1, 2. (a) Pathianin Adama chu eng nge a pêk? (b) Engvângin nge Pathianin Adama tân nupui a pêk? (A thupui chunga milem en rawh.)

JEHOVA chuan awmze nei takin leilung hi a siam a. ‘Mihring awm nân a din a ni.’ (Is. 45:18) Mihring a siam hmasak ber, Adama chu ṭha famkimin a siam a, tichuan Pathianin in mawi tak—Eden huan a pe a. Adama chuan thing mawi tak te, tui luang dem dem te, leh ramsa hlim taka an zuang vêlte hmuh chu nuam a va ti dâwn êm! Mahse, thil pawimawh tak engemaw kim lo a awm. Chu chu Jehova’n: “Mihring amah chauhva awm hi a ṭha lo ve: amah ṭanpuitu tûr a kawppui âwm mi ka siamsak teh ang,” tia a sawi khân a târ lang a ni. Pathian chuan Adama chu tui takin a muthilhtîr a, a nâkruh pakhat a la a, “hmeichhiaah a siam a.” Adama a lo harh chhuah chuan a hlim ngawt ang! “Hei zet chu ka ruh ang ruh neia, ka tisa ang tisa nei ngei chu a ni: Mipa laka lâk chhuah a nih avângin ‘Hmeichhia’ tih tûr a ni ang,” a ti a ni.—Gen. 2:18-23.

² Pathianin hmeichhia a pêk chu mipa ṭanpuitu atâna ṭha famkim a nih avângin a ṭha bîk hle. Fa neih theihna chanvo hlu tak pawh a nei dâwn a. “Adama chuan a nupui chu mi nung zawng zawng nu a nih avângin a hmingah Evi a vuah,” hial a ni. (Gen. 3:20) Nupa hmasa berte hnêna Pathian thilpêk chu a va duhawm  êm! Anni chuan ṭha famkim fa neih chhoh theihna an nei a. Chutiang chuan lei chu mihring ṭha famkimte’n paradis-a chantîrin an luah khat ang a, thil nung dangte chu an thuhnuaiah an dah dâwn a ni.—Gen. 1:27, 28.

3. (a) Pathian malsâwmna dawng tûrin Adama leh Evi’n eng nge an tih ngai a, mahse eng thil nge thleng? (b) Eng zawhnate nge kan ngaihtuah ang?

³ Malsâwmnate dawng tûrin Adama leh Evi chuan Jehova thu zâwmin, a rorêlna an pawm a ngai a. (Gen. 2:15-17) Chutiang a nih chauh chuan Pathianin an tâna a thiltumte chu an tipuitling thei dâwn a ni. Mahse, lungchhiatthlâk takin “rûlpui tar,” Setana thununin an awm a, Pathian lakah thil sual an ti ta a ni. (Thup. 12:9; Gen. 3:1-6) Chu helna chuan engtin nge hmeichhiate a nghawng? Hmân laia Pathian ṭihtu hmeichhiate’n eng nge an tih hlawhtlin? Engtin nge tûn laia Kristian hmeichhiate chu “pâwl lian tak” anga sawi theih an nih?—Sâm 68:11.

4. Tuin nge nupa hmasa berte thil sual tihah mawhphur?

⁴ Adama chu a helna thiltih sawifiah tûra phût a nih khân: “Mi awmpui tûra i hmeichhe mi pêk ngei khân thing rah chu mi pe a, ka ei ta a ni,” tiin chhuanlam tling lo tak chu a siam a. (Gen. 3:12) A thil sual tiha mawhphurtu nih chu a duh lo va, Pathianin a pêk hmeichhia—leh hmangaih taka amah Petu chu mawhpuh a tum tlat bawk! Adama leh Evi chuan thil an tisual ve ve a; mahse, a mawhphurtu zâwk chu Adama a ni. Chuvângin, tirhkoh Paula chuan “mi pakhat [Adama] avângin sual khawvêlah a lût a, sual avângin thihna a lût bawk,” tiin a ziak a ni.—Rom 5:12.

