1. Engin nge Pathian kan biaknaah hmun pawimawh tak luah?

INAH emaw, thil hlui dah khâwmna hmun museum-ah emawa Jehova hming inziak chu i hmu tawh ngai em? I hmu a nih chuan, i phûr viau ngei ang. Pathian hming chuan amah kan biaknaah hmun pawimawh tak a luah a ni—Jehova Thuhretute kan ni si a! Khawvêl pum huapin, keimahni aia Pathian hming hmang nasa pâwl dang an awm lo. Mahse, Pathian hming put theihna chanvo hlu kan neih rualin mawhphurhna pawh kan nei tel tih kan hria a ni.

2. Pathian hming put theihna chanvo hlu kan neih rualin eng mawhphurhna nge kan neih tel?

² Jehova hming hmanna ringawt chuan a duhsak min hlawhtîr nghâl mai lo. Nungchang lama a tehnate milin kan nung tûr a ni a. Chu mi chungchângah Bible chuan Jehova mite chu “sual kalsan” tûrin min hriattîr a ni. (Sâm 34:14) Chu thu bul chu tirhkoh Paula’n: “Lalpa hming lam apiang chuan sual kalsan rawh se,” tia a ziah khân chiang takin a sawi lang a ni. (2 Timothea 2:19 chhiar rawh.) Pathian mite kan nih angin engtin nge suahsualna hnâwlin, ‘sual kan kalsan’ theih ang?

3, 4. Eng Bible châng nge Bible lama mi thiamte’n hriatthiam harsa an tih a, engvângin nge?

³ Paula’n 2 Timothea 2:19 a ziah hun laia thil awm dân chu han ngaihtuah teh. Hetah hian “Pathian lungphûm nghet” chungchâng sawiin, chuta inziak thu puan chhuah pahnih chu a sawi a. A pakhatna chu, Number 16:5 aṭanga lâk chhuah ni ngeia lang, “Lalpa chuan ama tate chu a hria” tih a ni a. (Thuziak hmasa en rawh.) A pahnihna, “Lalpa hming lam apiang chuan sual kalsan rawh se,” tih chu Bible lama mi thiamte’n hriatthiam harsa an ti hle thung. Engvângin nge?

⁴ Paula ṭawngkam hman chuan a thusawi chu hmun danga mi a lâk chhuah a ni tih a târ lang a. Mahse, Hebrai Pathian Lehkha Thuah chuan Paula thusawi ang chiah chu hmuh tûr a awm lo. Chuvângin, Paula’n: “Lalpa hming lam apiang chuan sual kalsan rawh se,” tia a sawi khân eng a sawina nge? He mi thu a sawi hma chiah hian Paula chuan Kora helna chungchâng Number bung 16-a mi chu a la chhuak a ni. Chu thu puan chhuah pahnihna pawh chu helna a chhuah lai vêla thilthleng nên chuan a inkûngkaih thei lo vang maw?

5-7. Paula chuan 2 Timothea 2:19-ah khân Mosia hun laia thil thleng eng chungchâng nge a sawi? (A thupui chunga milem en rawh.)

⁵ Mosia leh Arona laka helin, Dathana leh Eliaba fapa Abiramate chu Kora lamah an ṭang tih Bible chuan a sawi a. (Num. 16:1-5) Anni chuan Mosia zah lohna lantîrin, Pathianin a hnêna thuneihna a pêk chu an hnâwl a ni. Chûng hel hmangte chu Jehova mite zînga an la awm zawm zêl avângin mi rinawmte tân a hlauhawm a. Jehova’n amah betu rinawmte leh hel hmangte a thliar hran hun a han thlen chuan, thupêk chiang tak a pe ta a ni.

⁶ Chutah chuan heti hian kan chhiar a ni: “LALPAN Mosia a bia a, ‘Mipuite hnênah chuan, “Kora te, Dathana te, Abirama te bûk ata hi kiansan vek rawh u,” tiin sawi rawh,’ a ti a. Tichuan Mosia chu a tho va, Dathana leh Abirama te hnênah chuan an va kal a; Israel-ho upate chuan an zui a. Tin, pungkhâwmho hnênah chuan, ‘Hêng mi sualho puan in aṭang te hian chhuak rawh u khai; an engmah hi khawih suh u, chutilochuan an sualna zawng zawngah hian in tel ve dah ang e,’ tiin a sawi a. Chutichuan Kora te, Dathana te, Abirama te bûk ata chu an chhuak ta sung sung mai a,” tiin. (Num. 16:23-27) Jehova chuan hel hmangte chu a tiboral ta vek a. Chu mi nêna inkalh chiahin, betu rinawmte—dik lohna hnâwltute—erawh chu zuah an ni thung a ni.

