MIHRING chanchin azawnga hun khirh berah kan awm a. (2 Tim. 3:1-5) Nî tin hian Jehova kan hmangaihna leh a tehna felte mila nun kan tumna chu fiahin a awm a ni. Isua chuan he buaina hun hi a lo hmuh lâwk avângin, a hnungzuitute chu a tâwp thlenga chhel taka tuar thei tûra an mamawh fuihna an dawng dâwn tih a lo tiam a. (Mt. 24:3, 13; 28:20) Anmahni tichak tûrin thlarau lam chaw “a hun apianga” semsaktu tûr bâwih rinawm chu a ruat a ni.—Mt. 24:45, 46.

Kum 1919-a bâwih rinawm ruat a nih aṭang khân, ṭawng tina mi maktaduai têl “a chhûngte” chu Pathian inawpna pâwla lâk khâwm an niin, thlarau lama châwm an ni bawk. (Mt. 24:14; Thup. 22:17) Mahse, ṭawng tina thu leh hla chhuah hmuh theih zât chu a inang lo va, kan thu leh hla chhuah internet aṭanga hmuh theihte pawh mi tinin an dawng thei lo bawk. Entîr nân, jw.org chauhva tihchhuah video-te leh thuziakte chu mi tam takin an nei lo va. Chu chu mi ṭhenkhatin thlarau lama chak reng tûra an mamawh chaw an dawng lo tihna a ni em? Thutlûkna dik siam thei tûrin, zawhna pawimawh palite chhânna hi lo ngaihtuah rawh.

Setana’n Isua chu lung chhanga chantîr tûra a thlêm khân, Isua chuan: “Mihring hi chhang chauhvin an nung lo vang a, Pathian kaa thu tin chhuakin an nung zâwk ang,” tiin a chhâng a ni. (Mt. 4:3, 4) Jehova thute chu Bible-ah chhinchhiah a ni a. (2 Pet. 1:20, 21) Chuvângin, Bible chu kan thlarau lam chawa thil pawimawh ber a ni.—2 Tim. 3:16, 17.

Jehova inawpna pâwl chuan New World Translation of the Holy Scriptures chu a bu pum emaw, a ṭhen lai emaw ṭawng 120-in a tichhuak a, kum tinin ṭawng dang pawha tihchhuah belh zêl a ni bawk. Chu bâkah, Bible ṭawng lehlin dangte chu a bu pumin emaw, a ṭhen lai emaw ṭawng sâng têlin copy tlûklehdingâwn tam taka tihchhuah a ni. Chu hlawhtlinna mak tak mai chu Jehova duhzâwng nên a inmil a, ani chuan “mi zawng zawng chhandama awmah leh thutak hriaah a duh a ni.” (1 Tim. 2:3, 4) Tin, ‘thil siam [Jehova] mithmuha lang lo rêng rêng a awm loh’ avângin, ani chuan “mahni thlarau lam mamawh hriate” chu a inawpna pâwl lamah a hîp a, an tân thlarau lam chaw a pe a ni.—Heb. 4:13; Mt. 5:3, 6 NW; Joh. 6:44; 10:14.

Mi chuan thlarau lama a chak theih nân, Bible chhiar aia tam a tih a ngai a. A thil chhiar chu a hre thiamin, a thil zirte chu a nunpui tûr a ni. (Jak. 1:22-25) Kum zabi khatnaa Ethiopia mi tilreh chuan chu mi dikzia chu a hria a ni. Chanchin ṭha hriltu Philipa’n “I chhiar kha a awmzia i hria em?” tia a zawh lai chuan Pathian Thu chu a lo en mêk a. “Tuma mi hrilhfiah lovin engtin nge ka hriat theih ang?” tiin a chhâng a ni. (Tirh. 8:26-31) Philipa chuan chu mi tilreh chu Pathian Thu hriatna dik nei tûra ṭanpuiin a chhâng lêt a. A thil zir chuan a rilru a khawih êm avângin, baptisma a chang ta a ni. (Tirh. 8:32-38) Chutiang bawkin, Bible ṭanchhan kan thu leh hla chhuahte chuan thutak hriatna dik nei tûrin min ṭanpui a. Kan rilru a khawihin, kan thil zirte nunpui tûrin min chêttîr a ni.—Kol. 1:9-12.

Jehova chhiahhlawhte chu thu leh hla chhuahte hmangin thlarau lamah hnianghnâr taka châwm an ni a. (Is. 65:13) Entîr nân, ṭawng 210-a hmuh theih Vênnainsâng hian Bible hrilh lâwknate chu a hrilhfiah a, thlarau lam thutak kan hriat thiamna a tihpun bâkah, Bible thu bulte mila nung tûrin min chêttîr bawk a ni. Ṭawng 100 vêla lehlin Awake! magazine hian Jehova kut chhuak thilsiamte chanchin kan hriatna a tizau va, Bible thurâwn ṭangkai takte nunpui dân min hrilh bawk a ni. (Thuf. 3:21-23; Rom 1:20) Bâwih rinawm pâwl chuan ṭawng 680 aia tamin Bible ṭanchhan thu leh hlate a tichhuak bawk! Nî tin Bible chhiar nân hun i insiam ziah em? Kum tinin in ṭawnga hmuh theih magazine tharte leh thu leh hla chhuah tharte chu i chhiar ziah em?

