1. Mihringte hian eng thil nge kan mamawh a, chu chu tuin nge phuhru thei?

MIHRINGTE hian mi dangte nêna inhnaih an mamawh hle a. Mite chu “an inngainat tawn a, an inhriat chian hle chuan an inhnaih” anga sawi a ni ṭhîn. Chhûngkua leh ṭhian min hmangaihtu, min ngaihlutu, leh min hrethiamtute nêna kan inlaichînna hian min tihlim a. Mahse, inlaichînna hnai ber kan neihpui tûr chu min Siamtu Ropui hi a ni.—Thur. 12:1.

2. Eng nge Jehova’n min tiam a, mahse engvângin nge mi tam takin chu chu an rin loh?

² Jehova chuan A Thuah amah “hnaih” tûrin min fuih a, chutianga kan tih chuan ‘min hnaih’ ang tih min tiam. (Jak. 4:8) Chu chuan min va tiphûr tak êm! Mahse, mi tam tak chuan Pathian hnaih tlâk lo angin an inngai a, a nih loh leh ani chu hla lutuk angin an ngai bawk. Jehova chu hnaih theih loh a ni takzet em?

3. Jehova chungchângah eng thu dik nge kan hriat ang?

³ Jehova chuan amah hmuh tumte chu ‘a hlat loh ṭheuh’ avângin, amah hriat chu thil theih a ni. (Tirhkohte 17:26, 27; Sâm 145:18 chhiar rawh.) Kan Pathian chuan mihring ṭha famkim lote pawhin an hnaih a duh a, anni chu ṭhian ṭha tak anga pawm a duh vek a ni. (Is. 41:8; 55:6) Fakna hla phuahtu chuan Jehova chanchin chu: “Aw ṭawngṭaina ngaithlatu, i hnênah tîsa  zawng zawng chu an lo kal ang. I thlana, i kiang i pantîra chu, a eng a thâwl e,” tiin ama thiltawn ngei aṭangin a ziak thei a. (Sâm 65:2, 4) Bible-a Juda Lal Asa chanchin chuan Pathian hnaihtu mi pakhat chungchâng leh Jehova’n a lo chhân lêt dân a târ lang a ni.

4. Lal Asa chuan Juda mite tân eng entawn tûr nge a siamsak?

⁴ Lal Asa chuan biakna dik atân nasa takin ṭan a la a, ram chhûnga zung nghet tak kaih tawh biak ina nawhchizawrhna leh milem biaknate a nuai bo a ni. (1 Lal. 15:9-13) Zalên taka thusawi theihna nei chungin mite chu, “LALPA an pi leh pute Pathian zawng tûr leh a dân leh a thupêk zâwm tûrin,” a fuih bawk. Jehova chuan Asa lal tirh aṭanga a kum sâwmna thleng chuan muanna a awmtîr a. Asa chuan chu muanna chu tu thlentîr angin nge a sawi? Ani chuan: “LALPA kan Pathian hi kan zawn tâk avângin ram chu kan hnuaiah a lo awm ta a; amah chu kan zawng a, ani chuan kil tin kil tanga râlmuanga awmna min pe ta a ni,” tiin a mite chu a hrilh a ni. (2 Chro. 14:1-7) A hnua thil thleng chu ngaihtuah teh.

5. Eng dinhmun hnuaiah nge Asa chuan Pathian a rinchhan tih a târ lan a, chu chuan eng nge a thlen?

⁵ Asa dinhmunah chuan han indah chhin teh. Zera leh Ethiopia mite chu mi 1,000,000 leh tawlailir 300 nên an lo kal a. (2 Chro. 14:8-10) I lalram chhûnga chutiang sipai tam tak lo lut i hmuh chuan engtin nge i awm ang? I sipaite lah chu an vaiin 580,000 chauh an ni si a! In lêt vêl lâiin an run che u Pathianin a phal chu mak i ti ang em? He thil thleng thut hi i finna hmanga chinfel i tum ang em? Asa chêt dân chuan Jehova a hnaih tih leh a rinchhan tih a târ lang. “Aw LALPA kan Pathian, min ṭanpui rawh khai; nangmah ringin i hmingin hêng mipuiho hi kan rawn bei a ni a. Aw LALPA, kan Pathian i ni a, mihringin nang chu ngam suh se,” tiin a au chhuak a ni. Engtin nge Pathianin tihtak zeta Asa dîlna chu a chhân? ‘LALPAN . . . Ethiopia mite chu a bei [“a hneh,” NW] a.’ An hmêlma zîngah chuan tumah dam khawchhuak an awm lo!—2 Chro. 14:11-13.

