“Nangni Hi Ka Thuhretute In Ni”
“‘Nangni hi ka thuhretute in ni,’ Jehova’n a ti.”—IS. 43:10, NW.
1, 2. (a) Thuhretu nih chu eng nge a awmzia, he khawvêla chanchin theh darhtute chu engtin nge langsâr taka an hlawhchham? (b) Engvângin nge Jehova chu he khawvêla chanchin theh darhtuteah a innghah loh?
THUHRETU nih chu eng nge a awmzia? Dictionary pakhat chuan: “Thil thleng hmutu leh a thlen dân sawitu,” tiin a hrilhfiah a ni. Entîr nân, South Africa ram Pietermaritzburg khawpuia chanchinbu, tûna The Witness tih tâk chu kum 160 chuang tihchhuah a ni tawh a. Chu chanchinbuin a tum ber chu khawvêl puma thilthlengte dik taka sawi a nih avângin a hming chu a inhmeh hle a ni. The Witness chanchinbu tichhuaktu chuan an chanchinbuin “thu dik, thu dik pumhlûm, leh thu dik chauh,” a tihchhuah tûr thu a sawi.
2 Mahse, lungchhiatthlâk takin, khawvêla chanchin theh darhtute chuan mihringte chanchina thilthleng dik tak leh pawimawh lai berte chu an ngaihthah, a nih loh leh a dik lovin an sawi ṭhîn a ni. Pathian engkimtitheia chungchâng pawh dik takin an puang chhuak lo, Ani chuan hmân laia a zâwlnei Ezekiela hmangin heti hian a sawi a ni: ‘Hnamte chuan kei hi, Jehova chu ka ni tih an hria ang,’ tiin. (Ezek. 39:7) Mahse, lei leh vâna Rorêltu Chungnungber chu he khawvêla chanchin theh darhtuteah a innghat lo. Ani chuan Thuhretu maktaduai riat vêl a nei a, anni chuan a chanchin te, hun kal tawh leh tûn laia mihringte a dâwr dânte chu hnam tina mite hnênah an hrilh a ni. Chûng Thuhretute chuan mihringte hma lam huna Pathianin malsâwmna pêk a tiamte chu an puang chhuak bawk a ni. Chu thu hrilh hna chu thil pawimawh berah dahin: “‘Nangni hi ka thuhretute in ni, ka chhiahhlawh ka thlana pawh chu,’ Jehova’n a ti,” tia Isaia 43:10-a sawi Pathian min pêk hming putu kan ni tih kan lantîr a ni.
3, 4. (a) Engtikah nge Bible Zirlaite chuan hming thar an hman ṭan a, chu chu eng angin nge an ngaih? (A thupui chunga milem en rawh.) (b) Eng zawhnate nge kan ngaihtuah ang?
3 Jehova chu “hei hi kumkhuaa ka hming chu a ni a, tin, hei hi chhuan zawng zawng thlenga mi hriat rengna chu a ni,” tia sawitu “Lalber chatuana awm” a nih avângin a hming putu kan ni chu chanvo hlu a va ni êm! (Ex. 3:15; 1 Tim. 1:17; Thuhriltu 2:16 nên khaikhin rawh.) Kum 1931 khân, Bible Zirlaite chuan Jehova Thuhretute tih hming chu an hmang ṭan ta a. Chu mi hnu aṭang chuan, chu hming thar ngaihhlutna mi tam takte ziah chu he magazine-ah hian tih chhuah a ni ṭhîn a ni. Canada rama kohhran pakhat chuan: “‘Jehova Thuhretute’ kan ni tih chanchin ṭha hriat chuan min tiphûr hle a, chu hming thar pu tlâka awm tûr chuan tum ruhna min pe lehzual a ni,” tiin an ziak.
4 Pathian hming putute nih theihna chanvo ngaih hlutna chu engtin nge kan lantîr theih? Bible aṭanga lâk chhuah kan hming Jehova Thuhretute, tih chu kan hrilhfiah thei em?
HMAN LAIA PATHIAN THUHRETUTE
5, 6. (a) Eng kawngin nge Israel nu leh pate chu Jehova thuhretute an nih? (b) Israel nu leh pate chu eng thil dang nge ti tûra thupêk an nih a, engvângin nge chutiang tho chu tûn laia nu leh pate pawhin an tih ngai?
