1. Eng pâwlin nge Jehova hmingpu Israel hnam kalpêng chu thlâk? (A thupui chunga milem en rawh.)

JEHOVA chu kum zabi khatnaa Kristian kohhran din nân leh tûn hnaia biakna dik din thar lehna atân chawimawina pêk phû tak a ni. Thuziak hmasaa kan hriat tawh angin, Krista hnungzuitu hmasate awmna pâwl chuan Jehova hmingpu Israel hnam kalpêng chu a thlâk a. C.E. 70-a Jerusalem tihchhiat a nih khân Pathian duhsak hlawh tak chu pâwl thar chu a him a ni. (Lk. 21:20, 21) Kum zabi khatnaa chûng thilthlengte chu tûn laia Jehova chhiahhlawhte chunga thil thleng tûr hmahruaitu a ni a. Setana khawvêl hi a tâwp ṭêp tawh a, Pathian inawpna pâwl erawh chu a dam khawchhuak ang. (2 Tim. 3:1) Chu chu engtin nge kan chian theih?

2. Isua’n “hrehawm nasa tak” chungchâng eng nge a sawi, chu chu engtin nge a inṭan ang?

² Isua chuan hmuh theih lohva a lo awmna leh he khawvel tâwpna chungchângah: “Hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang,” tiin a sawi a ni. (Mt. 24:3, 21) Chu  hrehawm nasa tak tehkhin rual loh chuan Jehova’n politics thiltih theihna hmanga “Babulon Khaw Ropui,” khawvêla sakhaw dik lo zawng zawng a tih boralna chu a thlen ṭantîr ang. (Thup. 17:3-5, 16) A dawtah eng thil nge thleng ang?

3. Sakhaw dik lo tihboral a nih hnuah, Jehova mite chungah eng thil nge thleng ang?

³ Sakhaw dik lo tihboral a nih hnu chuan Setana leh a khawvêl kal hmang hrang hrang chuan Jehova chhiahhlawhte chu an bei ang. Entîr nân, ‘Magog rama mi Goga’ chungchângah Bible chuan: “I chho vang a, thlipui ang maiin a lo thleng ang a, chhûmin ram a tuam mup mup ang mai hi i ni ang, nang leh i hnêna sipai rual zawng zawng leh i hnêna mi tam takte chu,” tiin a sawi lâwk a ni. Jehova Thuhretute chuan sipai an nei lo va, he leia remna duh ber an nih bawk avângin, hneh awlsam tak angin an lang ang. Mahse, chu beihna chu a va hlawhtling dâwn lo em!—Ezek. 38:1, 2, 9-12.

4, 5. A mite tiboral tûra Setana beihna chu engtin nge Jehova’n a chhân lêt ang?

⁴ A mite tiboral tûra Setana beihna chu engtin nge Jehova’n a chhân lêt ang? Lei leh Vâna Lalchungnungber A nih anga dikna a neih chu hmangin an tân thil a ti ang a. A mite beihna chu amah beihna angin a ngai ang. (Zakaria 2:8 chhiar rawh.) Chuvângin, kan Pa vâna mi chu min chhanhim tûrin a rawn che vat dâwn a ni. Chu chhan chhuahna chuan Armageddon, “Pathian Engkimtitheia ni ropuia indonaa” Setana khawvêl tihchhiatna a thlen hunah a vâwrtâwp a thleng ang.—Thup. 16:14, 16.

⁵ Armageddon chungchângah Bible hrilh lâwkna chuan: “LALPA chuan hnamte a khing a, tîsa zawng zawng chungah ro a rêl dâwn, mi suaksual chu khandaih hnênah a pe ang, LALPA thu chhuak chuan a ti. Sipaihote LALPA chuan heti hian a ti: Ngai teh, thil ṭha lo chuan hnam tin a rawn hrût dâwn e, thlipui na tak mai lei hmun tâwp aṭangin a lo thawk dâwn. Chumi nîa LALPA thahte chuan lei tâwp aṭangin lei tâwp thlengin an dâp ang a; sûn loh leh khâwm loh leh phûm lovin an awm ang a; lei chunga êkdûr mai an ni ang,” tiin a sawi a ni. (Jer. 25:31-33) Armageddon chuan he kalhmang suaksual tâwpna hi a rawn thlen ang. Setana khawvêl chu a tâwp ang a, Jehova inawpna pâwl lei lam pêng erawh chu a awm reng thung ang.

6, 7. (a) “Mipui tam tak” chu khawi aṭanga lo kal nge an nih? (b) Tûn kum kaltaahte khân eng pun chhohna nge awm?