5. Hun engemawti chhûng Pathianin mihringte mahnia ro an inrêl hran a la phalsakna chuan eng nge a finfiah?

⁵ Nupa tuak hmasa berte chu an chunga Rorêltu atân Jehova an mamawh lo anga ngaihtîr an ni a. Chu chuan he zawhna pawimawh tak: Tuin nge rorêl tûra dikna nei? tih hi a tichhuak a ni. Chatuan atâna chu zawhna chhânna pe tûr chuan, Pathianin Adama chu hun engemaw chen amaha ro a inrêl hran a phalsak a. Mahnia inrêl hrang thei a nih lohzia a hre chho dâwn tih Pathian chuan a hria a ni. Kum zabi tam tak chhûngin, chutianga ro inrêl hranna chuan mihringte chungah harsatna hrang hrang a thlen cho ta zêl a. Kum zabi kal ta chhûng lek pawh khân mi 100,000,000 vêl indonaah an thi a, chutah chuan pawisawi lo mipa, hmeichhia, leh naupang maktaduai tam tak an tel. Chuvângin, “mihringah hian, a pheikhai hruai tûr a awm lo” tih thu dikzia finfiahna tam tak a awm tawh a. (Jer. 10:23) Chu chu hriain, Jehova chu kan chunga Rorêltu atân kan pawm a ni.—Thufingte 3:5, 6 chhiar rawh.

6. Engtin nge ram tam takah hmeichhiate chu cheibâwl an nih?

⁶ Setana thununna hnuaia awm khawvêlah hian mipa leh hmeichhiate chu dik lo taka cheibâwl an ni ve ve a. (Thur. 8:9; 1 Joh. 5:19) Thil thleng râpthlâk tak ṭhenkhat zîngah chuan hmeichhiate dik lo taka cheibâwlna pawh a tel a ni. Khawvêl pumah hian hmeichhia za zêla 30 vêlte chu an kawppui mipate’n an nghaisa ṭhîn a. Hnam ṭhenkhatah chuan mipate chu an puitlin huna chhûngkaw inthlah chhawng zêl chhawm nungtu tûr leh an nu leh pa, leh pi leh pu tarte enkawl tûra an ngaih avângin an duhsak bîk ṭhîn. Ram ṭhenkhatah chuan, hmeichhiate chu naupang duhawm lo tak angin an ngai a, mipa aiin hmeichhe naupangte chu pai an nih laia tihtlâk an tam zâwk hle bawk.

7. Eng ang bul ṭanna nge Pathianin mipa leh hmeichhia a pêk?

⁷ Hmeichhiate dik lo taka cheibâwlna chuan Pathian a tilâwm lo tak zet a. Ani chuan hmeichhiate chu dik tak leh zah takin a cheibâwl a ni. Chu chu Jehova’n Evi ṭha famkima a siamna leh chhiahhlawh ang ni lova, Adama kawppui ṭha tak anga a siamna aṭang hian a lang chiang a. Hei hi thil siam, a ni rukna  tâwpa Pathianin “a thil siam tinrêng chu a en a, ngai teh, ṭha a ti êm êm a,” tia a sawi chhan pakhat pawh a ni. (Gen. 1:31) Ni e, Jehova thil siam “tinrêng” chu ‘a ṭha êm êm’ a ni. Mipa leh hmeichhia chu ṭha taka bul ṭan theihna a va siamsak tak êm!

8. (a) Mite nungchang tlângpui chu hrilhfiah rawh. (b) Mihringte chanchin tluan chhuakah Pathianin tute chungah nge duhsakna a lantîr?

⁸ Eden huana helna a chhuah hnu aṭang khân a tlângpuiin mipa leh hmeichhiate nungchang chu a chhiat belh zêl a, kum zabi kal ta chhûng khân a hma zawng aiin a chhe zual a ni. Bible chuan “ni hnuhnûngahte” suahsualna a pung dâwn tih a sawi lâwk a. Mihringte’n thil sual an tih nasat êm avângin ‘hun khirh tak’ kan tawng ngei mai. (2 Tim. 3:1-5) Mahse, mihringte chanchin tluan chhuakah hian “Lalpa PATHIAN” chuan amah ringtu, a dân zâwmtu, leh a Rorêlna hnuaia intulût mipa leh hmeichhiate chungah duhsakna a lantîr a ni.—Sâm 71:5 chhiar rawh.

