1, 2. (a) Ngun taka thlan zawhnate hman a hlutna târ langtu thiltawn sawi rawh. (A thupui chunga milem en rawh.) (b) Engvângin nge thu hrilhfiah harsa tak takte chuan min tizâm tûr a nih loh?

KUM engemaw zât kal taah khân, Kristian unaunu pakhat chuan a pasal ring lotu nên Bible thu an sawi dûn a. An pa chu Kristianna ram kohhran pakhatah a hming maiin member a ni tawh ṭhîn a ni. Chutianga an sawi dun lai chuan an pa chuan Trinity a rin thu a sawi a. An pa chuan Trinity zirtîrna chu a hre chiang chiah lova a hriat avângin unaunu chuan, “Pathian chu pathum ni lova pakhat ni anga ring tho siin, Pathian chu Pathian ni a, Isua chu Pathian ni a, thlarau thianghlim pawh Pathian ni bawkin i ring em?” tiin thiam takin a zâwt a. An pa chuan, “Ka ring lo!” tia a chhâng chu a mak hle. Pathian nihna dik tak chungchânga titina phûrawm tak chu an nei zui ta a ni.

² Chu thiltawn chuan ngun taka thlan zawhnate thiam taka zawh a hlutna chu a târ lang a ni. Chu chuan thil pawimawh tak a târ lang bawk a: Trinity te, hremhmun meidîl  te, a nih loh leh Siamtu a awm rinhlelhna chungchânga thu hrilhfiah harsa tak takte chuan min tizâm tûr a ni lo, tih hi. Jehova leh a zirtîrnate chunga kan innghah phawt chuan, kan thu ngaithlatute thinlung thleng thei, mite hmin thei tak chhânna kan pe thei ṭhîn a ni. (Kol. 4:6) Chutiang thupuite an sawiho laia rawngbâwltu thiam takte thil tih chu i lo bih chiang ang u. (1) Mi rilru phawrh chhuak thei zawhnate zawh dân, (2) Bible chhûtpui dân, leh (3) kan thusawi pawimawh lai tichiangtu tehkhin thu hman dânte chu kan ngaihtuah ang.

3, 4. Mite rinna kan hriat theih nân engvângin nge zawhna kan hman a pawimawh? Entîrna pe rawh.

³ Zawhnate chuan mite thurin hre tûrin min ṭanpui thei a. Engvângin nge chu chu a pawimawh? “Ngaihthlâk hmâa chhân chu a tân âtthlâk nihna leh mualphona a ni,” tiin Thufingte 18:13 chuan a sawi. Thu engemaw chungchânga Bible thlîr dân kan sawi lan hmain, kan titipuite rin dân chiah chu hriat kan tum phawt a ṭha a. Chutiang a nih loh chuan, an thil la rin ngai hauh loh hnial kalh nân hun kan hmang ṭeuh thei si a!—1 Kor. 9:26.

⁴ Mi tuemaw nên hremhmun meidîl chungchâng sawiho angah han inchan ta ila. Mi zawng zawngin hremhmun meidîl chu innghaisakna hmun tak tak angin an ngai vek lo va. Mi tam tak chuan Pathian laka inmihranna dinhmun angin an ngai a ni. Chuvâng chuan heti hian kan sawi thei ang: “Mite chuan hremhmun meidîl chungchângah ngaih dân hrang hrang an neih avângin, i ngaih dân ka zâwt thei che ang em?” tiin. A chhânna kan ngaihthlâk hnu chuan, chu mi chungchânga Bible sawi dân hre thiam tûrin kan ṭanpui ṭha thei lehzual dâwn a ni.

5. Engtin nge zawhnate chuan mi chu chutianga a rin nachhan hre tûra min ṭanpui theih?

⁵ Thiam taka zawhna hmanna chuan miin chutianga a rin nachhan hre tûrin min ṭanpui thei bawk a. Entîr nân, rawngbâwlnaa kan mi tawn tuemaw chuan Pathian a rin loh thu sawi ta se, engtin nge ni ang? Ani chu chanchhâwnna ngaih dân ang chi, thil thlîr dânin a thunun anga ngaih mai chu a awlsam thei a ni. (Sâm 10:4) Mahse, mi ṭhenkhat chuan hrehawm tawrhna nasa tak an hmuh emaw, an tawn emaw avângin Pathianah rinna an hloh thung. Hmangaihna ngah tak Siamtuin chutianga hrehawm tawrhna awm a phal chu an ring thei lo pawh a ni thei. Chuvângin, in neituin Pathian awm a rinhlelh thu a sawi chuan, “Chutiang chuan i lo ring reng ṭhîn em ni?” tiin kan zâwt thei a. A nih loh thu a sawi chuan, Pathian awm rinhlelhtîrtu thil engemaw a awm leh awm loh kan zâwt thei a. A chhânna chuan thlarau lama amah ṭanpui theih dân ṭha ber hre tûrin min ṭanpui thei a ni.—Thufingte 20:5 chhiar rawh.