⁶ Pathian inawpna pâwl chu a pawm hlawh mite awmna a nih avângin leiah hian a la awm reng a, a ṭhang chak hle bawk. Bible chuan: “Lalpa mit chu mi felte chungah a fu a, a beng pawh an ṭawngṭaina lamah a chhi si ṭhîn,” tiin min tiam a. (1 Pet. 3:12) Chûng mi felte zîngah chuan ‘hrehawm nasa tak ata chhuak’ tûr “mipui tam tak” pawh an tel a ni. (Thup. 7:9, 14) Chûng dam khawchhuakte chu “mipui” mai ni lovin, “mipui tam tak” an ni. “Hrehawm nasa tak” ata dam khawchhuakte zînga tel angin i inmitthla thei em?

⁷ Mipui tam takte chu khawi aṭanga lo kal nge an nih? Lâk khâwm an nih chhan chu Isua’n a lo awm lehna a sawi lâwk chhinchhiahna zînga mi vâng a ni. Ani chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a sawi a. (Mt. 24:14) Ni hnuhnûngahte hian, hei hi Pathian  inawpna pâwl hnathawh pawimawh ber a ni. Jehova Thuhretute’n khawvêl pumah thu hrilh leh zirtîr siam hna an thawh avângin mi maktaduai tam takte chuan ‘thlarau leh tih tak zeta’ Pathian biak dân an zir a ni. (Joh. 4:23, 24) Entîr nân, kum sâwm kal ta chhûng—rawngbâwl kum 2003 aṭanga 2012 thleng—khân mi 2,707,000 aia tamte chuan Pathian hnêna inpumpêkna lantîrin baptisma an chang a. Khawvêl pumah Thuhretu 7,900,000 ai tam an awm tawh a, a bîk takin kum tina neih Hriatrengna inkhâwmah mi maktaduai tam takte chuan an telpui bawk a ni. ‘Pathian chu a ṭhantîrtu’ a nih avângin, kan tamna hi kan chapopui lo. (1 Kor. 3:5-7) Mahse, mipui tam tak chu an ṭhang chho va, kumte a liam rual hian an pung chho zêl a ni.

8. Tûn laia Jehova inawpna pâwl punna chanchin chhinchhiah tlâk tak chu eng nge?

⁸ Jehova chuan a Thuhretute chu a ṭanpui avângin Pathian chhiahhlawhte punna chanchin hi chhinchhiah tlâk tak a ni. (Isaia 43:10-12 chhiar rawh.) Chu pun chhohna chu hêng hrilh lâwkna thuah hian: “In zînga hnam tê ber pawh hnam ropui tak an ni ang a, hnam tlêmte pawh hnam chak tak an ni ang: kei LALPA hian a hun hunah chuan ka thlentîr thuai ang,” tiin a sawi lâwk a. (Is. 60:22) Hmânah chuan hriak thih labângte chu “hnam tê ber” ang mai an ni a; mahse, thlarau lam Israel dangte Pathian inawpna pâwla hruai luh an nih tâkah chuan an pung chho va. (Gal. 6:16) Kum tam tak chhûng Jehova malsâwmna avângin, mi pui tam tak chu lâk khâwm belh zêl an ni bawk.

9. Pathian Thua kan hmuh hma lam hun êng tak tawng tûr chuan eng nge kan tih ngai?

⁹ Hriak thih Kristian kan ni emaw, mipui tam tak zînga mi kan ni emaw pawh ni se, Pathian Thua kan hmuh hma lam hun êng tak chu kan tawng thei a. Mahse, chutianga tawng tûr chuan Jehova’n ti tûra min beiseite kan tih ngei a ngai a ni. (Is. 48:17, 18) Mosia Dân hnuaia Israelte kha han ngaihtuah teh. Dânin a tum pakhat chu mipat hmeichhiatna lam te, sumdâwnna thila indâwr dân te, naupang enkawl dân te, mi dangte ṭha taka cheibâwl dân te, leh thil dangte chungchânga dân ṭha tak pea Israel mite vênhim a ni. (Ex. 20:14; Lev. 19:18, 35-37; Deut. 6:6-9) Pathianin min beisei anga thiltihna chu chutiang bawkin kan hlâwkpui a, a duhzâwng tih chu khirh kan ti lo bawk. (1 Johana 5:3 chhiar rawh.) A nihna takah chuan, Dânin Israel mite a vênhim angin, Pathian Jehova dânte leh thu bulte zawmna chuan min vênghim chauh ni lovin, ‘rinnaah chuan dik tak,’ a nih loh leh chak takin min awmtîr dâwn a ni.—Tit. 1:13, 14.