9. Mi engzât nge Tuilêtah dam khawchhuak a, engvângin nge?

⁹ Pathianin Nova hun laia Tuilêt hmanga tharum thawhna a hluarna hmân lai khawvêl a tih boral khân mi tlêmtê an dam khawchhuak a. Chutih lai chuan Nova unaute chu la dam pawh ni se, tuilêtah chuan an thi a ni. (Gen. 5:30) Mahse, Tuilêta dam khawchhuak chu mipa leh hmeichhia an inzât chiah a. Chûng dam khawchhuakte chu Nova, a nupui, a fapa pathum, leh an nupuite an ni. Pathian an ṭih a, a duhzâwng an tih avângin an nunna zuah a ni a. Pathian ṭanpuina dawngtu chûng mi pariat thlahte chu tûna mihring tlûklehdingâwn tam takte hi kan ni.—Gen. 7:7; 1 Pet. 3:20.

10. Engvângin nge thlahtu rinawm nupuite’n Jehova ṭanpuina an dawn?

¹⁰ Kumte a han ral zêl chuan, thlahtu rinawm nupuite pawhin Pathian ṭanpuina an dawng bawk a. Anni chuan an dinhmunte chu sawisêl ṭhîn sela chuan, chutiang ṭanpuina chu an dawng hauh lo vang. (Jud. 16) Abrahama nupui zahawm tak chuan Ur rama an nun nuam tak kalsan a, engemaw chen ram danga puan ina chêng tûra an chhuah lai khân nasa taka a sawisêl a rinawm loh hle. “Sarin Abrahama chu ‘Lalpa’ tiin a thu a âwih,” zâwk a ni. (1 Pet. 3:6) Pathian malsâwmna dawng a, nupui ṭha tak lo ni ta Rebeki chanchin pawh hi ngaihtuah bawk teh. A pasal Isaaka’n “a hmangaih hle a . . . a nu thih thuah pawh chuan a lo thlamuang thei ta” pawh chu thil mak a ni lo. (Gen. 24:67) Sari leh Rebeki ang Pathian ṭih mi unaunute kan zînga an awm hi kan va lâwm êm!

11. Engtin nge Hebrai nau chhar pahnihte chuan huaisenna an lan tîr?

¹¹ Aigupta rama sal an tân chhûng khân Israelte chu an pung chak hle a, Pharaoa chuan Hebrai mipa nausênte chu an pian tirha tihlum vek tûrin thu a pe a ni. Mahse, Hebrai nau chhartute chunga mawhphurtu ni âwm tak, Siphraii leh Puaii hi lo ngaihtuah teh. Jehova ṭihna thûk tak an neih avângin huaisen takin nausên tihhlum chu an duh lova. Chuvângin, Jehova chuan chhûngkua pein mal a sâwm a ni.—Ex. 1:15-21.

12. Debori leh Jaeli chungchânga thil chhinchhiahtlâk tak chu eng nge?

¹² Rorêltute hun laia Pathian ṭanpuina dawngtu hmeichhe pakhat chu zâwlnei Debori a ni. Ani chuan Rorêltu Baraka fuihin, Israel mite chu an hmêlmate laka zalên tûrin a ṭanpui a; mahse, Baraka’n Kanaan mite a hneh loh tûr thu pawh a sawi lâwk bawk. Pathian chuan Kanaan sipai hotu Sisera chu “hmeichhe hnênah” a pe zâwk dâwn a. Jaeli, Israel mi ni lovin a tih hlum khân chu chu a thleng a ni.—Ro. 4:4-9, 17-22.

