1, 2. Engvângin nge Paula chuan chak lote chu a khawngaih theih?

CHAK loh châng kan nei ṭheuh va. Kan dam loh hunah chakna kan nei lovin, kan nî tin thiltih ṭhinte pawh tih harsa kan ti thei a ni. Chawlhkâr hnih khat mai ni lovin, a thla têl chak lo angah han inmitthla teh. Chutiang huna mi dangte’n i chunga khawngaihna an lantîr chuan i lâwm dâwn lâwm ni?

² Tirhkoh Paula chuan kohhran pâwn lam leh chhûng lam aṭanga nêksâwrna avânga tawrh leh chauh awmzia chu a hria a. Tuar thei tawh lo anga inhriat châng a nei bawk a ni. (2 Kor. 1:8; 7:5) Kristian rinawm a nih anga a nun leh harsatna tam tak a tawhte ngaihtuah lêtin: “Mi chak lote ka tuarpui lo ngai em ni?” tiin a sawi a ni. (2 Kor. 11:29) Kristian kohhrana awm mi chi hrang hrangte chu mihring taksa pêngte nêna khaikhinin, Paula chuan “taksa pêng chak âwm lo zâwka langte hi an pawimawh zâwk êm êm a ni” tih a sawi. (1 Kor. 12:22) Eng a sawina nge? Engvângin nge chak lo zâwk anga langte chu Jehova thlîr anga kan thlîr a ngaih? Chutianga thlîrna chu engtin nge kan hlâwkpui ang?

3. Kohhran chhûnga ṭanpuina mamawhte kan thlîr dân chu engin nge nghawng mai thei?

³ Chakna leh ṭhatlai hun chawisân ṭhinna khawvêlah kan chêng a. Mi tam takte’n an duh ang tipuitling tûrin engmah tih an hreh lova, chak lo zâwkte an rapbet fo ṭhîn. Chutiang mizia chu kan ngaizam mai lo chung pawhin kohhran chhûngah ngei pawh ṭanpuina mamawh rengte chu thlîr dân ṭha lo kan lo nei ṭan reng thei a. Mahse, Pathian neih ang thlîr dân inbûk tâwk chu kan nei chho thei a ni.

4, 5. (a) Engtin nge 1 Korinth 12:21-23-a hmuh tehkhin thu chuan Jehova’n mihringte chak lohna a thlîr dân hre thiam tûra min ṭanpui? (b) Chak lote ṭanpui chu engtin nge kan hlâwkpui theih?

⁴ Korinth khuaa mite hnêna Paula lehkha thawna chhinchhiah tehkhin thu aṭangin Jehova’n mihring chak lohna a thlîr dân chu kan hrethiam thei a ni. Bung 12-naah Paula chuan mihring taksa pênga pawimawh nêp deuh emaw, chak lo ber lai emaw pawhin pawimawhna an nei tih min hriattîr a. (1 Korinth 12:12, 18, 21-23 chhiar rawh.) Mihring taksa chungchânga he ngaih dân hi chan châwnna ringtu ṭhenkhat chuan an ringhlel a. Mahse, mihring taksa awmze zirna chuan taksa pêng ṭangkai lo anga ngaih ṭhinte’n hna pawimawh tak an thawk tih hmuh chhuah a ni a. * Entîr nân, mi ṭhenkhat chuan ke zung tê ṭangkaina nei lo angin an sawi a, mahse, taksa pum chu a inbûk tâwktîr tih hriat chhuah a ni tawh a ni.

⁵ Paula tehkhin thu chuan Kristian kohhrana awmte chu an ṭangkai vek tih a târ lang a. Mihringte zahawmna lâksaktu Setana ang lo takin Jehova chuan chak lo anga langte pawh tiamin, a chhiahhlawh zawng zawngte chu “pawimawh” tak angin a thlîr a ni. (Job. 4:18, 19) Chu chuan tualchhûng leh khawvêl pum huap Pathian mite kohhrana kan chanvo ngaihlu tûrin min ṭanpui ṭheuh tûr a ni. Entîr nân, ṭanpui ngai tar pakhat i ṭanpui lai kha ngaihtuah lêt leh teh. Chutianga ṭanpui tûr chuan i insiamrem a ngai pawh a ni thei. Mite ṭanpui chu a ṭangkaiin, nang pawhin i hlâwkpui a ni lâwm ni? Mi dangte kan ṭanpui hian, chuta ṭang chuan hlimna kan hmu a, dawhtheihna, hmangaihna leh puitlinnaah kan ṭhang chho a ni. (Eph. 4:15, 16) Kohhrana mite tlin tâwk chu engpawh ni se, an mahni hlut ṭheuhtu kohhran chuan inbûk tâwkna leh hmangaihna a târ lang tih hmangaihna ngah tak kan Pa chuan a hria a ni.

