuang tak leh rilru hahdam takin ka awm ta a ni,” tiin a sawi. A hnuah Ella-i chu ni thum lai tân ina khung hran a ni a. “Police officer-te chuan: ‘Estonia ramah hian Jehova hriat ni tawh loh tûr khawpin kan che dâwn a ni! Labor camp-ah i kal ang a, mi dangte chu Siberia–ah an kal ang!’ tiin min au khum a. Deusawh takin, ‘Khawiah nge i Jehova chu?’ an tizui bawk a ni,” tiin a sawi. Ella-i chuan mihring a hlau dâwn nge ni a, Jehova a rinchhan dâwn? Dâwp a nih lai chuan, huaisen takin amah deusawhtute hnênah chuan: “He mi chungchâng hi ka  ngaihtuah nasa tawh hle a, zalên taka awm a, Pathian pawm hlawh loh ai chuan amah nêna inlaichînna neia lung ina tân ka thlang zâwk dâwn a ni,” tiin a sawi chhuak a ni. Ella-i tân chuan Jehova chu a hmaa mi tuemaw ding ang maiin a tak a. A rinna avângin rinawmna chu a vawng tlat a ni.

8, 9. (a) Mihring hlauhna tihbo dân ṭha ber chu eng nge ni? (b) Mihring hlauhna lakah i tlâwm mai dâwn a nih chuan, tu nge i ngaihtuah tlat ang?

⁸ Jehova i rinna chuan hlauhna hneh tûrin a ṭanpui ang che. Thuneitu thiltithei takte chuan Pathian be tûra i zalênna neih chu khuahkhirh an tum a nih chuan, i nunna, i hmakhua, leh i hma lam hun chu mihring kuta awm angin a lang thei a. Jehova rawng bâwl chhun zawm zêl a, thuneitute tihthinur reng mai chu a finthlâk leh thlâk loh i ngaihtuah mai thei a. Hei hi hre reng rawh: Mihring hlauhna tihbo dân ṭha ber chu Pathian rin a ni, tih hi. (Thufingte 29:25 chhiar rawh.) Jehova chuan: “Mihring thi leh mai tûr hlobet ang lek hi engati nge in hlauh le?” tiin a zâwt a ni.—Is. 51:12, 13.

⁹ I Pa engkimtitheia chu ngaihtuah tlat la. Ani chuan dik lo taka rorêltute avânga hrehawm tuarte chu a hmu a, a khawngaih a, a ṭanpui bawk a ni. (Ex. 3:7-10) Thuneitu thiltithei takte hmaah i rinna humhim ngei a ngai a nih pawhin, ‘engtin nge, eng thu nge ka sawi ang? tiin, lungkham suh ang che; i sawi tûr chu a hun takah chuan a hriattîr dâwn si che a.’ (Mt. 10:18-20) Rorêltute leh sawrkâr thuneitute chuan Jehova chu an tluk lo. Tûnah hian i rinna tihchakna hmangin, Jehova chu nangmah ṭanpui châk êm êmtu Mi tak tak angin i hmu thei a ni.

10. (a) B.C.E 1513 Nisan thla khân Jehova’n Israel mite chu eng kaihhruaina nge a pêk? (b) Engvângin nge Mosia’n Pathian kaihhruaina chu a zawm?

¹⁰ B.C.E 1513 Nisan thlaah Jehova chuan Mosia leh Arona chu Israelte hnênah kaihhruaina dang lam tak: Berâm pa emaw, kêl pa emaw hrisêl ṭha tak thlang chhuak a, talh a, an kawngka lu chunga tât tûr a, thu pe tûrin a hrilh a. (Ex. 12:3-7) Engtin nge Mosia chuan a chhân lêt? A chungchângah tirhkoh Paula chuan: “Rinnain Kalhlên Kût leh thisen theh kha a siam a, fa tîr tiboraltu chuan anmahni a tawh lohna tûrin,” tiin a hnuah a ziak a ni. (Heb. 11:28) Mosia chuan Jehova chu a rin tlâk tih a hria a, Aigupta rama fa tîrte tiboral tûra Jehova thutiam a rinna chu a târ lang a ni.

11. Engvângin nge Mosia chuan mi dangte a vaukhân?

¹¹ Mosia fapate chu “tiboraltu” hnên aṭanga hla tak, Midian ramah chuan an awm a nih hmêl hle a. * (Ex. 18:1-6) Mahse, an fa tîrte dinhmun hlauhawma awm Israel chhûngkaw dangte hnênah thuâwih takin kaihhruaina a pe a ni. Mite nunna chu dinhmun hlauhawmah a awm a, Mosia chuan a unau Israelte chu a hmangaih a ni. Mosia’n: “Israel upaho zawng zawng chu a koh khâwmtîr a, tin, an hnênah, . . . ‘kalhlênna tûr talh rawh u,’” tiin a hrilh thu Bible chuan a sawi.—Ex. 12:21.