6. Engtin nge Asa chu kan entawn ang?

⁶ Pathian kaihhruaina leh vênhimna ring tlat tûra Asa chêttîrtu chu eng nge? “Asa chuan . . . LALPA mithmuha thil ṭha a ti ṭhîn a,” a “thinlung chu a dam chhûng zawng LALPA lamah a ṭha famkim” tih Bible chuan a sawi. (1 Lal. 15:11, 14) Keini pawhin Pathian rawng chu thinlung zawng zawnga kan bâwl a ngai a. Tûnah leh chatuana amah nêna inlaichînna ṭha tak nei tûr chuan chutianga kan tih chu a pawimawh hle a ni. Jehova chuan amah hnaih nâna min hnaih hmasak avâng leh inlaichînna nghet tak siam a, nei chho tûra min ṭanpui avângin kan va lâwm êm! Pathianin chutianga a tih dân kawng hnih chu han ngaihtuah teh.

7. (a) Jehova chuan min hnaih tûrin eng nge a tih? (b) Pathianin min hnaih dân pawimawh ber chu eng nge?

⁷ Jehova chuan kan chênna leilung mawi tak hi siamin mihring chhûngkua a hmangaihzia a târ lang a. Min chawm nâna kan tisa lam mamawhte min pein min hmangaihna chu a la lantîr zawm zêl a ni. (Tirh. 17:28; Thup. 4:11) Chu aia pawimawh zâwk, kan thlarau lam mamawh pawh min pe bawk. (Lk. 12:42) A hnêna kan ṭawngṭai hian amah ngeiin min ngaihthlâksak tih min tiam. (1 Joh. 5:14) Pathianin min hnaih  dân leh amah kan hnaih dân pawimawh ber erawh chu tlanna hmanga min hmangaihna a lantîr hi a ni a. (1 Johana 4:9, 10, 19 chhiar rawh.) Jehova chuan a “Fapa mal neih chhun” chu sual leh thihna ata chhanchhuah kan nih theih nân leiah a rawn tîr a ni.—Joh. 3:16.

8, 9. Jehova thiltumah Isua’n eng hmun pawimawh tak nge a luah?

⁸ Krista hun hma lama mite pawhin tlanna an hlâwkpui chu Jehova’n a duh a. Mihringte Chhandamtu tûr chungchâng a hrilh lâwk aṭang daih tawh khân, a thiltumte a thleng ngei dâwn tih a hriat avângin a thlîrna aṭang chuan tlanna chu pêk tawh ang mai a ni. (Gen. 3:15) Kum zabi liam taahte khân, tirhkoh Paula chuan “Krista Isuaa tlanna,” avânga Pathian chunga a lâwmna chu a sawi chhuak a. “Pathianin ama felzia entîr nân Krista Isua chu, a thisena, rinna avânga, sual thuphachawinaah a ruat a,” tiin a sawi belh a ni. (Rom 3:21-26) Pathian kan hnaihnaa Isua chanvo chelh chu a va pawimawh êm!

⁹ Isua avâng chauhvin mi inngaitlâwmte chuan Jehova hriain, amah nêna inlaichînna hnai tak an nei thei a. Engtin nge he thu dikzia hi Bible-in a târ lan? Paula chuan heti hian a ziak a ni: “Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân,” tiin. (Rom 5:6-8) Dawng tlâk kan nih vâng ni lovin, hmangaih kan nih avângin Isua tlanna inthâwina chu pêk kan ni. Isua chuan: “Pa mi tîrtuin a hîp loh chuan tumah ka hnênah an lo kal thei lo vang,” tiin a sawi a. Hun dangah pawh: “Keimaha kal lo chu tumah Pa hnênah an thleng ngai lo,” tiin a sawi bawk. (Joh. 6:44; 14:6) Engtin nge Jehova’n mite chu Isua hmangin a lamah a hîp a, chatuana nunna thlîr chunga A hmangaihnaa awm reng tûra a ṭanpui? Thlarau thianghlim hmangin a ni. (Juda 20, 21 chhiar rawh.) Jehova’n min hnaih dân kawng dang chu i lo ngaihtuah ang u.

