1, 2. (a) Kum 40 a nihin, Mosia chuan eng thutlûkna nge a siam? (A thupui chunga milem chu en rawh.) (b) Engvângin nge Mosia chuan Pathian mite nêna tihduhdaha awm chu a thlan?

MOSIA chuan Aigupta ramin a pêk theih thilte chu a hria a. In lian ropui tak takte a hmu bawk a. Ani chu lal chhûngkaw zînga mi a ni. Mosia chu “Aigupta rama mite finna zawng zawng an zirtîr a,” chutah chuan themthiamna te, vân sâng chanchin zirna te, chhiarkawp te, leh science lam thil dangte a tel ngei a rinawm. (Tirh. 7:22) Aigupta mi nâwlpuite neih theih ngai loh tûr, hausakna te, thuneihna te, leh chanvo ropui tak chu a nei thei a ni!

² Mahse, Mosia chuan kum 40 mi a nihin fa anga latu Aigupta lal chhûngkuate hriat thiam theih loh tûr thutlûkna a siam a. Aigupta mi nâwlpuite tân pawha nun “pângngai” tling pha lo, sal tângte zînga awm chu a thlang zâwk zu nia! Engvângin nge? Mosia chuan rinna a nei a. (Hebrai 11:24-26 chhiar rawh.) A rinna avângin, Jehova hmu thei ang mai a ni. Thlarau lam thil ngaihsak tak a nih angin, Mosia chuan “hmuh theih lohva,” Jehova chungah leh a thutiam thlen famkimnaah chuan rinna a nghat a ni.—Heb. 11:27.

3. He thuziakah hian eng zawhna pathum nge chhân a nih ang?

³ Keini pawhin kan mita kan hmuh theih piah lam chu kan en a ngai a. “Rinna nei pâwla mi” kan nih a ngai a ni. (Heb. 10:38, 39)  Kan rinna tichak tûrin, Hebrai 11:24-26-a ziak Mosia chanchin chu i lo bih chiang ang u. Chutianga kan tih lai chuan, hêng zawhna: Engtin nge rinna chuan Mosia chu tisa lam châkna hnâwl tûra a chêttîr? Hmuhsita a awmin, a rawngbâwlna chanvo hlut tûrin rinna chuan engtin nge a ṭanpui? Engvângin nge Mosia khân “lâwmman pêk tûr chu a thlîr” tlat? tih chhânna chu zawng ang che.

4. Mosia chuan “sual nawmna hlimpui” chungchângah eng thil nge a hriat?

⁴ Mosia chuan “sual nawmna hlimpui” chu rei lo tê atân chauh a ni tih rinna mitin a hmu a. Mi dangte chuan heti hian an ngaihtuah mai thei a ni, Aigupta chu milem biakna leh dawithiamna chuan chiahpiah hle mah se, khawvêl thuneitu ni khawpa a ṭhan chhoh laiin, Jehova mite erawh sala tângin hrehawm an tuar si a, tiin. Mahse, Mosia chuan Pathianin thil awm dân a thlâk thei tih a hria a. Nuam chêntute chu hmuingîl hlein lang mah se, he khawvêl suaksual hi a la chhe vek dâwn tih a hre bawk. Chuvâng chuan, ‘rei lo tê atân sual nawmna hlimpuina’ lamah hîpin a awm lo a ni.

5. Engin nge “rei lo tê atân sual nawmna hlimpui” chu do tûra min ṭanpui ang?

⁵ Engtin nge “rei lo tê atân sual nawmna hlimpui” chu i do theih? Sual nawmna chuan a daih rei lo tih theihnghilh ngai suh. Rinna mitin, “khawvêl hi a châknate chawpin a boral mêk” tih hmu thiam ang che. (1 Joh. 2:15, 17) Mi sual inlam lêt lote hma bâk tûr chu ngaihtuah rawh. Anni chu “hmun nâl takahte” an awm a, “thil râpthlâk taktea tihboral” an ni ang. (Sâm 73:18, 19) Thil sual ti tûra thlêma i awm hunah, ‘Ka hma lam hun atân eng nge ka duh?’ tiin inzâwt rawh.

6. (a) Engvângin nge Mosia chuan “Pharaoa fanua fapaa vuah” chu a duh loh? (b) Engvângin nge Mosia chuan thutlûkna dik a siam nia i ngaih?

