1. Thu hrilh rawngbâwlnaa mite kan cheibâwl dân chuan nghawng eng nge a neih? Entîrna pe rawh. (A thupui chunga milem en rawh.)

KUM tlêm tê liam taah khân, Fiji rama Kristian nupa tuak khat chu Krista thih Hriatrengna atâna mite sâwmna beihpui thlâknaah an tel a. Nu pakhat a in kawta an biak lai chuan ruah a rawn sûr ṭan a. Unaupa leh a nupui chuan an nihliap pakhat chu an hmantîr a ni. Hriatrengna zâna chu nu a lo tel ve an hmuh chuan nupate chu an lâwm hle. Chu nu chuan Thuhretute va tlawh laia an thusawi chu a hriat mang tawh loh thu a sawi a. Mahse, amah an cheibâwl dân chuan a rilru a khawih êm avângin Hriatrengnaah a tel phah ta a ni. Engin nge chutianga chhân lêtna ṭha tak chu awmtîr? Nupate chuan Dân Rangkachak tia koh ṭhin chu an zawm vâng a ni.

2. Dân Rangkachak chu eng nge ni a, engtin nge kan nunpui theih?

² Dân Rangkachak chu eng nge ni? Isua thurâwn pêk: “Thil engkim miin in chunga an tiha in duh tûr ang apiang chu, mi chungah pawh ti ve rawh u,” tia a sawi hi a ni. (Mt. 7:12) Engtin nge chu dân chu kan nunpui theih? A tlângpui thuin, thil pahnih tihna hmangin a ni a. A hmasain, heti hian kan inzâwt tûr a ni, ‘Mi dang angah han inchan ta ila, engtia cheibâwl nge ka duh  ang?’ tiin. Tichuan, mi dangte chu chutiang chuan a theih ang tâwkin kan cheibâwl tûr a ni.—1 Kor. 10:24.

3, 4. (a) Dân Rangkachak chu kan Kristian unaute kan dâwr hun chauhva hmang tûr kan nih loh chhan hrilhfiah rawh. (b) He thuziakah hian eng nge kan sawiho vang?

³ Kan Kristian unaute kan dâwr hunah Dân Rangkachak chu kan nunpui ṭhîn a. Mahse, Isua chuan kan rinna min ṭâwmpuitute chauh chutianga cheibâwl tûr chuan min ti lo. A nihna takah chuan mi nâwlpuite leh kan hmêlmate hial pawh kan cheibâwl dân tûr a sawi laiin he Dân Rangkachak thu hi a târ lang a ni. (Luka 6:27, 28, 31, 35 chhiar rawh.) Kan hmêlmate lakah pawh he Dân Rangkachak hi hmang tûr kan nih chuan, an zînga tam tak—“chatuana nun duhna rilru dik tak” nei mai theite—hnêna thu kan hrilh hunah phei chuan kan hmang lehzual tûr a va ni êm!—Tirh. 13:48, NW.

⁴ Tûnah chuan thu hrilh rawngbâwlna kan neih laia rilrua kan vawn theih zawhna pali kan sawiho vang: Kan va biakte chu tute nge an nih? Anni chu khawi hmunah nge kan va pan? Eng huna pan nge ṭha ber ang? Engtin nge kan pan ang? Hêng zawhnate hian thu kan hrilhte rilru veizâwng hre thiam tûr leh anmahni mila kan thusawi siamrem tûra min ṭanpui dân kan sawiho dâwn a ni.—1 Kor. 9:19-23.

5. Eng zawhnate nge kan inzawh theih?

⁵ Kan thu hrilh rawngbâwlnaah, mi chi hrang hrangte kan be ṭhîn a. Mi tinte chu an seilen dân a inang lo hlawmin, mi mal buaina hrang hrang an nei ṭheuh a ni. (2 Chro. 6:29) Tuemaw hnêna chanchin ṭha hrilh i tum hunah, heti hian inzâwt rawh: ‘Kan dinhmun hi inthlâk thleng ta se, ani chuan engtianga min thlîr nge ka duh ang? Ṭhenawm narân ve mai angin min thlîr ta se ka lâwm ang em? Nge ni a, a mi mal taka min hriat chian chu ka duh zâwk?’ Chutiang zawhnate ngaihtuahna chuan in neitu tinte chu ṭha taka cheibâwl tûrin min ṭanpui ang.

6, 7. Thu hrilh rawngbâwlnaa kan tawn tuemaw chu thinrim emaw, hawihhâwm lo emaw anga a lan chuan, eng nge kan tih ang?

