1, 2. Engtin nge ngun taka Jehova vênhimna chu enthlâkna camera en rengna nên a inan loh?

RAM tam takah chuan, thuneitute’n traffic dân zâwm lote an chhui a, tawhsual tâwk laite an hmuh theih nân enthlâkna camera-te an dah tam tawlh tawlh a. Mite an sut hnua tlân chhe nghâl ṭhînte camera-in thla a lo lâk chuan, chu chuan thil tisualtu tlânbo chu zawng hmu a, man tûrin thuneitute a ṭanpui thei a ni. Khâwl hmanga thlalâkna chu hmun tinah a awm tawh avângin mite’n an thiltih avânga hremna an pumpelh chu a harsa lehzual tawh a ni.

² Mahse, enthlâkna camera hmun tina hman a nihna chuan engtin emaw takin hmangaihna ngah tak kan Pa, Jehova chu min hriat chhuahtîr tûr a ni em? Bible chuan a mit chu “hmun tinah a awm” tih chu a sawi ngei mai. (Thuf. 15:3) Mahse, chu mi awmzia chu kan thiltih apiang a en reng tihna a ni em? Pathian chuan min hrem nân a dânte keng kawh tûr chauhvin min thlîr reng tihna a ni em? (Jer. 16:17; Heb. 4:13) Ni lo ve! Jehova’n min en reng chhan ber chu min hmangaih ṭheuh va, kan tâna ṭha tûr a duh vâng a ni.—1 Pet. 3:12.

3. Pathian hmangaihna târ lan dân eng kawng ngate nge kan ngaihtuah ang?

³ Pathianin min hmangaih avânga min vênhimna chu ngaihlu  tûrin engin nge min ṭanpui ang? Chu mi a târ lan dân chu i lo ngaihtuah ang u. Ani chuan (1) ngaihtuahna sual kan neih hunah min vaukhânin, (2) kawng dik lo kan zawh hunah min siam ṭhain, (3) a Thua kan hmuh thu bulte hmanga min kaihruaiin, (4) harsatna hrang hrang kan tawn hunah min ṭanpuiin, leh (5) keimahnia thil ṭha a hmuh hunah mal min sâwmin a târ lang a ni.

4. Jehova’n sual “kawngka bulah a bawk reng” tih vaukhânna a pêk chhan chu eng nge ni?

⁴ Pakhatnaah, ngaihtuahna sual kan neih huna Pathian min vaukhân dân i lo ngaihtuah ang u. (1 Chro. 28:9) Pathianin ngun taka min vênhimna ngaihlu tûr chuan, Pathianin a pawm loh avânga “thinur êm êm,” Kaina a dâwr dân kha han ngaihtuah teh. (Genesis 4:3-7 chhiar rawh.) Jehova’n Kaina chu ‘thil ṭha ti’ tûrin a fuih a. Chutianga a tih loh chuan, sual chu “kawngka bulah a bawk reng” tih a vaukhân a ni. Sual “chungah thu i nei tûr a ni,” tiin a hrilh bawk. Kaina’n vaukhânna a zawm a, ‘lawm a hlawh’ chu Pathian chuan a duh a. Chu chuan amah nêna an inlaichînna ṭha chu a vawng him dâwn a ni.

5. Eng kawngin nge Jehova chuan rilru put hmang thianghlim lo kan neih theihte chungchângah min vaukhân?

⁵ Eng nge kan chanchin ve le? Jehova chuan kan ngaihtuahna a hre thei a; kan rilru put hmang leh kan thiltih chhan dik tak chu a lakah kan thup thei lo. Hmangaihna ngah tak, kan Pa chuan felna kawng zawh tûrin min duh a; mahse, kan kawng zawh thlâk tûrin min tilui lo. A Thu, Bible hmangin kawng dik lo kan zawh hunah min vaukhân a ni. Engtin nge min vaukhân? Nî tina Bible kan chhiarnaah sual tihduhna leh rilru put hmang thianghlim lote hneh tûra min ṭanpuitu thute kan chhiar fo ṭhîn a. Chu bâkah, kan Kristian thu leh hla chhuahte chuan harsatna tawhte chungchâng leh a hneh theih dânte min hrilh a ni. Tin, kohhran inkhâwmahte chuan a hun taka fuihna kan dawng ṭheuh bawk!