⁶ Mosia rinna chuan a thiltih tûr thlan pawh a thunun bawk a. “Rinnain Mosia chuan a lo puitlin hnu khân Pharaoa fanua fapaa vuah a duh lo va.” (Heb. 11:24) Lal chhûngkaw zînga mi nia Pathian rawng bâwlin, a hausakna leh a hamṭhatna neihte chu Israel mi a unaute ṭanpui nân a hmang thei tih a ngaihtuah lo. Jehova chu a thinlung, rilru, leh chakna zawng zawnga hmangaih a tum tlat zâwk a ni. (Deut. 6:5) A thutlûkna siam chuan lungngaihna nasa tak a pumpelhtîr a ni. A hnu lawkah a kalsan tâk Aigupta rama ro tam tak chu Israel mite ngei chuan an lâksak ta si a! (Ex. 12:35, 36) Pharaoa chu tihmualpho leh tihboral a ni. (Sâm 136:15) Mosia erawh chu a boral ve lo va, Israel hnam pum chu hmun hima hruai tûrin Pathianin a hmang a. Ani chuan nun awmze nei tak a nei a ni.

7. (a) Matthaia 6:19-21-na sawi angin, engvângin nge hma lam hun rei lo tê piah lam chu kan thlîr ang? (b) Tisa lam thil leh thlarau lam thil khâwl khâwm inan lohna târ langtu entîrna sawi rawh.

⁷ Jehova chhiahhlawh ṭhalai i nih chuan, eizawn nâna hnathawh tûr thlannaah engtin nge rinna chuan a ṭanpui theih che? Hma lam hun atâna ruahmanna i siam a nih chuan i fing a ni. Mahse, Pathian thutiam rinna chuan hma lam hun rei lo tê atâna khâwl khâwm tûrin a chêttîr dâwn che nge ni a, chatuan atân zâwk? (Matthaia 6:19-21 chhiar rawh.) Chu chu Ballet lâm thiam tak Sophie-i’n thutlûkna a siam ngai chu a ni. Scholarship leh United States chhûnga ballet company-tea mite’n an duh êm êm nihna chu pêk tum a ni a. Ani chuan: “Chawimawi nih chu thil phûrawm tak a ni. A nihna takah chuan, ka rualpuite zîngah chungnung hlein ka inngai a. Mahse, ka hlim chuang lo,” tiin a sawi chhuak a ni. Tichuan, Sophie-i chuan Young People Ask—What Will I Do With My Life? tih video chu a en a. “Khawvêlin hlawhtlinna leh chawimawina min pêk chu thinlung zawng zawnga Jehova biakna nên ka thleng tih ka hre chhuak ta a ni. Tih tak zetin ka ṭawngṭai a. Tichuan, lâma eizawnna chu ka kalsan ta ni,” tiin a sawi. A thutlûkna chu engtin nge a ngaih? “Ka nun hlui kha ka ngai lo. Tûnah chuan zaa  100-in ka hlim tawh a ni. Ka pasal nên pioneer kan thawk a. Kan hming thang lo va, sum leh pai lamah kan harsa hle a. Mahse, Jehova, Bible zirpuite, leh thlarau lam thiltumte kan nei thung a ni. Inchhîrna rêng rêng ka nei lo,” tiin a sawi belh a ni.

8. Bible fuihna engin nge ṭhalai chu a nuna a tih tûr chungchângah thutlûkna siam tûra ṭanpui thei?

⁸ Jehova chuan i tâna ṭha ber a hria a. Mosia chuan: “In laka LALPA in Pathianin a phût chu engmah dang a ni lo va, in ṭhatna tûra LALPA in Pathian ṭiha, a kawng zawng zawng chu zawh a, amah hmangaih a, in thinlung zawng zawng leh in rilru zawng zawnga LALPA in Pathian rawngbâwl a, LALPA thupêkte, a dânte zâwm tûra tûna thu ka pêk che u pawm hi a ni,” tiin a sawi. (Deut. 10:12, 13) Ṭhalai i nih lai hian Jehova hmangaih a, ‘i thinlung leh rilru zawng zawnga’ a rawng bâwltîr thei tûr che eizawnna chu thlang ang che. Chutiang nun kawng chu ‘i ṭhatna tûr’ a ni tih i ring tlat thei a ni.