5 Isaia hun lai khân Israel mi tinte chu Jehova “hriatpuitute [“thuhretute,” NW],” an ni a, a hnam pum pui chu Pathian “chhiahhlawh” an ni bawk. (Is. 43:10) Israel nu leh pate’n thu an hrilh dân kawng khat chu, Pathianin an thlahtute a dâwr dân chanchin an fate hrilh a ni. Entîr nân, kum tina Kalhlên Kût hmang tûra hrilh an nih khân “In faten in hnêna, ‘He rawngbâwlna awmzia hi eng tihna nge ni ngai le?’ an rawn tih chuan, nangnin, ‘Hei hi LALPA kalhlên inthawina a nih hi, ani chuan Aigupta mite a tihhlum lai khân kan inte chu a rawn zuah a, Aigupta rama Israela thlahte in chu a rawn kal hlên a ni,’ in la ti dâwn nia,” tiin hrilh an ni. (Ex. 12:26, 27) Israel mite’n thlalêra Jehova an biak theih nâna chhuahtîr tûra Mosia’n Pharaoa a dîl khân: “Tunge maw ni LALPA, a thu ka han zawm a, Israel-hote ka han chhuahtîrna tûr chu ni le?,” tia a chhân thu pawh Israel nu leh pate chuan an fate hnênah an hrilhfiah ngei ang. (Ex. 5:2) Aigupta rama hri sâwm a lên hnuah leh Tuipui Sena Aigupta sipaite laka Israel mite an him hnuah chuan Pharaoa zawhna chhânna chu mi tin tân a chiang ta hle a ni, chûng thute pawh chu an fate an hrilh tel ngei ang. Jehova chu hun kal tawhah—leh tûnah pawh hian—Engkimtithei a ni. Chu bâkah, Israel hnamte chuan Jehova chu Pathian dik leh a thutiamte Hlentu a nihzia mit ngeiin an hmu a ni.
6 Jehova hming put theihna chanvo ngaihlutu Israel mite chuan chûng thil thleng ropui takte chu an fate hnênah chauh pawh ni lovin, an bâwiha awm ram dang mite hnênah pawh an hrilh ngei ang. Chutiang bawka pawimawh chu a awm a, thianghlimna kawnga Pathian tehnate zâwm tûra an fate zirtîr tûrin Israel mite chu thu pêk an ni. Jehova chuan: “In thianghlim tûr a ni: Kei, LALPA in Pathian hi ka thianghlim si a,” tiin a sawi. (Lev. 19:2; Deut. 6:6, 7) Pathian hming ropui chawimawi nâna thianghlimna kawnga fate zirtîrtu, tûn laia Kristian nu leh pate tân chuan entawn tûr ṭha a va ni êm!—Thufingte 1:8; Ephesi 6:4 chhiar rawh.
Kan fate hnêna Jehova chanchin zirtîrna chuan a hming chawimawina a thlen (Paragraph 5, 6-na en rawh)
7. (a) Israel mite Jehova laka an rinawmnain an chhehvêla hnamte chu engtin nge a nghawng? (b) Pathian hming putu zawng zawngte’n eng mawhphurhna nge kan neih?
7 Israel mite rinawmna chuan Pathian hming chawimawina ṭha tak a thlen a ni. Anni chu: “Khawvêl hnam tinin LALPA ta in nih an hria ang a, an hlau vang che u,” tia hrilh an ni a. (Deut. 28:10) Mahse, lungchhiatthlâk takin Israel mite chanchinah chuan an rinawm lohna hmuh tûr a tam hle a. Mihring siam milemte an be ta fo mai a ni. Chu bâkah, Kanaan mite pathian, an biakte ang mai chuan an lo nunrâwng ta a, an fate inthâwi nâna hlânin, mi retheite an awpbet ta a ni. Entawn tûr ṭha lo tak an siam chuan thil pawimawh tak min zirtîr a. Pathian Jehova, Mi Thianghlima ai chu kan awh avângin, amah entawn a, kan thianghlim a ngai a ni.
“NGAI TEH U, THIL THAR KA TI DAWN E”
8. Isaia chu eng ti tûrin nge thupêk a nih a, chu chu engtin nge Isaia’n a chhân lêt?
8 Jehova chuan Israel mite’n sal tânna ata chhanchhuahna ropui tak an la hmuh tûr chungchâng chu a lo sawi lâwk tawh a. (Is. 43:19) Isaia bua a bung hmasa lam parukte chu Jerusalem leh a hual vêltu khawpuite chunga chhiatna lo thleng tûr chungchânga vaukhânna thu deuh hlîr a ni. Mite’n chu vaukhânna thu chu ngaithla duh lo mah se, sawi zawm zêl tûrin thinlung hre vektu Jehova chuan Isaia hnênah thu a pe a ni. Isaia chu a mangang hle, Pathian hnam thlante chu inlamlêt lovin eng chen nge an awm dâwn, tih hriat a duh a ni. Pathianin engtin nge a chhân? “Khawpuite mihring awm, awm lova a ram a, inte urtu awm lova ram chu a ṭiau vek,” hma loh chuan a ni ang.—Isaia 6:8-11 chhiar rawh.