⁷ Jehova chuan mihringte thinlung a hre thei! A tate, a nih loh leh a mite rinawmna chu a hmu a. Chuti chung chuan, a mi rinawmte chuan dik lohna hnâwl tûra hma an lâk vat a ngai a ni. Chuti a nih chuan Paula’n: “Lalpa hming lam apiang chuan sual kalsan rawh se,” tia a ziah khân Number 16:5, 23-27 chungchâng a sawina a ni thei ang. Chutianga thutlûkna siam chu “Lalpa chuan ama tate chu a hria,” tia Paula’n a sawi nên a inmil a ni.—2 Tim. 2:19.

8. Jehova hming lam a nih loh leh, Kristian kohhrana awm mai chu engvângin nge a tâwk loh?

⁸ Mosia hun laia thilthlengte chu sawiin Paula chuan Jehova nêna an inlaichînna hlu tak vênghim tûr chuan chêt lâk vat a ngai tih Timothea chu a hriattîr a ni. Mosia hun lai khân Jehova hming lam ringawt a tâwk  lo ang bawkin Kristian kohhrana awm mai chu a tâwk lo. Pathian betu rinawmte chuan sual an kal san nghâl vat tûr a ni. Chu chuan Timothea tân eng awmzia nge a neih? Paula fuihna aṭangin tûn laia Jehova mite’n eng nge zir tûr kan neih?

9. Engtin nge ‘inhnialna âtthlâk leh fing lo’ chuan kristian kohhran din tirh lam chu a nghawng?

⁹ Pathian Thu chuan Kristiante’n an kalsan ngei tûr, a nih loh leh an bânsan ngei tûr thil sual chungchângah thurâwn chiang tak min pe a. Entîr nân, 2 Timothea 2:19 hma lam thuah Paula chuan Timothea chu ‘thu mai mai chunga inhnial lo tûr’ leh ‘thu sawi mai mai chu hawisan ṭhîn tûrin’ a hrilh a ni. (2 Timothea 2:14, 16, 23 chhiar rawh.) Kohhran chhûnga mi ṭhenkhatte chuan kalpêngte zirtîrna chu an theh darh ṭan a. Chu bâkah, mi dangte chuan inhnialna siam thei ngaih dânte chu an tichhuak bawk niin a lang. A hnuhnûng zâwk hi a dik lohna Bible aṭanga sawi fak tûr awm lo mah se, inṭhen hranna a awmtîr a ni. Chutiang thilte chuan inhnialna a awmtîrin, thlarau lam thilah boruak ṭha lo tak a awmtîr a. Chuvângin, Paula chuan ‘inhnialna âtthlâk leh fing lovahte tel loh’ a pawimawhna a sawi uar a ni.

10. Kalpênna thlen thei thil kan hmachhawn hunah eng nge kan tih ang?

¹⁰ Tûn laiah hian kohhran chhûngah kalpênna kan hmu tam vak lo va. Chuti chung pawhin, Bible nêna inkalh zirtîrnate chu kan hmachhawn a nih chuan, khawi aṭanga lo kal pawh ni se kan hnâwl vat tûr a ni. Mi mal emaw, internet aṭang emaw, inbiak pawh nâna kan hman thil dangte aṭang emaw pawh ni se, kalpêngte nêna inhnial chu a finthlâk loh vang. Jehova mite kan nih angin, kalpênna chu kan pumpelh vek tûr a ni a, kan hnâwl tûr a ni.

11. Engin nge ‘inhnialna âtthlâkte’ chu thlen thei a, engtin nge Kristian upate chuan entawn tûr ṭha an siam theih?

¹¹ Kalpênna bâkah thil dang kohhrana inremna tichhe thei a awm bawk. Entîr nân, intihhlimna chungchânga ngaih dân inan lohna chuan ‘inhnialna âtthlâk leh fing lote’ a thlen thei a ni. Kohhran chhûnga mi tuemawin nungchang lama Jehova tehnate nêna inkalh intihhlimna a chawisâng a nih chuan inhnialna pumpelh duh vâng ngawtin Kristian upate chuan an ngaizam mai tûr a ni lo. (Sâm 11:5; Eph. 5:3-5) Mahse, upate pawh chu an ngaih dân chawi lâr lo tûrin an fîmkhur bawk a. Bible-in Kristian hotute a fuihna: “In zînga Pathian pâwlho awm chu enkawl rawh u . . . in chante chungah intilal hek lovin, pâwlho entawnan insiam zâwkin ho rawh u,” tih chu rinawm takin an zâwm tlat a ni.—1 Pet. 5:2, 3; 2 Korinth 1:24 chhiar rawh.