10. Bible zir nân leh chawlhkâr tina Chhûngkuaa Pathian Biakna neih zân hman nân engvângin nge hun kan insiam ang?

¹⁰ Lei lama Jehova inawpna pâwl chuan kawng hrang hrangin hma a sâwn zêl a. Entîr nân, Bible thutak kan hriat thiamna pawh a fiah chho zêl a ni. “Mi felte kawng erawh chu chhûn ên lai tak pawha êng zual deuh deuh, êng fîm tak ang,” a nih avângin, chu chu kan beisei tûr a ni. (Thuf. 4:18) Mahse, ‘Bible thutak kan hriat thiamnate siamrem a nih rualin kan insiamrem ve zêl em? Ni tinin Bible kan chhiar ṭhîn em? Kan thu leh hla chhuahte phûr takin kan chhiar em? Chawlhkâr tinin Chhûngkuaa Pathian Biakna zân kan hmang ziah em?’ tia kan inzawh chu a ṭha a ni. Kan zînga a tam zâwkte chuan chûng thiltih chu a harsa lutuk lo tih kan pawm ngei ang. Chu chu hun insiamna hmanga tih theih a ni ṭhîn a. Hrehawm nasa tak kan hnaih hle lai hian Pathian Thu hriatna dik tak kan neih a, kan nunpui a, thlarau  lama hma kan sâwn zêl chu a va pawimawh zual êm!

11. Eng kawngin nge hmân laia kûtte leh tûn laia inkhâwmte leh inkhâwmpuite chu a ṭangkai?

¹¹ Tirhkoh Paula fuihna: “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u,” tih zâwm tûra min fuih lai hian Jehova inawpna pâwl chuan kan tâna ṭha ber tûr thil a ti a ni. (Heb. 10:24, 25) Kum tina hman ṭhin kûtte leh Pathian be tûra kal khâwmna dangte chuan Israelte chu thlarau lamah a tichak a. Chu bâkah, Nehemia hun laia Bâwkte Kût ang chi abîk taka thil thlengte chu hun hlimawm tak a ni a. (Ex. 23:15, 16; Neh. 8:9-18) Chutiang bawkin, kan inkhâwmte leh inkhâwmpuite chu kan hlâwkpui a ni. Thlarau lama kan chak nân leh kan hlim nân chûngte chu a ṭha thei ang berin i hmang ṭangkai ang u.—Tit. 2:2.

12. Lalram thu hrilhna hna chu engtin nge kan ngaih ang?

¹² Pathian inawpna pâwla awm kan nih angin hlim takin “Pathian chanchin ṭha,” kan hril, a nih loh leh rawngbâwlna thianghlim chu kan hlân a. (Rom 15:15, 16) Chu ‘rawngbâwlna thianghlima’ telna chuan ‘Mi Thianghlim,’ Jehova “hnathawhpuite” min nihtîr a ni. (1 Kor. 3:9; 1 Pet. 1:15) Chanchin ṭha hrilhna chuan Jehova hming a tithianghlim a. “Pathian hlim chanchin ṭha ropui” kawltîr kan nihna chu chanvo hlu tak a ni ngei mai.—1 Tim. 1:11, NW.

13. Thlarau lama chakna leh kan nun chu engah nge a innghah?

¹³ Pathian chuan amah vuan tlat a, a inawpna pâwla thiltih hrang hrangte thlâwp tlatin thlarau lama chak reng tûrin min duh a. Mosia chuan Israel mite chu heti hian a hrilh a ni: “In hmaah nunna leh thihna, malsâwmna leh ânchhia ka dah tih tûnah hian in chungchâng thua hretu atân lei leh vân ka ko a ni; chutichuan nunna chu thlang rawh u, in nun theih nân, nangni leh in thlahte nên; LALPA in Pathian hmangaih a, a awkâ âwih a, amah vuan tlatin; amah chu in nunna, in dam reina a ni si a; tichuan in pu Abrahama te, Isaaka te, Jakoba te chhechhama pêk a tiam ramah chuan in awm dâwn a ni,” tiin. (Deut. 30:19, 20) Kan nun chu Jehova duhzâwng tihna, amah hmangaihna, thuawih taka a aw ngaihthlâkna leh amah vawn tlatnaah a innghat a ni.