13. Bible chuan Abigaili chungchâng eng nge min hrilh?

¹³ Abigaili chu B.C.E. kum zabi 11-naa hmeichhhe chhinchhiahtlâk tak a ni a. Thil  hrethiam tak a ni, a pasal Nabala chu tawh khirh, tlâktlai lo, nunrâwng, leh mi â tak a ni thung. (1 Sam. 25:2, 3, 25) Davida leh a mite chuan Nabala thil neihte chu hun engemaw chen an lo vênsak tawh a, mahse thil an han dîl chuan “a lo hau va,” engmah a pe lo. Chu chuan Davida thin a tihrim êm avângin Nabala leh a mite chu tihhlum a tum ta a. Abigail’n a lo hriat chuan Davida leh a mite tân eitûr leh intûr kengin a kal vat a, thisen chhuahna a thlen loh phah a ni. (1 Sam. 25:8-18) A hnuah Davida chuan: “Vawiina mi lo hmuak tûra tîrtu che LALPA, Israelte Pathian chu fakin awm rawh se,” tiin Abigaili chu a hrilh a. (1 Sam. 25:32) Nabala thih hnuah Davida chuan Abigaili chu nupuiah a nei ta a ni.—1 Sam. 25:37-42.

14. Salumana fanute chu eng hna thawhnaah nge an tel a, tûn laiah hian Kristian hmeichhiate’n chutiang nêna inang eng thil nge an tih?

¹⁴ Babulon sipaite’n B.C.E. 607-a Jerusalem leh temple an tih chhiat khân mipa, hmeichhia, leh naupang tam tak an thi a. Nehemia kaihhruaina hnuaiah B.C.E. 455 khân kulhte chu sak ṭhat leh a ni. Chu hna thawhnaah chuan Jerusalem bial chanve hotu Salumana fanute pawh an tel a. (Neh. 3:12) He hna hnuaihnung tak hi mahni duh thuin an thawk a ni. Tûn laiah pawh hian Kristian hmeichhe tam takte’n Jehova Thuhretute rawngbâwlna ṭanpuitu atâna in saknaah hlim takin an ṭanpui a. An hna thawh chu kan va ngai hlu êm!

15. Pathianin Mari chu eng chavo hlu nge a pêk?

¹⁵ Kum zabi khatna hma lama hun engemaw chhûng khân Jehova chuan hmeichhe tam tak chu chanvo ṭha takte pein mal a sâwm a. Chûng zîngah chuan nula thianghlim Mari pawh a tel. Josefa nêna an inhual hnuah mak tak maiin thlarau thianghlim fa a pai a ni. Engvângin nge Pathianin Isua nu ni tûra a thlan? A fapa ṭha famkim, a puitlin thlenga ṭhang chho tûra ṭanpui nâna neih ngai thlarau lam miziate a neih vâng a ni tih a chiang hle. Leia nung tawh azawnga ropui ber hringtu nih chu chanvo hlu a va ni êm!—Mt. 1:18-25.

16. Hmeichhiate chunga Isua rilru put hmang târ langtu entîrna pe rawh.

¹⁶ Isua chu hmeichhiate chungah a ngilnei hle a. Entîr nân, kum 12 chhûng lai thi pût tawh hmeichhe pakhat chungchâng hi lo ngaihtuah teh. Mipui hnung lam aṭangin Isua a pana, a kawr fualah a dek a. Isua chuan hau mai lovin, ngilnei takin: “Ka fanu, i rinna hi i dampui a ni e, thlamuang takin kal la, i natna ata chu lo dam hlen tawh ang che,” tiin a hrilh zâwk a ni.—Mk. 5:25-34.

17. C.E. 33 Pentikost nî khân eng thil mak tak nge thleng?

¹⁷ Hmeichhe ṭhenkhat chuan Isua leh a zirtîrte chu an rawngbâwlnaah an pui a. (Lk. 8:1-3) C.E. 33 Pentikost nî khân mipa leh hmeichhia 120 vêl chuan mak takin Pathian thlarau thianghlim an dawng a ni. (Tirhkohte 2:1-4 chhiar rawh.) Chutianga thlarau thianghlim leih an nihna chu hetiang hian sawi lâwk a ni: “Mi zawng zawng chungah [Jehova hian] ka thlarau ka leih ang a; tichuan in fapate, in fanuten ka thu an hril ang a . . . ka bâwihpate, ka bâwihnute chungah pawh ka thlarau ka leih ang,” tiin. (Joel. 2:28, 29) Pathian chuan a duhsakna chu kalpêng Israelte aṭangin mipa leh hmeichhe awmna, “Pathian Israelte” hnênah a sawn tih Pentikost nîa thil thleng mak tak hmangin a târ lang. (Gal. 3:28; 6:15, 16) Kum zabi khatnaa rawngbâwlnaa tel ṭhîn Kristian hmeichhiate zîngah chuan chanchin ṭha hriltu Philipa fanute pawh an tel a ni.—Tirh. 21:8, 9.