6. Engtin nge Paula chuan “chak lote” tih leh “chakte” tih thu mal hman châng a neih?

⁶ Korinth khuaa mite hnêna a lehkha thawnah Paula chuan ring lotute’n kum zabi khatnaa Kristiante an hmuh dân leh amah a inngaih dân sawi nân “chak lote” tih thu mal a hmang hi a ngaihvenawm hle a ni. (1 Kor. 1:26, 27; 2:3) Paula’n mi “chakte” chungchâng pawh a sawi khân, chu chu Kristian ṭhenkhatte inngai chungnung zâwk tûra a duh vâng a ni lo. (Rom 15:1) Chu ai mah chuan thil tawn ngah zâwk Kristiante chuan thutaka la nghet rih lote chunga dawhthei tûr an ni tih a sawina mai a ni.

7. Engvângin nge ṭanpui ngaite ṭanpui chu a harsat mai theih?

⁷ “Retheite” kan ṭanpui hian Jehova kan entawn chauh ni lovin, a pawm pawh kan hlawh bawk a ni. (Sâm 41:1; Eph. 5:1) Mahse, ṭanpuina mamawhte a ṭha lo zâwnga thlîrna chuan ṭanpui a tihharsat châng pawh a awm thei a. A nih loh leh, sawi tûr kan hriat chiah  loh avângin, nuam lo kan tiin, harsatna neite kan puih loh phah thei bawk. Unaunu pakhat, a pasalin a chhuahsan Cynthia-i * chuan heti hian a sawi a ni: “Unaute’n min pumpelh emaw, ṭhian ṭhain an tih tûr anga kan beisei ang an tih loh emaw chuan, kan rilru a na thei a. Harsatna kan tawh hunah, mi dangte kan mamawh ṭhîn,” tiin. Hmân lai mi Davida chuan mi dangte ngaihsak loh nih hrehawmzia chu a hria a ni.—Sâm 31:12.

8. Engin nge mite khawngaih lehzual tûra min ṭanpui ang?

⁸ Kan unau duk tak ṭhenkhatte’n dinhmun harsa tak—hrisel lohna te, sakhaw thuhmun lo chhûngkuaa awmna te, a nih loh leh rilru beidawnnate (depression) an tuar tih kan hriat reng chuan kan khawngaih lehzual ang. Eng nîah emaw chuan chutiang dinhmunah kan ding ve thei a ni. Ram Tiama an luh hma khân, Aigupta rama rethei leh chak lo taka awm Israelte chu hnehchhiaha awm an unaute chungah an “rilru tikhauh” lo tûra hrilh an ni a. Jehova chuan mi retheite chu ṭanpui phûte anga thlîr tûrin a beisei a ni.—Deut. 15:7, 11; Lev. 25:35-38.

9. Harsatna tâwkte kan ṭanpui hunah eng nge kan ngaih pawimawh ber ang? Entîrna pe rawh.

⁹ Dinhmun duhawm lo tak tawngte sawisêl emaw, rinhlelh emaw ai chuan thlarau lama thlamuanna kan pe zâwk tûr a ni. (Job. 33:6, 7; Mt. 7:1) Entîr nân: Motorcycle-a chesual pakhat chu emergency ward-ah a rawn thleng a, a enkawltu tûrte chuan chêtsualna thlentîrtu a nih leh nih loh hriat an tum ang em? Tum lo vang, a mamawh enkawlna chu a pe vat zâwk dâwn a ni. Chutiang bawkin, kan Kristian unau pakhat chu mi mal buaina avânga chak lova a awm a nih chuan thlarau lama ṭanpuina pêk chu kan ngai pawimawh ber tûr a ni.—1 Thessalonika 5:14 chhiar rawh.

10. Engtin nge chak lo zawk anga lang ṭhenkhatte chu “rinnaa hausa” tak an nih theih?

¹⁰ Kan unaute dinhmun kan han ngaihtuah lêt chuan, an chak lohna nia lang chu chak lohna angin kan ngai tawh lo vang. Kum tam tak chhûnga chhûngkaw dodâlna tâwktu unaunute hi han ngaihtuah teh. Mi ṭhenkhat chu tlâwm tak leh derdêp tak angin an lang mai thei a, mahse anni chuan rinna leh chhûng lama chakna nasa tak an lantîr a ni lâwm ni? Nu mal ṭanin a fa emaw, fate emaw hruaia a rawn inkhâwm ziah i hmuh hunah, a rinna leh tum ruhna avâng chuan mak i ti hle lâwm ni? School-a thil ṭha lo ti tûra thlêmna tâwk chung pawha thutak vuan nghet tlattu tleirâwl hi engtin nge i ngaih le? Chûng chak loh hmêl takte chu kan zînga dinhmun ṭha zâwka awmte ang bawkin “rinnaa hausa” tak an ni tih inngaitlâwm takin kan pawm a ni.—Jak. 2:5.