12. Jehova chuan eng thuchah pawimawh nge puang chhuak tûra min hrilh?

¹² Vântirhkoh kaihhruaia awmin, Jehova mite chuan thuchah pawimawh tak an puang chhuak a ni: “A rorêl hun chu a lo thlen tâk avângin Pathian chu hlau ula, chawimawi rawh u; vân te, lei te, tuifinriat te, tuihna te siamtu chu chibai bûk rawh u,” tih hi. (Thup. 14:7) Chu thuchah puan chhuah hun chu a thleng mêk a. Kan ṭhenawmte chu ‘hremnate an hmuh ve loh’ nâna Babulon Khaw Ropui ata chhuak tûrin kan vaukhân tûr a ni. (Thup. 18:4) Pathian laka inmihran tawhte chu amah nêna “lo inrem” tûra ngennaah “berâm dang” chuan hriak thih Kristiante chu an thawhpui a ni.—Joh. 10:16; 2 Kor. 5:20.

13. Engtin nge mi dangte hnêna chanchin ṭha hrilh duhna chu kan tihpun ang?

¹³ “Rorêl hun” chu a lo thleng tawh tih kan  ring tlat a. Jehova sawi angin kan thu hrilh leh zirtîra siam hna a hmanhmawhthlâk tih kan ring tlat bawk a. Tirhkoh Johana chuan inlârnaah ‘thli pali chelh lei kil lia ding vântirhkoh pali’ chu a hmu a ni. (Thup. 7:1) Rinnain, chûng vântirhkohte’n he khawvêla mi tichhe thei tak hrehawmna nasa tak thli an chelh lai thlah tûra an inring reng chu i hmu em? Chûng vântirhkohte chu i rinna mitin i hmu a nih chuan, inrin tâwkna nei chungin chanchin ṭha chu i hril thei ang.

14. Engin nge ‘mi suaksual chu a nunna hum tûra a sualna kawng kalsan tûra’ vaukhân tûrin min chêttîr ang?

¹⁴ Kristian dikte chuan Jehova nêna inṭhianna leh chatuana nun beiseina chu an nei tawh a. Mahse, ‘mi suaksual a nunna hum tûra a sualna kawng kalsan tûra’ vaukhân chu kan mawhphurhna a ni tih kan hria a ni. (Ezekiela 3:17-19 chhiar rawh.) Mite thisen mawh kan phur loh nân maia thu hril kan ni lo. Jehova kan hmangaih a, kan ṭhenawmte pawh kan hmangaih a ni. Isua chuan Samari mi ṭha tehkhin thu a sawiah hmangaihna leh zahngaihna awmze dik tak chu a târ lang a. Heti hian kan inzâwt thei a, ‘Samari mi ṭha angin, “khawngaih êm êm” avânga thu hril tûra chêttîrin ka awm em?’ tiin. Tehkhin thua mahni inthiam chawp a, ‘kawng sîr lehlama’ hêl ta mai puithiam leh Levia mi ang nih chu kan duh ngai hauh lo vang. (Lk. 10:25-37) Pathian thutiamte rinna leh ṭhenawmte hmangaihna chuan tâwpna a thlen hmain thu hrilhnaah theih tâwp chhuah tûrin min chêttîr ang.

15. Engvângin nge Israelte chu danbeh nia an inhriat?

¹⁵ Israel mite’n Aigupta an chhuahsan hnua dinhmun hlauhawma a awm lai  khân, Mosia chu “hmuh theih lohva” a rinna chuan a ṭanpui a. Bible chuan: “Israela thlahte chu an han dâk a, tin, ngai teh, Aigupta mite chuan an lam chu an pan phei ta a: tichuan an lo hlau ta êm êm mai a: tin, Israela thlahte chuan LALPA chu an au ta a,” tiin a sawi a ni. (Ex. 14:10-12) Chu dinhmun harsa tak chu rin loh taka thleng a ni em? Ni lo ve. Jehova chuan: “Pharaoa thinlung chu ka tihkhauhsak ang a, tichuan anmahni chu a ûm ang a; tin, keiin Pharaoa lakah leh a sipaiho zawng zawng lakah chuan chawimawina chu ka hlawh ang; tichuan Aigupta miten kei hi LALPA chu ka ni tih an hria ang,” tiin a sawi lâwk a ni. (Ex. 14:4) Amaherawhchu, Israelte chuan mita an hmuh theih chin—an hma lama kal kai theih loh anga lang Tuipui Sen, an hnung lama Pharaoa indo tawlailîr, leh anmahni hruaitu berâm pu kum 80 mi—chauh chu an hmu thei! Danbeh niin an inhria a ni.

