‘Pathianin ka ngaihtuahte leh ka mamawhte pawh tiamin engkim a hriat vek si chuan, engvângin nge ka ṭawngṭai a ngaih?’ tiin i zâwt mai thei a. Chu chu zawhna inâwm tak a ni. Pathian chuan “engte nge in mamawh tih a hre reng si a,” tiin Isua’n a sawi a ni lâwm ni? (Matthaia 6:8) Hmân lai Israel Lal Davida chuan chu chu hriain: “Ngai teh, aw LALPA, nangin i hriat fai vek loh chu, ka leiah hian thu rêng rêng a awm lo,” tiin a ziak a ni. (Sâm 139:4) Chutiang a nih chuan, engvângin nge Pathian hnêna kan ṭawngṭai a ngaih? A chhân nân, Bible-in Pathian betute ṭawngṭaina chungchâng a sawi chu i lo ngaihtuah ang u. *

Jehova * chuan thil engkim a hria tih Bible-in sawi mah se, a ngaih pawimawh chu amah betute chanchin lâk khâwm ringawt a ni lo tih a târ lang bawk. (Sâm 139:6; Rom 11:33) Pathian thil hriat reng theihna tâwp chin nei lo chu mi mal chanchin computer-a dah khâwm tawp tawp ang a ni lo va. A nihna takah chuan, Pathian chuan amah hnaih tûra min duh avângin chhûngrila kan ngaihtuahnate chu a ngaihsak hle a. (Sâm 139:23, 24; Jakoba 4:8) Chuvâng chu a ni, Pathianin kan mamawhte a hre reng chung pawha a hnêna dîl tûra Isua’n a hnungzuite a zirtîr chhan chu. (Matthaia 6:6-8) Min Siamtu hnêna kan ngaihtuahnate kan hrilh tam poh leh amah kan hnaih zual sauh ang.

A châng chuan, ṭawngṭainaa dîl tûr chiah hriat chu harsa kan ti mai thei a. Chutiang hunah chuan, Pathian chuan kan sawi chhuah loh rilru vei zâwng piah lam chu a hre thei a, kan dinhmunte a hriat vek avângin kan mamawhte chu a ngaihsak a ni. (Rom 8:26, 27; Ephesi 3:20) Langsâr lo tak pawh ni se, kan mi mal nunah Pathianin min ṭanpui tih kan hriat chuan, amah chu hnaih niin kan inhria a ni.

Bible chuan Pathian Engkimtitheia’n a chhiahhlawh rinawmte ṭawngṭaina a chhâng tih a sawi a; ṭawngṭaina ṭhenkhat a ngaihthlâk loh chhan pawh min hrilh bawk a ni. Entîr nân, hmân lai Israel rama tharum thawhna a hluar hle lai khân, Pathian chuan a zâwlnei Isaia chu a mite hnênah heti hian a hrilhtîr a ni: “Vawi tam tak in ṭawngṭai hunah pawh ka ngaithla tawh lo vang: in kutte chu thisenin a khat si a,” tiin. (Isaia 1:15) Pathian dân hmusittute leh rilru dik lo pu chunga ṭawngṭaitute chuan Pathianin a ngaihthlâksak chu an beisei thei lo tih a chiang hle a ni.—Thufingte 28:9; Jakoba 4:3.

Kawng leh lamah, Bible chuan: “Engpawh a duhzâwng anga kan dîl chuan anin min ngaihthlâksak ṭhin,” tiin a sawi a. (1 Johana 5:14) Chu chu  Pathianin amah betute dîlna apiang chu a chhâng vek tihna a ni em? Ni kher lo. Pathian hnêna ‘tisaa hlîng’ awm tihbosak tûra vawi thum ngawt dîltu, tirhkoh Paula chungchâng kha han ngaihtuah teh. (2 Korinth 12:7, 8) Mit ṭhat loh avângin hrehawm a tuar pawh a ni thei. A va beidawnthlâk dâwn em! Paula chu mak tak maia tihdam theihna pêk a ni a, mitthite hial pawh a kaitho va; mahse, natna a tuar ve tho a ngai a ni. (Tirhkohte 19:11, 12; 20:9, 10) A ṭawngṭaina chu a duh anga chhân ni lo mah se, Paula chuan Pathian chhân lêtna chu lâwm takin a pawm a ni.—2 Korinth 12:9, 10.

Bible-a kan hmuh mi ṭhenkhat chuan an ṭawngṭaina mak taka chhânna chu an dawng ngei mai. (2 Lalte 20:1-7) Mahse, chutiang chhânna chu Bible hun lai pawh khân a tam lo hle a ni. Ringtu ṭhenkhat chu Pathianin an ṭawngṭaina a chhâng lo anga a lan hunah an buai ṭhîn a. Lal Davida chuan: “Aw LALPA, eng chen nge mi theihnghilh kumkhua dâwn le?” tiin a zâwt a. (Sâm 13:1) Chu mi rinawm chuan Jehova’n a chhan chhuah ṭhin dân chu a hre thiam a, chu chuan Pathian a rinna chu a tinghet zual a ni. Chu a ṭawngṭainaah Davida chuan: “Nimahsela kei zawngin i ngilneihna hi ka ring a ni,” tiin a sawi zawm a. (Sâm 13:5) Davida angin, tûn laia Pathian betute pawhin an dîlna Pathianin a chhân hma chuan an ṭawngṭai fan fan a ngai thei a ni.—Rom 12:12.

Pathianin kan mamawh dik tak a ngaihsak.

