1-3. (a) Tûn laia mi tam tak chuan sum leh pai lamah eng buaina nge an tawh a, ṭhenkhatin engtianga chinfel nge an tum? (A thupui chunga milem chu en rawh) (b) Naupang enkawl seilennaah eng thil nge lungkham tûr awm thei?

“KA PASAL James-a chu nî tin hian hnathawhna aṭangin chau takin a lo haw ṭhîn a; mahse, kan nî tin mamawh aia tam hret chauh a hlawh chhuak a ni. A phur chhâwk zângkhai deuh ka duh a, kan fapa Jimmy-a chu a school kalpuite neih ang thil ṭhate leisak ka duh bawk a ni,” tiin Marilyn-i chuan a sawi. * An chhûng leh khatte ṭanpui leh an hma lam hun atâna inkhâwlkhâwm pawh a duh bawk a. A ṭhian tam tak chu sum thawk chhuak tam lehzual tûrin ram dangah an kal a ni. Mahse, chutianga kal ve tûra a inngaihtuah chuan, a rilru a buai hle a. Engvângin nge?

² Marilyn-i chuan a chhûngkaw hlu tak leh thlarau lam hun duan an neih ziahte kalsan chu a hreh hle a. Chuti chung chuan, mi dangte pawh ram dangah hun engemaw chen an kal a, an chhûngte pawhin Jehova rawng an la bâwl reng tho niin a lang, tiin a ngaihtuah a ni. Mahse, Jimmy-a chu râl khat aṭanga a enkawl seilen theih dân tûr pawh a ngaihtuah bawk a. A fapa chu Internet aṭangin, “Lalpa thununnaah leh zilhnaah” chuan hlawhtling takin a enkawl thei ang em?—Eph. 6:4.

 ³ Marilyn-i chuan kaihhruaina a zawng a. A pasal chuan a kal chu a duh lo va, mahse dan luih a tum loh thu a hrilh a ni. Upate leh kohhrana mi dangte chuan ram danga kal lo tûrin thurâwn an pe a; mahse, kohhrana unaunu ṭhenkhat chuan kal tûrin an fuih thung. Anni chuan: “I chhûngkua i hmangaih chuan, i kal ngei tûr a ni. Jehova rawng i bâwl chhun zawm thei tho alâwm,” an ti a. Merilyn-i chuan hreh tak chungin James-a leh Jimmy-a chu thlah nân a fâwp a, ram danga hna thawk tûr chuan a kal ta a. “Ka thang rei lo vang,” tiin a tiam a ni.

4. Engvângin nge mi tam tak chu ram danga an kal a, an nu leh pa ram danga awm naupangte chu tute’n nge enkawl ṭhîn?

⁴ Jehova chuan a chhiahhlawhte an retheih lutuk chu a duh lo va, mite chu retheihna tihreh nân hmun dangah an pêm ṭhîn. (Sâm 37:25; Thuf. 30:8) Thlahtu Jakoba chuan a fapate chu ṭâm avângin Aigupta ramah buh lei tûrin a tîr a. * (Gen. 42:1, 2) Tûn laiah, ram danga pêm a tam zâwkte chu an ṭâm vâng a ni lo. Mahse, leiba avângin hna an thawk rim hle pawh a ni thei a. Mi dangte chuan an chhûngkaw tihchangkân lehzual an duh vâng mai a ni thung. Ei leh bâr harsa tak kârah an thiltumte hlen tûrin, mi tam tak chu an chhûngkuate kalsanin ram chhûnga hmun dangah emaw, ram pâwnah emaw an awm a ni. An fa la naupang takte chu an kawppui te, an fa upa zâwk te, an pi leh pu te, an chhûngkhat dangte, a nih loh leh an ṭhiante enkawl tûrin an hnutchhiah ṭhîn. An kawppuite emaw, an fate emaw hnutchhiaha ram danga kal mi tam tak chuan duhthlan tûr nei lo angin an inngai a ni.

