Kan vai hian hma lam hun tûr kan ngaihtuah ṭheuh va. Mahni leh kan hmangaihte tâna nun dân tûrte kan ngaihtuah a ni. Hêng zawhnate ang hi kan zâwt a: ‘Ka fate chu khawvêl nuam zâwkah an nung ang em? Leilung hi râpthlâk taka tihboral a ni ang em? Ka hma lam hun tûr ṭha lehzuala ka siam theih nân tûna ka thlâkthleng theih thil engemaw a awm em?’ tiin. Eng ang mi pawh ni mah i la, thutiam dik tak, chiang tak, inmil leh nghet tak chu hriat châkna kan nei tlângpui ṭhîn a. Hma lam hun tûr i hriat chian chuan rilru lam leh tisa lam tân i inbuatsaih thei a ni.

Chuvângin, i hma lam hun tûr chu eng nge ni? Tuemawin a hre thei em? Hma lam hun tûr sawi lâwktu mi thiamte chuan hlawhtlinna ṭhenkhat an nei a, hlawhchhamna tam tak pawh an nei bawk. Mahse, Pathian chuan thil lo thleng tûrte chu dik takin a sawi lâwk thei a ni. A Thu chuan: “Keiin a tâwp tûr chu atîr aṭang rêngin ka sawi ṭhîn a, thil la tih lohte chu hmasâng aṭang rêngin ka sawi ṭhîn,” tiin a sawi a ni. (Isaia 46:10) Eng ang hlawhtlinna nge a neih tawh?

Engvângin nge hmân laia Pathian zâwlneite hrilh lâwkna dikzia chu i ngaihven ang? Hun rei tak chhûng nî tina sik leh sa awm dân dik taka sawi lâwk ṭhîntu i hmuh chuan, i rilru a khawih ngei ang tih a chiang a ni. Atûk atâna khawchin a sawi pawh i ngaihven duh ngei ang. Chutiang bawkin, Pathianin thil lo thleng tûr a sawi lâwkte a thleng famkim tih i hriat chuan i hma lam hun tûr chungchâng a sawi lâwkte chu i ngaihven ngei ang tih a chiang a ni.

KHAWPUI ROPUI TAK BORALNA:

Entîr nân, khaw ropui pakhat kum zabi tam tak chhûnga thiltithei tak chu a tluchhe thuai dâwn tih chiang taka  sawi lâwkna mak tak a awm a. A thusawitu pakhat hmangin, Pathian chuan Ninevi khaw ram tûr thu a sawi lâwk a ni. (Zephania 2:13-15) Chanchin zir mite chuan eng nge chhinchhiahna an neih? Pathianin a sawi lâwk hnu kum 15 vêl, B.C.E. kum zabi pasarihnaah khân, Babulon leh Midia-te’n an bei a, Ninevi khawpui chu tihram a ni ta a ni. Chu bâkah, Pathian chuan Ninevi khawpui chu ‘tihṭiau va, thlalêr anga tihro’ a ni ang tiin a lo sawi chiang hle a ni. He hrilh lâwkna dikzia finfiah theihna a awm em? Awm e. Chu khawpui chu daifêm aṭanga mêl 200 (518 sq km), bial vêla zau a ni a, a hnehtute chuan khawpui chu beisei angin an zuah lo va, an hmang ṭangkai lo bawk. Chu ai mah chuan, chu khawpui chu an tiram ta a ni. Chutianga thil lo thleng tûr dik takte chu Politic lama zir thiamte pawhin an hrilh lâwk thei ang em?

MIHRING RUHTE HAL A NI ANG:

Mihring ruhte maichâma hâltu tûr hming dik tak leh a thlahtu dik tak te, a maichâm hlanna hmun tûr khaw hming ang te—kum 300 vêl hmaa—huai taka lo puang lâwktu chu tu nge ni ang? Chutianga sawi lâwkna dangdai tak chu a lo thleng dik a nih chuan, a sawi lâwktu chu a hming thang ngei ang. Pathian aiawha thusawitu chuan “Davida chhûngte zîngah fapa a hming Josia a lo piang” ang a, chu chuan Bethel khawpuia maichâm chungah ‘mihring ruhte a hâl’ ang tih a puang a ni. (1 Lalte 13:1, 2) Kum zabi pathumna hnu lamah chuan lal Josia—Bible-a hming lâr lo tak—chu Davida thlah kal zêl chhûngkua aṭangin a lo chhuak a. Sawi lâwk ang chiahin, Josia chuan ‘thlâna ruhte chu a va la a,’ Bethela ‘maichâmah chuan a hâl ta a ni.’ (2 Lalte 23:14-16) Mihring aia thiltithei zâwk hnên aṭanga kaihhruaina a nih loh chuan tuin eng chutianga kimchang taka sawi lâwk thei ang?