16. Thupui Senah khân engtin nge rinna chuan Mosia a tihchak?

¹⁶ Mosia erawh chu a phi buai ve lo. Engvângin nge? A rinna mit chuan tuipui emaw, sipai rual emaw aia thiltithei zâwk, thil engemaw a hmuh vâng a ni. “LALPA chhandamna” chu a hmu thei a, Jehova chuan Israelte a dosak dâwn tih a hria a ni. (Exodus 14:13, 14 chhiar rawh.) Mosia rinna chuan Pathian mite a tichak a. Bible chuan: “Rinnain khawmuala kal angin Tuifinriat Senah khân an kal kai a; Aiguptahovin chu chu tih an tum ve a, lem zawhin an awm ta a,” tiin a sawi a ni. (Heb. 11:29) Chu mi avâng chuan, “mipuite chuan LALPA chu an ṭih a: tichuan LALPA leh a chhiahhlawh Mosia chu an ring ta a.”—Ex. 14:31.

17. Nakina eng thil lo thleng tûrin nge kan rinna fiah ang?

¹⁷ Kan nunna pawh dinhmun hlauhawmah a ding thuai dâwn niin a lang. Hrehawm nasa tak vawrtâwpah chuan he khawvêl sawrkârte hian keimahni aia lian leh tam zâwk daih sakhaw pâwlte chu an tichhia ang a, an tiboral vek ang. (Thup. 17:16) Jehova chuan hneh awlsam taka kan awmna dinhmun a sawi lâwknaah “kulh nei lo khuate . . . kulh lova chêng, kulh kawngkhâr leh a kalhna thîr nei lohote” tiin a târ lang a ni. (Ezek. 38:10-12, 14-16) Kan tisa lam mit aṭanga thlîr chuan kan damkhaw chhuak theiin a lang lo vang. Eng nge i tih tâk ang?

18. Hrehawm nasa tak chhûnga kan dinngheh theih dân hrilhfiah rawh.

¹⁸ Hlauh avânga kan nghîng a ngai lo. Engvângin maw? Jehova chuan Pathian mite beihna chungchâng a sawi lâwk vâng a ni. A rah chhuah tûr pawh a sawi lâwk bawk a. “Chumi nîah chuan heti hi a ni ang a, Israel ram bei tûra Goga a lo kal hunah chuan ka thinrimna chu ka hnâr khu chhuah hluah hluah ang, tih hi Lalpa PATHIAN thu chhuak a ni. Ka thin a rima ka thin a ur lai takin,” tih hi. (Ezek. 38:18-23) Jehova’n chutih hunah chuan a mite tihnat duhtu zawng zawng chu a tiboral tawh ang. Jehova’n ‘a ni ropui tak leh râpthlâk takah’ a chhandam dâwn che tih i rin chuan, “LALPA chhandamna” chu i hmu thei ang.—Joel. 2:31, 32.

19. (a) Jehova leh Mosia inlaichînna kha eng angin nge a inhnaih? (b) I kawng zawng zawnga Jehova i hriat reng chuan, eng malsâwmna nge i dawn ang?

¹⁹ Tûnah hian ‘hmuh theih lohva chu i hmuh avânga tuar ṭan ṭanin’ chûng thil thleng phûrawm tak atân chuan inbuatsaih rawh! Pathian Thu zir a, ṭawngṭai ziahin Pathian Jehova nêna in inṭhianna chu tinghet ang che. Mosia chuan Jehova nên chutianga inṭhian ṭhatna chu a nei a, Jehova’n nasa taka a hman avângin amah nêna ‘hmaichhan meuhva inbia’ ang maiin Bible chuan a sawi a ni. (Deut. 34:10) Mosia chu zâwlnei danglam bîk tak a ni a. Nang pawhin Jehova chu rinnaa i hmuh theih tak tak chuan chutianga inlaichînna hnai tak chu i nei thei a ni. Pathian Thuin a fuih che anga “i kawng zawng zawngah” amah i hriat reng chuan, “i kawngte chu a kawhhmuh zêl ang che.”—Thuf. 3:6. (w14-E 04/15)