A KAWM THU | ENGAH NGE MI ṬHATE CHUNGAH THIL ṬHA LO A THLEN ṬHIN?
Thil Ṭha Lo A Hluar!
Bangladesh-a, Dhaka khawpuia awm kum 35 mi, Smita-i * chu mi dangte hmangaih thei tak leh ngaihsak tak mi anga hriat hlawh a ni a. Pathian chanchin a zirte hre ve tûra mi dangte ṭanpui duhtu, nu taima leh hlim thei tak angin mite chuan an hria a ni. Mahse, Smita-i chu a han dam loh thut a, chawlhkâr khat pawh tling lova a thih tâk maina chuan a chhûngte leh a ṭhiante chu a va bara khaih tak êm!
Kum 30 chho bâwr vêl nupa tuak khat, James-a leh a nupui chu Smita-i ang bawka hriat hlawh an ni a. Ṭhâl laiin, United States Khaw Thlang lam Tuipui Kama awm an ṭhiante tlawhin an zin a. New York-a an inah chuan an haw leh ngai ta lo a ni. An zinnaah chuan, motora chêtsualna râpthlâk tak an tâwk a, an hmangaihte leh an hna thawhpuite chu khawhar takin an hnutchhiah a ni.
Tûn laia sual leh hrehawm tawrhna hluar tak hmu tûrin hmun hla tak kan en a ngai lo va. Indonaahte chuan tualchhûng mite leh sipaite an thi a. Dân bawhchhiatna leh tharum thawhna chuan pawisawi lote a tawrhtîr bawk. Mite kum zât leh an dinhmun chu eng ang pawh ni se, thihpui theih chêtsualnate leh natna nasa takte chuan a tlâkbuak tho a ni. Leilung chhiatnate chuan mite chu thliar chuang lovin a nuai bo va. Inpâwng huatna leh rorêl dik lohna pawh a hluar hle bawk. Nangmah ngei pawhin hrehawm i tuar mai thei a ni.
Hêng zawhnate zawh hi a âwm hle a ni:
-
Engvângin nge mi ṭhate chungah thil ṭha lo a thlen ṭhin?
-
Chûng thilte avângin Pathian kan mawhpuh tûr a ni em?
-
Chhiatnate hi amaha lo awm nge ni a, mihringte awmtîr zâwk?
-
Miin a tûn hma nuna thil sual a tih avânga mi mala hrehawm a tawrhna—Karma vâng a ni thei ang em?
-
Pathian engkimtithei a awm a nih chuan, engvângin nge mi ṭhate chu chhiatna laka a vênhim loh?
-
Nun hi sual leh hrehawm tawrhna lakah a zalên ngai ang em?
Hêng zawhnate chhân nân, zawhna pawimawh tak pahnih: Engvângin nge thil ṭha lote a thlen ṭhin a, Pathianin eng nge a tih ang? tih chhânna kan hriat thiam a ngai a ni. (w14-E 07/01)
^ par. 3 Hmingte chu thlâk a ni.