10. Engtin nge Bible-in Pathian hnaih tûra min ṭanpui?

¹⁰ He thuziak tâwpna thleng hian Bible bu hrang 14 chhûnga thu ziakte chu lachhuakin, kan târ lang tawh a. Bible tel lo chuan min Siamtu kan hnaih thei tih engtin nge kan hriat ang? A tel lo chuan engtin nge tlanna leh Jehova’n Isua hmanga min hnaih dân chu kan hriat theih ang? Jehova chuan a thlarauvin Bible ziah dân tûr a hrilh a, chu chuan a mize ngainatawm tak leh a thiltum ropui tak chu a târ lang a ni. Entîr nân, Exodus 34:6, 7-ah Jehova chuan Mosia hnênah “Pathian lainatnaa khat, mi khawngaih thei tak, thin nel tak, ngilneihna leh thu tak ngah, mi sâng tam tak chunga khawngaihna lantîr ṭhîn, khawlohna te, bawhchhiatna te, suahsualna te ngaidam ṭhîn” a nih thu a sawi a. Chutiang mi hnaih duh lo chu tu nge awm ang? Bible aṭanga a chungchâng kan zir tam poh leh kan tân a lo tak zual sauh ang a, kan hnaih lehzual dâwn tih Jehova’n a hria a ni.

11. Engvângin nge Jehova chanchin zir a pawimawh? (A thupui chunga milem en rawh.)

¹¹ Jehova nêna inlaichînna ṭha tak kan neih theih dân chungchângah, Draw Close to Jehovah tih lehkhabu ṭantir lam chuan: “Ṭhian kan siam rêng rêngin, chu inṭhianna chu inhriat chianna, leh a mize bîkte ngaihsânna leh ngaihhlutnaah a innghat ṭhîn. Pathian mizia leh a thil tih dân kawng Bible-a târ lante chu kan tân zir tûr pawimawh tak a ni,” tiin a sawi. Chuvângin, Jehova’n mihringte  hriatthiam theiha a Thu a ziahtîr avângin kan va lâwm êm!

12. Engvângin nge Jehova chuan Bible ziak tûra mihringte a hman?

¹² Jehova chuan Bible chu a vântirhkohte pawh a ziahtîr thei a. Anni chuan min ngaihsakin, kan thiltihte pawh an ngaihsak hle a ni. (1 Pet. 1:12) Vântirhkohte chuan Pathianin mihringte hnêna a thuchahte chu an ziak thei dâwn tih a chiang hle. Mahse, mihringte thil thlîr dân angin an thlîr ang em? Kan thil mamawh, kan chak lohna, leh kan châk zâwngte chu an sawi thei ang em? Thei lo, hetiang lama an tih theih lohte chu Jehova’n a hria a. Mihringte Bible ziahtîrin, kan tâna hriatthiam awlsam tûrin a siam a ni. Bible ziaktute leh a chhûnga târ lan mi dangte ngaihtuahna leh rilru chu kan hrethiam thei a. An lunghnualna, rinhlelhna, hlauhna, leh ṭhat famkim lohna kan tawrhpui theih bâkah an hlimna leh hlawhtlinnate chu kan hlimpui thei a ni. Zâwlnei Elija angin Bible ziaktu zawng zawngte chu “keimahni nungchang ang pu,” an ni.—Jak. 5:17.

13. Engtin nge Jona ṭawngṭaina chuan i thinlung a khawih?

¹³ Entîr nân, Pathianin tih tûr a hrilh Jona’n a tlân bosan laia chu zâwlnei rilru pût hmang tûr dik tak vântirhkohte’n an sawi chhuahsak theih leh theih loh tûr chu han ngaihtuah teh. Jehova’n Jona ngei a chanchin, tuipui mawng aṭanga Pathian hnêna tihtak zeta a dilna pawh tiama, a ziahtîr chu a va ṭha zâwk êm! Jona chuan: “Ka nunna ka kawchhûnga a chauh lai chuan, LALPA chu ka hre reng a,” tiin a sawi a ni.—Jon. 1:3, 10; 2:1-9.

14. Engvângin nge Isaia’n ama chungchâng a ziah chu kan sawi theih?

¹⁴ Jehova’n Isaia ama chungchâng ngei a ziahtîr dân pawh hi han ngaihtuah teh. Pathian ropuina inlârnaa a hmuh hnuah,  zâwlnei Isaia chuan a sualna chungchângah heti hian a sawi: “Hmui bawlhhlawh pu mi ka nih a, hmui bawlhhlawh pu mite zînga awm ka nih avângin ka chung a va pik êm! ka boral ta a nih hi; ka mitin Lal, sipaihote LALPA chu a hmu ta si a,” tiin. (Is. 6:5) Eng ang vântirhkohvin nge chutianga sawi thei ang? Isaia chuan chutiang chuan a sawi thei a, a rilru tûr pawh kan sawi thei a ni.