5, 6. (a) Isua chuan hlimna leh himna chungchâng eng nge a zirtîr? (b) Isua chuan a hnungzuitute chu eng nge dîl tûra a zirtîr? (c) Eng kawngin nge Jehova’n mal min sâwm?

⁵ Isua hun lai pawh khân, mi tam tak chu an retheiin, an chan a chhia a, anni chuan sum leh pai nei tam deuh se chuan an hlim a, an him zâwk an ring a ni thei ang. (Mk. 14:7) Isua erawh chuan mite chu thil danga an beiseina nghat tûrin a duh thung. Chatuan daih hausakna Hnâr—Jehova an rinchhan chu a duh a ni. Tlâng chunga a Thusawiah, Isua chuan hlimna leh himna tak tak chu sum leh paiah leh mahni thawhrimnaah a innghat lova, kan Pa vâna mi nêna kan inṭhiannaah a innghat tih a hrilhfiah a ni.

⁶ Isua chuan ṭawngṭai dân tûr a zirtîrnaah hausakna ni lovin, kan ni tin mamawh, ‘ei khawp’ dîl tûrin min zirtîr a. A thu ngaithlatute hnênah: ‘Leiah, . . . in tân rote khâwl khâwm suh u; vânah, . . . in tân rote khâwl khâwm zâwk rawh u,’ tiin a hrilh a ni. (Mt. 6:9, 11, 19, 20) Jehova chuan a thutiam angin mal min sâwm dâwn tih kan ring tlat thei a. Pathian malsâwmnaah chuan a pawm hlawhna mai ni lovin, kan thil mamawh tak zette min pêk pawh a tel a ni. Hlimna leh himna dik tak neih theih dân kawng awmchhun chu sum leh paiah ni lovin, min ngaihsaktu Paa rinna nghah hi a ni.—Matthaia 6:24, 25, 31-34 chhiar rawh.

7. (a) Naupangte enkawl tûra mawhphurhna chu Jehova’n tute hnênah nge a pêk? (b) Engvângin nge nu leh pate’n fate an enkawl dun a ngaih?

⁷ ‘Pathian felna zawn hmasaknaah’ chuan Jehova thlîr dân anga chhûngkaw mawhphurhna thlîr a tel a. Mosia Dânah khân Kristiante hman tûr he thu bul: Nu leh pate chuan an fate hnênah thlarau lam thil zirtîrna an pêk a ngai, tih hi a tel a ni. (Deuteronomy 6:6, 7 chhiar rawh) Pathian chuan he mawhphurhna hi pi leh pute emaw, mi dangte emaw hnênah ni lovin, nu leh pate hnênah a pe a. Lal Solomona chuan: “Ka fapa, i pa zirtîrna che chu ngaithla la, i nu zirtîrna che chu hawisan suh,”  tiin a sawi a ni. (Thuf. 1:8) Pathian chuan nu leh pate chu an fate kaihruai leh zirtîr tûra awm dûn tûrin a duh tihna a ni. (Thuf. 31:10, 27, 28) Naupangte chuan thil tam tak, a bîk takin thlarau lam thilte chu nî tina an nu leh pate’n Jehova chanchin an sawina aṭang leh entawn tûr an siamna aṭangin an zir a ni.

8, 9. (a) Chhûngkua aṭanga nu emaw, pa emaw an awm hran hian eng inthlâk danglamna nge lo awm ṭhîn? (b) Awm hranna chuan rilru leh nungchang lamah eng chhiatna nge a thlen?

