1, 2. Eng hna nge Jehova’n Mosia a pêk a, eng nge A tiam?

KHAWVELA rorêltu thiltithei ber hmaah dingin, Jehova mite ṭanna thu sawi angin han inchan teh. I rilru a hahin, tling tâwk lo nia inhriain, i tîm hle ngei ang. Engtin nge i thusawi dân tûr i inbuatsaih ang? Pathian engkimtitheia aiawhtu i nih angin engtin nge i thusawiah chuan thuneihna i lantîr theih ang?

² Mosia chu chutiang dinhmunah chiah chuan a ding a ni. Jehova chuan, “lei chunga mihring zawng zawnga zaidam lâwtlak” chu Pathian mite awpbeh an nihna leh Aigupta sala an tânna ata chhanchhuak tûrin Pharaoa hnênah tirh a nih thu a hrilh a. (Num. 12:3) Thil thlengin a la târ lan tûr angin, Pharaoa chu zahna nei lo leh mi chapo tak a ni. (Ex. 5:1, 2) Chuti chung pawhin, Jehova chuan Mosia chu Pharaoa hnênah sal tâng maktaduai thum vêlte chhuah tûra hrilh tûrin a duh tlat si! Jehova hnêna Mosia’n: “Kei Pharaoa hnêna kala, Israela thlahte Aigupta ram ata zuk hruai chhuaktu atân chuan tunge maw ka nih le?” tia a zâwt pawh chu a hriatthiam awm hle. Tling tâwk lo leh theihna nei lo angin a inngai ngei ang. Mahse, Pathian chuan amah mai a ni dâwn lo tih a tiam a. “I hnênah ka awm dâwn alâwm,” tiin a sawi a ni.—Ex. 3:9-12.

3, 4. (a) Mosia chuan eng nge a hlauh? (b) Mosia harsatna tawn chu eng nên nge i tehkhin theih ang?

 ³ Mosia chuan eng nge a hlauh? Pathian Jehova aiawhtu chu Pharaoa’n a lo dawnsawn duh loh emaw, a lo ngaihsak duh loh emaw a hlau a ni ngei ang. A mite ngei pawhin Jehova’n Aigupta ram aṭanga hruai chhuak tûra a ruata chu a nih an rin loh a hlau bawk a. Chuvângin, Mosia chuan Jehova hnênah: “Ngai teh, mi ring duhin ka thu an pawm lo vang: ‘LALPA chu i hnênah a inlâr ngût lo vang e,’ an ti mai âwm si a,” tiin a sawi a ni.—Ex. 3:15-18; 4:1.

⁴ Jehova’n Mosia a chhânna leh a hnua thil thlengte chuan kan vaiin thil pawimawh tak min zirtîr thei a ni. Sawrkâr mi lian hmaah kan la inlan ngai lo pawh a ni thei a. Mahse, Pathian leh a Lalram chungchâng nî tina kan hmuh ṭhinte hnêna sawi chu harsa i ti ṭhîn em? Harsa i tih chuan, Mosia entawn tûr siam aṭanga kan zir theih chu ngaihtuah rawh.