9. Mosia tân a chanvo hlen chhuah a harsat theih chhan hrilhfiah rawh.

⁹ Mosia chuan “Krista an hmuhsitna chu Aigupta ram rote ai chuan sum ropui zâwkah a ruat a.” (Heb. 11:26) Mosia chu “Krista,” a nih loh leh “Hriak Thiha” anga tirh a ni a, Israel mite Aigupta aṭanga hruai chhuak tûra Jehova thlan a ni. Mosia chuan chu hna thawh chu a harsain, ‘hmuhsit’ a ni hial dâwn tih a hria a. A hmain Israel mite zînga pakhat chuan: “Kan chungah hotuah leh rorêltuah tuin nge siam che?” tiin a lo nuihsawh tawh a ni. (Ex. 2:13, 14) A hnuah, Mosia ngei chuan Jehova hnênah: ‘Ka thusawi tehlul hi Pharaoan engtin nge a ngaihthlâk ang ni?’ tiin a zâwt a. (Ex. 6:12) Ani chuan inpuahchah nân leh hmuhsitna hmachhawn nâna a thil hlauh leh lungkhamte chu Jehova a hrilh a ni. Engtin nge Jehova’n Mosia chu a chanvo harsa tak hlen tûra a ṭanpui?

10. Engtin nge Jehova’n Mosia chu a chanvo hlen tûra a thuam?

¹⁰ A hmasain, Jehova’n Mosia chu: “I hnênah ka awm dâwn alâwm,” tiin a tiam a. (Ex. 3:12) A pahnihnaah, Jehova chuan: “Ni Tûra Ka Duh Ang Apiang Chu Ka Ni Ang,” tia a hming awmze zînga pakhat hrilhfiahna hmangin, rinngamna a neihtîr a. * (Ex. 3:14, New World Translation) A pathumnaah, Mosia chu Pathian tirh ngei a ni tih târ langtu thilmak tihtheihna a pe a ni. (Ex. 4:2-5) A palinaah, Mosia chu a chanvo hlen chhuak tûra ṭanpui tûr leh thu sawisaktu tûr Arona a pe bawk. (Ex. 4:14-16) A nun tâwp dâwn lamah Mosia chuan Pathianin A chhiahhlawhte chu chanvo a pêk eng pawh hlen chhuak tûrin a thuam ṭhîn tih a rin tlat avângin, amah thlâktu Josua hnênah: “I hmahruaitu chu LALPA a ni ang a, i hnênah a awm zêl ang a, a tithlâwn lo vang chia, kal pawh a kalsan tawp lo vang che; hlau suh la, zâm hek suh,” tiin inring tâwk takin a hrilh thei a ni.—Deut. 31:8.

11. Engvângin nge Mosia chuan a chanvo chu a hlut êm êm?

¹¹ Jehova ṭanpuina nên Mosia chuan a mawhphurhna harsa tak chu a hlut hle a, ‘Aigupta ram rote ai chuan ropui zâwkah’ a ruat a ni. Tihah chuan, Pharaoa rawngbâwl chu Pathian Engkimtitheia rawngbâwl nên chuan khaikhin theih a ni dâwn em ni? Aigupta lal fapa nihna leh “Krista,” a nih loh leh hriak thih nihna chu engtin nge khaikhin theih a nih tehrêng ang? A chanvo a hlut avângin Mosia chu malsâwm a ni a. Israel mite Ram Tiama a hruai laia thilmak “hlauhawm tak tak” tihtîr theitu, Jehova nêna inlaichînna ṭha bîk tak a nei a ni.—Deut. 34:10-12.