⁸ Ram danga kal tumte chuan an kal hmain an thil tawn theihte leh inpêk a ngaih dânte chu an ngaihtuah mai thei a, an chhûngte kalsannain a nghawng tûr hmu lâwk erawh an awm mang meuh lo. (Thuf. 22:3) * A kal hnu lawkah Marilyn-i chu a chhûngte nêna an awmho loh avângin rilru na takin a awm a. A pasal leh a fapa pawh chutiang tho chuan an awm a ni. Naupang Jimmy-a chuan a nu hnênah: “Engvângin nge min kalsan?” tiin a zâwt reng ṭhîn a. Marilyn-i’n thla engemaw zât lek kal tûra a lo ruahman chu a kum têlah a chang ta a, a chhûngkuaa inthlâk danglamna awm chuan a tihlauthâwng hle. Jimmy-a chu a lak aṭangin a inla hrang a, engmah pawh a hrilh ngai tawh lo a ni. Marilyn-i chuan lungngai takin, “Min hmangaih tawh lo,” tiin a sawi a ni.

⁹ Nu leh pate leh fate an chênho loh hian rilru leh nungchang lamah chhiatna a thleng thei a. * Fate chu an naupan a, an awm hran rei poh leh an rilru natna a zual ṭhîn a ni. Marilyn-i chuan Jimmy-a hnênah, a tâna ṭha tûr a nih avânga ti a nihzia a hrilh a. Jimmy-a erawh chuan a nuin a hlamchhiah niin a ngai tlat thung. Atîrah chuan, a nu a awm loh avângin a thinur a. A hnua amah tlawh tûra a nu a lo kîr chuan, a haw leh tawh thung a ni. Kalsana awm naupangte zînga thil pângngai tak angin, Jimmy-a chuan a nuin a thu a awihna leh ngainatna chu a phu tawh lo niin a hria a ni.—Thufingte 29:15 chhiar rawh.

10. (a) Thilpêkte hmanga nu leh pate awm lohna thawi dam tumna chuan fateah engtin nge nghawng a neih theih? (b) Nu emaw, pa emaw chuan râlkhat aṭanga a fa enkawl a tum hian eng thil nge kim lo awm ṭhîn?

¹⁰ Marilyn-i chuan a awm lohna chu sum leh thilpêkte thawnna hmanga thawi dam tum mah se, a fapa chu a lak aṭangin a tihrang tih, leh thlarau lam ngaihsakna leh chhûngkaw inlaichînna aiin tisa lam thil dah hmasa tûrin a fapa chu tum loh takin a lo zirtîr reng tih a hmu chhuak ta a ni. (Thuf. 22:6) Jimmy-a chuan a nu chu, “Lo kîr suh. Thil min rawn thawn tawp mai rawh,” tiin a hrilh a. Marilyn-i chuan lehkha thawnte, phone-te, a nih loh leh  video-a inbiaknate hmangin a fapa chu a enkawl seilian thei lo tih a hre thiam ṭan ta a. “I fa chu internet aṭangin mangṭha nân i kuahin, i fâwp thei lo,” tiin a sawi a ni.

11. (a) Engtin nge hnathawk tûra nupa awm hranna chuan an inneihna a nghawng? (b) Engtin nge unaunu pakhat chuan a chhûngte hnêna a kîr leh a ngai tih a hriat chhuah?

¹¹ Jehova nêna an inlaichînna leh a pasal James-a nêna an inlaichînna pawhin a tawrh phah a. Kristian inkawmhona leh rawngbâwlnaah chawlhkâr khatah ni khat emaw, a aia tlêm emaw chauh a tel thei a, a hnathawhna pu lakah mipat hmeichhiatna lama a lo invên a ngai bawk a ni. Buaina a tawh hunah rinchhan tûr kawppui a nei lo va, Marilyn-i leh James-a chuan mi dang an ngaina ṭan ta ve ve a, chûng mite chu an chêt sualpui ṭêp a ni. Marilyn-i chuan amah emaw, a pasal emaw chu uirê lo mah se, an awm dun loh laiin rilru lam leh mipat hmeichhiatna lama mamawh phuhru tûra Bible kaihhruaina chu an zâwm thei lo tih a hre thiam ta a. Ngaihtuahna inhrilh te, inen te, a nih loh leh innuih te, kut invawn te, nupa inkâra “hmangaihna” lantîr, a nih loh leh “chan tûr” inpêkte chu an ti thei lo a ni. (HTK. 1:2; 1 Kor. 7:3, 5) Tin, an fapa chu Jehova an biakpui thei lo bawk. Marilyn-i chuan: “Jehova ni ropuia dam khawchhuak tûrin chhûngkuaa Pathian biakna neih ziah a pawimawhzia inkhâwmpuiah ka han hriat chuan thlarau lama intichak leh tûr leh chhûngkaw nun siam ṭha leh tûrin ka haw a ngai tih ka hre thiam ta a ni,” tiin a sawi.