18, 19. (a) Pathianin mipa leh hmeichhiate chu eng chanvo hlu nge a pêk? (b) Engtin nge fakna hla phuahtu chuan chanchin ṭha hriltu hmeichhiate chungchâng a sawi?

¹⁸ Kum 1870 chho vêl khân biakna dika  tuina lantîrtute chu an tlêm hle a. Anni chu Isua hrilh lâwkna thu: “He ram Chanchin Ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih tûna a thlen famkimna atâna hmahruaitute an ni.—Mt. 24:14.

¹⁹ Bible zirlai pâwl tlêmtê chu tûn laia Jehova Thuhretu 8,000,000 vêl zet an lo tling chho ta a. Mi dang 11,000,000 aia tamte chuan Isua thih Hriatrengna kum tina neih ṭhinah telin Bible leh kan hnathawh ngaihsakna an lantîr a ni. Ram tam takah chuan hmeichhia an tam zâwk. Chu bâkah, khawvêl puma hun bikima Lalram chanchin puang chhuaktu hmeichhiate chu 1,000,000 aia tam an ni a. Pathian chuan hmeichhe rinawmte chu fakna hla phuahtu’n: “Lalpan thu a pe a; chanchin hriltu hmeichhe pâwl lian tak an lo ni ta a,” tia a sawi thlen famkimnaah chanvo hlu a pe tak zet a ni.—Sâm 68:11.

20. Eng chungchângin nge kan ngaihsak phu?

²⁰ Bible-a chhinchhiah hmeichhe rinawm tam takte chanchin chu sawi sên a ni lo va. Mahse, Bible leh kan thu leh hla chhuaha thuziakahte kan chhiar ṭheuh thei a ni. Entîr nân, Ruthi rinawmna chu ngun takin kan chhût thei a. (Rut. 1:16, 17) Lalnu Estheri hming chawia koh Bible bu hming chhiar leh a chanchin ziahna thuziak chhiarna chuan kan rinna a tichak ngei ang. Chhûngkuaa Pathian Biakna neih zânah chutiang chi zirhona neih chu kan hlâwkpui thei a. Tin, mahnia awm kan nih chuan, mahnia inzirna kan neih hunahte kan zir chiang thei bawk a ni.

21. Engtin nge Pathian ṭihtu hmeichhiate chuan hun harsa an tawh hunah Jehova laka an inpêkna an târ lan?

²¹ Jehova chuan Kristian hmeichhiate thu hrilhna chu mal a sâwm a, hun harsa an tawh hunah pawh a ṭanpui ṭhîn tih hnial rual a ni lo. Entîr nân, Nazi leh Communist rorêlna hnuaiah khân mi tam takin an tuar a, Pathian laka an rinawmna avângin ṭhenkhat chuan an nunna an chân hial a. Chutiang hunah pawh Pathian ṭihtu hmeichhiate chuan a ṭanpuina an dawn avângin an rinawmna an vawng tlat a. (Tirh. 5:29) Hmân lai ang bawkin tûn laiah pawh hian kan unaunute chuan an Kristian unau dangte rualin Pathian lal chungnunna chu an ṭan tlat bawk. Pathian chuan Israel mite chunga a tih angin, an kut ding lama chelh chungin: “Hlau suh u, kei in hnênah ka awm sia,” tiin a hrilh ang a ni.—Is. 41:10-13.

22. Eng chanvo hlu nge hma lam hunah nghâkhlel taka kan thlîr theih?

²² Kan hma lawkah hian Pathian ṭihtu mipa leh hmeichhiate chuan lei hi paradis nuam takah an chantîr ang a, tho leh mi maktaduai tam takte chu Jehova thiltumte zir tûrin an ṭanpui dâwn a ni. Chu mi hun a lo thlen hma chuan mipa kan ni emaw, hmeichhia kan ni emaw “thu khat vuaa” a rawngbâwl ho theihna chanvo hlu kan neih chu i ngaihlu ang u.—Zep. 3:9. (w14-E 08/15)