12, 13. (a) Intihhlimna thlan chungchângah Jehova Thuhretute’n eng thutlûkna nge an siam a, eng Bible thu bul nge hman theih a nih? (b) Engtin nge paragraph 12-naa sawi thu bulte chu mi mal thil chi hrang hrangah kan hman theih?

¹² Intihhlimna chungchângah, kan inawpna pâwl chuan film en loh tûr bîk, video games khelh loh tûr bîk, lehkhabu chhiar loh tûr bîk, leh hla ngaihthlâk loh tûr bîk min hrilh kim vek kher lo. Engvângin nge? Bible chuan mi tinte chu “chhia leh ṭha fiah tûrin an hriat theihnate” sawizawi tûrin a fuih a ni. (Heb. 5:14) Kristianin intihhlimna a thlan laia a ngaihtuah theih thu bulte chu Bible-ah târ lan a ni a. Kan thutlûkna siam apiangah kan thil tum chu ‘Lalpa lâwm zâwng a ni tih’ kan fiah tûr a ni. (Eph. 5:8-10) Chhûngkaw lute chuan thuneihna eng emaw chen an nei tih Bible-in min zirtîr a, chuvângin intihhlimna ṭhenkhat chu an inchhûnga lâk luh an  phal lo pawh a ni thei.—1 Kor. 11:3; Eph. 6:1-4.

¹³ A chunga kan sawi tâk Bible thu bulte khi intihhlimna kan thlan hun chauhva hman tûr a ni lo. Thawmhnaw hâk leh inchei dân te, hrisêlna leh chaw ṭha te, leh mi mal thilte pawhin inhnialna a tichhuak thei a. Chuvângin Bible thu bulte a kalh loh chuan, Jehova Thuhretute chuan fing takin chutiang thila inhnial chu an pumpelh a ni, ‘Lalpa bâwih chuan do tûr a ni si lo va, mi zawng zawng chungah zaidamin a awm zâwk tûr a ni.’—2 Tim. 2:24.

14. Ṭhian sual kawm loh a pawimawhna târ lan nân Paula’n eng tehkhin thu nge a hman?

¹⁴ ‘Jehova hming lam apiangin sual an kalsan’ theih dân kawng dang chu eng nge ni? Thil sual titute kawm loh hi a ni. Paula’n “Pathian lungphûm nghet” tehkhin thu a sawi hnuah tehkhin thu dang a sawi leh a, chu chu a chhinchhiah tlâk hle. ‘In ropui . . . bungbêl, rangkachak leh tangkaruaa siam mi chauh awm lo va, thing leh belleia siam mite pawh awm ṭhîn; ṭhenkhatte ngaihhlut tûr awm a, ṭhenkhatte ngaihhlut loh tûr awm bawk,’ chungchâng a ziak a. (2 Tim. 2:20, 21) Tichuan, Kristiante chu bungbêl ‘ngaihhlut loh’ laka ‘inthiarfihlîm’ tûrin a fuih a ni.

15, 16. “In ropui tak” tehkhin thu aṭangin eng nge kan zir theih?

¹⁵ Chu tehkhin thu chu eng nge a awmzia? Paula hmehbel thusawi chuan Kristian kohhran chu “in ropui tak” nên a tehkhin a, kohhran chhûnga mi tinte chu “bungbêlte,” a nih loh leh in chhûnga bungruate nên a tehkhin a ni. In chhûnga bungraw ṭhenkhatte chu thil hlauhawm takte’n a tichhia emaw, a thianghlim lo emaw pawh a ni thei. Inneitu chuan chûng bungruate chu ei rawngbâwl nâna hman bungraw fai bulah dah lovin, a dah hrang ṭhîn.

¹⁶ Chutiang chuan, tûn laia Jehova mite pawhin kohhrana Jehova thu bul pawisa  lo zawm zêltute chu ṭhianah an siam tûr a ni lo. (1 Korinth 15:33 chhiar rawh.) Kohhran chhûnga mite lakah pawh chutianga kan awm a ngaih chuan, kohhran pâwna mi ‘tangka ngainatu te, nu leh pa thu âwih lo te, thianghlim lo te, hêktu te, mi kawlhsen te, ṭha duh hauh lo te, vervêk te, Pathian hmangaih aia mahni lâwmna mai hmangaih zâwktute’ ṭhiana siam chu kan “hawisan” lehzual a va ngai dâwn êm!—2 Tim. 3:1-5.