11, 12. (a) Mihring chak lohna kan thlîr dân siamrem tûrin engin nge min ṭanpui ang? (b) Jehova’n Arona a dâwr dân aṭangin eng nge kan zir?

¹¹ Jehova’n a chhiahhlawh ṭhenkhat a dâwr dân ngaihtuahna chuan mihring chak lohna chu A thlîr dân anga thlîr tûrin min ṭanpui a ni. (Sâm 130:3 chhiar rawh.) Entîr nân, Arona’n rangkachak bâwngno lem a siam laia Mosia bula awm ni ta la, Arona thiam inchantîrna ho lam tak chu engtin nge i ngaih ang? (Ex. 32:21-24) A nih loh leh, Arona’n Miriami thu âwih a, Mosia’n ram dang mi nupuia a neih a sawisêl laia a rilru put hmang chu engtin nge i ngaih? (Num. 12:1, 2) Jehova’n Meriba-a mak tak maia tui a pêk laia Arona leh Mosia’n an chawimawi loh khân, nang ni ta la engtin nge i chhân lêt ang?—Num. 20:10-13.

¹² Jehova chuan chutiang dinhmunahte chuan Arona chu a hrem nghâl thei a. Arona  chuan thil tisual mah se, mi sual a ni lo tih a hria a ni. Arona chu dinhmun khirh tak hnuaia a awm vâng leh mi dangte thununa a awm vângin kawng dik lo a zawh niin a lang a ni. Mahse, a thil sual tih chu a pawm thlap a, Jehova rorêlna chu a thlâwp a ni. (Ex. 32:26; Num. 12:11; 20:23-27) Jehova chuan Arona rinna leh inlam lêtna rilru put hmang chu a en zâwk a ni. Kum zabi têl hnuah pawh, Arona leh a thlahte chu Jehova ṭihtute anga hriat an la ni reng a ni.—Sâm 115:10-12; 135:19, 20.

13. Mihring chak lohna kan thlîr dânah eng inbih chianna nge kan neih theih?

¹³ Jehova ngaihtuahna anga kan ngaihtuahna siamrem tûrin, chak lo anga langte kan thlîr dân kan bih chiang tûr a ni a. (1 Sam. 16:7) Entîr nân, ṭhalai pakhatin intihhlimna thlan chungchângah fîmkhur lohna emaw, ngaihsamna emaw a lantîr hunah engtin nge kan chhân lêt? Sawisêl nghâl vak ai chuan, lo puitling tûra ṭanpui nâna kan tih theih tûrte chu engvângin nge kan ngaihtuah zâwk loh vang? Ṭanpui ngai tuemaw ṭanpui tûrin hma kan la thei a, chutianga tihna chuan hriat thiamna leh hmangaihnaah min ṭhan chhohtîr a ni.

14, 15. (a) Elija’n hlauhna a neih khân engtin nge Jehova’n a ngaih? (b) Elija thiltawn aṭangin eng nge kan zir theih?

¹⁴ Jehova’n rilrua mangang a chhiahhlawh ṭhenkhatte a chhân lêt dân leh kan ngaihtuahna khaikhinna chuan zau zâwka mi dangte thlîr tûrin min ṭanpui bawk a. Rilru manganna neite zîngah chuan Elija pawh a tel a ni. Ani chuan Baala zâwlnei 450-te chu Pathian dik chungchângah huai takin cho mah se, Lalnu Jezebeli’n thah a tum tih a hriat chuan a tlân chhia tho a ni. Mêl 95 (km 150) vêla hla Beer-seba khuaa a kal hnu chuan, thlalêr hla takah a kal ta a. Ni sa tak hnuaia a kalna chuan a tihchauh êm avângin,  thing hnuaiah a ṭhu a, “thih a dîl” ta hial a ni.—1 Lal. 18:19; 19:1-4.

