Bible Ṭanchhan Zawhnate Chhânna
Engvângin nge kan ṭawngṭai ang?
Pathian Jehova chuan hreh hauh lova kan rilru veizâwngte hrilh ziah tûrin min duh a. (Luka 18:1-7) Min ngaihsak avângin min ngaithla a ni. Kan Pa vâna mi chuan ṭawngṭai tûra min sâwm si chuan, engvângin nge a sâwmna chu kan pawm lo vang?—Philippi 4:6 chhiar rawh.
Ṭawngṭaina chu ṭanpui dîlna mai a ni lova. Chu chuan Pathian hnaih tûrin min ṭanpui zâwk mah a ni. (Sâm 8:3, 4) Pathian hnêna kan ngaihtuahnate kan sawi chhuah ziah hian, amah nêna kan inṭhianna chu a nghet zual sauh a ni.—Jakoba 4:8 chhiar rawh.
Engtin nge kan ṭawngṭai ang?
Kan ṭawngṭai hian Pathian chuan mi hriata mawi tûra pawngpaw chham deuh hluah emaw, kan hriatsa chham nawn fo emaw chu a duh lo. Awm dân tûr bîk lah a ruat hek lo. Jehova chuan thinlung aṭanga ṭawngṭai tûrin min sâwm a ni. (Matthaia 6:7) Entîr nân, hmân lai Israel ramah khân, Hani chu chhûngkaw buaina lungchhiatthlâk tak chungchângah a ṭawngṭai a. Chu a lungngaihna chu a hnua hlimnaa a lo chan tâk khân, Pathian hnênah tih tak zeta lâwm thu sawiin a ṭawngṭai leh a ni.—1 Samuela 1:10, 12, 13, 26, 27; 2:1 chhiar rawh.
Kan neih theih chanvo hlu a va ni êm! Siamtu chu ka rilru veizâwngte kan hrilh thei a. A thiltihte avânga chawimawiin, lâwmthu kan hrilh thei bawk a ni. Chu chanvo hlu chu kan ngaihthah tûr a ni lo tih a chiang hle a ni.—Sâm 145:14-16 chhiar rawh. (w14-E 07/01)