12. Jehova hnên aṭanga chanvo engte nge kan hlut ang?

¹² Keini pawhin chutiang bawk chu thawh tûr kan nei a. Jehova chuan tirhkoh Paula  leh mi dangte ang bawkin, a Fapa hmangin rawngbâwltuah min ruat a ni. (1 Timothea 1:12-14 chhiar rawh.) Chanchin ṭha hrilh theihna chanvo hlu kan nei ṭheuh va. (Mt. 24:14; 28:19, 20) Ṭhenkhat chuan hunbi kimin rawng an bâwl a. Baptisma chang tawh unaupa puitling takte chuan kohhranho rawngbâwltu leh upa angin kohhranah mi dangte rawng an bâwlsak a ni. Mahse, ring lotu i chhûngte leh mi dangte chuan chûng chanvote hlutna chu an ringhlel emaw, i inpêkna chu an sawisêl emaw pawh a ni thei. (Mt. 10:34-37) An tilunghnual che a nih chuan, i inpêkna chu a manhla leh hla loh emaw, i chanvo i hlen theih leh theih loh emaw chu i ngaihtuah ṭan mai thei a ni. Chutiang chu i chungah a thleng a nih chuan, engtin nge rinna chuan beidawng lo tûrin a ṭanpui ang che.

13. Engtin nge Jehova chuan theocratic chanvote hlen chhuak tûra min thuam?

¹³ Rinnain Jehova ṭanpuina dîl ang che. I hlauhna leh rilru veizâwngte chu hrilh rawh. Tihah chuan, hnathawh tûr petu che chu Jehova a ni a, ani chuan hlawhtling tûrin a ṭanpui ang che. Engtin nge? Mosia ang bawk khân a ṭanpui ang che. A hmasain, Jehova chuan: “Ka tichak ang che u a; a ni, ka ṭanpui ang che u; a ni, ka felna kut ding lamin ka chelh reng ang che u,” tiin a tiam che a. (Is. 41:10) A pahnihnaah, a thutiamte chu a rintlâk tih a hriat nawntîr che a ni: “Ka sawi tawh a, ka hlen bawk ang; ka tum tawh a, ka ti bawk ang,” tiin. (Is. 46:11) A pathumnaah, Jehova chuan i rawngbâwlna hlen tûrin ‘thiltihtheihna nasa’ tak a pe che a ni. (2 Kor. 4:7) A palinaah, i rawngbâwlnaa chhel thei tûrin min ngaihsak taktu kan Pa chuan ‘infuih tawn a, intisâwt tawn ṭheuh’ ṭhîn betu dikte khawvêl pum huapa inunauna a pe che a. (1 Thes. 5:11) Jehova’n i chanvote hlen chhuak tûra a thuam che hian amah i rinna chu a ṭhang cho ang a, a rawngbâwlnaa i chanvo dawnte chu leia ro hlute aiin i ngaihlu zâwk ang.

14. Engvângin nge Mosia chuan lâwmman a dawng dâwn tih a hriat chian?

¹⁴ Mosia chuan “lâwmman pêk tûr chu a thlîr” tlat a ni. (Heb. 11:26) Mosia’n hma lam hun a hriatna chu chutih lai chuan beitham hle mah se, chu chu a thil thlîr dân thununtîrtuah a hmang tho a ni. A pu Abrahama angin, Jehova’n mitthi tawhte a kaitho thei tih chu a ring tlat a. (Lk. 20:37, 38; Heb. 11:17-19) Malsâwmna a la dawn tûrte chuan Mosia chu  kum 40 chhûng râl tlâna awm ang leh kum 40 dang thlalêra a nun khawhral ang maia inngai lo tûrin a ṭanpui a ni. Pathian thutiamte thlen famkim dân tûr chu kimchang takin hre lo mah se, a rinna mit chuan lâwmman hmuh theih loh chu a hmu thei a ni.

15, 16. (a) Engvângin nge kan lâwmman dawn tûr kan ngaihtuah chu a pawimawh? (b) Lalram hnuaiah eng malsâwmnate nge dawn i châk?

¹⁵ I lâwmman dâwn tûr chu ‘i thlîr tlat’ em? Mosia angin, Pathian thutiamte chu kimchang takin kan hre hrih lo va. Entîr nân, hrehawm nasa tak lo thlen ‘hun chu kan hre lo.’ (Mk. 13:32, 33) Mahse, Mosia ai chuan lo thleng tûr Paradise chanchin chu kan hre tam zâwk hle a. Kimchang takin hre lo mah ila, Pathian Ram hnuaia nun chungchânga a thutiamte chu ‘thlîr tlat’ tûrin kan hre tam tâwk a ni. Khawvêl thar chungchâng chiang taka mitthlana chuan chu Lalram chu zawng hmasa tûrin min chêttîr ang. Engtin nge? Han ngaihtuah teh: In a chanchin i hriat tam loh tak chu i lei ang em? Lei hauh lo vang! Chutiang bawkin, beiseina awmze nei lo ûm nân kan nun kan thâp lo vang. Rinna chuan Lalram rorêlna hnuaia kan nun dân tûr chu chiang taka hmu tûrin min ṭanpui tûr a ni.