6. Zawhna kan zawh hnuah eng nge kan tih ang?

⁶ Mite hnêna zawhna kan zawh hnuah, a chhânna kan ngaihthlâk a, a rilru veizâwng kan hriat thiampui chu a ngai tak zet a. Entîr nân, tuemaw chuan chhiatna a thlen avângin hmangaihna ngah tak Siamtu awm a rinhlelh phah thu a sawi mai thei a. Pathian a awm tih finfiahna pêk hmain, amah kan hriat thiam a, hrehawm kan tawrh chhan a ngaihtuah chu thil dik lo a nih loh thu kan hrilh phawt a ṭha a ni. (Hab. 1:2, 3) Dawhthei tak leh hmangaihna nei taka kan  biakna chuan hriat tam lehzual duh tûrin a chêttîr thei a ni. *

7. Rawngbâwlnaa kan thiamna chu engah nge a innghah?

⁷ Tûnah chuan Bible thute chhûtpui dân i lo ngaihtuah ang u. Bible hi kan rawngbâwlnaa kan hmanrua ber a ni a. ‘Hna ṭha tinrêng thawk tûra kim taka inthuamin min tifamkim thei a ni.’ (2 Tim. 3:16, 17) Rawngbâwlnaa kan thiamna chu, Bible châng kan chhiar tam lamah ni lovin, kan chhiarte kan chhûtpui dân leh kan hrilhfiah dânah nasa takin a innghat a ni. (Tirhkohte 17:2, 3 chhiar rawh.) Entîr nân, a hnuaia dinhmun pathum hi han ngaihtuah teh.

8, 9. (a) Isua leh Pathian an intluk nia ringtu tuemaw chhûtpui dân kawng khat chu eng nge ni? (b) Chu thu chhûtpui dân ṭangkai tak nia i hriat chu eng nge?

⁸ Dinhmun 1-na: Kan rawngbâwlnaah Isua leh Pathian intluk nia ringtu tuemaw kan tâwk a. Chu mi chungchâng chhûtpui tûr chuan eng Bible chângte nge kan hman theih? Isua thusawi: “Mahni duhzâwng ti tûrin vân aṭanga lo chhuk ka ni lo va, mi tîrtu duhzâwng ti tûra lo chhuk ka ni zâwk e,” tih lâk chhâwnna Johana 6:38 chu kan chhiartîr thei a. Chu Bible châng kan chhiar hnu chuan heti hian kan zâwt thei a ni: “Isua chu Pathian a nih chuan, vân aṭangin tuin nge rawn tîr? Ani chu Isua aiin a ropui zâwk dâwn lâwm ni? A tîrtu chu a tirha ai chuan a ropui zâwk si a,” tiin.

⁹ Chutiang deuh bawkin, tirhkoh Paula’n Isua a thih a, a thawh leh hnua Pathian thiltih a târ lanna Philippi 2:9-11 chu kan chhiarsak thei a. Chutah chuan: “Pathianin [Isua] chu nasa takin a chawimawi ve ta thung a, hming zawng zawnga hming chungnung ber chu a pe ta a,” tiin a sawi a ni. Chu Bible châng chhût tûra ṭanpui nân, heti hian kan zâwt thei a: “Isua chuan a thih hmain Pathian a tluk a nih si chuan, a hnuah Pathianin dinhmun sâng zâwka a chawimawi khân, chu chuan Pathian chungah a awmtîr dâwn lâwm ni? Mahse, mi chu engtin nge Pathian aia a ropui theih ang?” tiin. Miin Pathian Thu a zah a, rilru ṭha a put chuan, chutianga chhûtpuina chuan ngun lehzuala zir tûrin a chêttîr thei a ni.—Tirh. 17:11.

10. (a) Hremhmun meidîl ringtu chu engtin nge kan chhûtpui theih ang? (b) Hremhmun meidîl chungchâng chhûtpui dân ṭangkai nia i hriat chu eng nge ni?