A LALNA A TAWP:

Tuemaw chuan khawvêl thu neitu sâng ber titlâwmtu tûr chu—a pian hma aṭangin—a beih dân tûr danglam tak te nên lam sawi lâwk thei sela chuan, chu chu a mak hle ngei ang. Pathian chuan Kura chu ram hneh tûra tirhchhuah a nih tûr thu a puang chhuak a. Ani chuan Juda mite chu an sal tânna ata chhuahtîrin an hmun thianghlimte pawh a sak ṭhattîr bawk ang. Chu bâkah, Pathian chuan remhriatna dangdai tak hmangin Kura chuan luite a tikang ang a, kulh kawngkâte chu  hawnsa a niin, awlsam taka a hneh dân tûrte chu a sawi lâwk a ni. (Isaia 44:27–45:2) Pathianin chipchiar taka a sawi lâwkte chu dik taka thleng famkim tawh a awm em? Thilthleng chanchin ziaktute chuan chu hnehna latu chu Kura a ni chiang tih an pawmpui a ni. Kura chuan a sipaite hmangin Babulon tui luang lai chu thiam taka kawng danga la pengin luipui chu a tikang a. Chu bâkah, sipaite chu khawpui kawngka hawnsaah chuan an lut tlang ta a ni. Kura lal hnu chuan Juda mite chu chhuah an ni a, Jerusalema an biakin sa ṭha leh tûra hriattîr an ni a. Chu chu thil mak tak a ni, Kura chu Judate Pathian bia a ni si lo va. (Ezra 1:1-3) Pathian ni lo, tuin nge thil lo thleng tûr chanchin chu kimchang taka sawi lâwk thei?

Hma lam huna lo thleng tûr Pathian sawi lâwk thlen famkim dân entîrna pathum chu kan hre ta a. Hêng hi thilthleng satliah mai a ni lo. Juda hruaitu Josua chuan a mite hnênah: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve,” tiin an hriat ṭhan tawh chu a sawi a ni. (Josua 23:1, 2, 14) Josua mite’n Pathian thutiamte leh a hrilh lâwkte a thlen dikzia chu an hnial thei lo va. Mahse, engtin nge Pathianin a tih? Pathian kawngte leh mihring kawngte inkârah inan lohna lian tak a awm a ni. Chu chu i tâna hriat tûr pawimawh tak a ni a, Pathianin kan hma lawka lo thleng tûr chungchâng a sawite chuan a nghawng nghâl thei ngei ang che.

Mihring hrilh lâwknate chuan scince thiamna lam zir bingna ang thil te, thu dik awmsa lam âwnin emaw, thlarau lam hriatna lem emaw pawh an ṭanchhan ṭhîn a. An sawi lâwk hnuah mihringte chuan thil thleng tûrte hmuh tumin an nghâk tawp ringawt a ni.—Thufingte 27:1.

Mihringte nêna inang lo takin, Pathian chuan thil zawng zawng a hre vek a. Ani chuan mihringte mizia leh rilru ngaihtuahna te a hre thiam vek a; chuvângin, a duh phawt chuan Pathian chuan mi mal leh a hnam puma an thiltih tûr chu a hre lâwk thei a ni. Mahse, chûng aia tam pawh a ti thei bawk. Thil lo thleng ngei tûr anga langte chu a thlâk danglamin, a thunun thei bawk a ni. “Ka kâ aṭanga ka thu chhuak chu . . . engmah tih nei lovin ka hnênah a kîr leh lo vang a, . . . a hlawhtling bawk ang,” tiin a sawi a ni. (Isaia 55:11) A châng chuan, Pathian hrilh lâwknate chu nakina tih tûr min hrilhna ang a ni a. A thiltih hlawhtlinte chuan tiamkamna chiang tak a pe a ni.

Nang leh i hmangaih takte tâna hma lam hun tûr hrilh lâwkna rin tlâk a awm em? Hurricane thlipui lo tleh tûr chu hriat lâwkna i neih chuan nun chhanhim nân hma i la thei a ni. Chutiang bawkin, Bible hrilh lâwkna pawh i chhâng lêt thei a. Pathianin khawvêl pum huap thlâkthlengna ropui tak lo thleng mai tûr chu a puang a. (“Hma Lam Hun Chungchânga Pathian Thil Târ Lante” tih bâwm chu en rawh) Chu hma lam hun tûr chu mi thiam an tih tam takte hrilh lâwkna nên chuan a danglam hle a ni.

Heti hian i ngaihtuah thei a ni: He khawvêl chanchin hian chhinchhiahna chiang tak a nei a. Chu chu ziah tawh a ni a, a tâwpna i hre lâwk thei a ni. Pathian chuan: “A tâwp tûr chu atîr aṭang rêngin ka sawi . . .‘Ka remruat chu a ding chhuak ang a, ka duhzâwng zawng zawng chu ka ti vek ang,’” a ti a. (Isaia 46:10) Nang leh i chhûngte chuan hma lam hun hlimawm tak in nei thei a. Thil lo thleng tûr chungchâng Bible sawi dân chu Jehova Thuhretute zâwt ang che. Thuhretute chuan thlarau zâwlna an nei lo va, thlarau aw hriat theihna emaw; hrilh lâwk theih bîkna emaw an nei hek lo. Anni chu i hma lam hun atâna Pathian thiltithei takin a ruahman thil ṭhate hmuhtîr theitu Bible zirlaite an ni. (w14-E 05/01)