5. Eng nge Jehova’n Mosia kutah a pêk a, chu chuan engtin nge a hlauhna a tihreh theih? (A thupui chunga milem en rawh.)

⁵ Mosia’n a thu an lo ngaih thutak loh a hlauh thu a sawi khân Pathian chuan a hmaa thil lo thleng tûr a chinfel theih nân a buatsaih a. Exodus bu chuan heti hian a chhinchhiah: “LALPA chuan [Mosia] hnênah, i kuta mi kha engnge ni?” a ti a. Tin, ani chuan, “Tiang,” a ti a. Tin, ani chuan, “Leiah khân han paih teh,” a ti a. Tin, leiah chuan a han paih a, tin, rûlah a lo chang ta a; tin, Mosia chuan a tlânsan ta a. Tin, LALPA chuan Mosia hnênah, ‘I kut khân han ban la, a meiah han la teh, (tin, a kut chuan a han ban a, a han la a, tin, a kutah chuan tiangah a lo chang leh ta a): LALPA, . . . Pathian chu i hnênah a rawn inlâr ngei a ni tih an rin theihna tûrin,’ a ti a,” tiin. (Ex. 4:2-5) Jehova tirh ngei a ni tih a fiah theihna tûr Mosia kutah Pathianin a pe a ni. Tiang pângngai mai anga lang chu Pathian thiltihtheihna chuan thiltithei tak a nihtîr ta! Chu thilmak tihna chuan Jehova’n a ṭanpui tih a finfiahin, Mosia thusawi chu a va tirinawm zual dâwn êm! Tichuan, Jehova chuan: “Nangin he tiang hi i keng ang a, chu chuan thilmakte chu i ti ang,” tiin a hrilh a ni. (Ex. 4:17) A kutah Pathian thuneihna târ lanna a awm avângin Mosia chuan hma lam a pan thei a, a mite leh Pharaoa hmaah inringtâwk takin Pathian dik ai chu a awh thei ta a ni.—Ex. 4:29-31; 7:8-13.

6. (a) Thu kan hrilh hunah kan kutah eng nge awm ang, engvângin nge? (b) ‘Pathian thu a nung a,’ ‘thil a tih theih’ dân sawifiah rawh.

⁶ Mite hnêna Bible thuchah hrilh tûra kan kal hian he zawhna tho: “I kuta mi kha engnge ni?” tih hi zawh kan ni thei a. A tam zâwkah chuan hman mai theih tûrin Bible kan keng ṭhîn. Ṭhenkhat chuan Bible chu lehkhabu ve mai angin ngai mah se, Jehova chuan a thâwk khum, a Thu ziak hmangin min bia a ni. (2 Pet. 1:21) Bible-ah chuan Pathian Lalram rorêlna hnuaia thil lo thleng tûr chungchânga thutiamte a chuang a. Chu chu tirhkoh Paula’n: “Pathian thu hi a nung a, thil a ti thei,” tia a ziah theih chhan a ni. (Hebrai 4:12 chhiar rawh.) Jehova chuan a thutiamte tithleng famkim tûra a thawh zawm reng avângin a hlawhtling vek ang. (Is. 46:10; 55:11) Miin Jehova Thusawite a hriatthiam tawh chuan, Bible-a a thu chhiarte chuan a nunah nasa takin hna a thawk thei a ni.

7. Engtin nge ‘Pathian thu chu dik taka’ kan hman theih ang?

⁷ Ni e, Jehova chuan kan thuchah ken chu thu dik leh a hnêna mi a ni tih kan finfiah theih nân kan kutah a Thuziak, thu nung chu min kentîr a. Hebrai mite hnêna lehkha a thawn hnuah Paula’n thlarau lama a zirtîr Timothea hnêna “thutak thu fel taka hmang” tûra a hrilh pawh chu a mak lo. (2 Tim. 2:15) Engtin nge Paula fuihna chu kan zawm theih ang? Bible châng ṭha taka thlante chu a ngaithlatu  thinlung a thlen theih nâna chhiar rîkna hmangin kan ti thei a. Kum 2013-a tract tih chhuahte chu chutianga kan tih theih nâna min ṭanpui tûra ruahman a ni.

8. Engtin nge service overseer pakhat chuan tract chungchâng a sawi?

⁸ Tract tharte lan dân chu a inang vek a. Chuvângin, pakhat hman dân kan thiam chuan, avaia hman dân kan thiam tihna a ni. Hman a awlsam em? U.S.A. rama Hawaii thliarkâra service overseer pakhat chuan: “He hmanraw thar hi intinah leh vântlâng thu hrilhnaa a ṭangkai tûrzia kan lo hre phâk lo hle mai,” tiin a ziak. Tract-te ziah dân phung chuan ṭha taka mite chhânlêt a hlawhin, inkawmna a thlen phah fo tih a hmu chhuak a. Chu chu a kâwma zawhna leh a chhânna thlan tûr pathum a awm vâng niin a ngai. Inneitu chuan chhân sual a hlauh a ngai lo a ni.