¹⁰ Dinhmun 2-na: Sakhaw ngaihsak tak in neitu chuan hremhmun meidîlah mi  sualte chatuana hrem an ni dâwn lo tih rin harsa a ti a. Hremhmun meidîl awm a rin chhan chu mi suaksualte an thil sual tih avânga hrem an tuar hmuh a duh vâng pawh a ni thei. Chutianga ngaitu chu engtin nge kan chhûtpui theih ang? A hmasain, mi suaksualte chu hrem an ni dâwn tih kan hrilh hre thei a. (2 Thes. 1:9) Tichuan, sual hremna chu thihna a ni tih târ lanna Genesis 2:16, 17-na chu kan chhiartîr thei a ni. Adama thil sual tih avângin mi zawng zawng chu sual neiin an pian phah tih kan hrilhfiah thei a. (Rom 5:12) Mahse, Pathian chuan hremhmun meidîla hremna chungchâng engmah a sawi lo tih kan sawi thei a ni. Tichuan, “Adama leh Evi kha chatuana hrem nih theihna dinhmun hlauhawmah awm ta se, chu mi chungchânga vaukhânna pêk chu a âwm hle lo vang maw?” tiin kan zâwt thei a. Chutah, thil sual an tih hnua hremhmun meidîl chungchâng engmah sawi tel lova, hremna tûr puan chhuahna Genesis 3:19 chu kan chhiarsak thei a ni. Adama hnênah chuan vaivuta a kîr tûr thu hrilh a ni zâwk a ni. Heti hian kan zâwt thei a, “Adama kha hremhmun meidîlah a kal tak tak a nih chuan, leiah i kîr leh ang tia hrilh chu thil dik a ni thei ang em?” tiin. Mi chu rilru zau tak a nih chuan, chutiang zawhna chuan ngun lehzualin a ngaihtuah zuitîr thei a ni.

11. (a) Mi ṭha zawng zawng vâna an kal vek ringtu tuemaw chhûtpui dân kawng khat chu eng nge ni? (b) Vâna kal chungchângah eng anga chhûtpui nge ṭangkai i tih?

¹¹ Dinhmun 3-na: Kan rawngbâwlnaah, mi ṭha zawng zawng vâna an kal vek ringtu kan tawng a. In neitu Bible hrilhfiah dân chu chutianga a rinna chuan a thunun mai thei a ni. Entîr nân, Thu Puan 21:4-na kan lo chhiarpui ta a. (Chhiar rawh.) Ani chuan chu Bible chânga malsâwmnate chu vâna nun dân tûr niin a ngai thei a ni. Engtin nge kan chhûtpui ang? A finfiahtu châng dang hman ai chuan, chu Bible châng vêk chu kim chang takin kan sawipui thei a. “Thihna a awm leh thei tawh lo vang,” tih a sawi a. Thil engemaw awm leh tawh lo tûr chuan, lo awm tawh ṭhîn a nih ngei a ngai tih chu a pawm leh pawm loh kan zâwt thei a ni. Ani chuan a pawm thu a sawi ngei a rinawm. Tichuan, vânah thihna a awm ngai loh thu leh leiah chauh hian mite an thih ṭhin thu kan sawi thei a. Thu Puan 21:4-na thu hi hma lam huna leia malsâwmnate sawina a ni chu thil inâwm tak a ni.—Sâm 37:29.

12. Engvângin nge Isua’n tehkhin thu a hman?

¹² Isua chuan thu a hrilhnaah zawhnate bâkah, tehkhin thute a hmang bawk a. (Matthaia 13:34, 35 chhiar rawh.) Isua tehkhin thu chuan a thu ngaithlatute rilru put hmang a târ lang a ni. (Mt. 13:10-15) Tehkhin thu chuan Isua zirtîrna chu a tiduhawmin, hriat reng a hlawhtîr bawk. Kan zirtîrnaah engtin nge tehkhin thu kan hman theih ang?

13. Pathian chu Isua aiin a ropui zâwk tih zirtîr nân eng tehkhin thu nge kan hman theih?

¹³ Tehkhin thu tluangtlam tak chu hman a ṭha ber ṭhîn. Entîr nân, Pathian chu Isua aiin a ropui tih kan hrilhfiah hunah, a hnuaia mi ang hi kan tichhin thei a ni. Pathian leh Isua chuan an inlaichînna chu Pa leh Fa inlaichînna nên an tehkhin ve ve a. Pathian chuan Isua chu a Fapa angin a sawi a, Isua pawhin Pathian chu a Pa angin a sawi bawk a ni. (Lk. 3:21, 22; Joh. 14:28) A dawtah, in neitu hnênah chuan: “Mi pahnih an intluk tih min zirtîr i duh chuan, a tihchian nân tehkhin thuah eng ang  chhûngkaw inlaichînna nge i hman ang?” tiin kan zâwt thei a ni. Ani chuan unau—phir unau chungchâng a sawi hial thei bawk. Chutianga a sawi chuan, a thil khaikhin chu a âwm hle tih kan sawi thei a ni. Tichuan, heti hian kan zâwt thei a: “Nang leh kei hian he tehkhin thu hi awlsam takin kan hman chuan, Isua—Zirtîrtu Ropui pawhin he tehkhin thu hi a ngaihtuah dâwn lâwm ni? Pathian chu a Pa angin a sawi zâwk si a. Chuvângin, Isua chuan Pathian chu amah aia upa zâwk leh thunei zâwk niin a târ lang a ni,” tiin.