⁶ Tumah hian “mi ṭha lo” anga mite’n min thlîr chu kan duh lo. Entîr nân, Kristian kan nih angin ‘kan ṭawngka chhuak chu khawngaihna tel ni fo’ tûra Bible thurâwn chu zawm kan tum tlat a ni. (Kol. 4:6) Mahse, mi ṭha famkim lo kan nih avângin kan inchhîr lehna tûr thil sawi chhuah châng kan nei a. (Jak. 3:2) Kan thiltawn a fuh loh avângin tuemaw chu ngilnei lo taka biak nî kan nei a nih pawhin, mi “hawihhâwm lo” emaw, “mi dangte ngaihtuah lo” emaw anga mite’n min thlîr chu kan duh chuang lo. Mi dangte’n min hriat thiam chu kan beisei ngei ang. Chutiang bawkin mi dangte pawh kan hre thiam tûr a ni lâwm ni?

⁷ Thu hrilh rawngbâwlnaa kan tawn tuemaw chu thinrim emaw, hawihhâwm lo emaw anga a lan chuan, a chhan hriat thiam tum chu a ṭha dâwn lâwm ni? Ani chu hnathawhnaah emaw, school-ah emaw nêksâwrin a awm a ni thei ang em? Natna khirh tak a nei em? Jehova mite’n zaidam tak leh zahthiam taka an cheibâwl chuan atîra thinur in neitute chuan ṭha takin an chhâng lêt fo a ni.—Thuf. 15:1; 1 Pet. 3:15.

8. Engvângin nge “mi zawng zawng” hnênah chanchin ṭha kan hrilh ang?

⁸ Mi chi hrang hrang hnênah thu kan hril a. Entîr nân kum engemaw zât lek kal ta chhûng khân, Vênnainsâng-ah “Bible-in Nun A Thlâk Danglam” tih thiltawnte târ lanna tihchhuah a ni a. An zînga mi ṭhenkhat chu tûn hmain rûk hmang te, zu ngawlvei te, mi sual pâwla mi te, a nih loh leh damdawi ngawlveite an ni. Mi dangte chu Politician te, sakhaw hruaitu te, a nih loh leh mahni hna chauh ngaihsakte an ni a. Ṭhenkhat chu nungchang  bawlhhlawh takte an ni bawk. Mahse, an vaiin chanchin ṭha an hria a, Bible an zir a, nun thlâk danglamin, thutakah an lo awm ta a ni. Chuvângin, mi ṭhenkhatte’n Lalram thuchah an pawm ngai dâwn lo angah kan ngai mai tûr a ni lo. (1 Korinth 6:9-11 chhiar rawh.) Chu aimahin,“mi zawng zawng” chuan chanchin ṭha an chhâng lêt thei tih kan hre zâwk tûr a ni.—1 Kor. 9:22.

9. Engvângin nge mi dangte in chu zahna kan lantîr ang?

⁹ Kan rawngbâwlnaah mite chu kawi hmunah nge kan pan? An inah kan pan ṭhîn a ni. (Mt. 10:11-13) Mi dangte’n kan in leh thil neihte zah taka an cheibâwl hian kan lâwm a ni. Kan in chu kan tân a pawimawh a. Mi dangte chîm buai vak loh leh hmun him tâwk tak a nih kan duh a ni. Chutiang bawkin, kan ṭhenawmte chungah pawh zahna kan lantîr tûr a ni a. Chuvângin in tina rawng kan bâwlnaah an in zahna lantîr chu a ṭha hle a ni.—Tirh. 5:42.

10. Engtin nge kan rawngbâwlnaah mi dangte rilru tihbuaina kan pumpelh theih?

¹⁰ Tharum thawhnaa khat tûn lai khawvêlah hian, in neitu tam tak chuan hmêlhriat lohte chu an ringhlel ṭhîn a. (2 Tim. 3:1-5) Chutianga rinhlelhna belhchah tûr zâwng chuan thil kan ti tûr a ni lo. Entîr nân, in pakhat chu va panin an kawngka chu va kik ang ni ta ila. Tumahin min chhâng lo a nih chuan, in neitute chu zawngin tukverh aṭanga bih mai emaw, an tual vêla inneitu zawn kual mai emaw kan duh thei a. In vêngchhûngah, chutianga tihna chuan in neitu rilru a tibuai thei ang em? An ṭhenawmte chuan engtin nge an ngaih ang? Kim takin thu kan hril tûr a ni ngei mai. (Tirh. 10:42) Thuchah ṭha tak theh darh chu kan phûrin, kan thil tum pawh a ṭha a. (Rom 1:14, 15) Mahse, kan thu hrilhna biala mite ṭûl lo taka tibuai thei thil apiang pumpelh chu a finthlâk a ni. Tirhkoh Paula chuan: “Kan rawngbâwl hna hi an dem lohna tûrin eng kawngah mah tlûk phahna tûr rêng rêng kan siam lo va,” tiin a ziak a ni. (2 Kor. 6:3) Kan bialchhûnga in leh thilneihte zahna kan lantîr hian, kan chêtzia chuan mi ṭhenkhat chu thutak lamah a hîp thei a ni.—1 Petera 2:12 chhiar rawh.