9, 10. (a) Engtin nge kan tract-te chuan Bible hmang tûra min ṭanpui? (b) Eng tract nge i hman hlawhtlin ber a, engvângin nge?

⁹ Tract tinte chuan ṭha taka thlan Bible chângte chhiar tûrin min fuih a. Entîr nân, Hrehawm Tawrhna A Tawp Ngai Ang Em? tih tract chu han en teh. Inneitu chuan ‘a tâwp dawn,’ ‘a tâwp dawn lo,’ a nih loh leh “a tâwp mai thei” tiin lo chhâng pawh ni se, a chhûng chu keuvin, thil dang pawh sawi belh chuang lovin “Hei hi Bible sawi dân chu a ni,” ti la. Tichuan, Thu Puan 21:3, 4 chhiar ang che.

¹⁰ Chutiang bawkin, Engtin Nge Bible I Thlîr? tih tract i hman hunah pawh a kâwma chhânna thlan tûr pathum awm zîngah chuan a eng pawh thlang se a pawi lo. A chhûng keuvin, “Bible chuan ‘Pathian Lehkha Thu zawng zawng hi Pathian thâwk khuma pêk a ni’ tih a sawi asin,” ti ang che. Tichuan, “Heti hian a sawi belh bawk a ni,” tiin i sawi belh thei bawk ang. I Bible keuvin, 2 Timothea 3:16, 17 chhiar chhuak vek ang che.

11, 12. (a) Rawngbâwlna aṭangin lungawina eng nge i neih? (b) Engtin nge tract chuan tlawhkir nei tûra inbuatsaih nân a ṭanpui che?

¹¹ Inneitu chhânlêt dân chuan tract i chhiar leh sawipui tam zâwng tûr chu a hril ang. Engpawh ni se, mite hnêna tract pêk mai bâkah—i tlawh hmasak bernaah chuan Bible châng pakhat emaw, pahnih emaw chauh chhiar thei mah la, Pathian Thu chhiarsak chu i duh thei a ni. A hnuah sawihona in nei zawm zêl thei ang.

¹² Tract hnungah chuan “Ngaihtuah Tûr” tih thupui hnuaiah zawhna a awm zêl a. Engtin Nge Nakin Hun Tûr Chu I Thlîr? tih tract-ah chuan tlawh leh hun atâna zawh tûr: “Engtin nge Pathianin kan khawvêl hi ṭha tûra a thlâk ang?” tih chu a awm a ni. Matthaia 6:9, 10 leh Daniela 2:44-te chu târ lan a ni. Mitthite Hi An Nung Leh Tak Tak Ang Em? tih tract atân chuan: “Engvângin nge kan tar a, kan thih?” tih zawhna siam a ni a. Genesis 3:17-19 leh Rom 5:12 târ lan a ni bawk.

13. Bible zirpui neih ṭan nâna tract-te hman theih dân hrilhfiah rawh.

¹³ Tract-te chu Bible zirpui neih ṭan nâna rahbi pawimawh takah hmang ang che. Miin tract hnung lama QR code chu a scan hunah, kan Web site-ah a hruai lût ang a, Bible zir duhna a neihtîr thei a ni. Tract chuan Pathian Min Pêk Chanchin Ṭha! tih brochure pawh a târ lang a, a chhûnga zirlai kan en tûr bik pawh a târ lang bawk. Entîr nân, Tuin Nge Khawvêl Hi Thunun Tlat? tih tract chuan, chu brochure-a zirlai 5-naah a hruai lût a. Engtin Nge Chhûngkaw Nun Hlim Kan Neih Theih Ang?tih chuan zirlai 9-naah a hruai lût thung. Siam a nih dân ang taka tract-te chu hmangin, tlawh hmasak ber leh tlawh kir hunah Bible hman dân ṭha tak i nei ang a. Chutianga i tihna chuan Bible zirpui tam lehzual a neihtîr thei che a ni. In rawngbâwlnaa thiam taka Pathian Thu hmang tûrin thil dang eng nge in tih theih?

14, 15. Engtin nge rawngbâwlnaa Paula rilru put hmang chu kan entawn theih?

