Bible-ah chuan mitthi ruangte emaw, ruhte emaw hâl a nih thu tam tak a chuang a. (Jos. 7:25; 2 Chro. 34:4, 5) Chu chuan chûng mite chu mawihnai taka phûm tlâk loh an ni tih a târ lang mai thei a ni. Mahse, mitthi ruangte hâl a nih hian, phûm tlâk lo an ni tihna a ni kher chuang lo.

Chu chu Lal Saula leh a fapa pathumte an thih chanchinah khân kan hmu thei a ni. An pali chuan Philistia mite beihnaah an thi a. A fate zînga pakhat Jonathana chu Davida ṭhian ṭha leh ṭanpuitu rinawm tak a ni a. Jabes-Gilead-a awm Israel mi huaisente chuan thil thleng chanchin an han hriat chuan, Saula leh a fate ruang chu an la a, an hâl a, an ruhte chu an phûm ta a. A hnuah Davida chuan chûng Israel mite thiltih chu a fak a ni.—1 Sam. 31:2, 8-13; 2 Sam. 2:4-6.

Bible-a mitthite tâna beisei tûr awm chu thawhlehna—Pathianin mi a tih nun lehna chu a ni. Mitthi ruang chu hâl a ni emaw, ni lo emaw pawh ni se, Pathian Jehova chuan taksa thar neia tihnun leh theihna a nei a ni. Lal Nebukadnezzara thupêk anga rawhtuina meia hâl hlum tûr Hebrai mi rinawm pathumte chuan, chutianga tihhlum an nih pawhin Pathianin a kaitho thei tih an ring tlat a ni. (Dan. 3:16-18) Chu chu, Nazi concentration camp-a tihhlum a, hâl tâk Jehova chhiahhlawhte chungah pawh a thleng bawk a ni. Pathian chhiahhlawh rinawmte chu thil hlauhawm puak darhah emaw, kawng dangin emaw an hnuhma pawh hmuh tûr awm lovin an thi a. Chuti chung chuan, an tholeh ngei dâwn a ni.—Thup. 20:13.

Pathian Jehova chuan mi chu kaitho leh tûrin an taksa hlui a zawm khâwm leh kher a ngai lo. Chu chu Pathianin vân nunna chang tûr hriak thih Kristiante a kaihthawhnaah a lang a ni. ‘Thlarauva tihnuna awm’ Isua ang bawkin, hriak thih Kristiante chu anmahni tho ni mah se, thlarau taksa pua kaihthawh an ni. An lei taksa hlui chu vânah an chhohpui lo a ni.—1 Pet. 3:18; 1 Kor. 15:42-53; 1 Joh. 3:2.

Thawhlehna kan beiseina chu mitthi ruang sâwngbâwl dânah ni lovin, Pathianin thiltihtheihna leh a thutiam hlen chhuah a duhna kan rinnaah a innghat zâwk a ni. (Tirh. 24:15) Pathianin hun kal tawha mitthite mak taka a kaihthawh tawh dân leh kan hma lama a la kaihthawh leh dân tûr chu kan hre thiam vek kher lo thei a. Chuti chung pawhin, Jehova chu kan ring tlat a ni. Chu chu Isua kaih thawhlehna hmangin min ‘hriattîr,’ a nih loh leh min tiam a ni.—Tirh. 17:31; Lk. 24:2, 3.

Kristiante chuan mitthi ruang sâwngbâwl dânah khawtlânga thil tih dân phung te, tualchhûnga mite rilru put dân te, leh dânin a phûtte chu an ngaihtuah tel tûr a ni a. (2 Kor. 6:3, 4) Mitthi ruang hâl tûr a nih leh nih loh chu mi mal emaw, chhûngkua emawa thutlûkna siam tûr a ni. (w14-E 06/15)