I Awmna Apiangah Jehova Aw Ngaithla Rawh
“In bengin in hnung lama thu, ‘Hei hi kawng a nih hi, tah hian kal rawh u,’ tiin a hre zêl ang.”—IS. 30:21.
1, 2. Engtin nge Jehova’n a chhiahhlawhte a biak?
MIHRINGTE chanchin tluan chhuakah hian Jehova’n a mite chu kawng hrang hrangin a kaihruai a. Ṭhenkhatte chu vântirhkoh te, inlârna te, a nih loh leh mumang hmangtea biain, an hma lam huna thilthleng tûrte a hriattîr ṭhîn a. Tih tûr engemaw bîk tak a pe bawk ṭhîn. (Num. 7:89; Ezek. 1:1; Dan. 2:19) Mi dangte chuan Jehova’n lei lama a inawpna pâwla a aiawhtu mihring a dahte aṭangin kaihhruaina an dawng bawk. Eng ang pawhin mite’n A thu chu dawng mah se, a kaihhruaina zâwmtute chu malsâwm an ni ṭhîn.
2 Jehova chuan tûn laiah hian a mite chu a Bible, a thlarau thianghlim, leh kohhran hmangin a kaihruai a. (Tirh. 9:31; 15:28; 2 Tim. 3:16, 17) Kaihhruaina kan dawn hi a chian êm avângin ‘kan bengin kan hnung lama thu’: “Hei hi kawng a nih hi, tah hian kal rawh u,” tih a hre zêl ang mai a ni. (Is. 30:21) Isua pawhin ‘bâwih rinawm leh fing tak’ hmânga kohhran a kaihhruai avângin Jehova aw chu kan hnênah min hrilh chhâwng ang a ni a. (Mt. 24:45) Kan chatuan nunna chu kan thuawihnaah a innghah avângin he kaihhruaina leh kawhhmuhna hi kan ngai pawimawh hle a ni.—Heb. 5:9.
3. Engin nge Jehova kaihhruaina kan chhân lêt dân tibuai thei? (A thupui chunga milem en rawh.)
3 Diabol Setana chuan Jehova hnên aṭanga kan dawn nun chhanhimtu kaihhruaina lak ata min lâk pên a tum a. Chu bâkah, kan Jer. 17:9) Chuvângin, Pathian aw kan ngaihthlâk tiharsa thei thilte kan hneh theih dân ngaihtuah ho ila. Kan dinhmun chu engpawh ni se, Jehova nêna inbiak pawhna ṭha takin amah nêna kan inlaichînna a vênhim theih dân i sawi ho bawk ang u.
‘thinlung bum hman’ pawh hian Jehova kawhhmuhna kan chhân lêt ṭhat zâwng chu a tibuai thei bawk. (SETANA NGAMTHLEMNATE CHU HNEHIN
4. Engtin nge Setana chuan mite ngaih dân thunun a tum?
4 Setana chuan thu dik lo leh bumna thute thehdarha, mite ngaihtuahna thunun a tum a ni. (1 Johana 5:19 chhiar rawh.) Lehkhabu chhuahte bâkah, khawvêl pum hi—hmun kilkhâwr berte pawh tiamin—radio, TV, leh internet-te’n a tuam chhuak vek tawh a. Hêngte hian thil hriat châkawm tak takte ti chhuak mah se, Jehova tehnate nêna inmil lo nungchang leh tehnate an theh lâr ṭhîn. (Jer. 2:13) Entîr nân, chanchin thar leh ennawm tih chhuahna hmunpuite chuan neih inang inneihnate chu pawm theih angin an sawi a, mi tam takte chuan mawngkawhurna chungchâng Bible-in a sawi dân chu a lutuk niin an ngai bawk a ni.—1 Kor. 6:9, 10.
5. Engtin nge Setana thu theh lârte thununna chu kan pumpelh theih ang?
5 Engtin nge Pathian felna hmangaihtute chuan tûn laia Setana thu theh lârte thununna chu an pumpelh theih ang? Engtin nge a ṭha leh ṭha lo chu an thliar hran theih ang? “[Pathian] thu ang zêla a awm dân vêng ṭhain.” (Sâm 119:9) Pathian ziak Thuahte chuan thu dik leh bumna thu theh lârte thliar hrang thei tûr kaihhruaina pawimawhte a awm a. (Thuf. 23:23) Bible châng la chhuakin, Isua chuan ‘mihring hi Pathian kaa thu tin chhuakin an nung ang,’ tih a sawi a ni. (Mt. 4:4) Bible thu bulte nunpui dân kan zir a ngai a. Entîr nân, Jehova dânin inngaih a khap thu Mosia’n a ziah hma daih aṭang khân tlangvâl Josefa chuan chutiang tih chu Pathian laka sual a ni tih a hrethiam a ni. Potiphara nupuiin thil dik lo tihpui a tum khân Jehova thu âwih loh chu a ngaihtuah ngai lo. (Genesis 39:7-9 chhiar rawh.) Potiphara nupui chuan rei tak nawr lui mah se, Josefa chuan Pathian aw a ngaithla zâwk a. A dik leh dik lo thliar hrang tûr chuan Jehova aw ngaihthlâk a, setana thu theh lârte ngaihthlâk loh a pawimawh a ni.