17. Israel mi rinawmte chuan eng ang chiahin nge sual an do?

¹⁷ ‘Kora te, Dathana te, Abiramate bûk kiansan vek’ tûra hrilh an nih laia Israel mite chêt lâk vat dân chu “an chhuak ta sung sung mai a,” tiin Bible chuan chiang takin a sawi. (Num. 16:24, 27) Chu ṭawngkam chuan thu âwih an hreh lohzia leh an tawi muan lohzia mai bâkah, thu an âwih pumhlûmzia pawh a târ lang bawk a ni. Mi rinawmte chuan an nun thâp an tum lo va, châk takin thu an âwih pumhlûm zâwk a. Jehova lama ṭang tlatin, sual an do a ni. Heta ṭang hian eng nge kan zir theih?

18. Paula’n ‘tleirâwl châknate tlânsan’ tûra Timothea a fuih laia a sawi tum chu eng nge?

¹⁸ Jehova nêna kan inṭhian ṭhatna vênghim tûra kan chêt vat a ngai ṭhîn a. Hei hi Paula’n Timothea hnêna ‘tleirâwl châknate tlânsan’ tûra a hrilh laia a sawi tum chu a ni. (2 Tim. 2:22) Chutih lai chuan, Timothea chu puitling kum 30 pêl tawh a ni a. ‘Tleirâwl châkna’ âtthlâk tak chu puitling tawhte pawhin an nei thei tho a ni. Timothea’n chutiang châknate chu a nei a nih chuan, a “tlânsan” tûr a ni. Kawng danga sawi chuan ‘sual a kalsan’ tûr tihna a ni. Isua chuan: “I mitin a tihtlûk che chuan kher chhuak la, paih daih rawh,” a tih khân he thu tho hi a sawi a. (Mt. 18:9) Tûn laiah pawh hian, he fuihna thu thinlung taka zâwmtu Kristiante chuan thlarau lama thil hlauhawmte chu hrehna nei lo leh vuaicha hauh lovin an chingfel vat ṭhîn a ni.

19. Engtin nge tûn laiah hian mi ṭhenkhat chu thlarau lama dinhmun hlauhawma awmtîr theitu laka an invêng vat?

¹⁹ Mi ṭhenkhat zu ngawl lo vei tawhte chuan Thuhretu an nih hnuah zu lam chi rêng rêng in tawh loh an thlang a. Mi dangte erawh chuan intihhlimna ṭhenkhat amah maia pawi lêm lo pawh, nungchang lama chak lohna an lo neih tawh ṭhin chawk tho thei a nih chuan an hnâwl bawk. (Sâm 101:3) Entîr nân, unaupa pakhat chuan Thuhretu a nih hmain, pawisak nei lova duhdah taka an lâmna hmuna kal chu nuam a ti hle ṭhîn a. Mahse, thutak a zir hnu chuan, a hun kal tawha châkna, a nih loh leh ngaihtuahna ṭha lo a neih tawh ṭhin chu chawh thawh a nih leh a hlauh avângin Thuhretute inhmuhkhâwmnaa lâmnaah pawh a tel duh lo hial a ni. Kristiante chu thil sual ni lêm lo, zû te, lâm te, a nih loh leh thil dang lakahte chuan an inthiar fihlîm vek kher a ngai lo. Mahse, kan vai hian thlarau lama dinhmun hlauhawma min awmtîr theitu lakah chuan invêng vat tûra beisei kan ni.

20. ‘Sual kalsan’ chu awlsam lo mah se, engin nge min thlamuan?

²⁰ Pathian hming put theihna chanvo hlu kan neih rual hian mawhphurhnate kan nei bawk a. ‘Sual kan kalsanin, thil ṭha kan tih’ ngei a ngai a ni. (Sâm 34:14) Chutianga tih chu a awlsam loh châng a awm ṭhîn ngei mai. Mahse, Jehova chuan “ama tate” leh a kawng dik zâwmtute chu engtik lai pawhin a hmangaih dâwn tih hriat chu a thlamuanawm hle a ni.—2 Tim. 2:19; 2 Chronicles 16:9a chhiar rawh. (w14-E 07/15)