¹⁴ Paula chuan a rawngbâwlnaah ‘a tam thei ang berte’ hnêna thu hrilh châkna nasa tak a nei a. (1 Korinth 9:19-23 chhiar rawh.) ‘Judate, dân hnuaia awmte, dân nei lote, chak lote’ lâk luh a beisei tih hria ang che. Ni e, ani chuan ‘eng emaw ti tala ṭhenkhatte tal a chhandam theihna tûrin mi zawng zawng hnênah’ hrilh a duh a ni. (Tirh. 20:21) Kan thu hrilhna bial chhûnga “mi zawng zawng” hnêna thutak hrilh tûra kan inbuatsaih hian engtin nge Paula rilru put hmang chu kan entawn theih ang?—1 Tim. 2:3, 4.

¹⁵ Thusawi dân tûr entîrna chu Kan Lalram Rawngbâwlna-ah thla tin a lang ṭhîn a. Tichhin rawh. Mahse, thupui dangte chu in thu hrilhna biala mite rilruah a lian a nih chuan, chu mi nêna inmilin anmahni tiphûr thei thusawi dân duang chhuak ang che. I bul vêla thil awm te, chuta chêng mi dang te, leh an ngaihven ber thilte chu ngaihtuah la. Tichuan, an mamawhte chungchâng sawina Bible chângte chu ngaihtuah rawh. Bial kantu pakhat chuan he mi chungchângah hian a nupui nêna Bible lam an ngaihtuah dân chu hetiang hian a sawi a ni: “Tâwi fel taka thu kan sawi chuan inneitu tam zâwkte’n Bible châng pâkhat chhiar chu min phalsak ṭhîn a. Kan kuta Bible keusa kengin tih dân phung pangngai anga chibai kan buk hnuah Bible kan chhiar ṭhîn,” tiin. Rawngbâwlnaa hlawhtling taka hman tawh ṭhin thupui te, zawhna te, leh Bible châng i hman theihte chu ngaihtuah ang che.

16. Rawngbâwlnaa Isaia 14:7 hman theih dân sawi rawh.

¹⁶ Dân bawhchhiatna leh tharum thawhna a thlen ṭhinna hmunah chuan heti hian i zâwt thei ang: “‘Leilung pum pui hi muanawm tak, tibuaitu awm lovin a awm a. Mite hlim takin an au’ tih chu vawiin atâna chanchin langsâr ber ni tûr angin i ngaihtuah tawh ngai em? Chu chu Isaia 14:7-ah Bible chuan a sawi a ni. Dik takin Bible-ah chuan hun muanawm tak kan hma lama lo thleng tûr Pathian thutiam tam takte a awm a ni,” tiin. Tichuan, chutiang thutiamte zînga pakhat chu Bible aṭangin chhiarsak a duh leh duh loh zâwt ang che.

17. Engtin nge Matthaia 4:4 chu inbiak ṭan nân kan hman theih ang?

¹⁷ In vêng chhûnga mite tân eizawn a harsa  em? A harsat chuan: “Miin a chhûngkua hlim taka siam tûrin engzât nge a hlawh chhuah ngai ang?” tia zâwtin inbiakna chu i ṭan thei ang. A chhân hnuah: “Mipa tam takte chuan an mamawh aia tam daih an hlawh a, mahse an chhûngkua chu an la lungawi chuang lo. Chuti a nih chuan eng thil nge tih ngai ni ang?” tiin i sawi thei a. Tichuan, Matthaia 4:4 chu chhiar la, Bible zirpui tûrin sâwm ang che.

18. Engtin nge mite thlamuan nân Thu Puan 21:4 chu kan hman theih ang?

¹⁸ Tûn hnai maia chhiatna thleng avângin in vêng chhûnga mite’n an tuar em? I thusawi chu heti hian i ṭan thei ang: “Thlamuanna thu ṭhenkhat sawi tûrin kan rawn kal a. (Thu Puan 21:4 chhiar rawh.) Pathianin a tihbo tûrte chu i lo hmu em? ‘Mittui,’ ‘thihna,’ ‘lungngaih,’ ‘ṭah,’ leh ‘nat te’ a tibo dâwn a ni. Pathianin nun nuam tak nei tûrin min duh tih hriat chu a lâwmawm hle lawm ni? Mahse, chu chu engtin nge a nih theih ang?” tiin. Tichuan, Chanchin Ṭha Brochure-a zirlai inawm ber chu sawipui ang che.