6, 7. Setana thurâwn suaksual tak pumpelh tûrin eng nge kan tih ngai?
6 Khawvêl hi sakhaw zirtîrna leh rin dân inkalh tak takte’n a chiah hneh êm avângin mi tam takte chuan sakhaw dik zawn chu thil sâwt lo angin an ngai a ni. Mahse, Jehova chuan a kaihhruaina chu a ṭangkaipui duhte tân chuan duh ang tâwka hmuh theihin a dah a. Kan ngaihthlâk tûr zâwk kan thlan a ngai a ni. Aw pahnih ngaihthlâk kawp reng chu a theih loh avângin, Isua aw chu ‘kan hriat’ a, kan ngaihthlâk a ngai bawk. Jehova’n A berâmte châwm tûra a ruat a ni si a.—Johana 10:3-5 chhiar rawh.
7 Isua chuan: “In ngaihthlâk chu engnge a nih fîmkhur rawh u,” tiin a sawi. (Mk. 4:24) Jehova zilhnate chu a fiahin, a dik a, mahse lo dawng tûra kan thinlung buatsaihin, fîmkhur taka kan ngaihthlâk a ngai a. Kan fîmkhur loh chuan hmangaih taka Pathian zilhna aiin Setana thurâwn suaksual tak chu kan ngaithla zâwk thei a ni. Khawvêl rimawite, video-te, TV-a thil chhuahte, lehkhabute, ṭhiante, zirtîrtute, a nih loh leh mi thiam anga sawite chu inthununtîr ngai suh.—Kol. 2:8.
8. (a) Engtin nge kan thinlung chuan setana ngamthlêmnaa tlûk luh a tih awlsam? (b) Kan chunga thil hlauhawm thleng thei kan ngaihthah chuan eng thil nge thleng thei?
8 Setana chuan thil sual tih duhna kan nei tih a hria a, thil sualte min tihtîr a tum a ni. Setana’n chutiang zâwnga min thlêm a tum hunah chuan, kan rinawmna vawn chu thil harsa tak a ni thei. (Joh. 8:44-47) Engtin nge chu chona chu hlawhtling taka kan hneh theih ang? Mi pakhat rei lote atâna nawm chen a duh vânga a tih loh tûr thil ti ta mai chu han ngaihtuah teh. (Rom 7:15) Chu dinhmun lungchhiatthlâk tak chu engin nge thlentîr? Mi chuan Jehova aw a hriat theihna chu zâwi zâwiin a hloh a nih hmêl hle. A thinlunga thilthleng mêk chu a hmu thiam lo emaw, a ngaihthah lui emaw a ni thei. Entîr nân, a ṭawngṭai tawh lo emaw, rawngbâwlnaah a chhuak tam tawh lo emaw, inkhâwm loh a chîng ṭan emaw pawh a ni thei bawk. A tâwpah phei chuan thil ṭha lo tih a hriat reng chu a ti ta hial a ni. Thil hlauhawm thleng thei chu rang taka kan hriat a, kan siam ṭhat vat chuan chhiatpui tûr thil sual pawi tak tih chu kan pumpelh thei a. Chu bâkah, Jehova aw kan ngaihthlâk chuan kalpêngte ngaih dân rêng rêng chu kan ngaithla lo vang.—Thuf. 11:9.
9. Engvângin nge thil sual tih duhna kan neih hriat chhuah vat chu a pawimawh?
9 Natna chu hmuh chhuah vat a nih chuan, nun a chhanhim thei a. Chutiang bawkin, thlêmnaa min hruai lût thei duhnate chu kan hriatthiam vat chuan chhiatna thleng tûr kan dang thei a ni. Chutiang thil chu kan hriat veleh—‘a duhzâwng ti atâna [Setana] thanga kan tan’ hmaa kan chêt vat chu a fin thlâk ang. (2 Tim. 2:26) Kan ngaihtuahna leh duhzâwngte chuan Jehova’n ti tûra min beiseite lakah min tawlh botîr tih kan hriat chuan eng nge kan tih ang? A zilhnate kan thinlung zawng zawnga ngaithla chungin a hnênah kan kîr leh vat tûr a ni. (Is. 44:22) Duhthlanna ṭha lo kan siam chuan ser nung min siamsakin, kan tawrh phah hrep thei tih kan hre tûr a ni. Chutianga thil sual khûnkhân tak ti lo tûra invên nâna chêt lak vat leh buma awm loh chu a va ṭha zâwk êm!