11. Mi dangte’n kan hun neih dân an hriat thiam hian engvângin nge kan lâwm?

¹¹ Kristiante kan nih angin, kan zînga a tam zâwk chu kan buai thei hle a. Kan mawhphurhnate hlen tûrin, ngaih pawimawh hmasak tûrte insiamin, hun duante chu fîmkhur takin kan siam a. (Eph. 5:16; Phil. 1:10, 11) Thil engemawin kan hun duan a tihbuai chuan, kan beidawng mai thei a ni. Chuvângin, mite’n kan hun neih dân hre thiam a, min pan huna hun rei tak tak an hman loh hian kan lâwm a ni. Dân Rangkachak chu rilrua vawng rengin, thu kan hrilhte chungah engtin nge zahna kan lantîr theih ang?

12. Engtin nge kan thu hrilhna biala mite pan hun tûr ṭha ber chu kan hriat theih ang?

¹² In neitute pan nâna hun ṭha ber chu hriat kan tum tûr a ni. Kan thu hrilhna bialah mite chu eng hunah nge inah an awm ṭhin? Eng hunah nge an ngaihthlâk duh zâwk mai theih? Chu mi mila kan hun duan siamrem chu a ṭha a ni. Khawvêl hmun ṭhenkhatah chuan, chawhnu tlai lam deuh emaw, tlai lam hma deuh emawa in tina rawngbâwlna chuan rah ṭha a chhuah lehzual a. In thu hrilhna bialah pawh chutiang a nih chuan, chûng huna in tin kal tûrin ruahmanna i siam thei ang em? (1 Korinth 10:24 chhiar rawh.) Kan thu hrilhna biala mite hnêna thu hrilh hun ṭha ber tûra kan tel theih nâna kan inpêkna engpawh chu Jehova’n mal a sâwm dâwn tih kan chiang thei a ni.

13. Engtin nge in neitu zahna kan lantîr theih?

 ¹³ Engtin nge mite chu zahna kan lantîr lehzual theih ang? A ngaithla duh tuemaw kan hmuh hunah, ṭha takin thu kan hrilh tûr a ni a, kan sawipui rei lutuk tûr erawh a ni lo. In neitu chuan a ngaih pawimawh thil dang tih tum a lo nei pawh a ni thei a. A buai thu a sawi chuan, kan rei loh tûr thu kan hrilh thei a—kan sawi ang chuan kan awm tûr a ni bawk. (Mt. 5:37) Titina tâwp lamah chuan, kan hmuh leh theih hun tûr kan zawh chu a ṭha a ni. Thuchhuahtu ṭhenkhat chuan: “Rawn tlawh leh che chu kan châk ngawt ang. Ka lo kal hmaa phone che emaw, sms thawn che emaw chu a ṭha ang em?” tia zawh chu ṭangkai an ti hle a ni. Kan thu hrilhna biala mite hun duan mila kan insiamrem hian, ‘mahni sâwtna zawng lova, chhandam an nih theihna tûra mi tam tak sâwtna zawng zâwktu,’ Paula entawn tûr siam chu kan zui a ni.—1 Kor. 10:32, 33.

14-16. (a) Engvângin nge in neitu hnênah kan va tlawh chhan chu chiang taka kan hrilh ang? Entîrna pe rawh. (b) Bialkantu pakhat chuan eng anga mite pan nge ṭangkai a tih?

¹⁴ Ni khat chu a aw aṭanga tu tih hriat lohvin min rawn phone angah han inchan ta ila. Chu kan hriat ngai loh chuan kan thil ei duh zâwng min zâwt a ni. Min rawn betu chu tu nge a nih a, eng nge a duh tih kan ngaihtuah mai thei a. Hawihhâwm avângin rei lo tê chu kan be mai thei; mahse, tihtâwp thuai kan duh tih kan lantîr ngei ang. Kawng leh lamah chuan, phone-a min rawn betu chuan  chaw ṭha chungchâng zir chiangtu a nih thu leh min hrilh tûr thil ṭangkai tak a neih thu a rawn sawi nghâl angin han ngaihtuah ta ila. A thusawi chu kan ngaithla ṭha zâwk ngei ang. Tihah chuan, mite’n tlang tak leh thiam taka min pan hian kan lâwm ṭhîn si a. Engtin nge thu hrilh rawngbâwlnaa kan tawnte hnênah chutiang hawihâwmna chu kan lantîr theih ang?