15, 16. (a) Engvângin nge kan mihring puite rilru chu kan hriatthiam theih? Entîrnate pe rawh. (b) Engin nge Jehova hnaih zual tûra min ṭanpui ang?

¹⁵ Vântirhkohte chu Jakoba anga “tlâk lo” nia inhriatna nei leh Petera anga “mi sual” nia inhriatna nei anga sawi theih an ni em? (Gen. 32:10; Lk. 5:8) Anni chu Isua zirtîrte angin “hlau” takin an awm ang em? A nih loh leh, vântirhkoh sualna nei lote chuan Paula leh mi dangte angin dodâlna an tawn hunah ‘huaisenna neih’ an tum ang em? (Joh. 6:19; 1 Thes. 2:2) Vântirhkohte chu kawng engkima ṭha famkim an nih avâng leh thiltithei tak an nih avângin chutianga an hlauh leh an beih chu a ngai ve lo. Mihring ṭha famkim lo ngeiin an rilru veizâwngte an sawi chhuah hian keini pawh mihring ve mai kan nih avângin kan lo hrethiam thuai ṭhîn a ni. Pathian Thu kan chhiar hian, tihtak zetin ‘lâwmte chu kan lâwmpuiin, ṭapte chu kan ṭahpui,’ thei bawk a ni.—Rom 12:15.

¹⁶ Hun kal tawha Jehova’n a chhiahhlawh rinawmte a dawr dân Bible-in a sawite kan ngaihtuah ngun chuan, dawhthei leh hmangaih taka mihring ṭha famkim lote min hnaihtu kan Pathian chanchin ropui tak chhiarsên lohte chu kan zir ang. Chutiang chuan, Jehova chu kan lo hrechiangin, nasa takin kan lo hmangaih ang a. Kan hnaih zual sawt thei bawk ang.—Thufingte 3:32 chhiar rawh.

17. (a) Azaria’n Asa hnênah eng fuihna ṭha tak nge a pêk? (b) Engtin nge Asa chuan Azaria fuihna chu a ngaih thah a, chu chuan eng nge a rah chhuah?

¹⁷ Lal Asa’n Ethiopia sipaite a hneh hnuah amah leh a mite tâna thu fing ṭhenkhat zâwlnei Azaria chuan a hrilh a. “A lama in ṭan chhûng zawng LALPA chu in lamah a ṭang a, amah in zawn chuan in hmu ang a, amah in hawisan chuan ani pawhin a hawisan ang che u,” tiin a sawi a ni. (2 Chro. 15:1, 2) Mahse, Asa chuan a hun tâwp lamah chuan chu zilhna ṭha tak chu a zâwm lo va. Israel lalram hmar lama hmêlmate’n an han vau chuan ṭanpui tûrin Suria chu a sâwm ta a ni. Ṭanpui tûra Jehova au leh tawh lovin, milem betute nêna inzawm chu a thlang ta zâwk a. Inâwm takin Asa chu: “Atthlâk takin thil i ti a nih hi; tûn achinah chuan do i nei reng tawh ang,” tia hrilh a ni a. Chu mi hnu chuan a lal hun chhûng kumte chu indonain a khat zo ta a ni. (2 Chro. 16:1-9) Kan tân eng nge zir tûr awm?

18, 19. (a) A hma angin Jehova chu kan hnaih tawh lo a nih chuan eng nge kan tih ang? (b)Engtin nge Jehova chu kan hnaih zual zêl theih ang?

¹⁸ Jehova lak aṭangin kan kal bo ngai tûr a ni lo. Amah nêna kan inkâr a zau telh telh chuan: “I Pathian hnên lam hawi la; khawngaihna leh rorêlna hmang la, i Pathianah chuan innghat fo rawh,” tih Hosea 12:6 nêna inmilin thil kan ti tûr a ni. Chuti a nih chuan, tlanna chungchâng chu ngaihlu takin ngaihtuah ila, a Thu, Bible chu taima taka zirin Jehova chu i hnaih zual zêl ang u.—Deuteronomy 13:4 chhiar rawh.

¹⁹ Fakna hla phuahtu chuan: “Pathian hnaih hi a ṭha a ni,” tiin a ziak a. (Sâm 73:28) Kan vai hian Jehova chungchângah thil thar zir belh zêlin, amah hmangaih chhan tûr tam tak kan neih chu i ngaihlu zual sauh vang u. Jehova chuan tûnah leh chatuan thlengin min hnaih zêl rawh se! (w14-E 08/15)