9. (a) Engtikah nge Isaia’n Jerusalem chungchâng a hrilh lâwkna chu a thlen dik? (b) Tûn laiah hian kan ngaihsak ngai vaukhânna chu eng nge?
9 Isaia chuan Lal Uzzia rorêl tâwp kum, a nih loh leh B.C.E. 778 vêl khân he thupêk hi a dawng a. Lal Hezekia lal chhûng B.C.E. 732 Thup. 20:1-3, 6.
hnu thlengin, zâwlnei hna chu kum 46 vêl a thawk a ni. Chu chu B.C.E. 607-a Jerusalem tihchhiat a nih hma khân kum 125 a tling tawh a ni. Tûn laiah pawh hian Pathian mite chu thil lo thleng tûr hriat lâwktîr an ni bawk. Vênnainsâng chu a chhuah hmasak ber aṭangin kum 135 a tling tawh a, chutih chhûng chuan Setana rorêlna suaksual tak a tâwp thuai tûr thu leh Isua Kum Sâng Rorêlnain a rawn thlâk tûr thu dik chu hre tûrin a chhiartute a hrilh tawh a ni.—10, 11. Babulon-a awm Israel mite’n Isaia hrilh lâwkna thlen famkimna eng nge an hmuh?
10 Thuâwih Juda tam tak, Babulon mite hnêna inpete chu Jerusalem tihchhiatnaah an thi ve lo va, Babulon-ah sala hruai an ni. (Jer. 27:11, 12) Kum 70 hnuah Pathian mite chuan: “Nangmah tlantu, Israel Mi Thianghlima, LALPA chuan heti hian a ti: ‘Nangmahni avângin Babulon bei tûr ka tîr ang a, an kulh kalhnate chu ka chhu chhe vek ang,’” tiin.—Is. 43:14, C.L. Re-edited.
11 Chu hrilh lâwkna nêna inmilin, khawvêl sawi nghîng lawih khawp thil chu B.C.E. 539 October thla khân zân khat thil thuah a thleng ta rup mai le. Babulon lal leh an mi liante chuan Jerusalem temple aṭanga an lâk no thianghlim chuan uain an in a, an pathian siam chawpte chu an fak a, chutih lai tak chuan Media leh Persia sipaite chuan Babulon chu beiin, an hneh a. B.C.E. 538 emaw, 537 emaw khân Babulon hnehtu, Kura chuan Judate chu an rama kîr leh a, Jerusalema Pathian biak in sa ṭha leh tûrin thu a pe ta a ni. Chûng thilthlengte chu Isaia chuan a lo hrilh lâwk vek tawh a; chutah chuan Jehova’n a mi, inlamlêtte Jerusalema an kîr leh hunah a enkawlin, a vênghim ang tih pawh a tel a ni. Pathian chuan anni chu “ka mi, ka thlante, mi fakna tilangtu tura ka tâna ka mi siamte” tiin a ko. (Is. 43:20-21; 44:26-28) Sal tângte chu an rama an kîrleh a, Jerusalema Jehova biak in an sak ṭhat leh hnu chuan Pathian dik awm chhun Jehova’n a thusawi a tithleng famkim ziah tih hmutute an ni ta a ni.
12, 13. (a) Jehova biakna din thar lehnaah Israel mite rualin tute nge tel? (b) “Berâm dangte” chu “Pathian Israelte” an thlâwp laiin eng ti tûrin nge beisei an nih a, anni chuan eng beiseina nge an neih?
12 Israel mite biak in sa ṭha leh tûra an kîr leh chuan, ram dang mi sâng tam takte chu Jehova biaknaah an tel ṭan a. A hnuah phei chuan ram dang mi tam zâwkin Jehova an be ta a ni. (Ezr. 2:58, 64, 65; Est. 8:17) Tûn laiah hian, Isua “berâm dang” ‘mipui tam takte’ chuan “Pathian Israelte” hmanga din, hriak thih Kristiante chu rinawm takin an thlâwp a. (Joh. 10:16; Thup. 7:9, 10; Gal. 6:16) Pathian hming pêk, Jehova Thuhretute tih chu mipui tam takte pawhin an pu a ni.