12. Chhûngte hlata awmte hnênah Bible thurâwn eng nge pêk theih a nih?

¹² Haw tûra Marilyn-i’n thutlûkna a han siam chuan ṭhenkhatin thurâwn ṭha an pe a, ṭhenkhat erawh chuan thurâwn ṭha lo an pe bawk. Ram danga a lawina kohhran upate chuan a rinna leh huaisenna avângin an fak a. An kawppuite leh an chhûngte hlata awmte erawh chuan an fak lo thung. Anni chuan entawn tûr ṭha a siam chu zui a hnêkin, haw lo tûra thlêm an tum a. “I lo kîr leh thuai ang. I haw chuan engtin nge in inchâwm ang?” an ti a. Chutianga tilunghnual zâwnga thusawi ai chuan Kristian unaute chuan ‘Pathian Thu chu sawichhiata a awm loh nân, la nula deuhte chu an pasalte hmangaih tûr te, an fate hmangaih tûr te, . . . mahni ina thawktua awm tûr tein’ an fuih tûr a ni.—Tita 2:3-5 chhiar rawh.

13, 14. Chhûngte thil beisei aia Jehova dah hmasa tûr chuan engvângin nge rinna neih a ṭûl? Entîrna pe rawh.

¹³ Hna thawk tûra ram danga kal tam tak chu hnam dân ngaihhlutna leh mi dang zawng aia nu leh pate chawimawi a ngai nia hriatna neia seilian an ni a. Kristian tân chuan Jehova tilâwm tûra thil chîn ṭhan lâr tak emaw, chhûngte duhzâwng emaw kalha thil tihna chu rinna târ lanna a ni tak zet a ni.

¹⁴ Carin-i chanchin hi han ngaihtuah teh, ani chuan: “Kan fapa Don-a a pian laiin ka  pasal nên chuan ram dangah hna kan thawk a, chutih lai chuan Bible ka zir ṭan mêk a ni. Mi dangte chuan sum kan thawh chhuah tam lehzual hma chu ka nu leh pate enkawl atân Don-a chu thawn haw tûrin min beisei,” tiin a sawi. Carin-i’n Don-a chu enkawl a tum luih chuan a pasal pawh tiamin a chhûngte chuan mi thatchhia tia kovin, an nuihzat a. “Dik taka sawi chuan, chutih laia ka nu leh pate bula kum engemaw zât chhûng atâna Don-a dah a ṭhat loh chhan chu ka hre thiam chiah lo va. Mahse, kan fapa enkawl tûrin keini a nu leh pate hi Jehova’n mawhphurhna min pe tih ka hria a ni,” tiin Carin-i chuan a sawi. A han rai leh chuan ring lotu a pasal chuan nau titla tûrin a nawr a. Thutlûkna ṭha a lo siam tawh chuan a rinna a tichak a, Jehova tân a dingnghet tlat a ni. Tûnah chuan amah leh a pasal, leh an fate chu an awmho avângin an lâwm hle. Carin-i khân mi dangte enkawl seilen atân a fa pakhat zâwk emaw, an pahnihin emaw lo thawn haw ta se chuan, a rah chhuah chu a danglam hle ngei ang.