Engtin nge thlarau lama hun duan ṭha chuan Setana ngamthlêmna laka a vênhim theih che? (Phêk 24-naa milem)
CHAPONA LEH DUHAMNA HNEHIN
10, 11. (a) Engtin nge chapona a lan chhuah? (b) Kora, Dathana, leh Abirama-te kawng zawh ṭha lo aṭangin eng nge kan zir theih?
10 Kan thinlung pawh hian min bum thei tih kan hriat a ngai a ni. Thil sual tih duhna kan neih hian min va thunun thei tak êm! Entîr nân, chapona leh duhâmna hi lo ngaihtuah ta ila. Hêng miziate hian Jehova aw kan ngaihthlâkna a thunun theih dân leh chhiatna kawnga min hruai theih dân han ngaihtuah teh. Mi chapo chuan a nih bâkin a inngai thei a. A duh apiang ti tûra dikna nei ang leh tumahin tih tûr an hrilh thei lo angin a inngai thei a ni. Chuvângin, a Kristian unaute, upate, leh Pathian inawpna pâwl kawhhmuhna leh kaihhruaina hial pawh engah mah a ngai lo thei a. Chutiang mi tân chuan, Jehova aw chu a chiang lo hle thei a ni.
11 Israel mite thlalêra an kal lai khân, Kora, Dathana, leh Abirama chu Mosia leh Arona thuneihna lakah an hel a. Chapona avângin, helte chuan a hranga Jehova biak dân tûr an ruahman a ni. Engtin nge Jehova’n a chhân lêt? A tiboral a ni. (Num. 26:8-10) He thilthleng hian thil pawimawh tak min va zirtîr êm! Jehova laka helna chuan chhiatna a thlen a ni. “Chapona chu boralna hmâah a kal,” tih i hre reng ang u.—Thuf. 16:18; Is. 13:11.
12, 13. (a) Chaponain manganna a thlen theih dân târ langtu entîrna pe rawh. (b) Chapona chu thunun a nih lohva a ṭhan chak dân hrilhfiah ang che.
12 Duhâmna chungchâng pawh hi han ngaihtuah bawk teh. Mi duhâm chuan huangtau taka thil tiin, nungchang pângngai lo takin a awm ṭhîn a ni. Suria sipai hotu Naamana chuan a phâr tihrehsak a nih hnuah, zâwlnei Elisa chu thil engemaw pêk a tum a. Mahse, Elisa chhiahhlawh Gehazia chuan chûng thilpêkte chu a awt a: “[Naamana] ka va ûm ang a, eng emaw tal ka va lâksak teh ang,” tiin a ngaihtuah a. Elisa hriat lohvin, Naamana chu a ûm a, “tangkarua talent khat leh silhfen inthlâkna tûr pahnih” dîl tûrin dâwt a hrilh a ni. Gehazia’n he thil a tih avâng leh Jehova zâwlnei hnêna dâwt a hrilh avângin eng thil nge thleng? Mi duhâm tak Gehazia chuan Naamana phâr chu a kai ta reng mai le!—2 Lal. 5:20-27.
13 Chapona chu thil tê tham tak aṭangin inṭan mah se, thunun a nih loh chuan mi chu a thunun thuai ṭhîn. Bible-a Akana chanchin chuan chaponain thil a tih theihzia a târ lang a. A chapo chak dân chu chhinchhiah ang che. “Râllâk zînga mi Babulon ram puan ṭha tak leh, tangka sekel zahnih leh, rangkachak tlang sekel sawmnga bûk ka hmu a, ka awt ta êm a, ka la ta mai a ni,” tiin a sawi. Dik lo taka awhna a neih chu hnâwl aiin, bungruate chu ruin, a puan inah a thukru a. A thil sual tih hriat chhuah a han nih chuan Josua chuan Jehova’n Akana a tih mangan tûr thu a hrilh a ni. Chu mi nî ngei chuan amah leh a chhûngkua chu lunga den hlum an ni ta a. (Jos. 7:11, 21, 24, 25) Chapona chu eng lai pawha min thunun thei thil hlauhawm tak a ni. Chuvângin, ‘awhna rêng rêng lakah chuan i invêng’ ṭheuh vang u. (Lk. 12:15) Ngaihtuahna dik lo emaw, mipat hmeichhiatna lam dik lo taka ngaihtuah châng emaw kan nei thei a, kan ngaihtuahna chu thununin, awhna, a nih loh leh châkna kan neih chu thil sual tih nân kan hman loh a pawimawh a ni.—Jakoba 1:14, 15 chhiar rawh.