Jehova inawpna pâwl chuan thu leh hlate a tihchhuah bâkah, kan inkhâwmte, inkhâwmpuitea hman tûr Bible ṭanchhan outline-te pawh a buatsaih bawk a. Chutiang inkhâwma thusawite, lemchante, entîrnate, leh biangbiaknate chu a hmuhnawmin, ngaihthlâk nuam i ti em? Jehova chuan thlarau lam ruai min buatsaihsak tak zet a ni.—Is. 25:6.

Ni lo. Jehova chhiahhlawh ṭhenkhat chuan mi dangte aiin thlarau lam chaw dawn tam zâwk châng an neih avângin mak kan ti tûr a ni lo. Engvângin nge? Tirhkohte kha han ngaihtuah teh. Anni chuan kum zabi khatnaa zirtîr dang tam takte aiin kaihhruaina an dawng tam zâwk a. (Mk. 4:10; 9:35-37) Chuti chung pawhin, zirtîr dangte chuan thlarau lam chaw an dawng ṭha tâwk lo tihna a ni lova, an mamawh ang chu an dawng tho a ni.—Eph. 4:20-24; 1 Pet. 1:8.

Isua leia a awm laia a thusawi leh a thiltih tam tak Chanchin Ṭha ziaka telh kim a ni lo chu chhinchhiah tlâk tak a ni a. Tirhkoh Johana chuan: “Hêng lo hi Isua thiltih a dang tam tak a la awm, chûng chu ziak fai vek ni dâwn sela, lehkhabu ziak tûr zawng zawng chu khawvêlah pawh hian lengin ka ring lo,” tiin a ziak a ni. (Joh. 21:25) Kum zabi khatnaa Isua hnungzuitute khân keini aiin, amah mi ṭha famkim chanchin chu hre tam zâwk mah se, kan tlacham chuang lo. Jehova chuan Isua hniak hnung zuitu kan nih theihna tûrin a chanchin tâwk fang chu kan hria tih a tichiang a ni.—1 Pet. 2:21.

Kum zabi khatnaa kohhrante hnêna tirhkohte ziah lehkhathawnte pawh kha han ngaihtuah teh. Paula ziah lehkha thawn pakhat tê pawh Bible-a vawn ṭhat a ni lo. (Kol. 4:16) Chu lehkhathawn chu kan neih loh avângin thlarau lam chaw kan dawng tâwk lo tihna a ni em? Ni lo. Jehova chuan kan mamawh a hria a, thlarau lama chak reng tûra kan mamawh tâwk chu min pe a ni.—Mt. 6:8.

Tûn laiah, Jehova chhiahhlawh ṭhenkhat chuan mi dangte aiin thlarau lam chaw chu an hmu tam zâwk a. In ṭawngin thu leh hla chhuah tlêmtê chauh hmuh theih a ni em? Chutiang a nih chuan, Jehova’n a ngaihsak che tih hria ang che. Thu leh hla chhuah i neih ang angte chu zir la; a theih chuan, i ṭawng hriat thiama neih inkhâwmahte chuan tel la. Jehova chuan thlarau lamah a tichak dâwn che tih ring tlat ang che.—Sâm 1:2; Heb. 10:24, 25.

Kan Web site-ah chuan kan magazine-te leh Bible zirna thu leh hla chhuah dangte chu tihchhuah a ni a. Nupate, tleirâwlte, leh naupangte ṭanpuitu thu leh hlate pawh tihchhuah a ni bawk. Chhûngkuate chuan Chhûngkuaa Pathian Biakna an neihah chûng thute sawiho ṭhin chu an ṭangkaipui a ni. Kan Web site-ah chuan special program chi hrang hrang, Gilead zir chhuahnate leh kum tin inkhâwm (annual meeting) report-te tihchhuah a nih bâkah, Jehova mite nghawngtu leilung chhiatna leh dân lama hmasâwnna awmte pawh khawvêl puma kan unaute hnêna hrilh hriat a ni. (1 Pet. 5:8, 9) Chu Web site-te zirtîr nâna hmanraw thiltithei tak a ni bawk a, kan rawngbâwlna khuahkhirh emaw, khap emaw a nihna ramahte pawh chanchin ṭha chu hmuh theihin a awm phah a ni.

Mahse, kan Web site chu i tlawh emaw, tlawh thei lo emaw pawh ni se, thlarau lamah chak takin i awm reng thei a. Bâwih pâwl chuan thlarau lama a chhûngte ṭha taka a châwm ṭheuh theih nân thu leh hla mamawh tâwk chhu chhuak tûrin a thawk rim hle a ni. Chuvângin, jw.org tlawh theih nân electronic thil engemaw chu lei ngei ṭûl angah ngai suh. Mi ṭhenkhat chuan mi mala ruahmanna siamin kan Web site-a thu leh hla chhuah ṭhenkhatte chhu chhuakin Internet nei lote hnênah an pe thei a; mahse, chu mi ti tûrin kohhrante chu phût an ni lo.

Kan thlarau lam mamawhte ngaihsak tûra a thutiam a hlen avângin Isua chungah kan lâwm hle a. Hêng ni hnuhnûng hun harsa tak tâwpna kan hnaih hle lai hian, Pathian Jehova’n thlarau lam chaw ‘a hun apiangah’ a pe chhun zawm zêl dâwn tih kan ring tlat thei a ni. (w14-E 08/15)