6, 7. (a) Engtin nge mi maktaduai tam takte tâna buatsaih thu leh hla chhuahte chu Pathianin a hmangaihna che lantîrna anga sawi theih a nih? (b) Engtin nge mi mal taka Jehova ngaihsakna che chu i hlâwkpui theih?

⁶ Chûng vaukhânna zawng zawngte chu Jehova’n min hmangaihna leh ngun taka min vênhim ṭheuhna târ lanna a ni tak zet a. Dik takin, Bible chu kum za tam tak a awm reng tawh a, Pathian inawpna pâwl buatsaih thu leh hlate pawh mi maktaduai tam takte tâna ziak a niin, inkhâwmtea zilhna thute chu kohhran pumpui tâna buatsaih a ni bawk. Hêng zawng zawngah hian Jehova chuan i rilru put hmang i siam ṭhat theih nân, a Thu ngaihtuah ngun tûrin a duh che a. Chuvângin, hei hi Jehova’n mi mal taka a hmangaihna che a lantîrna anga sawi theih a ni.

⁷ Pathian vaukhânna hlâwkpui tûr chuan, min ngaihtuah tak zet tih kan hriat hmasak a ngai a. Tichuan a Thu chu ṭha taka chhâng lêtin, Pathian tilâwm lo thil ngaihtuahna tawh phawt chu paih bo kan tum tlat tûr a ni. (Isaia 55:6, 7 chhiar rawh.) Vaukhânna min pêkte chu kan zawm chuan, rilru hahna tûr tam tak kan pumpelh ang. Mahse, rilru put hmang ṭha lo kan neih angin thil lo ti ta ila, hmangaihna ngah tak kan Pa chuan eng ang ṭanpuina nge min pêk ang?

8, 9. Engtin nge Jehova’n a chhiahhlawhte hmanga zilhna min pêkna chuan min ngaihsak tak zetzia a târ lan? Entîrna pe rawh.

⁸ Zilhna kan tawh hunah Jehova min ngaihsakna chu, a bîk takin kan hre thiam thei a. (Hebrai 12:5, 6 chhiar rawh.) Zilhna emaw, thununna emaw dawn chu nuam kan ti lo ngei mai. (Heb. 12:11) Mahse, zilhna min petu rilru tûr pawh kan ngaihtuah tel a ngai a ni. Ani chuan Pathian Jehova nêna kan inlaichînna  nghawng thei kan thiltih chu a hriat a ngai a, kan rilru veizâwng a ngaihtuah a ngai bawk a, bâkah Bible aṭanga Pathian tilâwm tûra kan kawng zawh siam ṭhat theih dân min kawh hmuh tûrin hun leh tha leh zung pêk a inhuam a ngai a ni. Chutiang zilhna lo Chhuahna chu Jehova a nih avângin kan ngaihlu a ni.

⁹ Mihring zilhna petute’n Pathian ngaihsakna an târ lan dân entîrna chu i lo ngaihtuah ang u. Unaupa pakhat chuan thutaka a awm hmain saruak lem leh thuziakte a enziah ṭhîn a, mahse chu a thil chîn chu a bânsan tawh a. Chuti chung chuan, a thil chîn hlui chu mei kâng a rêm hnua a ling tlêm la awm angin a rilruah a la awm reng a ni. Cell phone thar a han neih chuan, chu thil ṭha lo tih a châkna chu a rawn thar leh a. (Jak. 1:14, 15) A phone chu Internet-a saruak lem en nân a hmang ta ṭhîn a ni. Ni khat chu telephone hmanga thu hrilhna an neih laiin, address ṭhenkhat en tûrin upa pakhat chu a phone a hawhtîr a. Upain phone a han hmansak chuan, saruak lem lanna web site-te chu a rawn lang ta mai a. Chu chu thlarau lama dinhmun hlauhawm taka ding kan unaupa tân chuan malsâwmnaah a chang ta a ni. A hun takah zilhna a dawng a, chu chu a hlâwkpui a, a thil chîn ṭha lo chu a bânsan ta a ni. Kan sual inthup pawh hmu a, kan kal thui lutuk hmaa min zilhtu, min ngaihsak tak kan Pa vâna mi chungah chuan kan va lâwm tak êm!