¹⁵ Thu hrilhna bial tam takah chuan in neitute hnênah kan va tlawh chhan chu chiang taka kan hrilh a ngai a. In neitute neih loh thu pawimawh tak kan nei ngei mai; mahse, mahni inhmêlhriattîr mang meuh si lo va, hetiang zawhna: “Khawvêla buaina engpawh i ching fel thei a nih chuan, a enga ber nge i chin fel ang?” tih ang chi zâwtin kan thusawi chu ṭan ta mai ila, engtin nge ni ang? Chutiang zawhnain a tum chu mi rilru hriat a, titina chu Bible lama khalh luh a ni tih kan hria a. Mahse, in neitu chuan: ‘He mi hi tu nge maw a nih a, engvângin nge chu zawhna chu min zawh le? Eng chungchâng nge maw ni le?’ tiin a ngaihtuah mai thei a ni. Chuvângin, in neitu chu rilru nuam taka awmtîr kan tum tûr a ni. (Phil. 2:3, 4) Chu chu engtin nge kan tih theih ang?

¹⁶ Bialkantu pakhat chuan a hnuaia târ lan mite pan dân hi ṭangkai a ti hle a. In neitu chibai a, a inhmêlhriattîr hnuah Thutak Hriat I Duh Em? tih tract chu pein, “Vawiin chu in vênga mi tinte hnênah hei hi kan pe a. Hetah hian mi tam takte zawh ṭhin zawhna paruk a tel a. Hei hi i ta tûr a nia,” tiin a sawi a. Unaupa chuan mi a tam zâwkte’n kan tlawh chhan an hriat tawh chuan an hahdam deuh niin a lan thu a sawi. Chutah tak chuan, titina neih chu a awlsam zual ṭhîn a ni. Bialkantu chuan a dawtah heti hian a zâwt a: “Hêng zawhna zînga a engemaw ber hi i lo ngaituah ngai em?” tiin. In neitu’n a han thlan chuan, unaupa chuan tract chu a keu va, chu zawhna chungchânga Bible sawi dân chu a sawipui a ni. A nih loh pawhin, zawhna pakhat chu thlangin, in neitu tilai si lovin a sawipui zawm a ni. Titina ṭan dân tam tak a awm ngei mai. Hmun ṭhenkhatah chuan, in neitute chuan kan va tlawh chhan kan hrilh hmain pângngai taka kan chibai phawt chu an beisei thei a. A pawimawh ber chu kan vêngchhûnga mite duh dân anga kan pan theih nân kan thusawi dân siamrem hi a ni.

17. He thuziaka târ lan angin, Dân Rangkachak kan zawm theih dân kawng ṭhenkhat chu eng nge ni?

¹⁷ A nih chuan, kan thu hrilhnaah Dân Rangkachak kan zui theih dân kawng ṭhenkhat chu eng nge ni? In neitute chu ṭha takin kan cheibâwl ṭheuh va. In neitute in leh thil neihte zah takin kan cheibâwl a. Ina an awm a, an ngaihthlâk duh tûr huna thu hrilh chu kan tum tlat a ni. Kan thuchah ken chu tualchhûnga mite pawm duh tûr zâwngin kan hmêlhriattîr bawk.

18. Mite’n min cheibâwl tûra kan duh anga kan thu hrilhna biala mite kan cheibâwlna aṭangin hlâwkna eng nge awm?

¹⁸ Mite’n min cheibâwl tûra kan duh anga kan thu hrilhna biala mite kan cheibâwlna aṭangin hlâwkna tam tak a awm a. Ngilnei tak leh mite ngaihtuah taka thil kan tih chuan kan êng chu mi mit hmuhah kan tiêngin, Bible thu bulte hlutna kan târ lang a, kan Pa vâna mi kan chawimawi bawk. (Mt. 5:16) Kan pan dân chuan thutakah mi a hîp tam lehzual thei a ni. (1 Tim. 4:16) Thu kan hrilhte’n an pawm emaw, pawm lo emaw pawh ni se, kan rawngbâwlna hlen chhuak tûrin theih tâwp kan chhuah tih hriain lungawina kan nei a ni. (2 Tim. 4:5) “Chanchin ṭha avângin engkim ka ti ṭhîn, chan ka neih ve theih nân,” tia sawitu tirhkoh Paula chu i entawn ṭheuh vang u. (1 Kor. 9:23) A tâwp thlengin kan rawng bâwlnaah Dân Rangkachak chu i zâwm zêl ang u. (w14-E 05/15)