15, 16. (a) Naupan laia hnutchhiaha awm unaunu pakhat thil tawn chu sawi rawh. (b) Engvângin nge a fanu chungchângah kawng dang zui a tum?

¹⁵ Thuhretu pakhat, a hming Vicky-i chuan: “Kum rei lote chhûng chu ka pi’n min enkawl a, ka nau erawh chu ka nu leh pa bulah a awm thung. Ka nu leh pa bula ka han awm leh meuh chuan, an chunga ka rilru put hmang chu a lo danglam tawh a. Ka unaunu chuan a puitlin hnuah pawh a rilru veizâwng chu an hnênah a hrilh hreh lo va, a kuah hreh lovin, inlaichînna hnai tak an nei a ni. Kei erawh chuan ka puitlin hnuah pawh anni chu ka hnaih thei lo va, ka rilru veizâwng hriattîr chu harsa ka ti hle. Ka unaunu nên chuan ka nu leh pa an tar huna enkawl tûrin kan intiam a. Ka unaunu chuan hmangaihna avângin a ti ang a, kei erawh chuan tih tûr a nih avâng chauhva ti ka ni ang,” tiin a sawi a ni.

¹⁶ “Ka nu chuan a nu enkawl atâna min thawn haw ang bawk khân, ka fanu pawh a enkawl atâna thawn haw tûrin min duh a. Thiam takin ka hnial a ni. Ka pasal nên chuan kan fate chu Jehova kawnga enkawl seilen kan duh a. Ka fanu nêna kan inlaichînna lo awm zêl tûr tihchhiat chu ka duh lo a ni,” tiin Vicky-i chuan a sawi a ni. Ani chuan nun hlawhtling neih theih dân awmchhun chu sum leh pai neih tumna leh chhûngte thil beisei aia Jehova leh a thu bulte dah hmasak a ni tih a hria a. Isua chuan “Tuman hotu pahnih [Pathian leh sum] rawng an bâwl khawp thei lo,” tiin chiang takin a sawi a ni.—Mt. 6:24; Ex. 23:2.

17, 18. (a) Kristiante chuan eng thilah nge englai pawha duhthlanna an neih? (b) A dawta thuziakah eng zawhnate nge kan sawiho ang?

¹⁷ Kan Pa, Jehova chuan kan nuna a Ram leh a felna kan dah hmasak phawt chuan, kan thil mamawh tak zette nei tûrin ṭanpui min tiam a. (Mt. 6:33) Chuvângin, Kristian dikte chuan englai pawhin duhthlan tûr an nei a ni. Eng ang harsatna pawh tâwk mah ila, Jehova chuan Bible thu bulte bawhchhe lo tûrin “tlân chhuahna kawng” siamsak min tiam a ni. (1 Korinth 10:13 chhiar rawh.) A finna leh kaihhruaina dîla ‘amah kan rin a,’ a thupêkte leh thu bulte kan zui a, kan ‘nghah fan fan’ chuan “aman [kan tân] a ti vek ang.” (Sâm 37:5, 7) Hotu dik tak pakhat awmchhun anga a rawngbâwl tûra kan thawhrimna chu mal a sâwm ngei ang. Amah kan dah pawimawh ber chuan, min “hlawhtlintîr” ang.—Genesis 39:3 nên khaikhin rawh.

¹⁸ Awm hrannain a ngawng chhiatna siam ṭha tûrin eng nge tih theih awm? Awm hrang si lova kan chhûngte mamawh thawk chhuak tûrin eng hma lâkna ṭangkai takte nge kan neih theih? He mi chungchângah hian thutlûkna ṭha siam tûrin mi dangte chu engtin nge hmangaihna nei taka kan ṭanpui theih? A dawta thuziak chuan hêng zawhnate hi a chhâng ang. (w14-E 04/15)