10, 11. (a) Eng kawngin nge Pathian kaihhruaina i zawn theih? (b) Engtin nge Jehova kaihhruaina zui a finthlâk dân chu chhûngkaw pakhatin an tawn?

¹⁰ Fakna hla phuahtu chu Jehova hnênah “i remruatnain [“thurâwnin,” NW] mi hruai,” tiin a zai a ni. (Sâm 73:24) Kaihhruaina kan mamawh apiangin, A thua a thil thlîr dânte zawmna hmangin Jehova chu kan “hre reng” thei a. Bible thu bulte nunpuina chu thlarau lamah kan hlâwkpui chauh ni lovin, a châng chuan kan tisa lam mamawh enkawl tûrin min ṭanpui bawk a ni.—Thuf. 3:6.

¹¹ Jehova’n mi ṭhenkhatte a kaihhruai dân entîrna pakhat chu Philippines rama Masbate tlâng rama awm, mi ram hawha lo siamtu thiltawnah hian a hriat theih a ni. An nupa chuan an chhûngkaw hung tak chu enkawl chungin regular pioneer an thawk a. Ni khat chu an ram neitu hnên aṭangin chhuak tûra hriattîrna thu, thin tiṭhâwng tak chu an dawng a. Eng nge a chhan? Rinawm lo anga dik lo taka puh  an nih vâng a ni. Unaupa chuan a chhûngte nêna an awmna tûr zawn hmuh chu lungngai hle mah se: “Jehova’n min pe ang. Eng thil pawh thleng se, kan mamawh chu min pe zêl a ni,” a ti. Unaupa rin tlatna chu thil âwm lo a ni lo. Ni engemaw zât hnuah ram chu an chhuahsan a ngai lo tih an han hriat chuan an rilru a hahdam ta hle a ni. Eng thil nge thleng ta? Dik lo taka puh an ni chung pawhin, Thuhretu chhûngkua chu Bible thu bulte kaihhruaiin an awm a, zahna leh inrem duhna an lantîr zawm zêl tih ram neitu chuan a hmu a ni. Chu chuan a rilru a khawih êm avângin, a awmtîr zui bâkah, lo neihna tûr hmun a pêk belh ta hial a ni. (1 Petera 2:12 chhiar rawh.) Ni e, Jehova chuan nuna harsatnate hmachhawn thei tûrin a Thu hmangin kaihhruaina min pe a ni.

12, 13. Eng dinhmunahte nge mi ṭhenkhat chuan Pathianin an hrehawm tawrhna a hriat leh hriat loh an ngaihtuah mai theih?

¹² Mahse, dinhmun harsa engemaw chuan rei tak a awh châng a awm ṭhîn a. Natna benvawn, chhûngte’n hun rei tak min dodâlna, a nih loh leh tihduhdahna kan tuar reng pawh a ni thei. Kohhran chhûnga tuemaw nêna mize inmil lohna nasa tak kan neihte chungchâng chu eng nge ni ve?

¹³ Entîr nân, tuemaw thusawi chu a ngilneih loh thlâk anga i ngaih avângin i rilru a na pawh a ni thei a. ‘Pathian inawpna pâwlah hei hi a thleng tûr a ni lo!’ tiin i sawi a. Mahse, chutianga sawitu unaupa chuan kohhranah chanvo hlu a dawngin, mi dangte’n amah chu an ngai ṭha hle lawi si. ‘Engtin nge chu chu a nih theih? Jehova’n a hmu lo em ni? Thil a ti dâwn lo em ni?’ tiin i ngaihtuah a ni.—Sâm 13:1, 2; Hab. 1:2, 3.