19. Sakhaw ngaihsak mite thu sawipui huna Thu Puan 14:6, 7 hman theih dân hrilhfiah rawh.

¹⁹ Mite’n sakhua an ngaihsakna hmunah i chêng em? Chutiang hmunah i chêng a nih chuan, hetiang hian zâwtin inbiakna chu i ṭan thei ang: “Vântirhkohvin rawn be ta che se la, a sawi tûr chu i ngaithla ang em? (Thu Puan 14:6, 7 chhiar rawh.) He vântirhkoh hian ‘Pathian hlau rawh,’ tia min hrilh avângin a rilrua awm Pathian chungchâng hriat chu a pawimawh dâwn lawm ni? ‘Lei leh vân siamtu’ tia a sawi bawk avângin chu Pathian chu kan hre thei a ni. Chu chu tu nge?” tiin. Tichuan, Sâm 124:8 chu chhiarpui ang che, chutah chuan: “Min ṭanpuina tûr chu LALPA, lei leh vân siamtu hmingah a awm,” tiin a inziak a ni. Pathian Jehova chungchâng tam lehzual sawipui tûrin sâwm zui rawh.

20. (a) Eng kawngin nge Thufingte 30:4 chu mi tuemaw hnêna Pathian hming zirtîr nân hman theih a nih? (b) Eng Bible châng nge i rawngbâwlnaah hlawhtling taka i hman?

²⁰ Ṭhalaite hnênah chuan heti hian i sawi ṭan thei ang: “Zawhna pawimawh tak Bible aṭangin ka chhiar duh a. (Thufingte 30:4 chhiar rawh.) Heta a sawi tling pha hi mihringah tumah kan awm loh avângin min Siamtu chungchâng a sawina a ni ngei ang. A hming engtin nge kan hriat theih ang? Bible aṭangin ka hmuhtîr thei che ang em?” tiin.

21, 22. (a) Engtin nge ṭha taka thlan Bible châng chuan mite nun a thlâk danglam theih? (b) Rawngbâwlna hna i thawh mêk laiin eng nge tih i tum tlat?

²¹ Ṭha taka thlan Bible châng chu mite kan chhiarpui huna an lo dawnsawn dân tûr kan hre lo. Entîr nân, Australia ramah Thuhretu mipa pahnihte chuan nu pakhat awmna in chu an va kik a. Pakhat zâwk chuan: “Pathian hming i hria em?” tiin a zâwt a, tichuan Bible châng pakhat—Sâm 83:18 chu a chhiar bawk a. Chu nu chuan: “Mak ka ti lutuk a! Min kalsan hnu chuan Bible lehlin dang zâwngin mêl 35 (km 56) laia hla lehkhabu zawrhnaah motorin ka inkhalh liam a, chu hming chu dictionary-ah ka zawng ta a ni. Pathian hming Jehova a ni tih ka hriat chian hnu chuan, ka hriat loh tûr âwm thil dangte pawh ka ngaihtuah zawm ta a ni,” tiin a sawi. Chu mi hnu lawk chuan, a pasal tûr nên Bible an zir ṭan a, a hnuah chuan baptisma an chang ta a ni.

²² Pathian Thu chuan a chhiartute nun a thlâk danglam a, hmangaih taka Jehova thutiamte rinna a neihtîr a ni. (1 Thessalonika 2:13 chhiar rawh.) Bible thuchah chuan mite thinlung thleng tûra theihtâwp chhuaha thu kan sawi ai pawhin thil a tithei zâwk a. Chuvângin, hun remchâng awm apiangah Pathian Thu chu kan hmang tûr a ni. A nung si a! (w14-E 08/15)