¹⁵ Jehova’n a zâwlnei rinawm beidawng tak vân aṭanga a en chuan engtin nge a awm ang? A chhiahhlawh chu lunghnual tak leh hlauhna neia a awm avângin a hnâwl mai em? Hnâwl lo. Elija tlin tâwk chu hriain, vântirhkoh a tîr ta zâwk a ni. Vântirhkoh chuan Elija chu thil ei tûrin vawi hnih lai a hrilh a. Chutiang chuan a kal lehna tûrah ‘a chelh thei,’ a nih loh leh a thleng thei dâwn a ni. (1 Lalte 19:5-8 chhiar rawh.) Ni e, Jehova chuan kaihhruaina a pêk hma pawhin, a zâwlnei thusawi chu ngaithlain, a mamawh ṭanpuina a pe a ni.

16, 17. Jehova’n Elija a ngaihsakna chu engtin nge kan entawn theih?

¹⁶ Mite ngaihsak tak kan Pathian chu engtin nge kan entawn theih? Thurâwn kan pe nghâl mai tûr a ni lo. (Thuf. 18:13) An dinhmun chhiat avânga ‘chawimawi loh zâwk’ anga kan ngaihte chunga khawngaihna kan lantîr hmasak chu a ṭha zâwk dâwn a ni. (1 Kor. 12:23) Tichuan, an mamawh dân azirin ṭha taka ṭanpui thei dinhmunah kan ding dâwn a ni.

¹⁷ Entîr nân, a hmaa kan târ lan tâk Cynthia-i, a pasalin a fanu pahnih nêna a kalsan chungchâng chu han ngaihtuah teh. Phatsan niin an inhria a ni. Engtin nge Kristian unau ṭhenkhatte’n an ṭanpui? Heti hian a sawi a ni: “Unaute hnêna thil awm dân phone-a kan hrilh chuan, minute 45 chhûng lekin an rawn thleng nghâl a. Min ṭahpui ta hial a ni. Atîr lam ni hnih thum chhûng chu min kalsan lo. Thil kan ei ṭhat loh avâng leh kan rilru a nat êm avângin hun engemaw ti chhûng chu an inah min hruai a ni,” tiin. Chu chuan Jakoba thuziak: “Unaupa emaw, unaunu emaw, saruaka awmin an ni tin chaw tlachham se la, tin, in zînga tuin emaw an hnênah, ‘Thlamuang takin kal ula, lum tak leh puar takin awm rawh u,’ ti ula, taksa tâna thil châkkhai chu in pêk si loh chuan engnge sâwt ang? Chutiang bawkin rinna chu thiltih nei lovin amah chauhvin a awm chuan thi a ni,” tih chu a hriat chhuahtîr mai thei che a ni. (Jak. 2:15-17) Tualchhûnga unaute’n a hun taka an ṭanpui avângin Cynthia-i leh a fanute chuan thil râpthlâk tak an tawn hnu thla ruk lekah auxiliary pioneer thawk tûrin chakna an nei leh ta a ni.—2 Kor. 12:10.

18, 19. (a) Chak lote chu engtin nge kan ṭanpui theih ang? (b) Chak lote kan ṭanpui hian tute’n nge hlâwkpui?

¹⁸ Natna khirh tak ata ṭha chhuak leh tûr chuan hun a ngai tih mahni thil tawn ngei aṭang i hre tawh pawh a ni thei a. Chutiang bawkin, mi mal harsatna emaw, dinhmun khirh tak emaw avânga chau Kristian chuan thlarau lam chakna nei lêt leh tûrin hun a mamawh thei a ni. Kan Kristian unau chuan mahnia zirna te, ṭawngṭaina te, leh Kristian thiltih dangte hmanga a rinna a tihchak chu a ngai ngei mai. Mahse, inbûk tâwkna a neih leh thlengin kan dawhthei ang em? Chutianga a ṭhat chhoh leh chhûng chuan, hmangaihna tlo tak chu kan lantîr ang em? Chak lote chu mi dangte’n an hlut nia inhriatna an neih nân leh kan Kristian lainatna an hriatthiam nân ṭanpui kan tum tlat ang em?—2 Kor. 8:8.

¹⁹ Unaute kan ṭanpui hian pêkna aṭang chauhva lo awm thei hlimna kan tawng tih theihnghilh ngai suh. Khawngaihna leh dawhtheihna lantîr dân kan zir bawk. Mahse, thil dang pawh a la awm. Kohhran pumah boruak ṭha a awmtîrin, hmangaihnaah a ṭhan chhohtîr a ni. A pawimawh ber chu, mi tinte hlu tak anga thlîrtu, Jehova kan entawn hi a ni. Ni e, ‘mi chak lote ṭanpui’ tûra fuihna zawm chhan tûr ṭha tak kan nei ṭheuh a ni.—Tirh. 20:35. (w14-E 06/15)