14. Kan mi mal buaina chingfel tûra Pathian a inrawlh loh chhan ni thei pakhat chu eng nge ni?

¹⁴ Jehova chuan inrawlh loh chhan ṭha tak a nei thei a. Entîr nân, mi dangte chu a mawh zawng zawng deuhthaw phurtu anga i ngaih laiin, Pathian thlîr dân erawh chu a dang daih thei a ni. A thlîrna aṭang chuan, i hriat aia tam mahin i thiam lo zâwk thei a. Thusawi na tak anga i ngaih chu, a nihna takah chuan i ngaihtuah ngai, i dawn ngai tak zilhna a ni thei a ni. Governing Body anga rawngbâwl, Unau Karl Klein-a chuan a nun kawng chanchin a ziahnaah Unau J.F. Rutherford-a hnên aṭangin ṭum khat chu zilhna chiang tak a dawn thu a sawi a. A hnuah Unau Rutherford-a chuan Unau Klein-a chu, “Chibai, Karl!” tiin hlim takin a bia a. Mahse, a zilhna dawn avânga la thinur rengin a rûl tâwk chauhvin a chhâng lêt a ni. Huatna a la pai reng tih hriain, Unau Rutherford-a chuan Diabola thanga tlûk luhna lakah a vaukhân a. A hnuah Unau Klein-a chuan: “A bîk takin, kan unau tuemawin a sawi tûr thil engemaw a sawi avânga a chunga huatna kan pai reng hian, Diabola thanga awh mai theihin kan awm tihna a ni,” tiin a ziak a ni. *

15. Dinhmun harsa hmachhawn thei tûra Jehova ṭanpuina i nghah laiin, dawhtheih lohna pumpelh tûrin engin nge ṭanpui ang che?

¹⁵ Kan harsatna tawrh chu tâwp nei lo anga a lan hunah kan dawhthei lo ṭan thei a. Chu chu engtin nge kan hmachhawn ang? Kawngpuiah motor i khalh a, traffic zama tâng angah han inmitthla teh. I tân chen tûr i hre lo va. I nin avânga kawng dang zawh i tum chuan, kawng i bo thei a. Dawhthei taka kawng pangngaia kal aiin i tumna hmun thlen nân hun i hmang rei zâwk thei a ni. Chutiang bawkin, Pathian Thua târ lan kawng chu i zawh tlat chuan, a hun takah i tumna hmun chu i thleng ngei ang.

16. Jehova’n kan hrehawm tawrhnaa inrawlh loh a thlan mai theih chhan dang chu eng nge?

¹⁶ Jehova chuan zirtîrna pawimawh tak kan dawn a duh avângin kan harsatnaah a inrawlh  lo pawh a ni thei. (1 Petera 5:6-10 chhiar rawh.) Pathian chuan harsatna chu a thlentîr lo ngei mai. (Jak. 1:13) Harsatna thlentîrtu ber chu, “inkhingpui Diabola” a ni a, harsatna tam zâwk chu a thlentîr a ni. Mahse, Pathian chuan thlarau lama ṭhang chho tûra min ṭanpui nân dinhmun harsa tak chu a hmang thei a. Kan hrehawm tawrhna chu a hmu a, ‘anin min ngaihsak’ avângin, “rei lo tê” chauh a awm zawm a phal ang. Harsatna i tawh laiin, ngun taka Jehova vênhimna chu i hlutin, chhuahna kawng a siamsak ngei ang che tih i ring tlat em?—2 Kor. 4:7-9.