¹⁶ Pathian Ram chiang lehzuala mitthla tûrin Paradise-a i nun dân tûr chu ‘thlîr tlat’ ang che. I ngaihruat thiamna hmang rawh. Entîr nân, Bible-a chuang Kristian hun hmaa mite chanchin i zir hunah, an thawhleh huna an hnêna i zawh theih tûr chu ngaihtuah ang che. Ni hnuhnûng chhûnga i nun dân an zawh mai theih che chu ngaihtuah rawh. Kum za têl kal taa thi tawh, i pi leh pute chu hmu leh a, Pathianin an tâna thil a tih zawng zawngte zirtîr a phûrawm dân tûr chu mitthla ang che. Dinhmun râl muang taka ramsa tam takte bih chianna hmanga an chanchin zir nuam i tih dân tûr pawh chu han ngaihtuah teh. I ṭhat famkim telh telh ruala Jehova hnaih zual zêla i inhriat dân tûr chu ngaihtuah bawk ang che.

17. Engtin nge kan lâwmman dawn tûr hmuh theih loh rilrua chiang taka hriatna chuan tûn laiah min ṭanpui?

¹⁷ Kan lâwmman dawn tûr hmuh theih loh rilrua chiang taka hriatna chuan hma lam pan zêl tûr te, hlimna nei tûr te, leh chatuan nunna him tak ṭanchhana thutlûkna siam tûrtein min ṭanpui a ni. Paula chuan hriak thih Kristiante hnênah: “Kan hmuh loh chu kan beisei erawh chuan kan nghâk fan fan ṭhîn a ni,” tiin a ziak a. (Rom 8:25) Chu thu bul chu chatuan nun beiseina nei Kristian zawng zawngte tân a ni. Kan lâwmman chu la dawng lo mah ila, kan rinna a chak êm avângin “lâwmman pêk tûr” chu dawhthei takin kan nghâk zawm zêl a. Mosia ang bawkin, Jehova rawng bâwl nâna hun kan hmante chu hun khawhralna angin kan thlîr lo. “Thil hmuh theihte hi rei lo tê atân a ni a, thil hmuh theih lohte erawh chu chatuan atân a ni si a,” tih hi kan ring tlat zâwk a ni.—2 Korinth 4:16-18 chhiar rawh.

18, 19. (a) Engvângin nge kan rinna vawng tûra kan beih a ngaih? (b) A dawta thuziakah eng nge kan zir ang?

¹⁸ Rinna chuan ‘thil hmuh lohte chu min hriatfiahtîr a.’ (Heb. 11:1) Tisa lam mi chuan Jehova rawngbâwl hlutna chu a hmu lo. Chutiang mi tân chuan, thlarau lam rote chu thil “âtthlâk” a ni. (1 Kor. 2:14) Mahse, khawvêl mite hmuh loh chatuan nunna leh thawhlehna neih chu kan beisei a. Hriatna nei lo “kamtam” tia Paula kotu, a hun laia mi fingte ang bawkin tûn laia mi a tam zâwkte chuan kan thu hrilh beiseina chanchin chu thil âtthlâk niin an ngai a ni.—Tirh. 17:18.

¹⁹ Rinna nei lote hual vêla kan awm avângin, kan rinna vawng reng tûrin kan beih a ngai a. “I rin a bo loh” nân Jehova hnênah ṭawngṭai rawh. (Lk. 22:32) Sualin a nghawng te, Jehova rawngbâwlna ropui bîk tak te, leh chatuan nun beiseina i neihte chu i rilruah chiang takin vawng ang che. Mosia rinna chuan chûng thilte piah lam chu a hmuhtîr thei a. A dawta thuziakah, “hmuh theih lohva” hmu tûra a rinnain Mosia a ṭanpui dân kan bih chiang ang.—Heb. 11:27. (w14-E 04/15)