14. Engtin nge unaupa pakhat chuan mita hmuh theih Pathian inawpna pâwl chungchâng chu a ngaih?

¹⁴ Pathian vuan tlat a, A inawpna pâwl ruala kê pên zêltu, unau Pryce Hughes-a chuan: “Kum 1914 hmâ lawk aṭanga Jehova thiltumte ka hriat avângin ka lâwm tak zet a ni . . . Ka tâna thil pawimawh ber sawi dâwn ta ila, mita hmuh theih Jehova inawpna pâwl belh tlat chu a ni ngei ang. Atîr lama ka thiltawnte chuan mihring ngaih dâna innghah a finthlâk lohzia min zirtîr a. Chu mi chungchânga thu tlûkna ka siam hnu chuan, inawpna pâwl rinawm tak belh tlat chu ka tum ta a ni. Chutianga tih bâka Jehova duhsakna leh malsâwmna dawn theih dân kawng dang a awm dâwn chuang em ni?” tiin a ziak a ni.

15. Bible thute kan hriat thiamna siamrem a nih huna kan thlîr dân tûr târ langtu Bible-a entîrna pe rawh.

¹⁵ A mi mal taka Jehova duhsakna leh malsâwmna dawng tûr chuan, a inawpna pâwl chu kan thlâwpin, Bible kan hriat thiamna siamrem a nih hunah kan pawm ngei tûr a ni. Hei hi han ngaihtuah teh: Isua a thih hnu khân, Dâna ṭhahnemngai tak Juda Kristian tam tak an awm a, Dân zawm chu an la tum  tlat a ni. (Tirh. 21:17-20) Mahse, Hebrai mite hnêna Paula lehkhathawn chuan “Dân thu anga hlan” vâng ni lovin, “Isua Krista taksa vawi khata hlan nghâl” vânga tihthianghlim an ni tih pawm tûrin a ṭanpui a ni. (Heb. 10:5-10) Juda thlah chûng Kristian a tam zâwkte chuan an ngaihtuahna chu siam remin, thlarau lamah hma lam an pan tih rinhlelh rual a ni lo. Keini pawh Pathian thu hriat thiamnaah leh kan thu hrilh hna siamrem a nih hunah taima taka kan zir a, rilru inhawng tak kan nih a ngai a ni.

16. (a) Eng malsâwmnain nge khawvêl thara nun chu tiropui ang? (b) Khawvêl thara thleng tûr eng thil nge i nghahhlelh?

¹⁶ Jehova leh a inawpna pâwl chunga rinawm zawng zawngte chuan a malsâwmna an dawng zawm zêl ang. Hriak thih rinawmte chuan vâna Krista roluahpui nih theihna chanvo hlu tak an nei ang a. (Rom 8:16, 17) Lei lam beiseina nei kan nih chuan, Paradise-a nun a nawm dân tûr chu han mitthla teh. Jehova inawpna pâwla mi kan nih angin, mi dangte hnêna Pathian tiam khawvêl thar chungchâng hrilh chu nuam kan va ti êm! (2 Pet. 3:13) Sâm 37:11 chuan: “Thuhnuairawlhte . . . chuan ram hi an luah ang a: remna chênin an hmuingîl ang,” tiin a sawi a ni. Mite chuan ‘inte an sa ang a, chûngah chuan an awm rengin,’ “an thawh chhuah chungah chuan an lâwm dâwn a ni.” (Is. 65:21, 22) Inhnehchhiahna te, retheihna te, leh ṭâm te a awm tawh lo vang. (Sâm 72:13-16) Babulon Khaw Ropui chuan a awm tawh dâwn loh avângin, tumah a bum thei tawh hek lo vang. (Thup. 18:8, 21) Mitthite kaihthawh an ni ang a, chatuana nun theihna hun pêk an ni ang. (Is. 25:8; Tirh. 24:15) Jehova hnêna inpumpêk mi maktaduai tam takte tân hma lam hun phûrawm tak a va ni êm! Bible-a thutiamte chu kan tâna a taka lo chang tûr chuan, thlarau lama hma kan sâwn a, Pathian inawpna pâwl ruala hma lam kan pan a, a ruala kê kan pen ve zêl a ngai a ni.

17. Jehova biakna leh a inawpna pâwl chungah eng rilru put hmang nge kan neih ang?

¹⁷ He khawvêl tâwpna hi a hnai tawh hle a, rinnaah nghet tlatin, biakna atâna Pathian ruahmanna chungah chuan lâwmna nasa tak i lantîr ang u. Chu chu: “LALPA hnênah thil pakhat ka dîl a, chu mawlh chu ka zawng ang; LALPA mawizia hmu tûr leh, a biak ina thu zâwt tûrin ka dam chhûng zawnga LALPA ina ka awm reng theihna tûr chu,” tia zaitu, Davida rilru put hmang neih chu a ni. (Sâm 27:4) Kan vai hian Pathian chu vuan tlatin, a mite ruala ke pênin, Jehova inawpna pâwl rualin i kal zêl ang u. (w14-E 05/15)