14. Chapona leh duhâmna kan nei tih kan hriat chuan eng nge kan tih ang?
14 Chapona leh duhâmna chuan manganna a thlen thei a. Kawng dik lo zawhnain a rah chhuah ngaihtuahna chuan Jehova aw kan ngaihthlâkna tibuai lo tûrinDeut. 32:29) Bible-ah hian Pathian dik chuan kawng dik min hrilh bâkah chu kawng kan zawh a hlâwkna leh kawng dik lo zawhnain a rah chhuah chu min hrilhfiah bawk a ni. Chapona emaw, duhâmna emaw avânga thil engemaw tih kan duh chuan, a rah chhuah tûr kan ngaihtuah chu a va finthlâk dâwn êm! Kan thil tihsualin keimahni, kan hmangaihte, leh a bîk takin Jehova nêna kan inlaichînna a nghawng dân tûr chu kan ngaihtuah tûr a ni.
min ṭanpui ang. (JEHOVA NENA INBIAK PAWHNA ṬHA NEI RAWH
15. Isua entawn tûr siam aṭangin inbiak pawhna chungchângah eng nge kan zir theih?
15 Jehova chuan kan tâna thil ṭha ber a duh a. (Sâm 1:1-3) Kan mamawh hunah kaihhruaina dik min pe ṭhîn. (Hebrai 4:16 chhiar rawh.) Isua chu ṭha famkim ni mah se, Jehova a be ziah a, bâng lovin a ṭawngṭai ṭhîn. Jehova chuan Isua chu ropui takin a ṭanpui a, kawng a kawhhmuh a. A rawngbâwlsak tûrin vântirhkohte a tîr a, ṭanpui tûr leh tirhkoh 12-te a thlanaa pui tûrin A thlarau thianghlim a pe bawk. Jehova aw chuan vân aṭangin Isua a thlâwp leh a pawm thu a sawi a ni. (Mt. 3:17; 17:5; Mk. 1:12, 13; Lk. 6:12, 13; Joh. 12:28) Isua angin, Pathian hnêna ṭawngṭaia kan thinlung kan leih buak a ngai a. (Sâm 62:7, 8; Heb. 5:7) Ṭawngṭaina hmangin Jehova nêna inbiak pawhna ṭha tak kan nei theiin, amah chawimawitu nun hlawhtling tak kan nei thei a ni.
16. Engtin nge Jehova aw hre thei tûrin a ṭanpuina kan dawn?
16 Jehova chuan a duh apiangte tâna dawn theih tûr fuihna a pe a, mahse zâwm tûrin tumah a tilui lo. A thlarau thianghlim chu kan dîl a ngai a, ani chuan phal takin min pe ang. (Luka 11:10-13 chhiar rawh.) ‘Eng angin nge kan hriat’ tihah erawh kan fîmkhur a ngai thung a. (Lk. 8:18) Entîr nân, saruak lem leh thuziakte emaw, film ṭha lote emaw en reng chungin Jehova hnêna mipat hmeichhiatna lama châkna dik lo kan neihte tireh tûra dîl chu a vervêk thlâk ngawt ang. Jehova thlarau thianghlim awmnaa kan awm a ngai a ni. A thlarau chu kohhran inkhâwmahte a awm tih kan hria a. Jehova chhiahhlawh tam takte chuan inkhâwmahte Jehova aw ngaithlain, manganna an pumpelh a. Chuvâng chuan an thinlunga awhna sual awm chu an hrethiamin, an kawngte an siam ṭha a ni.—Sâm 73:12-17; 143:10.
JEHOVA AW NGUN TAKIN NGAIHTHLA ZEL RAWH
17. Engvângin nge mahni inrinna neih a hlauhawm?
17 Hmân lai lal Davida kha han ngaihtuah teh. Tleirâwltê a nih laiin, Philistia mi hrawl, Goliatha chu a hneh a. Davida chu sipai, lal, vênghimtu, leh hnam tâna thutlûkna siamtu a ni ta a ni. Mahse, mahni a inring a, a thinlung chuan a bum a, Bath-sebi nên thil sual an ti a, a pasal Uria thihtîr dân a ruahman bawk. Zilhna a han dawn chuan a thiltih sual chu a pawm a, Jehova nêna an inlaichînna chu a siam ṭha leh a ni.—Sâm 51:4, 6, 10, 11.
18. Engin nge Jehova aw ngaithla zawm zêl tûrin min ṭanpui thei ang?
18 A lutuka mahni inrinna nei lo ila, 1 Korinth 10:12-a thurâwn chu i zâwm ang u. Mahni ‘pheikhai hruai’ thei kan awm loh avângin a tâwpah chuan Jehova aw emaw, a Hmêlma aw emaw chu kan ngaihthlâk a ngai dâwn a ni. (Jer. 10:23) Bâng lovin ṭawngṭaiin, thlarau thianghlim kaihhruaina zâwm chungin Jehova aw chu ngun takin i ngaithla zawm zêl ang u. (w14-E 08/15)