MI THENKHATE’N AN RINHLELH CHHAN: Pathian ringtu mi tam takte chuan amah hlat hle niin an inhria a. Chawlhkâr tina inkhâwm ziah Ireland aṭanga lo kal Christina-i chuan: “Pathian chu thil engkim siamtu angin ka thlîr a. Mahse, amah chu ka hre lo va, hnaih niin vawikhat tê pawh ka inhre ngai lo,” tiin a sawi a ni.

BIBLE ZIRTIRNA CHU: A ngaihna hre lova kan awm hunah Jehova chuan min ṭanpui a tumna a tâwpsan ngai lo. Isua chuan Pathian min ngaihsak dân chu heti hian a târ lang a ni: “Mi tupawhin berâm za nei sela, an zînga pakhat vâk bo sela, sawmkua leh pakuate chu hnutchhiaha, tlânga han kalin, a bo chu a zawng lo vang em ni?” tiin. Zir tûr eng nge awm? “Chutiang bawkin hêng mi tête zînga pakhat boral pawh hi in Pa vâna mi duhzâwng a ni lo ve.”—Matthaia 18:12-14.

“Hêng mi tête zînga pakhat” tupawh hi Pathian tân a hlu a ni. Engtin nge Pathian chuan ‘a bo chu a zawn’? Atîra kan lâk chhâwn Bible chângin a sawi dânin, Jehova chuan mite chu a lamah a hîp a ni.

Pathianin mi rilru ṭha pute a lama hîp tûra hma a lâk dân hi ngaihtuah teh. C.E. kum zabi khatnaah khân, Pathian chuan tawlailîra chuang Ethiopia mi lian pakhat zawng chhuak tûrin Kristian tirhkoh Philipa a tîr a, chu mi lianin a chhiar lai mêk Bible hrilh lâwkna awmzia chu a sawipui a ni. (Tirhkohte 8:26-39) A hnuah, Pathianin tirhkoh Petera chu Rom sipai hotu Kornelia ṭawngṭai a, Pathian biak tuma bei fan fantu ina tlawh tûrin a kawhhmuh a. (Tirhkohte 10:1-48) Pathian chuan tirhkoh Paula leh a ṭhiante chu Philippi khaw pâwna luia kal tûrin a kawhhmuh bawk. Chutah chuan “Pathian betu” Ludi chu an hmu a, “Lalpa chuan a thinlung a tivâr ta a.”—Tirhkohte 16:9-15.

Chûng aṭang chuan Jehova’n a zawngtute chu amah hriat theihna hun remchâng a hawnsak tih a chiang a. Tûn laiah tute’n nge mite inah leh vântlâng hmuna Pathian chungchânga Bible thuchah puang chhuak? Mi tam tak chuan, “Jehova Thuhretute” tiin an chhâng ngei ang. Heti hian inzâwt rawh, ‘Pathian chuan min hnaih tûrin anni chu a hmang a ni thei ang em?’ tiin. Pathianin a lama a hîpna che chhân lêt nân a ṭanpuina dîla ṭawngṭai tûrin kan fuih che a ni. * (w14-E 08/01)