1 Johana 1:8, 9 chhiar rawh.
13 Krista Kum Sâng Rorêl chhûngin mipui tam takte chuan he kalhmang tâwpna ni hnuhnûng chhûnga Jehova Thuhretute zînga pakhat nih a nawmzia mitthi tho lehte hnêna hrilh theihna hun hlimawm tak an nei dâwn a ni. Mahse, tûnah hian kan hming phua kan nun a, thianghlim renga awm kan tum chauhvin chutiang chuan kan ti thei ang. Chu bâkah, eng ang pawhin thawk rim mah ila, mi sual kan ni tih leh Pathian hming thianghlim putu nih chu chawimawina ropui tak a ni tih hre reng chungin thianghlim lohna kan neih apiangah nî tin ngaihdam kan dîl ṭhin a ngai a ni.—PATHIAN HMING AWMZIA
14. Jehova tih hming awmzia chu eng nge?
14 Pathian hming putute nih chawimawina hi hlut zual tûr chuan, a awmzia ngun taka kan ngaihtuah a ngai a. Pathian hming “Jehova” tia lehlin ṭhin hi thiltih sawifiahtu Hebrai verb aṭanga lâk a ni a, “awm, ni” tia lehlin theih a ni. Chuvângin, Jehova tih awmzia chu “A Nihtîr” tia hriatthiam a ni. He hrilhfiahna hi Jehova, lei leh vân Siamtu leh a thiltumte Tipuitlingtu a nihna nên a inmil hle. Thil a han thlen chhoh zêl chuan, Pathian duhzâwng leh thiltumte chu Setana pawh tiamin tumahin thleng lo tûrin an dang thei lo va, a thleng dik zêl a ni.
15. Eng kawngin nge Jehova chuan a hming awmze lan chhuahtîr nân a mize ṭhenkhat a târ lan? (“Hming Awmze Thûk Tak Nei Chu” tih bâwm chu en rawh.)
15 Pathian mite Aigupta ram ata hruai chhuak tûra Mosia hrilh a nih khân, Jehova chuan a hming sawifiah nân thiltih sawina ṭawngkam nêna inkûngkaih a mize ṭhenkhat a târ lang a. Bible chuan heti hian a sawi a ni: “Pathianin Mosia hnênah, ‘AWMA KA NI,’ [a nih loh leh, KA NIH DUH ANG APIANG CHU KA NI ANG] a ti a; tin, a hnênah chuan, “Nangin Israela thlahte hnênah chuan, ‘AWMA chuan in hnênah mi rawn tîr a ni e,’ i ti tûr a ni,” tiin. (Ex. 3:14) Eng ang dinhmun hnuaiah pawh Jehova chuan a thiltumte tipuitling tûrin a ṭûl ang apiang a innihtîr ang. Sala lo tâng tawh Israel mite hnênah chuan Chhanchhuaktu, Vênghimtu, Kaihruaitu, leh tisa leh thlarau lama an mamawh zawng zawng Petu a ni tih a lantîr a ni.
KAN LAWMNA LANTIRIN
16, 17. (a) Engtin nge Pathian hming put theihna chanvo hlu kan neih avânga lâwmna kan lantîr theih? (b) A dawta thuziakah eng nge kan sawiho vang?
16 Tûn laiah hian Jehova chuan thlarau lam leh tisa lama kan mamawhte min pein a hming awmzia ang takin thil a ti zawm zêl a. Mahse, Pathian hming chu a nih duh ang nihna chauh a ni lo va. A thiltum tihpuitlinnaa a Thuhretute hna thawh hlawhtlintîrna pawh a tel bawk. Chu thil ngaihtuahna chuan a hming putu kan nih ang ngeia nung tûrin min chêttîr ang. Kum 70 lai kalta chhûnga Norway rama Thuhretu taima tak kum 84-a upa Kare-a chuan heti hian a sawi: “Chatuan lal, Jehova rawngbâwl a, a hming putute zînga tel chu chawimawina ropui takah ka ngai a ni. Bible thutak hrilhfiah leh mite mita hlimna leh hriatthiamna lang chhuak hmuh chu chanvo hlu tak a ni reng ṭhîn a. Entîr nân, Krista tlanna inthawinain thil a tihpuitlin leh chu mi avânga remna leh dikna awmna khawvêl thara chatuana nun an neih theih dân ka zirtîr lai chuan lungawina nasa tak ka nei a ni,” tiin.
17 Thu hrilhna bial ṭhenkhatah chuan Pathian chungchâng zir duhte hmuh an harsa chho tawlh tawlh a. Chuti chung pawhin, Kare-a angin, i thusawi ngaithla duhtu leh Pathian hming chungchâng zirtîr theih i hmuh hunah chuan i hlim hle lâwm ni? Mahse, engtin nge Jehova Thuhretute ni chungin Isua thuhretute kan nih ang? Chu zawhna chu a dawta thuziakah sawiho a ni ang. (w14-E 07/15)