14. Eng entîrnain nge Pathianin Diabola chu hremhmun meidîlah mite a hremtîr loh tûrzia târ lang?

¹⁴ Entîrna dang hi lo ngaihtuah teh. Ṭhenkhat chuan Setana chu hremhmun meidîla “thu neitu” angin an ngai a. Pathianin Diabola chu hremhmun meidîlah mite a hremtîr loh tûrzia hmu thiam tûrin he tehkhin thu hian nu emaw, pa emaw chu a ṭanpui mai thei a ni. Hetiang deuh hian kan sawi thei ang: “I fa chu hel hmang tak, thil ṭha lo tam tak ti angin han mitthla teh. Engtin nge i tih ang?” tiin. Ani chuan a fa chu a thunun tûr thu a sawi mai thei a. Sim tûrin ṭanpui a tum nawn fo pawh a ni thei. (Thuf. 22:15) Chutiang a nih chuan, a fa chuan amah ṭanpui tûra a thawhrimna zawng zawng chu lo hnâwl ta se, eng nge a tih ang tih kan zâwt thei a. Nu leh pa a tam zâwkte chuan a tâwpah chuan an fa hrem mai loh chu thlan tûr dang an neih loh thu an sawi ngei ang. A hnênah chuan: “I fa chu mi sual tak tuemawin hel hmang tak ni tûrin a lo thunun reng tih hre chhuak ta la, engtin nge ni ang?” tiin kan zâwt thei a. Chutianga lo thununtu chungah chuan nu leh pate chu an thinur ngei ang. Kan sawi tum tak tih chian nân, “I fa chu mi sual tak tuemawin a thunun tih hre reng chungin, ani chu i fa i hremtîr ang em? tiin kan zâwt thei a. A chhânna chu hremtîr lo vang tih a ni ngei ang. Chutiang a nih chuan, Pathian chuan thil sual ti tûra mite thununtu Diabola vêk chu anmahni hremtuah a hmang lo vang tih a chiang hle!

15, 16. (a) Engvângin nge Lalram thuchah kan puan chhuah chu mi zawng zawngin an pawm kan beisei loh? (b) Mite zirtîrnaah hlawhtling tak ni tûrin thiam bîk tak kan nih a ngai em? Hrilhfiah rawh.

¹⁵ Lalram thuchah kan puan chhuah chu mi zawng zawngin an pawm dâwn lo tih kan hria a. (Mt. 10:11-14) Zawhna ṭha tak tak hmangin, thiam taka chhûtpuiin, entîrna ṭha ber ber pawh hmang mah ila, chutiang tho chu a ni ang. Tihah chuan, leia nungdam tawh azawnga Zirtîrtu ropui ber, Isua zirtîrna pawh kha mi tlêmtê chauhvin an chhâng lêt si a!—Joh. 6:66; 7:45-48.

¹⁶ Kawng leh lamah chuan, mite zirtîr thiam tak niin inhre lo mah ila, kan rawngbâwlnaah kan hlawhtling thei a ni. (Tirhkohte 4:13 chhiar rawh.) Pathian Thu chuan “chatuana nun duhna rilru dik tak” neite chuan chanchin ṭha an pawm ang tih rin nachhan tûr ṭha tak min pe a ni. (Tirh. 13:48, NW) Chuvângin, mahni inthlîr dân leh Ram chanchin ṭha hrilh kan tumte thlîr dân inbûk tâwk chu i nei ang u. Kan thu ngaithlatute leh keimahni ngei pawhin kan hlâwkpui dâwn tih ring tlat chungin, Jehova zirtîrna kan dawnte chu a ṭangkai thei ang berin i hmang ang u. (1 Tim. 4:16) Jehova chuan ‘mi tinte chhân’ dân hre tûrin min ṭanpui thei a. A dawta thuziakah chuan, thu hrilh rawngbâwlnaa kan hlawhtlin theih dân kawng khat chu Dân Rangkachak tia koh ṭhin zawmna a ni tih kan zir ang. (w14-E 05/15)