17. Jehova’n tute nge a zawn a, engvângin nge?

¹⁷ A tâwp berah chuan, Pathian chuan a chhan thlamuanthlâk tak avângin kan nun chu a enfiah a. Zâwlnei Hanania hmangin Lal Asa hnênah: “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni,” tiin A puang chhuak a ni. (2 Chro. 16:9) Jehova chuan i chungah ‘a chakzia a tilang ang,’ a awmzia chu a vênghim chein, mal a sâwm dâwn che tihna a ni.

18. I thil ṭha tihte hlutsak lo anga i inhriat hunah, Jehova chungchâng eng nge i hriat reng ang? (A thupui chunga milem chu en rawh.)

¹⁸ Pathian chuan a “khawngaihna” kan dawn theih nâna “ṭhatna zawng” a, “ṭhatna ngaina” a, “thil ṭha ti” tûrin min duh a. (Amos. 5:14, 15; 1 Pet. 3:11, 12) Jehova chuan mi felte chu a hria a, mal a sâwm ṭhîn a ni. (Sâm 34:15) Entîr nân, Hebrai nau chhartu Siphraii leh Puaii te kha han ngaihtuah teh. Israel hnam chu Aigupta sala an tân lai khân, hêng hmeichhe pahnihte hian Hebrai nau an chhar laia nausên mipate tihlum vek tûra thu petu Pharaoa aiin, Pathian chu an hlau zâwk a. Pathian an ngaihsak avângin an chhia leh ṭha hriatna chuan nausênte nunna chu zuah tûrin a chêttîr a ni ngei ang. Siphraii leh Puaii chu a hnuah mahnia chhûngkua neiin an awm ta a ni. (Ex. 1:15-17, 20, 21) Engkim en rengtu Jehova chuan an thil ṭha tih chu a hmuh hmaih lo. Kan thil ṭha tih chu tumahin an ngaihsak lo nia hriat châng kan nei a. Jehova erawh chuan a ngaihsak a ni. Kan thil ṭha tih zawng zawng chu a hria a, min rûl lêt ang.—Mt. 6:4, 6; 1 Tim. 5:25; Heb. 6:10.

19. Thil ṭha tihte Jehova’n a hmuh hmaih lo tih engtin nge unaunu pakhat chuan a hriat?

¹⁹ Austria rama unaunu pakhat chuan a thawhrimna chu Pathianin a hmuh hmaih lo tih a hria a. Hungarian thlah a nih avângin, a thu hrilh rawngbâwlnaa a biak pawh tûr Hungarian ṭawng hmang address pakhat chu a dawng a. Chu mi hmun chu a va zawng nghâl a; mahse, chu inah chuan tumah an awm hauh lo. A kal nawn fo ṭhîn a. Chutah chuan tuemaw a awm nia hriat châng a nei a, mahse tumah chhângtu an awm lo. Thu leh hla chhuah te, a mi mala lehkha thawn te, leh amah biak pawh theihna tûr te, leh thil dangte chu a hnut chhiah ṭhîn a. Kum khat leh a chanve chhûng zet a va tlawh fo hnu chuan, a tâwpah kawngka chu hawnsak a ni ta nge nge! Hmeichhe nêlawm tak pakhat chuan unaunu chu a lo chibai a: “Khawngaihin lo lût rawh. I thil hnut chhiahte kha ka chhiar vek a, ka lo nghâk reng che a nia,” tiin a hrilh a ni. Inneitu chu cancer enkawlna (chemotherapy) hmanga enkawl mêk a ni a, mite hmu thei dinhmuna a awm loh vâng a ni. Bible an zir ṭan ta a. Ni e, Pathian chuan unaunu taimâkna chu mal a sâwm a ni!

20. Ngun taka Jehova vênhimna chu engtin nge i ngaih?

²⁰ Jehova chuan i thiltih apiang chu a hmu a, a tâwpah a rûl lêt ang che. Pathianin a en che tih i hriat hunah, enthlâkna camera-a endik reng ni angin inngai suh. Nangmah ngaihsak tak zettu Pathian chu hnaih lehzual angin i inngai zâwk thei a ni! (w14-E 04/15)