Nu leh pate chuan chhan ṭha tak neiin an fate thil dîl chu an dîl laiin an pe ziah lo. Chutiang chiah chuan, Pathianin kan thil dîlte chu a chhân dân tûra kan ngaih angin emaw, kan beisei hunah emaw a chhâng lo mai thei a ni. Mahse, min Siamtu chuan hmangaihna nei tak pa angin kan mamawh dik tak chu a hun takah, a nih tûr ang takin min pe ang tih kan ring tlat thei a ni.—Luka 11:11-13.

Pathian chuan hriat thiam harsa takin a chhâng mai thei.

Harsatna awm chhunzawm reng laka chhâwk zângkhaina hmu tûrin kan ṭawngṭai a nih chuan engtin nge ni ang? Mak taka chhânna kan hmuh loh avângin Pathian Jehova chuan min chhâng lo angin thutâwp kan siam tûr a ni em? Chu mi nêna inkalh takin, Pathianin hriat thiam harsa zâwnga min ṭanpui leh pui loh chu ngun takin kan ngaihtuah tûr a ni. Entîr nân, min ngaihsak tak ṭhian chuan min ṭanpui tûra a tih theih chu a hun takah a ti pawh a ni thei a. (Thufingte 17:17) Jehova chuan min ngaihtuahtu ṭhian chu min ṭanpui tûrin a chêttîr a ni thei ang em? Chu bâkah, ṭanpui kan ngenna chu Pathianin Bible thute hmangin min chhâng pawh a ni thei. Chutah chuan dinhmun harsa tak hmachhawn tûra kan mamawh hriat thiamna kan hmu thei a ni.—2 Timothea 3:16, 17.

Pathian chuan a mite harsatna lâk bosak aiin hmachhawn tûra an mamawh chakna a pe zâwk ṭhîn. (2 Korinth 4:7) Entîr nân, Isua chuan Pathian hming tihchhiat a hlauh avânga a hrehawm tawrh tûr lâk bosak tûra a Pa a ngen lai khân, Jehova chuan a fapa tichak tûrin vântirhkoh a tîr a ni. (Luka 22:42, 43) Chutiang bawkin, Pathian chuan kan mamawh lai bera fuihna thu min pe tûrin ṭhian ṭhate a hmang thei a. (Thufingte 12:25) Chutianga chhânna chu hriat thiam a harsat avângin, kan ṭawngṭaina Pathianin a chhân dân chu ngaihsak lehzual a ngai thei a ni.

Chhânna ṭhenkhat atân chuan Pathian hun ruat nghah a ngai.

Bible chuan Pathian Engkimtitheia’n “a hun têah” mi inngaitlâwmte hnênah duhsakna a lantîr thu a sawi a. (1 Petera 5:6) Tihtak zêta kan dîlnate chu chhâng har deuh angin lang mah se, chu chu Jehova’n min ngaihsak lo anga kan ngaih a ngai lo. Ani chuan thil a hre zâwk daih a, min ngaihsak tak Siamtu chuan a hnêna thil kan ngen chu kan tâna ṭha ber tûr a nih leh nih loh a chhût tih rinhlelh rual a ni lo.

Entîr nân, i fapa naupang pakhat chuan thîrsakawr a dîl che a. A thil dîl chu i pe nghâl ang em? Thîrsakawr khalh tûra a la upa tâwk lo nia i hriat chuan leisak rih loh chu i tum thei a. Mahse, chu  chu a tâna ṭha ber tûr nia i hriat hunah chuan i tihsak pawh a ni thei. Chutiang bawkin, Pathian chuan kan ṭawngṭai ngut ngut chuan a hun takah kan “thinlung duhzawngte” chu min pe mai thei a ni.—Sâm 37:4.

Bible chuan Kristian dikte chu ṭawngṭaina hlutzia ring tlat tûrin a fuih a. Mi ṭhenkhat chuan ‘chu chu sawi mai aiin tih a harsa’ niin an sawi mai thei a ni. Harsatna emaw, rorêl dik lohna engemaw kan tuar reng a nih chuan Pathian chhânna nghah chu harsa tih châng kan nei mai thei a ni. Ṭawngṭai fan fan chungchânga Isua zirtîrna erawh chu kan hre reng tûr a ni.

Isua chuan dik lo taka rorêltu pakhat hnêna phuba lâksak tûra kal fo hmeithai rethei tehkhin thu a sawi a. (Luka 18:1-3) Atîrah rorêltu chuan a ṭanpui duh lo va; mahse a tâwpah chuan a rilruin: “A phuba ka lâksak teh mai ang, chutilochuan a lo kal fo hian mi la tihah hrep dah ang e,” a ti ta a ni. (Luka 18:4, 5) Atîra ziakin a sawi dânin, chu rorêltu chuan hmeithaiin “[amah chu] mite hmuh laia a beih,” a nih loh leh entîr neia sawi chuan ‘a hming a chhiat’ loh nân a ṭanpui a ni. * Dik lo taka rorêltu pawhin hming chhiat a hlauh avânga hmeithai rethei a ṭanpui a nih chuan, min ngaihsak tak Pathian chuan “achhûn azâna amah kotute” a va ṭanpui dâwn êm! Isua sawi angin, Pathian chuan “an phuba a lâksak thuai ang.”—Luka 18:6-8.

Ṭanpuina dîl reng pawh chu a chauhthlâk châng awm ṭhîn mah se, kan beidawng tûr a ni lo. Pathian ṭanpuina dawn kan duh tak zetna chu ṭawngṭai ngut ngutin kan lantîr a ni. Pathianin kan dîlna a chhânna chu hriat thiam kan tum a, chuvâng chuan amah kan hnaih zual a ni. Rinna nêna kan dîl ngut ngut chuan kan ṭawngṭainaa thil ṭha kan dîlte chu Pathianin a chhâng ngei ang tih kan ring tlat thei a ni.—Luka 11:9. (w14-E 04/01)